DANƖƐL 12:1 - WƖA TENIŊ

¹ Ŋɩɩ nɛ kʋ-la sɩ nagɛ nuhuobiine a laalɛ gɛrɩpɛ fʋfʋlʋŋ gɛrɩŋ bɩra bʋl, “Bʋa-la lɛ Wɩa tɩndaarɩ-hɩaŋ-la ba sɩɩ yɩrɛ Maakɩl, nɩɩ-la sɩɩ pɔ ŋ nɩaa jaŋ kʋ lɩɩ. Bʋa-la lɛ hɛɛŋ jaŋ hɛ nɩmɛ. Wɩa sɩ ŋaa dʋnɩa a kaa kɔ bʋa-la lɛ hɛɛ-la doho ha bɩ jʋa aŋ ka. Ama ŋ nɩalɩŋ kala yɩraa sɩ hɛ mɩɩsɩŋ teŋ-la tʋɔŋ, ba jaŋ laaba ta.

DANƖƐL 12:1 ပူးပေါင်းရင်းမြစ်များ

WƖA YƖƖLAA 56:8

Ŋ jɩŋ tapʋlɩa-la mɩ sɩ gɔllɔ baarɛ nɛ, a na mɩ sɩlɩɩrɩŋ ma sɩ lɩɩ magɛ ŋɩɩ. Ŋ paa su ŋ kpaalɩŋ nɛ a ŋmʋnsɛ ba niiŋ bil.

WƖA YƖƖLAA 69:28

Kpʋ ba yɩraa ta mɩɩsɩŋ teŋ-la tʋɔŋ, sɩ́ leŋe dɩ ba yɩraa guoli tʋɔpʋl tɩŋŋaa yɩraa lɛ.

AZAAYA 4:3

Nɩalɩŋ kala sɩ ka Jerusalɛm lɛ a bɩ sʋba, nɩalɩŋ kala Wɩa sɩ lɩɩsa, ba jaŋ yɩrɛba tʋɔpʋl tɩŋŋaa.

AZAAYA 9:7

Ʋ kuoruŋ doluŋ arɩ ʋ fɩɛlɩŋ jaŋ pʋŋa pɩpɛ a kaa mʋ wuu, ʋ bɩ jaŋ dɛrɛ. Ʋ nɛ jaŋ hɔŋ Devit kuoru kpasa-la nyuŋ a beŋ ʋ nɩaa a kɛŋ kuorii-la woruŋ a leŋ dɩ ʋ chɩŋ kpaŋkpaŋ. Ʋ jaŋ kɛŋ wʋtɩtɩɩ arɩ tʋɔpʋla a benu a lɩɩ bʋa-la lɛ a kaa mʋ wuu. La TƖƖNA doluŋ kala Tɩɩna nyuŋ sɩ nyaasɛ wɩɩŋ deeŋ lɛ nɛ jaŋ leŋ dɩ ʋ ŋaa.

JƐRƖMAAYA 30:10

Ŋɩɩ wɩaa, má sɩ́ fawʋllʋŋ fá, mɩ tɩntɩnna Jekɔb doho nɩaa. Iziral tɩmma, má sɩ́ leŋe dɩ ma niiree maa. Mɩ-na ma TƖƖNA nɛ bʋla. Mɩ jaŋ sɛnɛ laama ta tintee-bolii-la ma sɩ hɛ lɛ a kɛmma kɔ dɩa. Mɩ jaŋ laa ma doho nɩalɩŋ sɩ hɛ yoŋ-baga lɛ ta. Iziral tinteeŋ jaŋ bɩra kɛŋ fɩɛlɩŋ dɩ ba hɔŋ sɔm, nʋʋkala bɩ jaŋ ŋaa dɩ fawʋllʋŋ kɛmba.

JƐRƖMAAYA 30:7

Tapʋlɩɩ-la chaasa lɔrɛ nɛ. Tapʋlɩɩ dɔŋ jaŋ tuo a nagʋ. Bʋa-la lɛ wʋwalɩmaa jaŋ jʋʋ Jekɔb, ama ʋ jaŋ lɩɩ ba lɛ suoo.”

ƐZƖKƖƐL 13:9

Mɩ jaŋ dɔgɩsɛ ma nɩalɩŋ sɩ nyɩɛ wɩaa arɩ maa na wɩaa a nagɛ duosoo tʋɔŋ nɛ, a vʋgaa nyɩɛ wɩaa. Ma bɩra bɩ jaŋ guoli mɩ nɩalɩŋ sɩ yie hilime vʋvʋʋrɛ wɩaa tʋɔŋ, koo dɩ ba ŋmʋnsɛ ma yɩraa hɛ Iziral tɩŋŋaa tʋɔŋ koo ma jʋʋ Iziral tinteeŋ. Ŋɩɩ nɛ ma jaŋ jɩŋ arɩ mɩ nɛ ma TƖƖNA Wɩɩjarɩbakɔ.

ƐZƖKƖƐL 34:24

Mɩ-na ba TƖƖNA nɛ jaŋ ŋaa ba Wɩa, dɩ mɩ tɩntɩnna Devit ma ŋaa ba sɩpaalaara. Mɩ-na ma TƖƖNA nɛ bʋla.

ƐZƖKƖƐL 5:9

A tɩŋ mɩ sɩɩ kɩsɛ tɔmɔ-la kala ŋ sɩ mɛ wɩaa, mɩ jaŋ dɔgʋsʋŋ a magɛ ŋɩɩ mɩ ha sɩ bɩŋ dɔgɩsɔ magɛ, aŋ maachie kala bɩra bɩ jaŋ dɔgʋsʋŋ ŋɩɩ.

DANƖƐL 10:13

Ama Sɩtaanɩ tɩndaarʋ-la sɩɩ beŋ Pɛsɩa tinteeŋ tɔ mɩ wombiiŋ tapʋlaa mara arɩ kʋbala nɛ. Ŋɩɩ nɛ Maakɩl sɩ ŋaa Wɩa tɩndaaraa nɩhɩaŋ dɔŋɔ kʋ pɛ mɩ lɛ, a tɩŋ Sɩtaanɩ tɩndaarʋ-la sɩɩ beŋ Pɛsɩa tinteeŋ fa sɩ tɔ mɩ wombiiŋ wɩaa.

DANƖƐL 10:21

Ama mɩ jaŋ laa sɩpaaŋ bʋl wɩɩ-la ba sɩ ŋmʋnsa hɛ Wʋtɩtɩɩ Teŋ-la lɛ. Nʋʋkala bɩ mɩ lɛ pɛ yuoba, see Wɩa tɩndaara Maakɩl. Ʋ nɩɩ pɔ ma Iziral tɩŋŋaa.

DANƖƐL 11:45

Ʋ jaŋ hɛ ʋ kuoru-lɛŋŋɛɛ Mediterenia mʋgʋ-balɩŋ arɩ peel-la nyuŋ Wɩa dɩɩ-balɩŋ sɩ chɩna pɛgɛ. Ŋɩɩ bʋa lɛ nɛ ʋ jaŋ sʋʋ, nʋʋ bɩ jaŋ pɛ ʋ lɛ.”

DANƖƐL 7:10

Ka nyiniŋ nagɛ fuoŋ a pɩpɛllɛ, a lɩlɩɩ ʋ sɩpaaŋ. Nɩaa bʋɩ-bʋɩba tɩma pʋpʋ, ka nɩaa bʋɩ-bʋɩba fii bʋbʋɔ-bugoo bʋɩ fii chɩŋ ʋ sɩpaaŋ. Ba suomi dɩ ba dii nɩaa sarɩya a suri tenniŋ.

DANƖƐL 9:12

Ŋ leŋe wɩalɩŋ ŋ sɩ bʋla tɩgɛ la dɩ la sɩpaalaaraa lɛ kʋ ŋaa wʋtɩtɩɩ nɛ. Ŋ sɩ joŋ wʋlɔrʋnʋŋ ŋaa la lɛ, dʋnɩa kala lɛ wʋdoho-la sɩ ŋaa Jerusalɛm lɛ ha bɩ ŋaa aŋ ka.

JOWƐL 2:2

Ʋ jaŋ ŋaa biriŋ lim tapʋlɩɩ, duoŋ-bɩlɩmbaanaa jaŋ tɔ dɩ leriŋ biri. A nagɛ wɩɩpɔsʋŋ sɩ yie guu tɔɔ lɩɩ ŋɩɩ peelee nyuŋ, ŋɩɩ nɛ laalɩyuoroo sɩ yʋga a kɛŋ doluŋ woruŋ jaŋ kɔ. Ba doho ha bɩ kɔ aŋ ka, maachie ma ba bɩra bɩ jaŋ kɔ.

MALAKAƖ 3:16

Ŋɩɩ nɛ nɩalɩŋ kala sɩɩ fá La TƖƖNA bʋl wɩaa dɔŋɔba teeŋ, La TƖƖNA jegile nɩɩ, aŋ leŋ ba ŋmʋnsɛ nɩalɩŋ kala sɩɩ fáʋ a zizilu yɩraa hɛ teniŋ tʋɔŋ dɩ ʋ liliisi ba wɩaa.

Matiu 24:21

Wɩa sɩ ŋaa dʋnɩa a kuu lɩɩ jɩnɩŋ, nʋʋkala ha bɩ hɛɛ-doho deeŋ na a nagɛ ŋɩɩ, ba bɩra bɩ jaŋ na hɛɛŋ ŋɩɩ a kaa mʋ wuu.

Maak 13:19

Wɩa sɩ ŋaa dʋnɩa a kʋʋ lɩɩ jɩnɩŋ, nʋʋkala ha bɩ hɛɛŋ deeŋ na a nagɛ ŋɩɩ, nʋʋ bɩra bɩ jaŋ na hɛɛŋ ŋɩɩ a kaa mʋ wuu.

Luuk 10:20

Ama má sɩ́ leŋe dɩ ma tʋɔŋ tɔrɛ arɩ jɩŋ-bɔŋŋɔɔ sɩɩ to ma niiŋ lɛ, má leŋ dɩ ma tʋɔŋ tɔrɛ a tɩŋ ba sɩ ŋmʋnsɛ ma yɩraa Wɩa-jaŋ lɛ.”

Rom Tɩŋŋaa 11:15

Juu tɩŋŋaa sɩ vɩa Wɩa wɩaa ŋɩɩ leŋe dʋnɩa nɩkaanaa arɩ Wɩa sɩŋ nɛ. Dɩ Juu tɩŋŋaa nɛ bɩra kʋ laa Wɩa wɩaa dii, ɛɛ nɛ saa ʋ jaŋ nagɛ? Ʋ jaŋ nagɛ nɩsʋʋnʋŋ sɩ sii sʋʋŋ lɛ nɛ.

Rom Tɩŋŋaa 11:26

Ŋ-la lɛ nɛ Wɩa jaŋ to a laa Iziral tɩŋŋaa kala ta. Ba ŋmʋnsɛ ŋɩɩ nɛ Wɩa teniŋ tʋɔŋ. Ba sɩ, “La Laataara jaŋ lɩɩ Zaayɔŋ. Ʋ jaŋ kiri wʋbɔŋŋɔɔ kala Jekɔb doho nɩaa tʋɔŋ.”

Ɛfɛsɩs Nɩaa 1:21

Ʋ nɛ kɩɩ kɩalɩŋ kala la sɩ bɩ na ka ba kɛŋ doluŋ a bibeŋ leriŋ. Ʋ nɛ kɛŋ yɩrɩŋ a kɩɩ nʋʋ na-kala sɩ kɛŋ yɩrɩŋ dʋnɩa deeŋ lɛ arɩ dʋnɩa-la sɩ jaŋ bɩra kɔ lɛ.

Fɩlɩpa Nɩaa 4:3

Ŋ-na mɩ tɩntɩnnɩ dɔŋ, mɩɩ chɛ dɩ ŋ pɛ haalaa deemba lɛ nɛ dɩ ba sɩŋ. Ba dɩ Kɩlɛmɛnt nɛ pɛ mɩ lɛ la bʋl Yesu wʋzɔmɔ-la a pɩ nɩaa, a saa pɛ mɩ tɩntɩnnɩ dɔnsʋ-la kala lɛ. Ba kala yɩraa nɛ hɛ mɩɩsɩŋ teŋ-la lɛ.

Juud 1:9

Ama bʋa-la lɛ Wɩa tɩndaaraa kʋhɩaŋ ba sɩɩ yɩrɛ Maakɩl, arɩ Sɩtaanɩ fa sɩ kɛŋ Mosis kʋsʋʋŋ wɩaa yuyuo dɔŋɔ, Maakɩl bɩ wɩɩkala bʋla chei Sɩtaanɩ tʋɔŋ, ama ʋ ta bʋl nɛ arɩ La Tɩɩna Wɩa jaŋ dɔgɩsʋ.

Jɔɔŋ Wʋnaalaa 1:5

arɩ Yesu Kirisito teeŋ. Ʋ nɛ ŋaa wɩalɩŋ sɩada tɩɩna a kɛŋ wʋtɩtɩɩ. Ʋ nɛ ŋaa Nɩɩ-la sɩ sʋba aŋ laa sɩpaaŋ sii sʋʋŋ lɛ. Ʋ nɛ kɛŋ dʋnɩa kuoroo kala doluŋ. Má leŋ dɩ la dɛnnʋ, a tɩŋ ʋ sɩ chola ŋɩɩ a joŋ ʋ chalɩŋ a jaasɛ, a lɩɩsɛla wʋbɔŋŋɔɔ lɛ.

Jɔɔŋ Wʋnaalaa 12:7

Bʋa deeŋ lɛ laalɩŋ sii Wɩa-jaŋ lɛ. Wɩa tɩndaarɩ-hɩaŋ ba sɩɩ yɩrɛ Maakɩl arɩ tɩndaaraa dɔnsʋŋ suomi a yuyuo dɩŋ-la. Ŋɩɩ nɛ dɩŋ-la arɩ ʋ harɩ-tooroo maa yuo.

Jɔɔŋ Wʋnaalaa 13:8

Nɩɩ-la kala yɩrɩŋ sɩ tuo mɩɩsɩŋ teŋ-la lɛ a lɩɩ dʋnɩa dɩ-suomuŋ, jaŋ dɛnnɛ baga kʋ-la. Pie-bie-la ba sɩ kpʋa nɛ tɩɩ teŋ-la.

Jɔɔŋ Wʋnaalaa 17:14

Ba dɩ Pie-bie-la jaŋ yuo dɔŋɔ, ama Pie-bie-la jaŋ yuo diiba, bɛɛ wɩaa ʋ nɛ ŋaa nɩalɩŋ kala sɩɩ beŋ nɩaa Kʋhɩaŋ, a kɛŋ kuoroo kala ma doluŋ. Ʋ dɩ ʋ harɩ-tooroo nɛ jaŋ yuo diiba. Nɩaa deemba nɛ ŋaa nɩalɩŋ Wɩa sɩ yɩra aŋ lɩɩsɛ, ba ŋaa nɩaa sɩ kɛŋ wʋtɩtɩɩ.”

Jɔɔŋ Wʋnaalaa 20:12

Ŋɩɩ nɛ ka mɩ na nɩalɩŋ sɩ sʋba, nɩhɩasɩŋ arɩ hambiisiŋ kala, dɩ ba chɩŋ kuoru kpasa-la sɩpaaŋ. Ŋɩɩ nɛ ba suri tenniŋ, a bɩra suri teniŋ dɔŋɔ ma, mɩɩsɩŋ teniŋ nɛ ŋɩɩ. Tenni-la lɛ nɛ ba ŋmʋnsɛ nʋʋkala sɩ hɛ dʋnɩa lɛ wʋŋaalaa hɛ, ba lɛ nɛ ba to a dii nʋʋkala sɩ sʋba sarɩya.

Jɔɔŋ Wʋnaalaa 20:15

Dɩ nʋʋkala yɩrɩŋ nɛ tuo mɩɩsɩŋ teŋ-la tʋɔŋ, ba yie joŋu yuo hɛ nyiŋ-bal-la tʋɔŋ nɛ.

Jɔɔŋ Wʋnaalaa 3:5

Nɩɩ-la kala sɩ wuo yuo dii Sɩtaanɩ, ʋ tɩɩna jaŋ laalɛ gɛrɩ-pʋllʋŋ. Mɩ bɩ jaŋ kpʋ ʋ yɩrɩŋ ta mɩɩsɩŋ teŋ-la tʋɔŋ. Mɩ jaŋ suri mɩ niiŋ a yɩrɛ ʋ yɩrɩŋ mɩ Nyɩmma Wɩa arɩ ʋ tɩndaaraa sɩpaaŋ.

Jɔɔŋ Wʋnaalaa 7:14

Ŋɩɩ nɛ mɩ bʋla pʋ, “Ŋ nɛ jɩma, mɩ kʋhɩaŋ.” Ŋɩɩ nɛ ʋ bʋla pɩmɛ, “Nɩaa deemba nɛ Wɩa lɩɩsɛ hɛɛ-bal-la tʋɔŋ. Ba chɛsɛ ba gɛnnɩŋ Pie-bie-la chalɩŋ lɛ nɛ, ba lɩɩ a pʋllɛ.