Ɛfɛsɩs Nɩaa 2:4 - WƖA TENIŊ

⁴ Ama Wɩa chola nɛ kɩŋkɛŋ, a faasa fɩfá la nenige,

Ɛfɛsɩs Nɩaa 2:4 ပူးပေါင်းရင်းမြစ်များ

NƐHƖMAAYA 9:17

Ba vɩa dɩ ba jegile nɩɩ nɛ a bɩ wʋmagɩla-la ŋ sɩ ŋaa ma liise. Ba vɩa aŋ kɛŋ nyu-duo nɛ a lɩɩsɛ ba sɩpaalaara dɩ ʋ mɩɩra kɛmba mʋ Ijipiti tinteeŋ, lee-la ba fa sɩ ŋaa yosi. Ama ŋ ŋaa Wɩa sɩ joŋ wɩaa chɩchɛ nɩaa nɛ, a fɩfá nɩaa nisusuŋ, a kɛŋ zile. Ŋ baanɩŋ bɩ lɩma lɩma ka sii, ŋ chonuŋ ma bɩ dɛrɛ. Ŋɩɩ wɩaa, ŋ bɩ ba vɩa ta,

WƖA YƖƖLAA 145:8

La Tɩɩna ka fá nɩaa nenige nɛ, a kɛŋ zile. Ʋ baanɩŋ bɩ lɩma lɩma ka sii, ʋ cho nɩaa bʋa na-kala lɛ.

WƖA YƖƖLAA 51:1

Wɩa, ŋ chonuŋ sɩ bɩ dɛrɛ wɩaa, mɩɩ sʋlʋŋ, fá mɩ nenige. Ŋŋ fá nɩaa nenige kɩŋkɛŋ nɛ. Mɩɩ sʋlʋŋ, joŋ mɩ wʋbɔmɔ-la chɛmɛ.

WƖA YƖƖLAA 86:15

Ama ŋ-na La Tɩɩna, ŋ nɛ Wɩa sɩ kɛŋ zile a fɩfá nɩaa nenige. Ŋ baanɩŋ bɩ lɩma lɩma ka sii, ŋ kɛŋ chonuŋ arɩ wʋtɩtɩɩ.

WƖA YƖƖLAA 86:5

Ŋ wɩaa zɔmɔ, ŋ joŋ wɩaa ma a chɩchɛ nɩaa. La Tɩɩna, ŋ chonuŋ bɩ magɩa kɛnɛ, nɩalɩŋ kala sɩɩ chʋɔlʋŋ teeŋ.

MOSIS KƐŊ IZIRAL TƖŊŊAA LƖƖ 33:19

Ŋɩɩ nɛ La TƖƖNA bʋl, “Mɩ jaŋ leŋ dɩ mɩ tʋla laa ŋ sɩpaaŋ a heele yɩrɛ mɩ yɩrɩ-balɩŋ ‘La TƖƖNA’ ŋ sɩpaaŋ. Nɩalɩŋ mɩ sɩ lɩɩsa dɩ mɩ fá ba nenige, mɩ jaŋ fá ba nenige, nɩalɩŋ mɩ sɩ lɩɩsa dɩ mɩ fá ba nisusuŋ, mɩ jaŋ fá ba nisusuŋ.”

AZAAYA 63:7

Mɩ jaŋ leŋ dɩ nɩaa jɩŋ ŋɩɩ La TƖƖNA sɩ faasa cho nɩaa. Mɩ jaŋ dɛnnʋ a tɩŋ wɩalɩŋ kala ʋ sɩ ŋaa pɩ la Iziral tɩŋŋaa wɩaa. Ʋ chaasa ŋaa wʋzɔŋŋɔɔ yʋgɛ nɛ pɩla. La TƖƖNA fá la nenige nɛ a dagɛla ʋ chono-la sɩ bɩ dɛrɛ.

JƐRƖMAAYA 31:3

La TƖƖNA fa kɛŋ ʋ tɩtɩa dagɛla nɛ a bʋl, “Mɩ choma nɛ, chono-la bɩ dɩdɛrɩŋ kɛnɛ. Mɩ kɛmma kʋ kpagɛ mɩ tɩtɩa nɛ, a kɛŋ zile arɩ kenyiri ma teeŋ.

DANƖƐL 9:9

La TƖƖNA Wɩa, ŋŋ fá nɩaa nenige nɛ a joŋ wɩaa chɩchɛba, arɩ la sɩ lɩɩ ŋ harɩŋ ma kala,

JONA 4:2

Ʋ sʋl La TƖƖNA, “Ou, mɩ TƖƖNA, ŋ-la dee mɩ bʋl mɩ fa ha sɩ hɛ mɩ jaŋ lɛɛ? Ŋ-la wɩaa nɛ tɩɩ mɩ fa fá lɩma lɩma a mʋmʋ Taasɩs ŋɩɩ. Mɩ jɩma ŋ ŋaa Wɩa sɩ kɛŋ zile a fɩfá nɩaa nenige nɛ. Ŋ baanɩŋ bɩ lɩma lɩma ka sii. Ŋ cho nɩaa ma woruŋ aŋ ŋaa Wɩa sɩ bɩ cho ʋ joŋ wʋbɔŋ kala ŋaa nʋʋ lɛ.

Luuk 1:78

Wɩa kɛŋ zile aŋ fɩfá nɩaa nenige. Ʋ jaŋ laala ta a leŋ dɩ la hɔŋ pʋlʋmʋŋ tʋɔŋ.

Rom Tɩŋŋaa 10:12

Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa, ba kala ŋaa kʋbala nɛ Wɩa teeŋ. Ʋ bɩ ba kaa pɔrɛ. Ʋ ŋaa nʋʋkala Tɩɩna nɛ. Dɩ nʋʋkala nɛ yɩrʋ, ʋ jaŋ pɛ ʋ tɩɩna lɛ woruŋ.

Rom Tɩŋŋaa 2:4

Wɩa sɩ kɛŋ zile kɩŋkɛŋ a kɛŋ kenyiri ŋɩɩ, a nyalɩma pɩma maa ŋaa wɩaa, ma bene arɩ ʋ bɩ kʋŋ ŋaa? Ma bɩ jɩŋ arɩ Wɩa sɩ kɛŋ zile ŋɩɩ, ʋʋ chɛ dɩ ma bɩrɩma lɩɩ ma wʋbɔŋŋɔɔ lɛ nɛɛ?

Rom Tɩŋŋaa 5:8

Ama ŋɩɩ Wɩa sɩ daga arɩ ʋ chola nɛ ŋ-la: Bʋa-la lɛ la ha sɩ ŋaa wʋbɔŋ ŋaaraa nɛ Kirisito sʋʋ la wɩaa.

Rom Tɩŋŋaa 9:23

Ʋ ŋaa ŋɩɩ dɩ ʋ kɛŋ ʋ tʋla-la sɩ yʋga a dagɛ nɩalɩŋ nenige ʋ sɩ fá nɛ, nɩalɩŋ ʋ sɩ laa sɩpaaŋ lɩɩsɛ dɩ ba na ʋ tʋla-la.

Ɛfɛsɩs Nɩaa 1:7

La sɩ mɛrɛ Kirisito lɛ ŋɩɩ, ʋ joŋ ʋ chalɩŋ jaasɛ la wɩaa a tiŋ la wʋbɔŋŋɔɔ chɩmɩŋ, dɩ Wɩa joŋ la wʋbɔŋŋɔɔ chɛla. Wɩa zile yʋga nɛ kɩŋkɛŋ la teeŋ,

Ɛfɛsɩs Nɩaa 2:7

Wɩa ŋaa ŋɩɩ, dɩ ʋ wuo dagɛla ʋ lahɔrɩmɔ sɩ bɩ magɩa kɛnɛ nɛ, arɩ ŋɩɩ ʋ sɩɩ fá nɩaa nenige a kaa mʋ maachie kala. Ʋ to Kirisito lɛ a dagɛ ʋ zile sɩ yʋga ŋɩɩ la lɛ.

Ɛfɛsɩs Nɩaa 3:8

Wɩa nɩaa kala tʋɔŋ, mɩ nɛ ŋaa ba kʋbie, aŋ ka ʋ lɩɩsɛmɛ ʋ lahɔrɩmɔ lɛ dɩ mɩ bʋl ʋ wʋzɔmɔ-la wɩaa a pɩ nɩalɩŋ sɩ bɩ Juu tɩŋŋaa ŋaa, dɩ ba jɩŋ Kirisito dʋa-la sɩ bɩ dɩdɛrɩ kɛnɛ wɩaa,

2 Tɛsalonaaka Nɩaa 2:13

La naambiiri, ʋ maga dɩ la lɔllɛ Wɩa bʋa na-kala lɛ pɩpɩma nɛ, ma nɩalɩŋ La Tɩɩna Yesu sɩ cho. Ma nɛ Wɩa lɩɩsɛ bumbuŋ kala dɩ ʋ laama ta. Wɩa to ʋ Dɩŋ-zɔmʋŋ doluŋ lɛ dɩ ʋ leŋ dɩ ma ŋaa tʋɔpʋl tɩmma a tɩŋ ma sɩ laa wʋtɩtɩɩ-la dii wɩaa.

1 Timoti 1:14

Aŋ ka La Tɩɩna Wɩa ha pɛ mɩ lɛ kɩŋkɛŋ kɩŋkɛŋ a leŋ mɩ laa Kirisito Yesu dii, aŋ cho nɩaa ma.

2 Timoti 1:9

Wɩa nɛ laala ta a yɩrɛla dɩ la ŋaa ʋ nɩaa. Ʋ bɩ naga Wɩa to la wʋzɔŋŋɔɔ lɛ nɛ a laala ta. Ama ʋ tɩtɩa tʋɔtɔrʋŋ lɛ nɛ ʋ fá la nenige a laala ta. Yesu Kirisito lɛ nɛ ʋ to a ŋaa ŋɩɩ pɩla. Ʋ jɩma arɩ ʋ jaŋ ŋaa ŋɩɩ pɩla faafaa kala nɛ, ka dʋnɩa-na suomi.

1 Pɩɩta 1:3

Má leŋ dɩ la dɛnnɛ Wɩa, ʋ nɛ ŋaa La Tɩɩna Yesu Kirisito Nyɩmma. Ʋ fá la nenige nɛ kɩŋkɛŋ a leŋ la kɛŋ mɩɩ-falɩŋ, a tɩŋ ʋ sɩ chɩsɛ Yesu Kirisito sʋʋŋ lɛ. La saa yɩɛlʋ arɩ la jaŋ kɛŋ mɩɩsɩŋ,