Ɛfɛsɩs Nɩaa 2:8 - WƖA TENIŊ

⁸ Wɩa lahɔrɩmɔ nɛ tɩɩ ʋ laama ta, a tɩŋ ma sɩ laa ʋ wɩaa dii. Ʋ bɩ naga ma tɩtɩa doluŋ lɛ nɛ tɩɩ Wɩa laama ta, ʋ ŋaa ŋɩɩ pɩma chɔgɩta nɛ.

Ɛfɛsɩs Nɩaa 2:8 ပူးပေါင်းရင်းမြစ်များ

Matiu 16:17

Ŋɩɩ nɛ Yesu bʋl, “Saamɔŋ, Jɔɔŋ bie, Wɩa jaŋ pɛ ŋ lɛ, wʋjɩmɩŋ deeŋ bɩ naga nuhuobiine nɛ pɩŋ. Ama mɩ Nyɩmma sɩ hɛ Wɩa-jaŋ nɛ pɩŋ.

Matiu 20:9

Nɩalɩŋ sɩ to harɩŋ mʋ baga-la, ʋ timba warɩpʋla kʋbala.

Maak 16:16

Nɩɩ-la kala sɩ laa mɩ wɩaa dii a leŋ ba fou Wɩɩchʋɔlɛ lɩɩŋ, Wɩa jaŋ laaʋ ta, ama nɩɩ-la kala sɩ bɩ mɩ wɩaa laa dii, Wɩa jaŋ joŋ cheeriŋ pʋ.

Luuk 7:50

Ama Yesu bʋla pɩ haal-la, “Ŋ sɩ laa Wɩa dii, ŋɩɩ nɛ tɩɩ ŋ na laatanɩŋ. Mʋ arɩ yarɩfɩɛlaa.”

Jɔɔŋ 3:36

Nɩɩ-la kala sɩ laa mɩ-na Wɩa Bie wɩaa dii, ʋ kɛŋ mɩɩsɩ-la sɩ bɩ dɛrɛ, ama nɩɩ-la kala sɩ bɩ mɩ-na Wɩa Bie wɩalɩŋ ka to, ʋ bɩ jaŋ kɔ dɩ ʋ kɛŋ mɩɩsɩ-la sɩ bɩ dɛrɛ, ama Wɩa jaŋ na baanɩŋ ʋ tɩɩna nyuŋ a kaa mʋ wuu.

Jɔɔŋ 4:10

Ŋɩɩ nɛ Yesu bʋla pʋ, “Dɩ ŋ nɛ fa jɩŋ kʋ-la Wɩa sɩ joŋo pɩ nɩaa, a fa jɩŋ nɩɩ-la sɩ sʋlʋŋ dɩ ŋ ŋaa lɩɩŋ pʋ dɩ ʋ nyʋa, ŋ fa jaŋ sʋlʋ dɩ ʋ pɩŋ lɩɩ-la sɩɩ pɩ nɩaa mɩɩsɩŋ.”

Jɔɔŋ 5:24

Wʋtɩtɩɩ nɛ mɩ bʋla pɩpɩma, nɩɩ-la kala sɩ jegile nɩɩ mɩ niiŋ wɩaa a laa nɩɩ-la ma sɩ tɩmmɛ wɩaa dii, ʋ jaŋ kɛŋ mɩɩsɩ-la sɩ bɩ dɛrɛ. Sarɩya bɩ jaŋ dii tɩɩna, ʋ lɩɩ sʋʋŋ bʋa lɛ nɛ a kɛŋ mɩɩsɩŋ.

Jɔɔŋ 6:35

Ŋɩɩ nɛ Yesu bʋla pɩba, “Mɩ nɛ ŋaa kʋdiile-la sɩɩ pɩ nɩaa mɩɩsɩŋ. Nɩɩ-la kala sɩ kɔ mɩ teeŋ, losuŋ bɩra bɩ jaŋ kɛnʋ. Nɩɩ-la ma sɩ laa mɩ wɩaa dii, lɩɩnyʋasʋŋ bɩra bɩ jaŋ kɛnʋ.

Jɔɔŋ 6:37

Nʋʋkala mɩ Nyɩmma sɩ joŋo pɩmɛ, ʋ jaŋ kɔ mɩ teeŋ. Nɩaa deemba kala sɩ kɔ mɩ teeŋ, mɩ bɩ jaŋ kɔ dɩ mɩ kiriba ta,

Jɔɔŋ 6:40

Wɩalɩŋ mɩ Nyɩmma sɩɩ chɛ nɛ ŋ-la: Dɩ nʋʋ na-kala sɩ na mɩ-na ʋ Bie a laa mɩ wɩaa dii, dɩ ʋ kɛŋ mɩɩsɩ-la sɩ bɩ dɛrɛ. Dʋnɩa dɩdɛrɩŋ ma, mɩ jaŋ chɩsʋ sʋʋŋ lɛ dɩ ʋ kɛŋ mɩɩsɩŋ.”

Jɔɔŋ 6:44

Nʋʋkala bɩ jaŋ wuo kɔ mɩ teeŋ, see dɩ mɩ Nyɩmma-la sɩ tɩmmɛ nɛ kɛŋ ʋ tɩɩna kaa kɔ mɩ teeŋ, dɩ mɩ chɩsʋ sʋʋŋ lɛ dʋnɩa dɩdɛrɩŋ.

Jɔɔŋ 6:65

Ŋɩɩ nɛ Yesu bɩra bʋl, “Wɩɩŋ deeŋ wɩaa nɛ tɩɩ mɩ bʋla pɩma arɩ nʋʋkala bɩ jaŋ wuo kɔ mɩ teeŋ, see dɩ mɩ Nyɩmma pɩ ʋ tɩɩna wombiiŋ.”

Tɩntɩŋŋaa 13:39

Nʋʋkala sɩ laa ʋ wɩaa dii, ʋ laa ʋ wʋbɔŋŋɔɔ kala ta nɛ, wʋbɔmɔ-la kala wɩalɩŋ Mosis fa sɩ ŋmʋnsa bil dɩ nɩaa tuto sɩ bɩ wuo laa ta.

Tɩntɩŋŋaa 14:27

Ba sɩ kɔ Antɩɔk, ba yɩrɛ nɩalɩŋ kala sɩ laa Yesu wɩaa dii a hilimi, a bʋl wʋzɔmɔ-la kala Wɩa sɩ to ba lɛ a ŋaa pɩba, a dagɛba ŋɩɩ Wɩa sɩ wuo suri wombiiŋ a pɩ nɩalɩŋ sɩ bɩ Juu tɩŋŋaa ŋaa, ba ma wuo laa Yesu wɩaa dii.

Tɩntɩŋŋaa 15:11

La laa dii arɩ La Tɩɩna Yesu dʋndʋŋa lahɔrɩmɔ lɛ Wɩa jaŋ laa la kala ta arɩ ʋ sɩ laaba ta ŋɩɩ.”

Tɩntɩŋŋaa 16:14

Haala-la sɩ jegile nɩɩ wɩalɩŋ tʋɔŋ dɔŋɔ yɩrɩŋ nɛ fa Lidia. Ʋ lɩɩ Taataya tinteeŋ nɛ, a biri gɛnnɩŋ yɩyallɛ. Ʋ faa chʋɔlɛ Wɩa nɛ woruŋ. Ʋ sɩ nɩɩ wɩalɩŋ Pɔɔl fa sɩɩ bʋl, Wɩa suri ʋ tʋɔŋ, ʋ laa wɩalɩŋ dii.

Tɩntɩŋŋaa 16:31

Ŋɩɩ nɛ ba bʋla pʋ, “Laa La Tɩɩna Yesu wɩaa dii, dɩ Wɩa laa ŋ dɩ ŋ dɩa nɩaa kala ta.”

Rom Tɩŋŋaa 10:14

Ama dɩ ba nɛ bɩ ʋ wɩaa laa dii, ɛɛ nɛ ba jaŋ ŋaa a yɩrɛ ʋ yɩrɩŋ dɩ ʋ laaba ta? Dɩ ba nɛ bɩra bɩ ʋ wɩaa nɩa, ɛɛ nɛ ba jaŋ ŋaa laa ʋ wɩaa dii? Dɩ nʋʋ ma nɛ saa bɩ ʋ wɩaa bʋla pɩba, ɛɛ nɛ ba jaŋ wuo ŋaa nɩɩ?

Rom Tɩŋŋaa 10:17

Ŋɩɩ wɩaa, ŋ yie nɩɩ wɩɩ nɛ a laa dii. Ba nɛ ŋaa wɩalɩŋ sɩ tɩgɛ Kirisito lɛ.

Rom Tɩŋŋaa 4:16

Ŋɩɩ wɩaa, nii-la Wɩa sɩ hɛ, nɩalɩŋ sɩ laa Wɩa dii nɛ jaŋ naʋ. Ʋ ŋaa zile kʋŋ nɛ a pɩ Abɩraham doho nɩaa kala. Ʋ bɩ naga arɩ ʋ joŋo pɩ nɩalɩŋ sɩɩ to wɩalɩŋ Mosis sɩ bile dʋndʋŋa nɛ, ama ba dɩ nɩalɩŋ kala sɩ laa Wɩa dii a nagɛ Abɩraham fa sɩ laa Wɩa dii ŋɩɩ, ba kala nɛ ʋ joŋo pa nɩalɩŋ sɩ keri ba penee arɩ nɩalɩŋ sɩ bɩ ba penee kere kala, bɛɛ wɩaa Abɩraham nɛ ŋaa la kala nyɩmma Wɩa sɩpaaŋ.

Rom Tɩŋŋaa 4:5

Ama nɩɩ-la sɩ bɩ ʋ wʋŋaalaa lɛ nɩɩ beŋ, aŋ laa dii arɩ Wɩa jaŋ wuo ŋaa dɩ nɩɩ-la sɩɩ ŋaa wʋbɔŋŋɔɔ na tʋɔpʋla ʋ sɩpaaŋ, ʋ sɩ laa Wɩa dii ŋɩɩ jaŋ ŋaa dɩ ʋ kɛŋ tʋɔpʋla Wɩa sɩpaaŋ.

Rom Tɩŋŋaa 9:16

Wɩɩŋ deeŋ saa bɩ naga nuhuobiine sɩ cho wɩalɩŋ a wʋwalɩmɛ dɩ ʋ ŋaaba nɛ tɩɩ, ama Wɩa sɩ fá la nenige nɛ tɩɩ,

Galiisia Nɩaa 3:14

Kirisito ŋaa wɩɩŋ deeŋ pɩ nɩalɩŋ sɩ bɩ Juu tɩŋŋaa ŋaa dɩ ba wuo to ʋ lɛ a na pɛnɛ-la Wɩa sɩ hɛ niiŋ pɩ Abɩraham arɩ ʋ jaŋ joŋo pɩba. Dɩ la nɛ laa Kirisito wɩaa dii, ʋ Dɩŋ-zɔŋ-la ʋ sɩ hɛ niiŋ arɩ ʋ jaŋ joŋo pɩla, la jaŋ wuo laa.

Galiisia Nɩaa 3:22

Ama Wɩa teniŋ tʋɔŋ ba bʋla arɩ dʋnɩa nɩaa kala ŋaa wʋbɔŋŋɔɔ yosi nɛ. Wɩa bʋl ŋɩɩ dɩ ʋ wuo joŋ kʋ-la wɩaa ʋ fa sɩ bʋla a pɩ nɩalɩŋ sɩ laa Yesu wɩaa dii nɛ, a tɩŋ ba sɩ laa Wɩa dii.

Ɛfɛsɩs Nɩaa 1:19

Mɩ bɩraa sʋlʋ dɩ ʋ wuo leŋ dɩ ma jɩŋ ŋɩɩ ʋ dol-bal-la sɩ bɩ magɩa kɛnɛ nɩalɩŋ sɩ laa ʋ wɩaa dii teeŋ. Ʋ yie to ʋ dol-bal-la lɛ nɛ a tɩŋ ʋ tɩntɩŋŋaa.

Ɛfɛsɩs Nɩaa 2:10

Wɩa nɛ ŋaala. Ʋ ŋaala dɩ la dɩ Kirisito Yesu ŋaa kʋbala nɛ a ŋɩŋaa wʋzɔŋŋɔɔ. Ʋ ŋaa wʋzɔŋŋɔɔ deemba bil la lɛ faa faa kala nɛ dɩ la ŋɩŋaaba.

Ɛfɛsɩs Nɩaa 2:5

a leŋ la dɩ Kirisito kala kɛŋ mɩɩsɩŋ. La wʋbɔŋŋɔɔ fa leŋe la sʋʋ nɛ. Wɩa lahɔrɩmɔ lɛ nɛ ʋ laama ta.

Fɩlɩpa Nɩaa 1:29

Ma-na, Wɩa nɛ pɩma wombiiŋ dɩ ma laa Kirisito wɩaa dii aŋ pɛ na hɛɛŋ a tɩŋ ʋ wɩaa.

Koloosi Nɩaa 2:12

Ba sɩ foma Wɩɩchʋɔlɛ lɩɩŋ, ʋ naga ma dɩ Kirisito kala nɛ sʋba ba joŋo hugi, Wɩa chɩsɛ ma dɩ Yesu kala sʋʋ-la lɛ, a tɩŋ ma sɩ laa dii arɩ Wɩa kɛŋ doluŋ.

2 Tɛsalonaaka Nɩaa 1:9

Wɩa jaŋ cheiba a kaa mʋ wuu. Ba bɩ jaŋ wuo mʋ La Tɩɩna Yesu teeŋ. Ba bɩra bɩ jaŋ wuo na ʋ tʋla arɩ ʋ doluŋ.

Hiburu TƖŊŊAA 6:4

Dɩ Wɩa nɛ wuo suri nɩaa sɩaa dɩ ba wuo jɩŋ ʋ wɩaa, a wuo laa Wɩa zile kɩalɩŋ ma, a bɩra kɛŋ ʋ Dɩŋ-zɔmʋŋ ma,

1 Pɩɩta 1:5

A tɩŋ ma sɩ laa ʋ wɩaa dii ŋɩɩ, Wɩa ka pɔma nɛ arɩ ʋ doluŋ. Dɩ dʋnɩa nɛ kʋ dɩdɛrɛ, ʋ jaŋ dagɛ nɩaa ŋɩɩ ʋ sɩ laama ta.