Ɛfɛsɩs Nɩaa 3:1 - WƖA TENIŊ

¹ Ba kɛŋ mɩ-na Pɔɔl tɔ dɩa a tɩŋ Kirisito Yesu wɩaa nɛ. Mɩ bɩra hɛ sarɩka lɛ a tɩŋ ma ma nɩalɩŋ sɩ bɩ Juu tɩŋŋaa ŋaa wɩaa nɛ. Ŋɩɩ wɩaa nɛ tɩɩ mɩ yie sʋl Wɩa pɩpɩma.

Ɛfɛsɩs Nɩaa 3:1 ပူးပေါင်းရင်းမြစ်များ

Luuk 21:12

Ka dɩ wɩaa deemba kala-na ŋaa, ba jaŋ kɛsɛma a to naasɩŋ dɔgɩsɛma. Ba jaŋ jomma hɛ nɩaa nɩsɩŋ lɛ dɩ ba dii ma sarɩya Wɩɩchʋɔlɛ dɩɩsɩŋ lɛ a kɛmma tɔ dɩa. Ba jaŋ kɛmma kaa mʋ kuoroo arɩ nɩbalaa sɩpaaŋ a tɩŋ mɩ wɩaa.

Tɩntɩŋŋaa 21:33

Laalɩyuori-hɩaŋ-la mʋ kɛŋ Pɔɔl, a ŋaa ba kɛŋ chɔrʋmɔɔ balɩa kaa vɔbʋ. Ŋɩɩ nɛ ʋ pɩɛsɛ nɩalɩŋ, “Kʋbɛɛ nɛ nɩa deeŋ? Bɛɛ nɛ ʋ ŋaa chei?”

Tɩntɩŋŋaa 23:18

Ŋɩɩ nɛ ʋ kɛnʋ kaa mʋ ba kʋhɩaŋ teeŋ a bʋla pʋ, “Pɔɔl, nɩɩ-la ba sɩ kaa tɔ dɩa nɛ yɩrɛmɛ a bʋla pɩmɛ dɩ mɩ kɛŋ bapʋɔsɩ-bie deeŋ kaa kɔ ŋ teeŋ, dɩ ʋ kɛŋ wɩɩ nɛ dɩ ʋ bʋla pɩŋ.”

Tɩntɩŋŋaa 26:29

Ŋɩɩ nɛ Pɔɔl bʋl, “Ʋ ŋaa lɛɛlɛ koo ʋ dieni mʋa, mɩ Wɩɩsʋlʋŋ nɛ dɩ ŋ dɩ nɩkaana-la kala sɩɩ jegile mɩ teeŋ jɩnɩŋ deeŋ, dɩ ma kʋ laa Yesu wɩaa dii a nagɛmɛ. Ama mɩ bɩ chɛ dɩ ma nagɛmɛ arɩ ba sɩ vɔɔmɛ arɩ chɔrʋmɔɔ ŋ-la.”

Tɩntɩŋŋaa 9:15

La Tɩɩna Yesu bʋla pɩ Ananɩas, “Sii mʋ, mɩ nɛ lɩɩsʋ dɩ ʋ tɩma pɩpɩmɛ. Ʋ jaŋ mʋ bʋl mɩ wɩaa pɩ nɩalɩŋ sɩ bɩ Juu tɩŋŋaa ŋaa, arɩ ba kuoroo, arɩ Iziral nɩaa teeŋ.

2 Kɔrɩntɩ Nɩaa 1:6

Dɩ la nɩɩ na hɛɛŋ, ma pɛnɩŋ arɩ ma laatanɩŋ wɩaa nɛ. Dɩ la nɛ na pɛnɩŋ, ma ma jaŋ na pɛnɛ-la doho tɩtɩa, dɩ ma nɛ wuo kɛŋ kenyiri a na hɛɛ-la doho la sɩɩ na.

2 Kɔrɩntɩ Nɩaa 10:1

Mɩ-na Pɔɔl tɩtɩa nɩɩ chɛ dɩ mɩ bʋl wɩɩ pɩma. Mɩɩ sʋlma a tɩŋ Kirisito wɩaa, nɩɩ-la sɩaa sɩ fɩɛla, ka ʋ kɛŋ kenyiri ma. Nɩaa dɔnsʋŋ sɩ, dɩ mɩ nɛ hɛ ma teeŋ, mɩ yie pʋɩ nɛ gbɛlɛ gbɛlɛ, ama dɩ mɩ tuo ma teeŋ, mɩ nyuŋ duori weŋgem.

2 Kɔrɩntɩ Nɩaa 11:23

Ba ŋaa Kirisito tɩntɩnna nɛɛ? Mɩɩ bʋl wɩaa arɩ mɩ nyuŋ tuo nɛ. Mɩ ma ŋaa dɔŋɔ nɛ, a paala kɩɩba. Mɩ nɛ paala fɩɛsɛ sɩɩŋ a tɩŋ kɩŋkɛŋ. Ba kɛmmɛ tɔ dɩa a yʋgɛ nɛ. Ba sɩ ŋmoomi kɩŋkɛŋ mɩ ka mʋa dɩ mɩ sʋba, mɩ bɩ ʋ ma niiŋ jɩŋ.

Galiisia Nɩaa 5:11

Mɩ naambiiriŋ, dɩ mɩ nɛ haa bʋl arɩ ʋ maga dɩ ma keri ma penee nɛ, aŋ ka dɩ Wɩa-na laama ta, bɛɛ nɛ tɩɩ ba ha to naasɩŋ dʋdɔgɩsɛmɛ? Dɩ mɩ nɛ fa sɩ dɩ nʋʋkala maga dɩ ʋ keri ʋ peniŋ, ŋɩɩ-na mɩ fa bɩ jaŋ na hɛɛŋ a tɩŋ mɩ sɩɩ bʋl Yesu sɩ sʋʋ daagɛsɛ-la nyuŋ wɩaa.

Galiisia Nɩaa 5:2

Má jegile nɩɩ, mɩ-na Pɔɔl nɛ bʋl wɩɩŋ deeŋ pɩpɩma. Dɩ ma nɛ leŋe dɩ ba keri ma penee a nagɛ Juu tɩŋŋaa wombiiŋ sɩ dagɛ ŋɩɩ, wɩɩ-la Kirisito sɩ ŋaa pɩma ŋaa wʋpɛɩ nɛ.

Galiisia Nɩaa 5:24

Ŋɩɩ wɩaa, nɩalɩŋ sɩ laa Kirisito wɩaa dii, ba kpʋ ba tɩtɩa tʋɔtɔrɛ wʋŋaalaa ta nɛ. Ba bɩra bɩ wɩalɩŋ ba sɩɩ hɩɛnʋ arɩ ba tʋɔtɔrɛ wʋŋaalaa lɛ ka to.

Ɛfɛsɩs Nɩaa 3:11

Wɩa fa bɩɩnɛ wɩɩŋ deeŋ faafaa kala nɛ a lɛɛlɛ to La Tɩɩna Yesu Kirisito lɛ a leŋ wɩalɩŋ sɛnɛ kʋ ŋaa wʋtɩtɩɩ.

Ɛfɛsɩs Nɩaa 3:13

Mɩ saa sʋlma dɩ má sɩ́ leŋe dɩ ma tʋɔŋ chei a tɩŋ mɩ sɩɩ na hɛɛŋ ŋɩɩ wɩaa. Mɩ sɩɩ na hɛɛ-la jaŋ leŋ dɩ ma laa yɩrɩŋ.

Ɛfɛsɩs Nɩaa 3:8

Wɩa nɩaa kala tʋɔŋ, mɩ nɛ ŋaa ba kʋbie, aŋ ka ʋ lɩɩsɛmɛ ʋ lahɔrɩmɔ lɛ dɩ mɩ bʋl ʋ wʋzɔmɔ-la wɩaa a pɩ nɩalɩŋ sɩ bɩ Juu tɩŋŋaa ŋaa, dɩ ba jɩŋ Kirisito dʋa-la sɩ bɩ dɩdɛrɩ kɛnɛ wɩaa,

Ɛfɛsɩs Nɩaa 4:1

Ba kɛŋ mɩ-na Pɔɔl tɔ dɩa a tɩŋ La Tɩɩna Yesu wɩaa nɛ. Ma nɩalɩŋ Wɩa sɩ yɩra, mɩɩ sʋlma dɩ ma leŋ dɩ ma wʋŋaalaa joŋ wombiiŋ arɩ Wɩa sɩɩ chɛ ŋɩɩ.

Ɛfɛsɩs Nɩaa 6:20

Mɩ sɩɩ bʋl Kirisito wʋzɔmɔ-la aa pɩ nɩaa ŋɩɩ, ŋɩɩ nɛ tɩɩ ba kɛmmɛ kaa hɛ chɔrʋmɔɔ. Má sʋl Wɩa pɩmɛ dɩ mɩ wuo bʋl Wɩa wɩaa arɩ nyuduoŋ, arɩ ŋɩɩ sɩ maga dɩ mɩ bʋl ŋɩɩ.

Fɩlɩpa Nɩaa 1:7

Mɩɩ bɩɩnɛ ma wɩaa nɛ woruŋ. Ʋ ŋaa wombii nɛ dɩ mɩ ŋaa ŋɩɩ, bɛɛ wɩaa ma kala pɛ mɩ lɛ nɛ la tɩŋ tɩntɩmɩɩ-la Wɩa sɩ joŋo pɩmɛ. Ma pɛ mɩ lɛ nɛ bumbuŋ-la mɩ fa sɩɩ bʋl Wɩa wɩaa, arɩ lɛɛlɛ ma kala ba sɩ kɛmmɛ tɔ dɩa a tɩŋ Wɩa wʋzɔmɔ-la wɩaa. Bʋa deeŋ lɛ la kala dii dansɩa a mʋ tɩgɛ Wɩa wʋzɔmɔ-la lɛ arɩ ba ŋaa wʋtɩtɩɩ nɛ, a leŋ nɩaa laa dii a chɩŋ ba lɛ kpaŋ kpaŋ.

Koloosi Nɩaa 1:24

Lɛɛlɛ mɩ tʋɔŋ tɔrɔ hɛɛ-la mɩ sɩ na a pɩma lɛ. Hɛɛ-la mɩ sɩ na ma wɩaa nɛ leŋe Kirisito sɩ na hɛɛ-la nɩalɩŋ sɩ laa ʋ wɩaa dii aa hilimi dɛrɛ. Nɩalɩŋ nɛ ŋaa ʋ yaraa.

Koloosi Nɩaa 4:18

Lɛɛlɛ mɩ-na Pɔɔl tɩtɩa nɛ ŋmʋnsa aa chʋɔlɛma. Má sɩ́ mɩ wɩaa yʋ arɩ ba sɩ tɔmɛ dɩa ma kala. Wɩa lahɔrɩmɔ lɛ ʋ jaŋ pɛ ma lɛ.

Koloosi Nɩaa 4:3

Má pɛ chʋɔlɛ Wɩa pɩpɩ la ma, dɩ Wɩa wuo suri wombiiŋ pɩla dɩ la wuo bʋl Kirisito wɩalɩŋ fa sɩ faa. Ba wɩaa nɛ tɩɩ ba kɛmmɛ tɔ dɩa.

2 Timoti 1:16

Ama baal-la ba sɩɩ yɩrɛ Ɔnɩɩsɩfɔrɔs, ʋ nɛ pɛ mɩ lɛ woruŋ a ŋaa mɩ nyuŋ faasa nyaasɛ. Ba sɩ kɛmmɛ kaa tɔ dɩa ŋɩɩ, hɩɩsɩŋ fa bɩ ʋ kɛnɛ a tɩŋ mɩ wɩaa. La Tɩɩna Wɩa jaŋ fá ʋ dɩ ʋ dɩa nɩaa nenige.

2 Timoti 1:8

Ŋɩɩ wɩaa dɩ ŋ nɛ bʋl La Tɩɩna Yesu wɩaa pɩpɩ nɩaa, sɩ́ leŋe dɩ hɩɩsɩŋ kɛnɩŋ a tɩŋ Yesu wɩaa. Bɩra sɩ́ leŋe dɩ hɩɩsɩŋ kɛnɩŋ mɩ ma wɩaa, a tɩŋ ba sɩ kɛmmɛ tɔ dɩa Kirisito wɩaa. Ama Wɩa doluŋ lɛ, sɛɩ dɩ la kala na hɛɛŋ a tɩŋ Yesu wʋzɔmɔ-la wɩaa.

Fɩlɩmɔŋ 1:1

Mɩ-na Pɔɔl, nɩɩ-la ba sɩ kaa tɔ dɩa a tɩŋ Yesu Kirisito wɩaa arɩ la naambie Timoti nɛ ŋmʋnsɛ teniŋ deeŋ aa pɩ ŋ-na Fɩlɩmɔŋ. Ŋ ŋaa la nandɔŋ-choolii nɛ, a bɩra ŋaa la tɩtɩnnɩ dɔŋ ma.

Fɩlɩmɔŋ 1:23

Ɛpafɩras ma ba sɩ kaa tɔ dɩa a pɛ mɩ lɛ Yesu wɩaa, ʋ ma ka chʋɔlʋŋ.

Fɩlɩmɔŋ 1:9

Ama a tɩŋ mɩ sɩ choŋ wɩaa, mɩ jaŋ sʋlʋŋ dɩ ŋ ŋaa wɩɩ-la. Mɩ-na Pɔɔl nɛ paala chɩŋ Yesu Kirisito naasɩŋ lɛ aŋ lɛɛlɛ hɛ sarɩka lɛ a tɩŋ ʋ wɩaa.

Jɔɔŋ Wʋnaalaa 2:10

Má sɩ́ leŋe dɩ fawʋllʋŋ kɛmma a mʋ tɩgɛ hɛɛ kala ma sɩ jaŋ na lɛ. Mɩ bʋlaa pɩma, Sɩtaanɩ jaŋ magɩsɛ ma dɔnsʋŋ a leŋ dɩ ba kɛmma tɔ bɩnɩŋ dɩa. Ma jaŋ na hɛɛŋ a yi tapʋlaa fii. Dɩ ba nɩɩ chɛ dɩ ba kpʋma ma, ma-na ha chɩŋ wɩalɩŋ ma sɩ laa dii lɛ. Dɩ ma nɛ ŋaa ŋɩɩ, mɩ jaŋ joŋ mɩɩ-zɔmʋŋ pɩma Wɩa-jaŋ lɛ.