Ɛfɛsɩs Nɩaa 5:14 - WƖA TENIŊ

¹⁴ Ŋɩɩ wɩaa nɛ tɩɩ ba bʋl, “Ma nɩalɩŋ sɩ pɩŋ doŋ a nagɛ ma sʋba, má sii doŋ lɛ. Kirisito jaŋ chaana hɛ ma lɛ.”

Ɛfɛsɩs Nɩaa 5:14 ပူးပေါင်းရင်းမြစ်များ

AZAAYA 26:19

Ama la laa dii arɩ ŋ nɩalɩŋ sɩ sʋba jaŋ sii a kɛŋ mɩɩsɩŋ, nɩalɩŋ kala sɩ hɛ bʋa tʋɔŋ jaŋ sii a yɩɩ yɩɩlaa arɩ tʋɔtɔrʋŋ. A nagɛ nyalɩŋ sɩ yie nyal a leŋ leriŋ fɩɛlɛ ŋɩɩ, ŋɩɩ nɛ nɩalɩŋ sɩ sʋba jaŋ sii sʋʋŋ lɛ a na fɩɛlɩŋ.

AZAAYA 51:17

Jerusalɛm nɩaa, má sii chɩŋ, ma na hɛɛŋ nɛ woruŋ La TƖƖNA nɩsɩŋ lɛ. Ʋ na baanɩŋ a dɔgɩsɛma kɩŋkɛŋ nɛ, ma kala vɔgɛ a gɩgɛrɛ.

AZAAYA 52:1

Jerusalɛm nɩaa, má sii, má sii chɩŋ, a kɛŋ doluŋ. Zaayɔŋ taŋ-la sɩ bɩ disiniŋ kɛnɛ nɩaa, má paa ma gɛrɩ-zɔŋŋɔɔ laalɛ. Nɩalɩŋ sɩ kɛŋ disiniŋ bɩra bɩ jaŋ kʋ jʋʋ ma taŋ-la.

AZAAYA 60:1

La TƖƖNA sɩ, “Jerusalɛm, sii chɩŋ a chaanɛ a nagɛ wɩɩpɔsʋŋ. La TƖƖNA tʋla chaana hɛ ŋ lɛ nɛ.

Luuk 1:78

Wɩa kɛŋ zile aŋ fɩfá nɩaa nenige. Ʋ jaŋ laala ta a leŋ dɩ la hɔŋ pʋlʋmʋŋ tʋɔŋ.

Luuk 15:24

Ʋ naga mɩ bie deeŋ fa sʋba nɛ aŋ lɛɛlɛ sii. Ʋ fa lɛlɛ nɛ, ka la lɛɛlɛ naʋ.’ Ŋɩɩ nɛ ba dii kɩaa arɩ tʋɔtɔrʋŋ.

Jɔɔŋ 8:12

Ŋɩɩ nɛ Yesu bɩra suomi a dɩdagɛ nɩaa, a bʋla pɩba, “Mɩ nɛ ŋaa dʋnɩa nɩaa pʋlʋmʋŋ, nɩɩ-la kala sɩ tomi, ʋ bɩ jaŋ vɛŋ birimiŋ tʋɔŋ. Ama ʋ jaŋ kɛŋ pʋlʋŋ sɩɩ pɩ nɩaa mɩɩsɩŋ.”

Jɔɔŋ 9:5

Mɩ ha sɩ hɛ dʋnɩa lɛ ŋɩɩ, mɩ nɛ ŋaa dʋnɩa nɩaa pʋlʋmʋŋ.”

Tɩntɩŋŋaa 13:47

Wɩa nɛ bʋla pɩla dɩ la ŋaa ŋɩɩ. Ʋ bʋl wɩɩŋ deeŋ Wɩa teniŋ sɛmɛ dɔŋɔ. Ʋ sɩ, ‘Mɩ nɛ lɩɩsɩŋ dɩ ŋ ŋaa nɩalɩŋ sɩ bɩ Juu tɩŋŋaa ŋaa pʋlʋmʋŋ. Ŋ jaŋ bʋl Wɩa niiŋ wɩaa dʋnɩa sɛmɛ-na kala, dɩ Wɩa laa nɩalɩŋ ta.’ ”

Rom Tɩŋŋaa 6:13

Ʋ bɩ maga dɩ ma joŋ ma yaraa lee-kala pɩ Sɩtaanɩ a ŋɩŋaa wʋbɔŋŋɔɔ. Ama má joŋ ma tɩtɩa pɩ Wɩa. Ma-na nagɛ nɩalɩŋ ʋ sɩ chɩsa sʋʋŋ lɛ nɛ ma kɛŋ mɩɩsɩŋ. Má saa joŋ ma yaraa kala pʋ dɩ ʋ leŋ dɩ maa ŋaa tʋɔpʋl wɩaa.

1 Kɔrɩntɩ Nɩaa 15:34

Má sii doŋ lɛ aŋ leŋ wʋbɔŋŋɔɔ ŋaanɩŋ. Ma dɔnsʋŋ wʋŋaalaa naga arɩ ma bɩ Wɩa jɩŋ, mɩ bʋl ŋɩɩ dɩ hɩɩsɩŋ kɛmma nɛ.

2 Kɔrɩntɩ Nɩaa 4:6

Bumbuŋ Wɩa sɩ ŋaa dʋnɩa, ʋ leŋe pʋlʋmʋŋ chaanɛ birimiŋ tʋɔŋ nɛ. Ŋɩɩ tɩtɩa nɛ lɛɛlɛ ʋ leŋ pʋlʋmʋŋ kʋ jʋʋ la tʋɔŋ. Pʋlʋŋ-la nɛ leŋe la kɛŋ wʋjɩmɩŋ a wuo jɩŋ ŋɩɩ Wɩa sɩɩ tʋl. Wɩa to Kirisito lɛ nɛ a dagɛ ʋ tʋla.

Ɛfɛsɩs Nɩaa 2:1

Ma fa naga arɩ ma sʋba nɛ a tɩŋ ma wʋcheelee arɩ ma wʋbɔŋŋɔɔ wɩaa.

Ɛfɛsɩs Nɩaa 2:5

a leŋ la dɩ Kirisito kala kɛŋ mɩɩsɩŋ. La wʋbɔŋŋɔɔ fa leŋe la sʋʋ nɛ. Wɩa lahɔrɩmɔ lɛ nɛ ʋ laama ta.

Koloosi Nɩaa 3:1

Ma dɩ Kirisito kala sɩ sii sʋʋŋ lɛ ŋɩɩ, máa chɛ wɩalɩŋ sɩ hɛ Wɩa-jaŋ, lee-la Kirisito sɩ hɔŋ Wɩa nadiiŋ sɛmɛ.

1 Tɛsalonaaka Nɩaa 5:6

Ŋɩɩ wɩaa, ʋ bɩ maga dɩ la pɩŋ doŋ arɩ nɩalɩŋ sɩ bɩ La Tɩɩna gbɛrɛ sɩɩ ŋaa ŋɩɩ. Ama ʋ maga dɩ la wei a kɛŋ la tɩtɩa wɩɩ na-kala lɛ.

2 Timoti 1:10

Lɛɛlɛ la Laataara Kirisito Yesu sɛnɛ kɔ dʋnɩa nɛ. Ʋ sɩ kɔ ŋɩɩ, la wuo na Wɩa zile wɩaa sɩ nagɛ ŋɩɩ nɛ. Kirisito sɩ kɔ, ʋ kpʋ sʋʋŋ doluŋ kala nɛ. Ʋ bʋl wʋzɔmɔ-la pɩla a to ŋɩɩ lɛ a dagɛla arɩ ʋ nɛ pɩla mɩɩsɩŋ, a bɩra dagɛla dɩ la nɛ sʋba ma, la jaŋ bɩra sii a kɛŋ mɩɩsɩ-la sɩ bɩ dɛrɛ.

2 Timoti 2:26

Ŋɩɩ nɛ ba jaŋ bɩra wasa kɛŋ wʋjɩmɩŋ a lɩɩsɛ ba tɩtɩa Sɩtaanɩ bɛrɛ́-la lɛ. Ʋ fa bɛrɛ kɛmba nɛ ba tuto ʋ tʋɔtɔrʋŋ lɛ.