HOSIA 9:3 - WƖA TENIŊ

³ Ba bɩ jaŋ pɛsɛ hɔŋ La TƖƖNA tintee-la lɛ. Efirem jaŋ mɩɩra mʋ Ijipiti tinteeŋ, dɩ ba kɛsɛba kaa mʋ Asiiria tinteeŋ dɩ ba dii kʋdiile-la sɩ kɛŋ disiniŋ Wɩa teeŋ.

HOSIA 9:3 ပူးပေါင်းရင်းမြစ်များ

1 KUOROO 9:7

ŋɩɩ-na, mɩ jaŋ kiri ma Iziral tɩŋŋaa ta tintee-la mɩ sɩ joŋo pɩma lɛ, aŋ vɩa mɩ dɩɩ-balɩŋ deeŋ mɩ sɩ lɩɩsa ʋ ŋaa mɩ kʋŋ dɩ ba dɩdɛnnɛmɛ nɩmɛ ta. Dɩ ŋɩɩ nɛ ŋaa, ma Iziral tɩŋŋaa kala jaŋ mɩɩra ŋaa nɩtɔɔnɩ dɩ nɩaa kala mʋmɔmma.

2 KUOROO 17:6

Hosia sɩ dii kuoruŋ ʋ jɩ-nibi lɛ nɛ, Asiiria kuoro yuo dii Samarɩa a kɛsɛ Iziral tɩŋŋaa kala a kaa mʋ Asiiria tinteeŋ. Ʋ kɛmba mʋ a leŋ dɔnsʋŋ hɔŋ taŋ-la ba sɩɩ yɩrɛ Hala lɛ, dɔnsʋŋ ma hɔnɔ kpagɛ fuo-la ba sɩɩ yɩrɛ Habɔ a hɛ Goza tinteeŋ. Ka dɔnsʋŋ ma hɔŋ tasɩ-la sɩ hɛ Medis tɩŋŋaa tinteeŋ lɛ.

JƐRƖMAAYA 16:18

Mɩ jaŋ timba naansɩɩŋ bʋlɩa a tɩŋ ba wʋbɔŋŋɔɔ arɩ ba wʋcheelee wɩaa, bɛɛ wɩaa ba ŋaa disiniŋ hɛ mɩ tinteeŋ lɛ nɛ arɩ ba tɔmɔ-la sɩ bɩ wei, a leŋ mɩ tinteeŋ su arɩ ba tɔmɔ-la mɩ sɩɩ kɩsʋ.”

JƐRƖMAAYA 2:7

Mɩ kɛmma kaa kʋ jʋʋ tinteeŋ sɩ sɩma nɛ, dɩ ma dii ʋ kɩaa arɩ kʋzɔŋ na-kala sɩ hɛ ʋ lɛ a nɩɩ sɩma. Ama ma kʋ jʋʋ nɛ a ŋaa disiniŋ hɛ mɩ tintee-la mɩ sɩ joŋo pɩma lɛ, a leŋ mɩ dɩ-tɩɩlɩŋ nagɛ kʋŋ mɩ sɩɩ kɩsʋ.

JEMBIEE 5:6

La joŋ la tɩtɩa pɩ Ijipiti arɩ Asiiria tɩŋŋaa nɛ, dɩ la wuo na kʋdiilee dii.

ƐZƖKƖƐL 4:13

La TƖƖNA sɩ, “Dɩ ŋ nɛ ŋaa ŋɩɩ, ʋ jaŋ dagɛ ŋɩɩ Iziral tɩŋŋaa sɩ jaŋ dii kʋdiile-la sɩ kɛŋ disiniŋ tintee-wogusu-la lɛ mɩ sɩ jaŋ kɛmba pɩsa hɛ lɛ.”

DANƖƐL 1:8

Ama Danɩɛl fa kɛŋ ʋ tʋɔŋ arɩ ʋ bɩ jaŋ dii kuoro dɩa kʋdiilee koo a nyʋa ʋ sɩnɩŋ dɩ ŋɩɩ leŋ dɩ ʋ kɛŋ disiniŋ. Ŋɩɩ nɛ ʋ sʋl tɩntɩnnɩ-hɩaŋ-la dɩ ʋ pɛ ʋ lɛ dɩ ʋ sɩ́ kɩalɩŋ dii a kɛŋ disiniŋ.

HOSIA 11:11

Ba jaŋ nagɛ diibii-laalɩŋ a lɩɩ Ijipiti tinteeŋ, a lɩɩ Asiiria tinteeŋ a nagɛ kokosuŋ. Mɩ jaŋ bɩra holliba ba dɩɩsɩŋ lɛ. La TƖƖNA nɛ bʋla.”

HOSIA 11:5

Ʋ sɩ vɩa dɩ ʋ mɩɩra kɔ mɩ teeŋ, ŋɩɩ-na, ʋ jaŋ mɩɩra mʋ Ijipiti tinteeŋ, Asiiria kuoro jaŋ benu.

HOSIA 7:11

Efirem nagɛ kokomo nɛ a yaarɛ, ʋ nyɩsɩŋ ŋaa mɔlɩɩ. Ʋ yie yɩrɛ Ijipiti nɩaa dɩ ba pɛ ʋ lɛ, aŋ mɩɩra fá mʋ Asiiria nɩaa teeŋ.

HOSIA 7:16

Ba bɩ mɩɩra kɔ mɩ-na Wɩa sɩ kɩɩ kʋŋkala teeŋ, ba nagɛ toŋ sɩ golibo nɛ. Ba jaŋ kpʋ ba sɩpaalaaraa laalɩŋ lɛ, a tɩŋ nii-jɩgɩ wɩalɩŋ ba sɩɩ bʋl. Wɩɩŋ deeŋ wɩaa, ba jaŋ mɔmba Ijipiti tinteeŋ lɛ.”

HOSIA 8:13

Ba yie kpʋ pʋsʋŋ a ŋaa Wɩɩsʋlʋŋ pɩmɛ, aŋ joŋ nammɩa-la chaŋ, ama mɩ-na ba TƖƖNA tʋɔŋ bɩ ba Wɩɩsʋlʋŋ-la nyuŋ tɔrɔ. Lɛɛlɛ mɩ jaŋ liise yi ba nɩbɔŋ wɩalɩŋ lɛ a dɔgɩsɛba a tɩŋ ba wʋbɔŋŋɔɔ wɩaa. Ba jaŋ mɩɩra mʋ Ijipiti tinteeŋ.

HOSIA 9:6

Dɩ ba nɛ paala foro fá ba bɩ ba kpʋa ma, Ijipiti nɩaa-na jaŋ dɛrɛba, dɩ ba hugiba lee-la ba sɩɩ yɩrɛ Memfis Ijipiti tinteeŋ lɛ. Lere-la ba sɩ bil ba warɩpʋla jaŋ lugi a bɩrɩmɛ tiiŋ aŋ ka dɩ sɔsʋŋ ma nyʋ tɔ ba dɩɩsɩŋ.

LEVI DOHO NƖAA 18:28

Dɩ ma nɩɩ ŋaa disiŋ wɩaa deemba tintee-la lɛ, mɩ jaŋ kirima ta arɩ mɩ sɩ kiri nɩalɩŋ sɩ laa sɩpaaŋ hɔŋ tintee-la lɛ ta ŋɩɩ.

LEVI DOHO NƖAA 20:22

Má to mɩ niiŋ arɩ wombie-la kala mɩ sɩ dagɛma, dɩ ŋɩɩ leŋ dɩ ma wuo hɔŋ tintee-la lɛ mɩ sɩ kɛŋ maa mʋ. Dɩ ma nɛ bɩ ŋɩɩ ŋaa, tintee-la bɩ jaŋ laama.

LEVI DOHO NƖAA 25:23

Ma bɩ maga ma joŋ tintee-la yalla pɩ nʋʋ dɩ ʋ ŋaa ʋ kʋŋ a kaa mʋ wuu, bɛɛ wɩaa mɩ nɛ tɩɩ tintee-la, ka ma ŋaa nʋhʋɔra a hɔŋ ʋ lɛ.

AMƆS 7:17

Ŋɩɩ wɩaa jegile nɩɩ wɩalɩŋ La Tɩɩna sɩ bʋla a tɩgɛ ŋ lɛ: ‘Ŋ haala jaŋ ŋaa hachɔrʋŋ ma tabalɩŋ lɛ, ka ba kpʋ ŋ hambolibiisiŋ arɩ ŋ toloo ma laalɩŋ lɛ, aŋ kɛŋ ŋ tinteeŋ kpaa dɔŋɔ. Ŋ ma tɩtɩa jaŋ sʋʋ tintee-la nɩaa sɩ bɩ Wɩa ka to lɛ. Ka dɩ ba kɛsɛ Iziral tɩŋŋaa kala lɩɩ ba tinteeŋ lɛ a mʋ yoŋ-baga.’ ”

MƖKA 2:10

Má sii viiri, daha tuo ma dɩ-wiesii. Ma wʋŋaalaa leŋe ʋ kɛŋ disiniŋ nɛ, ʋ cheye nɛ, nʋʋ bɩra bɩ jaŋ wuo wasʋ.

Tɩntɩŋŋaa 10:14

Pɩɩta bʋl, “Aɩ, mɩ Tɩɩna, mɩ ha bɩ kʋ-la kala sɩ kɛŋ disiniŋ die.”

MOSIS BƖRA WULLI WƖA WOMBIIŊ 28:63

La TƖƖNA tʋɔŋ sɩ tɔrɔ ʋ ŋaa ma pʋŋ a kɛŋ dʋa ŋɩɩ, ŋɩɩ tɩtɩa nɛ ʋ tʋɔŋ jaŋ tɔrɛ dɩ ʋ cheima. Ba jaŋ kirima tintee-la ma sɩɩ jʋʋ dɩ ma tɩɩ lɛ.

MOSIS BƖRA WULLI WƖA WOMBIIŊ 28:68

La TƖƖNA jaŋ leŋ dɩ lɩɩŋ daborusuŋ paama mɩɩra mʋ Ijipiti tinteeŋ, lee-la mɩ sɩ sɩ ma bɩra sɩ́ mɩɩra mʋ. Nɩmɛ ma jaŋ chɩchɛ dɩ ma joŋ ma tɩtɩa a yalla pɩ ma dʋndɔŋŋɔɔ a ŋaa yosi, ka nʋʋ tuo sɩ jaŋ yɔɔma.”

MOSIS BƖRA WULLI WƖA WOMBIIŊ 4:26

Jɩnɩŋ, wɩa-nyuŋ arɩ tinteeŋ pɛ na nɛ, dɩ ma nɛ ŋaa wɩaa deemba kʋŋkala ma sɩɩ chol Jɔdaŋ fuo-la dɩ ma laa tintee-la a tɩɩ lɛ, La TƖƖNA jaŋ guu cheima. Ma bɩ jaŋ hɔŋ nɩmɛ dieni ka dɩ ʋ cheima.

JOSUA 23:15

Má jɩŋ arɩ wʋzɔmɔ-la ma TƖƖNA Wɩa fa sɩ hɛ niiŋ arɩ ʋ jaŋ ŋaa pɩ ma kala sɩ kʋ ŋaa wʋtɩtɩɩ ŋɩɩ, ŋɩɩ tɩtɩa nɛ ʋ jaŋ joŋ wʋlɔrʋnʋ-la ʋ sɩ sɩ ʋ jaŋ joŋo ŋaa ma lɛ, a ŋaa ŋɩɩ deeŋ deeŋ a lɩɩsɛma tintee-zɔŋ-la ʋ sɩ joŋo pɩma lɛ.