JEMBIEE 2:9 - WƖA TENIŊ

⁹ Zaayɔŋ boi-baalaa tele nɛ hagɩla tɔ, ba daadoloo bori a chei. Ba kɛŋ ʋ kuoro arɩ ʋ sɩpaalaaraa mʋ yoŋ-baga nɛ, ba guoli tinteyee nɩaa tʋɔŋ. Ba bɩra bɩ wɩalɩŋ ba sɩ ŋmʋnsa bil dɩ ba tuto ka dagɛ. Wɩa wʋlaabʋlla-la sɩ hɛ ʋ lɛ bɩra bɩ wɩaa ka na arɩ duosoo tʋɔŋ La TƖƖNA teeŋ.

JEMBIEE 2:9 ပူးပေါင်းရင်းမြစ်များ

2 KUOROO 25:7

Ŋɩɩ nɛ ba kpʋ Zedikaaya hambolibiisiŋ kala ʋ sɩɩŋ lɛ, aŋ kɔrɩgɔ chaarɛ ʋ tɩtɩa sɩaa aŋ hɛʋ chɔrʋmɔɔ a lɛrʋ kaa mʋ Babɩlɔŋ.

2 IZIRAL TƖŊŊAA NAABARƖŊ 15:3

Ʋ fa diene kɩŋkɛŋ nɛ Iziral tɩŋŋaa sɩ bɩ Wɩɩ-tɩtɩɩ-la to, a bɩ nʋʋ sɩ ŋaa Wɩɩsʋllɩ sɩpaalaarʋ ma kɛnɛ dɩ ʋ dagɛba Wɩa wombiee ʋ sɩ bile dɩ ba tuto.

NƐHƖMAAYA 1:3

Ŋɩɩ nɛ ba bʋla pɩmɛ, “Nɩalɩŋ sɩ bɩ sʋba yoŋ-baga lɛ mɩɩra kɔ tintee-la nɛ a chaasa hɛ wʋwalɩmaa arɩ hɩɩsɩŋ tʋɔŋ. Jebii-la sɩ golli Jerusalɛm kala nɛ ba ŋmoo lo a nyɩgɛ ʋ boi-baalaa kala.”

WƖA YƖƖLAA 74:9

La bɩra bɩ wʋmagɩl kala na, Wɩa wʋlaabʋllaa ma tuo. La kʋŋkala bɩ jɩŋ ŋɩɩ wɩɩŋ deeŋ sɩ jaŋ diene magɛ.

AZAAYA 24:12

Tabal-la pɩŋ jikpeeŋ nɛ, ba ŋmoo ʋ boi-baalaa kala nɛ bori muno muno.

JƐRƖMAAYA 14:14

Ŋɩɩ nɛ La TƖƖNA bɩra bʋla pɩmɛ, “Nɩaa deemba bɩ mɩ wʋlaabʋllaa ŋaa, baa nyɩɛ wɩaa nɛ mɩ yɩrɩŋ lɛ. Mɩ bɩ ba tɩma koo a lɩɩsɛba koo a bʋl wɩɩ pɩba. Wɩalɩŋ ba sɩ na a nagɛ duosoo tʋɔŋ a bʋla pɩma ŋaa wʋnyɩɛrɩŋ nɛ, wʋyaayaasɩ-la ba sɩ vʋga nɩna, arɩ ba tɩtɩa tʋɔbɩɩnaa wɩalɩŋ ka nyɩsɛba nɛ.

JƐRƖMAAYA 23:16

Wɩɩ-la mɩ-na ma TƖƖNA doluŋ kala Tɩɩna sɩ bʋla nɛ ŋ-la: Má sɩ́ nɩalɩŋ sɩ nyɩɛ wɩaa arɩ ba ŋaa mɩ wʋlaabʋllaa a bʋl wɩalɩŋ pɩpɩma teeŋ jegilu. Ba leŋe ma kɛŋ yɩɛlaa sɩ bɩ jaŋ kʋ ŋaa wʋtɩtɩɩ nɛ. Ba yie bʋl wɩalɩŋ ba tɩtɩa sɩ bɩɩna nɛ a pɩpɩma, mɩ-na ma TƖƖNA dee bɩ wɩalɩŋ bʋla.

JƐRƖMAAYA 39:2

Zedikaaya sɩ dii kuoruŋ ʋ jɩ-fii arɩ kʋbala tʋɔŋ chɛŋ nɛsɛ tapʋl nibi chɛɛŋ, ba ŋmoo tabal-la kɛrɛ sɛmɛ dɔŋɔ lo aŋ jʋʋ taŋ-la.

JƐRƖMAAYA 39:8

Babɩlɔŋ tɩmma-la chol nyiniŋ hɛ kuoro dɩa lɛ arɩ nɩalɩŋ dɩɩsɩŋ aŋ ŋmoo Jerusalɛm jebiee lo.

JƐRƖMAAYA 51:30

Babɩlɔŋ laalɩyuori babiibalaa leŋ yuosuŋ nɛ. Ba ka ba dɩ-duoruŋ lɛ nɛ. Ba doluŋ dɛrɛ nɛ. Ba mɩɩra nagɛ haalaa nɛ. Ba chol nyiniŋ hɛ ʋ d-jʋʋlaa kala lɛ nɛ. Ba bori ʋ boi-baalaa doloo kala nɛ.

JƐRƖMAAYA 52:14

Ŋɩɩ nɛ Nebuzaradaŋ leŋ ʋ laalɩyuoroo ŋmoo kɛrɛ-la ba fa sɩ saa golli Jerusalɛm a lo.

JEMBIEE 1:3

Ba chaasa dɔgɩsɛ Juda nɩaa nɛ ba tɩma na hɛɛŋ woruŋ, ŋɩɩ harɩŋ ba kɛmba mʋ yoŋ-baga. Ba mʋ guoli tinteyee nɩaa tʋɔŋ, ba bɩ dɩ-wiesii na. Nɩalɩŋ kala sɩ kire to ba harɩŋ kɛsɛba nɛ, ba bɩ lee-kala kɛnɛ dɩ ba to mʋ.

JEMBIEE 4:15

Nɩaa yie bʋl ba lɛ, “Má sʋrɩsa lɩɩ, ma kɛŋ disiniŋ nɛ. Má sʋrɩsa mʋ, má sʋrɩsa lɩɩ. Má sɩ́ la digu.” Dɩ ba nɛ fá mʋ guoli tinteyee nɩaa tʋɔŋ a gɔllɔɔ baarɛ, nɩalɩŋ ma yie bʋl, “Ba bɩ daha wuo hɔŋ.”

JEMBIEE 4:20

Kuoru-la La TƖƖNA sɩ lɩɩsa ŋaa la mɩɩsɩŋ nɛ, ka ba bɛrɛ kɛnʋ. La fa bɩɩna ʋ daanyʋɔsʋŋ lɛ, la jaŋ wuo hɔŋ tinteyee nɩaa tʋɔŋ.

ƐZƖKƖƐL 12:13

Mɩ jaŋ yuo mɩ jóŋ a kɛnʋ, mɩ jaŋ kɛnʋ mʋ Babɩlɔŋ, Chalɩdɩ tɩŋŋaa tinteeŋ. Ʋ bɩ jaŋ na lee-la, ama nɩmɛ nɛ ʋ jaŋ sʋʋ.

ƐZƖKƖƐL 17:20

Mɩ jaŋ hɛ bɛrɛ a kɛnʋ. Mɩ jaŋ kɛnʋ mʋ Babɩlɔŋ a dɔgɩsʋ nɩmɛ a tɩŋ ʋ sɩ bɩ wʋtɩtɩɩ kɛnɛ mɩ teeŋ.

ƐZƖKƖƐL 7:26

Wʋlɔrʋnʋŋ jaŋ jʋʋba a lɩɩ aŋ ka pɩpɩ dɔŋɔ, dɩ ba nɩnɩɩ wʋbɔŋŋɔɔ bʋa na-kala lɛ. Ba jaŋ sʋl mɩ wʋlaabʋllaa dɩ ba dagɛba wɩalɩŋ ba sɩ jaŋ ŋaa. Wɩɩsʋllɩ sɩpaalaaraa sɩɩ dagɛ nɩaa wombii-la mɩ sɩ bile dɩ ba tuto bɩ jaŋ kɛŋ wɩɩ ba sɩ jaŋ bʋla pɩ nɩalɩŋ, nɩhɩasɩŋ ma bɩ jaŋ kɛŋ wɩɩ ba sɩ jaŋ dagɛba.

HOSIA 11:6

Laalɩŋ jaŋ gɩrɛ dɩ tokobiee lɩlɩgɩsɛ ʋ tabalaa lɛ, a bori ʋ boi-baalaa daadoloo, a cheyu dɩ wʋbɔmɔ-la ʋ sɩ bɩɩna dɛrɛ.

HOSIA 3:4

Ŋɩɩ tɩtɩa nɛ Iziral tɩŋŋaa jaŋ hɛ nɩmɛ tapʋl-daŋ a bɩ jaŋ kɛŋ kuoro koo sɩpaa-laarʋ, a bɩ pʋsʋŋ ma jaŋ kpʋ ŋaa Wɩɩsʋlʋŋ koo a kpaarɛ tabɩa-la sɩ ŋaa vesiŋ, a bɩ jaŋ kɛŋ gɛrɩ-laala-daŋɩɩ-la ba sɩ kaa chɛ na wɩaa koo tɔŋ.

AMƆS 1:5

Mɩ jaŋ ŋmoo Damasɩkʋs boi-baalɩŋ lo, aŋ chei nɩalɩŋ sɩ hɛ Avɛŋ fuonaaŋ lɛ (Avɛŋ bʋbʋɔŋ nɛ wʋbɔŋŋɔɔ), a chei nɩɩ-la ma sɩɩ beŋ taŋ-la ba sɩɩ yɩrɛ Bɛf Ɛdɛŋ. (Bɛf Ɛdɛŋ bʋbʋɔŋ nɛ tʋɔtɔrʋŋ dɩa.) Ba jaŋ yuo kɛsɛ Siiria tɩŋŋaa a kaa mʋ yoŋ-baga Kɩɩ tinteeŋ.” La Tɩɩna nɛ bʋla.

MOSIS BƖRA WULLI WƖA WOMBIIŊ 28:36

La TƖƖNA jaŋ kiri ma dɩ ma kuoro kala a mʋ hɛ tintee-wogo lɛ ma dɩ ma nyɩmmaba ha sɩ bɩ jɩŋ. Nɩmɛ ma jaŋ kpaarɛ vesiŋ ba sɩ kɛŋ daasɩŋ arɩ tabɩaa a ŋaa.

MOSIS BƖRA WULLI WƖA WOMBIIŊ 28:63

La TƖƖNA tʋɔŋ sɩ tɔrɔ ʋ ŋaa ma pʋŋ a kɛŋ dʋa ŋɩɩ, ŋɩɩ tɩtɩa nɛ ʋ tʋɔŋ jaŋ tɔrɛ dɩ ʋ cheima. Ba jaŋ kirima tintee-la ma sɩɩ jʋʋ dɩ ma tɩɩ lɛ.

1 SAMƲƐL 28:6

Ʋ pɩɛsɛ La TƖƖNA dɩ ʋ na wɩɩ-la ʋ sɩ maga dɩ ʋ ŋaa. Ama La TƖƖNA bɩ duosoo lɛ koo kʋ-la ba sɩɩ yɩrɛ Urim lɛ koo Wɩa wʋlaabʋllʋ kala lɛ to a bʋl wɩɩ pʋ.