Jeems 5:9 - WƖA TENIŊ

⁹ Mɩ naambiiriŋ, má sɩ́ wɩaa gʋrʋmʋ dɔŋɔ lɛ, dɩ Wɩa sɩ́ ma sarɩya dii a joŋ cheeriŋ pɩma. Na nɩɩ-la sɩ jaŋ dii la sarɩya nɛ chɩŋ boiŋ niiŋ a ŋaa siri dɩ ʋ jʋʋ ŋɩɩ.

Jeems 5:9 ပူးပေါင်းရင်းမြစ်များ

WƖAA DƖ-SUOMUŊ 4:7

Dɩ ŋ nɛ fa ŋaa woruŋ, mɩ fa bɩŋ ka laa? Aŋ ka ŋ sɩ bɩ woruŋ ŋaa, wʋbɔmʋŋ chɩna gbɛrɩŋ nɛ a chɩchɛ dɩ ʋ kɛnɩŋ. Ʋ maga dɩ ŋ yuo diiu nɛ.”

WƖA YƖƖLAA 59:15

Ba gɔllɔ chɛ kɩaa nɛ dɩ ba dii, dɩ ba nɛ bɩ vɔgɔ ba hihiini.

ƐZƖKƖƐL 7:12

Bʋa-la yie nɛ, tapʋlɩɩ-la kɔ nɛ. Nɩalɩŋ sɩ yɔɔ kɩaa, má sɩ́ leŋe dɩ ma tʋɔŋ tɔrɛ, nɩalɩŋ ma sɩɩ yallɛ kɩaa, má ma sɩ́ leŋe dɩ ma tʋɔŋ chei, bɛɛ wɩaa Wɩa baanɩŋ sii ma kala nyuŋ nɛ.

LEVI DOHO NƖAA 19:18

Pʋpɔ ŋ sɩ́ tʋɔŋ kɛŋ arɩ ŋ dɔŋɔ tɩɩna aa chɛ dɩ ŋ ŋaa wɩaa tiŋ chɩŋŋaa, ama cho ŋ dɔŋɔ arɩ ŋ sɩ cho ŋ tɩtɩa ŋɩɩ. Mɩ nɛ ma TƖƖNA Wɩa.

Matiu 24:33

Namaga deeŋ dagɛma wʋjɩmɩŋ nɛ. Dɩ ma na wɩaa deemba kala dɩ baa ŋaa, ma jɩŋ dɩ mɩ-na Nuhuobiine Bie kɔɔnʋŋ kpaga nɛ.

Maak 13:29

Namaga deeŋ lɛ ma jaŋ gʋnnɛ wɩaa. Dɩ ma nɛ na wɩaa deemba kala dɩ baa ŋaa, ma jɩŋ dɩ mɩ-na Nuhuobiine Bie kɔɔnʋŋ kpaga nɛ.

Maak 6:19

Ʋ sɩ bʋl ŋɩɩ Hɛrɔdɩas kɛŋ ʋ tʋɔŋ a chɩchɛ wombiiŋ dɩ ʋ kpʋ Jɔɔŋ. Ama ʋ bɩ wombiiŋ na,

1 Kɔrɩntɩ Nɩaa 10:11

Wɩa ŋaa wɩaa deemba kala ba lɛ dɩ ʋ chagɩlɛba nɛ. Ama ba saa ŋmʋnsɛ wɩaa deemba bil nɛ a pɩla dɩ ba dɩdagɛla wɩaa nɛ. La hɛ bʋa-la lɛ dʋnɩa sɩ kpagɛ dɩdɛrɩŋ nɛ.

1 Kɔrɩntɩ Nɩaa 4:5

Ŋɩɩ wɩaa, má sɩ́ cheeriŋ joŋo pɩ nʋʋkala, dɩ tapʋlɩɩ-la La Tɩɩna sɩ jaŋ kɔ a dii la sarɩya ha bɩ yie. Dɩ ʋ nɛ mɩɩra kɔ, wʋbɔmɔ-la kala nɩaa sɩ ŋaa birimiŋ tʋɔŋ, ba kala jaŋ kʋ lɩɩ pʋlʋmʋŋ. Nɩaa tʋɔbɩɩnaa kala ba sɩ kɛnɛ jaŋ kʋ lɩɩ pʋlʋmʋŋ. Bʋa-la lɛ Wɩa jaŋ bɛsɛ nʋʋkala lɛ a mʋ tɩgɛ wɩalɩŋ ʋ sɩ ŋaa.

2 Kɔrɩntɩ Nɩaa 9:7

Nʋʋkala magɛ dɩ ʋ tɩa magɛ ŋɩɩ ʋ tʋɔbɩɩnaa sɩ daga nɛ. Ʋ bɩ maga dɩ ʋ ŋaa saka saka. Ʋ bɩ maga dɩ ʋ bɩɩnɛ arɩ baa fʋgʋ nɛ dɩ ʋ pɩ kɩalɩŋ. Nʋʋkala maga dɩ ʋ tɩa kɩaa ʋ tʋɔtɔrʋŋ lɛ nɛ, bɛɛ wɩaa Wɩa cho nɩɩ-la sɩɩ pa arɩ tʋɔtɔrʋŋ nɛ.

Galiisia Nɩaa 5:14

Má ŋaa ŋɩɩ, bɛɛ wɩaa wɩalɩŋ Mosis fa sɩ bile dɩ nɩaa tuto, ba tʋɔŋ wʋnyuŋ nɛ ŋ-la: “Cho ŋ dɔŋɔ tɩɩna arɩ ŋ sɩ cho ŋ tɩtɩa ŋɩɩ.”

Galiisia Nɩaa 5:26

Má sɩ́ leŋe dɩ la cho dɩ la bibigisi la tɩtɩa lɛ, a sɩ́ leŋe dɩ la ŋaa dɩ la dɔnsʋŋ tɩŋŋaa baanɩŋ sisii, a sɩ́ yarɩ-bieriŋ kɛŋ dɔŋɔ lɛ.

Jeems 4:11

Mɩ naambiiri, má sɩ́ ma dɔnsʋŋ tɩŋŋaa yɩrɩŋ chei. Nɩɩ-la kala sɩ chei ʋ dɔŋɔ tɩɩna yɩrɩŋ koo a bʋl ʋ teeŋ ma arɩ ʋ cheye nɛ, ʋ naga tɩɩna ma bʋl wʋbɔŋ nɛ a tɩgɛ wɩalɩŋ Wɩa sɩ leŋe ba ŋmʋnsa bil dɩ nɩaa tuto lɛ. Dɩ nʋʋ nɛ bʋla arɩ wɩalɩŋ bɩ zɔŋ, ʋ ma bɩra bɩ wɩalɩŋ to. Ʋ mɩɩra joŋ ʋ tɩtɩa arɩ ʋ yʋga nɛ a kɩɩ wɩalɩŋ Wɩa sɩ leŋe ba ŋmʋnsa bil.

Jeems 4:12

Wɩa dʋndʋŋa nɛ kɛŋ doluŋ dɩ ʋ bil wɩaa pɩ nɩaa dɩ ba tuto. Ʋ dʋndʋŋa ma nɛ jaŋ wuo dii nɩaa sarɩya. Ʋ nɛ jaŋ wuo laaba ta, ʋ nɛ jaŋ bɩra wuo joŋ cheeriŋ pɩba a ŋaa dɩ ba sʋʋ. Kʋbɛɛ nɛ ka ma ma, dɩ ma dii ma dɔnsʋŋ tɩŋŋaa sarɩya?

Jeems 5:10

Mɩ naambiiriŋ, má bee na Wɩa wʋlaabʋlla-la sɩ bʋl wɩaa La Tɩɩna yɩrɩŋ lɛ, ba na hɛɛŋ nɛ woruŋ aŋ ha kɛŋ kenyiri. Má ma hɛ doluŋ aŋ to ba naabʋɔsʋŋ.

Jeems 5:7

Mɩ naambiiriŋ, má kɛŋ kenyiri a gbɛrɛ chɛɛ-la La Tɩɩna Yesu sɩ jaŋ mɩɩra kɔ. Ma bee na ŋɩɩ paara sɩ kɛŋ kenyiri. Ʋ yie gbɛrɛ nɛ duoŋ-puso nɩɩ, ʋ duu kɩaa, a bɩra kɛŋ kenyiri a gbɛrɛ gbanchaaŋ-duonuŋ lɛ ʋ kɩaa ŋaa, ʋ kʋŋ.

1 Pɩɩta 4:5

Ama tapʋlɩɩ kʋbala, ba jaŋ dagɛ wɩalɩŋ kala ba sɩ ŋaa a pɩ nɩɩ-la sɩ kɛŋ ʋ tɩtɩa dɩ ʋ dii nɩweyee arɩ nɩsʋʋnʋŋ kala sarɩya.

1 Pɩɩta 4:9

Má hʋhʋɔrɛ dɔŋɔ woruŋ ma dɩɩsɩŋ lɛ, aŋ sɩ́ wɩaa gʋgʋrɩmʋ.

Jɔɔŋ Wʋnaalaa 3:20

Má bee-na, mɩ chɩŋ boiŋ niiŋ nɛ aa ŋmoo boro. Nɩɩ-la kala sɩ nɩɩ mɩ yikoro a kɛŋ boro suri, mɩ jaŋ kʋ jʋʋ ʋ teeŋ, dɩ la dɩ ʋ kala dii kɩaa.