Jeems 3:17 - WƖA TENIŊ

¹⁷ Ama wʋjɩmɩɩ-la sɩ lɩɩ Wɩa teeŋ zɔmɔ kɩŋkɛŋ. Wʋbɔŋ kala tuo ʋ lɛ. Nɩɩ-la kala sɩ kɛŋ wʋjɩmɩŋ deeŋ, yie hɔŋ nɛ sɔm a kɩkɛrɛ yuosuŋ, a kɛŋ zile. Ʋ yie jegilee nɩɩ nɩaa niiŋ wɩaa. Ʋ yie fɩfá nɩaa nenige ma nɛ woruŋ, a ŋɩŋaa wʋzɔŋŋɔɔ. Ʋ bɩ tʋɔbɩɩnaa balɩa ma kɛnɛ a bɩ nii-sɩma ma kɛnɛ.

Jeems 3:17 ပူးပေါင်းရင်းမြစ်များ

1 KUOROO 3:12

mɩ jaŋ ŋaa wɩɩ-la ŋ sɩɩ chɛ a pɩŋ. Mɩ jaŋ pɩŋ wʋjɩmɩŋ nʋʋ ha sɩ bɩ kɛnɛ aŋ ka arɩ maachie kala.

1 KUOROO 3:28

Iziral tɩŋŋaa kala sɩ nɩɩ ŋɩɩ kuoro sɩ dii sarɩya-la, ba kala zizilu woruŋ. Ba jɩŋ arɩ Wɩa pʋ wʋjɩmɩŋ nɛ dɩ ʋ kaa dii sarɩya ʋ bʋa lɛ.

1 KUOROO 3:9

Ŋɩɩ wɩaa, pɩmɛ wʋjɩmɩŋ dɩ mɩ jɩŋ wʋzɔmʋŋ arɩ wʋbɔmʋŋ bʋa a kaa beŋ ŋ nɩaa. Dɩ ŋɩɩ dee, ɛɛ nɛ mɩ jaŋ wuo ŋaa a beŋ ŋ nɩ-daŋ deeŋ?”

1 IZIRAL TƖŊŊAA NAABARƖŊ 22:12

A leŋ dɩ ŋ TƖƖNA Wɩa pɩŋ wʋjɩmɩŋ arɩ dɩgɩlɩŋ-jegilee dɩ ŋ nɛ kʋ dii kuoruŋ, dɩ ŋ wuo to ʋ wombiiŋ a beŋ Iziral tɩŋŋaa.

1 IZIRAL TƖŊŊAA NAABARƖŊ 22:9

Ama ŋ jaŋ lʋl hambolibie dɩ ʋ dii kuoruŋ, mɩ jaŋ leŋ dɩ fɩɛlɩŋ hɛ nɩmɛ ʋ kuoruŋ bʋa kala lɛ. Ʋ yɩrɩŋ nɛ jaŋ ŋaa Solomoŋ (yɩrɩ-la bʋbʋɔŋ nɛ fɩɛlɩŋ), bɛɛ wɩaa ʋ kuoruŋ bʋa lɛ nɛ mɩ jaŋ leŋ dɩ Iziral tɩŋŋaa hɔŋ sɔm arɩ fɩɛlɩŋ.

JOB 28:12

Ama nɩɩ nɛ nʋʋ jaŋ wuo na wʋjɩmɩŋ? Nɩɩ nɛ wɩaa sɩaa jɩmɩŋ hɛ?

JOB 28:23

Wɩa nɛ jɩŋ ʋ wombiiŋ, ʋ dʋndʋŋa nɛ jɩŋ lee-la ʋ sɩɩ jʋʋ.

JOB 28:28

Ŋɩɩ nɛ ʋ bʋla pɩ nuhuobiine, ‘Dɩ ŋ nɩɩ fá mɩ-na ma Tɩɩna, wʋjɩmɩŋ nɛ ŋɩɩ, dɩ ŋ nɛ vɩa wʋbɔŋŋɔɔ ŋaanɩŋ, ŋ jɩŋ wɩaa sɩaa nɛ ŋɩɩ.’ ”

MOSIS KƐŊ IZIRAL TƖŊŊAA LƖƖ 36:2

Ŋɩɩ nɛ Mosis yɩrɛ Bɛzalɛl arɩ Oholiab arɩ nɩalɩŋ kala La TƖƖNA sɩ joŋ tɩntɩŋŋaa jɩma pa arɩ nɩalɩŋ kala sɩ cho dɩ ba tɩŋ tɩntɩmɩɩ-la, ba kɔ dɩ ba tɩŋ.

NAMAGABA 2:6

La Tɩɩna nɩɩ pa wʋjɩmɩŋ. Ʋ niiŋ lɛ nɛ ŋ yie to a kɛŋ wʋjɩmɩŋ a pɛ jɩŋ wɩaa bʋbʋɔŋ.

AZAAYA 2:4

Ʋ jaŋ laa tinteyee nɩaa wɩaa a jɩma pɩba, aŋ kɛŋ ba nɩ-daŋ hɛ dɔŋɔ lɛ dɩ ba ŋaa sɩma. Ba jaŋ kɛŋ ba tokobiee a libi pirisiŋ, aŋ kɛŋ ba tiŋŋee ma a libi sɩɩkɔrʋsʋŋ. Tintee kala bɩra bɩ jaŋ joŋ tokobiiŋ a je ʋ dɔŋɔ lɛ, koo a bɩra gʋnnɛ laalɩŋ yuonuŋ.

AZAAYA 32:6

Nɩyaarɩŋ yie bʋl nɩyaarɛ wɩaa nɛ a kɛŋ tʋɔbɩɩŋ bɔŋŋɔɔ. Ʋ yie ŋɩŋaa wɩalɩŋ sɩ bɩ La TƖƖNA wombiiŋ ka to nɛ, a nyɩɛ wɩaa ma a tɩtɩgɛ ʋ lɛ. Ʋ bɩ losuŋ sɩ kɛŋ nɩalɩŋ kʋdiilee ka pa, a vɔŋ nɩalɩŋ ma lɩɩnyʋasʋŋ sɩ kɛnɛ lɩɩŋ.

AZAAYA 40:11

Ʋ jaŋ beŋ ʋ nɩaa nyuŋ arɩ pie-daara sɩɩ beŋ ʋ piesee nyuŋ ŋɩɩ. Ʋ jaŋ paa ʋ pie-biisiŋ a nɔgɛ aŋ fɩɛla dɩdaa pie-naamba-la sɩ kɛŋ biiriŋ.

DANƖƐL 1:17

Wɩa pɩ bapʋɔsɛ biisiŋ deemba banɛsɛ wʋjɩmɩŋ arɩ jɩma dɩ ba wuo jɩŋ teniŋ arɩ wɩɩkala. Danɩɛl-na paala wuo jɩŋ wɩalɩŋ ba sɩ yie na arɩ duosoo tʋɔŋ arɩ duosi dosunuŋ kala bʋbʋɔŋ nɛ.

MALAKAƖ 2:9

Ŋɩɩ nɛ tɩɩ mɩ leŋ nʋʋkala hɩhɛ ma hɩɩsɩŋ a bɩ ma kaa tɩtɩŋ, bɛɛ wɩaa ma vɩa dɩ ma to mɩ wombiee nɛ aŋ dii sarɩya a laa pɩpɛ ma nɩchooloo lɛ.”

MALAKAƖ 3:3

Tɩndaarʋ-la jaŋ kʋ chɛsɛ Levi doho nɩaa dɩ ba lɩɩ a nagɛ sɛlɩmɛ koo hɔpʋla ba sɩ joŋo hɛ nyiniŋ lɛ a lɩɩsɛ hɔɔ-bɩnɩŋ. Ŋɩɩ lɛ nɛ La TƖƖNA jaŋ kɛŋ tʋɔpʋl tɩŋŋaa dɩ ba kɛŋ kɩaa kʋ ŋaa Wɩɩsʋlʋŋ a pʋ,

Matiu 23:28

Ŋɩɩ tɩtɩa nɛ ma ma nagɛ nɩaa teeŋ. Dɩ ba nɛ nama, ba yie bɩɩnɛ ma ŋaa tʋɔpʋl tɩmma nɛ, ka ma tʋɔŋ su arɩ wʋbɔŋŋɔɔ arɩ kanfugi wʋŋaalaa.

Matiu 5:8

Wɩa jaŋ pɛ nɩalɩŋ sɩ kɛŋ tʋɔpʋla lɛ, ba jaŋ na Wɩa.

Matiu 5:9

Wɩa jaŋ pɛ nanjejeeree lɛ. Ʋ jaŋ kɛmba yɩrɛ ʋ biiriŋ.

Luuk 21:15

bɛɛ wɩaa mɩ jaŋ joŋ wʋjɩmɩŋ a hɛ ma nyuŋ lɛ dɩ ma bʋl wɩalɩŋ ma dʋndɔŋŋɔɔ sɩ bɩ jaŋ wuo kaalɛrɛ arɩ wʋtɩtɩɩ dee.

Luuk 6:36

Má fɩfá nɩaa nenige arɩ ma Nyɩmma Wɩa sɩɩ fá nɩaa nenige ŋɩɩ.

Jɔɔŋ 1:14

Ŋɩɩ nɛ wɩɩ-la bɩrɩmɛ nuhuobiine a kʋ hɛ la tʋɔŋ. Ʋ fa hɛ la teeŋ a fɩfá la nenige woruŋ, a kɛŋ wʋtɩtɩɩ. La na ʋ tʋla. Tʋla deeŋ ʋ Nyɩmma Wɩa nɛ joŋo pʋ, arɩ ʋ nɛ ŋaa ʋ Bie kala.

Jɔɔŋ 1:47

Yesu sɩ na Natanɩal dɩ ʋʋ kɔ ʋ teeŋ, ʋ bʋl, “Nɩa deeŋ ŋaa Iziral tɩɩna tɩtɩɩ nɛ. Ʋ kɛŋ wʋtɩtɩɩ.”

Tɩntɩŋŋaa 11:24

Banabas fa ŋaa nɩpʋla nɛ a laa Wɩa dii woruŋ. Wɩa Dɩŋ-zɔmʋŋ ma hɛ ʋ lɛ woruŋ. Nɩaa fa yʋga a to ʋ lɛ a laa La Tɩɩna Yesu wɩaa dii.

Tɩntɩŋŋaa 9:36

Haal kʋbala nɛ fa hɛ Jɔpa lɛ. Ʋ faa to Yesu nɛ. Ʋ yɩrɩŋ nɛ Tabɩta. (Giriik tɩŋŋaa ka yɩrʋ Dɔkas nɛ. Ʋ bʋbʋɔŋ nɛ ‘bagɩl’.) Ʋ kɛŋ zile kɩŋkɛŋ a pɩpɛ summoo lɛ.

Rom Tɩŋŋaa 12:18

Dɩ ma nɛ wuolo, má leŋ dɩ ma dɩ nʋʋkala sɩŋ.

Rom Tɩŋŋaa 12:9

Má cho dɔŋɔ arɩ wʋtɩtɩɩ. Má bɛrɛ wʋbɔŋŋɔɔ, aŋ joŋ ma tɩtɩa hɛ wʋzɔŋŋɔɔ ŋaanɩŋ lɛ.

Rom Tɩŋŋaa 15:14

Mɩ naambiiriŋ, mɩ chaasa laa dii arɩ maa ŋaa wʋzɔŋŋɔɔ nɛ woruŋ, a jɩŋ wɩaa ma woruŋ, a wuo dɩdagɛ dɔŋɔ.

1 Kɔrɩntɩ Nɩaa 12:8

Wɩa Dɩŋ-zɔmʋŋ yie joŋ wʋjɩmɩŋ a pɩ nʋʋ ʋ wuo bʋl Wɩa wɩaa pɩpɩ nɩaa. Ʋ yie joŋ wɩɩ pɩ nʋʋ dɔŋ ʋ wuo jɩŋ Wɩa wɩaa bʋbʋɔŋ a wuo dɩdagɛba woruŋ.

2 Kɔrɩntɩ Nɩaa 10:1

Mɩ-na Pɔɔl tɩtɩa nɩɩ chɛ dɩ mɩ bʋl wɩɩ pɩma. Mɩɩ sʋlma a tɩŋ Kirisito wɩaa, nɩɩ-la sɩaa sɩ fɩɛla, ka ʋ kɛŋ kenyiri ma. Nɩaa dɔnsʋŋ sɩ, dɩ mɩ nɛ hɛ ma teeŋ, mɩ yie pʋɩ nɛ gbɛlɛ gbɛlɛ, ama dɩ mɩ tuo ma teeŋ, mɩ nyuŋ duori weŋgem.

2 Kɔrɩntɩ Nɩaa 6:6

La yie dagɛ arɩ la ŋaa Wɩa tɩntɩnnaa nɛ, bɛɛ wɩaa la bɩ disiniŋ kɛnɛ. La jɩŋ wɩaa nɛ, a kɛŋ kenyiri, a kɛŋ zile, a kɛŋ Wɩa Dɩŋ-zɔmʋŋ ma, a cho nɩaa arɩ wʋtɩtɩɩ.

2 Kɔrɩntɩ Nɩaa 7:11

Má bee na wɩalɩŋ sɩ ŋaa ma lɛ a tɩŋ Wɩa sɩ leŋe ma tʋɔŋ chei. Lɛɛlɛ ma fɩɛsɛ sɩɩŋ nɛ a kɛŋ ma tɩtɩa hɛ dɔŋɔ dɩdagɛ arɩ ma bɩ wɩɩ cheye. Ma na baanɩŋ nɛ a tɩŋ wʋbɔmɔ-la ma sɩ ŋaa wɩaa. Fawʋllʋŋ kɛmma. Ma chomi nɛ a fɩɛsɛ sɩɩŋ dɩ ma namɛ. Ma kɛŋ ma tɩtɩa hɛ dɔŋɔ dɩ ma dɔgɩsɛ nɩɩ-la sɩ ŋaa wʋbɔmʋŋ nɛ ma tʋɔŋ. Ma daga arɩ ma bɩ wɩɩkala cheye wɩɩ-la lɛ.

2 Kɔrɩntɩ Nɩaa 9:10

Wɩa nɛ yie joŋ kʋdoho a pɩ paara ʋ duu, ʋ nɛ yie pʋ kʋdiilee ʋ didii. Ŋɩɩ wɩaa ʋ jaŋ pɩma kɩaa a leŋ dɩ ba pʋŋa pɛ bʋa na-kala lɛ. Ʋ sɩ leŋe ma kɩaa pʋŋa pɩpɛ ŋɩɩ, ʋ jaŋ leŋ dɩ ma ma kɛŋ zile kɩŋkɛŋ a pɩpɛ nɩaa lɛ.

Ɛfɛsɩs Nɩaa 5:9

Pʋlʋmʋŋ tʋɔŋ nɛ nɩaa ŋɩŋaa wʋzɔŋŋɔɔ, tʋɔpʋl wɩaa arɩ wʋtɩtɩɩba.

Fɩlɩpa Nɩaa 1:11

Ŋɩɩ jaŋ leŋ dɩ ma to Yesu Kirisito lɛ a wasa ŋaa tʋɔpʋl wɩaa dɩ nɩaa na a dɛnnɛ Wɩa dɩ ʋ yɩrɩŋ yɩrɛ.

Fɩlɩpa Nɩaa 4:8

Mɩ naambiiriŋ, wɩɩ-la dɩdɛrɩŋ nɛ ŋ-la: Má ŋɩŋaa wɩalɩŋ sɩ ŋaa wʋtɩtɩɩba, wɩalɩŋ sɩ kɛŋ yɩrɩŋ, wɩalɩŋ sɩɩ to wombiiŋ, wɩalɩŋ sɩ bɩ disiniŋ kɛnɛ, wɩalɩŋ sɩ daga arɩ ma cho nɩaa, wɩalɩŋ sɩ zɔmɔ nɩaa sɩpaaŋ arɩ wɩalɩŋ sɩ jaŋ leŋ dɩ nɩaa bɩbɛsɛ ma lɛ. Má joŋ ma nyuŋ hɛ wɩaa deemba lɛ.

Koloosi Nɩaa 1:10

Ʋ jaŋ leŋ dɩ ma wʋŋaalaa kala chɩŋ Wɩa wombiiŋ lɛ, dɩ ʋ tʋɔŋ tɔrɛ ma nyuŋ a leŋ dɩ ma tɩŋ tɩntɩŋ-zɔŋŋɔɔ, tɩntɩŋ-dosunuŋ kala lɛ, dɩ ʋ kɛŋ doho, dɩ ma kʋ jɩŋ Wɩa woruŋ a waa pɛ.

1 Tɛsalonaaka Nɩaa 2:7

Ama la bɩ ŋɩɩ ŋaa. La leŋe la sɩaa fɩɛlɛ ma teeŋ nɛ, a nagɛ haala sɩ yie bibeŋ ʋ biiriŋ nyuŋ ŋɩɩ.

1 Timoti 5:21

Mɩ bʋl ŋɩɩ pɩŋ Wɩa arɩ Kirisito Yesu arɩ Wɩa tɩndaaraa Wɩa sɩ lɩɩsa sɩpaaŋ nɛ. Mɩɩ sʋlʋŋ arɩ sɩɩfɩɛsɩŋ dɩ ŋ to wɩaa deemba, a sɩ́ nɩaa kaa pɔrɛ wɩɩ-na kala ŋ sɩɩ ŋaa lɛ. Joŋ ba kala dɩ ba ŋaa nɩbala ŋ teeŋ.

2 Timoti 2:24

Nɩɩ-la sɩ tɩma pɩpɩ La Tɩɩna Wɩa, ʋ bɩ maga dɩ ʋ yuyuo yuosuŋ. Ʋ maga dɩ ʋ kɛŋ zile nɛ nʋʋkala lɛ, a wuo dɩdagɛ nɩaa woruŋ, aŋ pɛ kɛŋ kenyiri.

Taatɩs 1:15

Tʋɔpʋl tɩɩna teeŋ kʋŋkala zɔmɔ nɛ. Disiŋ tɩmma-la sɩ bɩ Wɩa wɩaa laa dii teeŋ, kʋŋkala ŋaa disiŋ kʋŋ nɛ. Ba tʋɔŋ lɔrɔ, ba tʋɔbɩɩnaa kala bɩ zɔŋ.

Taatɩs 3:2

Bʋla pɩba dɩ ba sɩ́ wʋbɔŋ kala bʋla tɩgɛ nʋʋkala lɛ. Ʋ bɩ maga dɩ ba cho yuosuŋ, ama ʋ maga dɩ ba leŋ ba dɩ nʋʋkala pɛgɛ zɔŋ, a leŋ dɩ ba sɩaa fɩɛlɛ nʋʋkala teeŋ.

Hiburu TƖŊŊAA 12:11

Dɩ ba nɛ kɛnla tʋraa kɩɩ, la tʋɔŋ yie chei nɛ, bɛɛ wɩaa wɩalɩŋ ba sɩɩ dagɛla hɛɩ pɩla nɛ. Ama dɩ la nɛ sɛyɛ dɩ ba kɛnla tʋra kɩɩ, ŋɩɩ jaŋ pɛ la lɛ. Dɩ la nɛ nyalɩma a mʋ sɩpaaŋ, wɩalɩŋ jaŋ leŋ dɩ la ŋaa tʋɔpʋl tɩmma Wɩa teeŋ, a fɩɛla hɔŋ sɔm arɩ fɩɛlɩŋ.

Hiburu TƖŊŊAA 12:14

Má hɛ ma doluŋ kala aŋ loo chɩchɛ dɩ ma dɩ nʋʋkala kɛŋ nii-bala, a bɩra loo chɩchɛ dɩ ma sɩ́ disiniŋ kɛŋ. Dɩ ma nɛ bɩ disiniŋ kɛnɛ, ma jaŋ wuo na Wɩa.

Jeems 1:17

Kʋzɔŋ-na kala lɩɩ Wɩa teeŋ nɛ. Ʋ nɛ ta kɩalɩŋ kala sɩ hɛ wɩa-nyuŋ lɛ a chaanɛ. Ama dɩ ba nɛ jʋa, birimiŋ yie hɛ nɩmɛ. Wɩa tɩtɩa bɩ ŋɩɩ naga. Ʋ bɩ bɩrɩmɛ.

Jeems 1:5

Dɩ ma kʋŋkala nɛ bɩ wʋjɩmɩŋ kɛnɛ, ʋ sʋl Wɩa dɩ ʋ pʋ wʋjɩmɩŋ. Wɩa kɛŋ zile, ʋ yie joŋ wʋjɩmɩŋ pɩ nʋʋkala sɩ sʋlʋ nɛ, ʋ bɩ nʋʋkala vɩa ta.

Jeems 2:13

Dɩ nʋʋ nɛ bɩ nɩaa nenige ka fá, Wɩa ma bɩ jaŋ fá tɩɩna nenige bʋa-la lɛ ʋ sɩ jaŋ didii nɩaa sarɩya. Ama nɩɩ-la sɩ fá nɩaa nenige bɩ jaŋ fá wɩɩkala sarɩya-la chɛ-diiliŋ.

Jeems 2:4

Dɩ ma nɛ ŋaa ŋɩɩ, ma kɛŋ nɩaa pʋpɔrɛ nɛ. Ma daga arɩ nɩaa dɔnsʋŋ nɛ kpɩa dɔnsʋŋ. Ma tʋɔbɩɩŋ bɔmɔ-la nɛ ma kaa ŋɩŋaa ŋɩɩ.

Jeems 3:15

Wʋjɩmɩŋ deeŋ doho bɩ Wɩa teeŋ lɩa. Ʋ ŋaa dʋnɩa wɩɩ nɛ a lɩɩ dʋnɩa nɩaa tʋɔbɩɩnaa lɛ arɩ Sɩtaanɩ teeŋ.

Jeems 4:8

Má sʋrɩsa mʋ kpagɛ Wɩa, ʋ ma jaŋ kʋ kpagɛma. Má sɔŋ ma nɩsaa lɩɩsɛ wʋbɔŋŋɔɔ ŋaanɩŋ lɛ, a pʋllɛ ma tʋɔŋ, a bɩra sɩ́ tʋɔbɩɩŋ lɔrʋnʋŋ bɩɩnʋ, bɛɛ wɩaa ma kɛŋ tʋɔbɩɩnaa balɩa balɩa nɛ.

1 Pɩɩta 1:22

A tɩŋ ma sɩɩ to wʋtɩtɩɩ wombiiŋ lɛ ŋɩɩ, ma pɩɩsɛ ma disiniŋ kala ta nɛ. Ma sɛnɛ cho ma naambiiri-la sɩ laa Wɩa wɩaa dii nɛ. Ŋɩɩ wɩaa, má kɛŋ ma tʋɔŋ arɩ ma doluŋ kala a wasa cho dɔŋɔ.

1 Pɩɩta 2:1

Ma sɩ kɛŋ mɩɩ-falɩŋ ŋɩɩ, má lɩɩsɛ ma tɩtɩa wʋbɔŋ kala lɛ, a sɩ́ nɩaa nyɩnyɩsʋ, a sɩ́ kanfugi tɩmma ŋaa. Má sɩ́ yarɩ-bieriŋ kɛŋ, a sɩ́ nɩaa harɩŋ gɩgaa.

1 Pɩɩta 2:18

Ma nɩalɩŋ sɩ ŋaa tɩntɩnnaa a tɩmaa pɩ nɩaa, má kɛŋ ma tɩtɩa muuri a tuto ma nɩhɩasɩŋ niiŋ a zizilba bʋa na-kala lɛ. Dɩ ba wɩaa zɔmɔ koo dɩ ba nɛ tɛrɛ ma, má zizilba.

1 Jɔɔŋ 3:18

Mɩ biiriŋ, má sɩ́ leŋe dɩ la kɛŋ niiŋ dʋndʋŋa cho dɔŋɔ. Má leŋ dɩ la to wʋtɩtɩɩ wombiiŋ a ŋɩŋaa wʋzɔŋŋɔɔ, dɩ la wʋŋaalɩa-la dagɛ arɩ la sɛnɛ cho dɔŋɔ nɛ.

1 Jɔɔŋ 3:3

Nɩɩ-la kala sɩɩ yɩɛlɛ wɩɩŋ deeŋ, ʋ jaŋ lɩɩsɛ ʋ tɩtɩa wʋbɔŋŋɔɔ lɛ aŋ kɛŋ tʋɔpʋla, arɩ Kirisito sɩ kɛŋ tʋɔpʋla ŋɩɩ.