2 Kɔrɩntɩ Nɩaa 8:8 - WƖA TENIŊ

⁸ Mɩ bɩ maa fʋgɛ dɩ ma joŋ kɩaa pɩpɩ nɩaa. Nɩaa dɔnsʋŋ fɩɛsɛ sɩɩŋ nɛ a cho dɩ ba ŋaa kɩaa kpɩkpaa nɩaa. Ŋɩɩ nɛ tɩɩ mɩɩ chɛ dɩ ma ma dagɛ arɩ wʋtɩtɩɩ, ma sɛnɛ cho nɩaa nɛ.

2 Kɔrɩntɩ Nɩaa 8:8 ပူးပေါင်းရင်းမြစ်များ

ƐZƖKƖƐL 33:31

Mɩ nɩaa jaŋ yʋgɛ a kɔ ŋ teeŋ dɩ ba jegile nɩɩ ŋ niiŋ wɩaa, ama ba bɩ jaŋ kɛmba tɩŋ. Ba niiree yie bʋbʋl wʋzɔŋŋɔɔ nɛ, ama ba tʋɔŋ bɔmɔ a gɩrɩma lɩlaa nɩaa kɩaa.

Rom Tɩŋŋaa 12:9

Má cho dɔŋɔ arɩ wʋtɩtɩɩ. Má bɛrɛ wʋbɔŋŋɔɔ, aŋ joŋ ma tɩtɩa hɛ wʋzɔŋŋɔɔ ŋaanɩŋ lɛ.

1 Kɔrɩntɩ Nɩaa 7:12

Ma nɩkaanaa ma, mɩ-na Pɔɔl nɛ bʋl wɩɩŋ deeŋ pɩpɩma, La Tɩɩna Wɩa dee. Dɩ baal-la sɩ laa Wɩa wɩaa dii nɛ kɛŋ haal-la sɩ bɩ Wɩa wɩaa laa dii, dɩ haal-la nɛ sɛyɛ dɩ ba hɔŋ, baal-la bɩ maga dɩ ʋ vɩaʋ.

1 Kɔrɩntɩ Nɩaa 7:25

Ma sɩ pɩɛsɛmɛ wɩɩ-la a mʋ tɩgɛ nɩalɩŋ ha sɩ bɩ bala koo haala jaa lɛ, Wɩa bɩ wɩɩkala bʋla pɩla a mʋ tɩgɛ ba lɛ, ama Wɩa sɩ fá mɩ nenige ŋɩɩ, ʋ leŋe mɩ ŋaa nɩtɩtɩɩ nɛ, ŋɩɩ wɩaa mɩɩ chɛ dɩ mɩ bʋl wɩɩ-la mɩ sɩ kɛnɛ nɛ a tɩgɛ hatoloo lɛ.

1 Kɔrɩntɩ Nɩaa 7:6

Mɩ sɩ bʋl wɩɩŋ deeŋ a pɩpɩma, ʋ bɩ naga arɩ mɩɩ chɛ dɩ mɩ bil nii nɛ a pɩma dɩ ma tuto.

2 Kɔrɩntɩ Nɩaa 6:6

La yie dagɛ arɩ la ŋaa Wɩa tɩntɩnnaa nɛ, bɛɛ wɩaa la bɩ disiniŋ kɛnɛ. La jɩŋ wɩaa nɛ, a kɛŋ kenyiri, a kɛŋ zile, a kɛŋ Wɩa Dɩŋ-zɔmʋŋ ma, a cho nɩaa arɩ wʋtɩtɩɩ.

2 Kɔrɩntɩ Nɩaa 8:10

Wɩɩ-la tʋɔŋ, wɩɩ-la mɩ-na sɩ na arɩ ʋ maga dɩ ma ŋaa nɛ ŋ-la, dɩɩmɩŋ ma sɩ suomi wɩɩ-la, ma ŋaaʋ a mʋ dɛrɛ. Ma nɛ laa sɩpaaŋ kɛŋ tʋɔŋ dɩ ma kɩɛsɛ kɩaa kaa mʋ pɩ Wɩa nɩalɩŋ, aŋ sɛnɛ ŋaa ma.

2 Kɔrɩntɩ Nɩaa 8:24

Ŋɩɩ wɩaa, má dagɛ nɩaa deemba arɩ ma sɛnɛ choba nɛ, arɩ ŋɩɩ la sɩ bigisi ma lɛ pɩba, dɩ nɩalɩŋ sɩ laa Yesu wɩaa dii aa hilimi tasɩ-la lɛ na dɩ wʋtɩtɩɩ nɛ.

2 Kɔrɩntɩ Nɩaa 9:2

bɛɛ wɩaa mɩ paala jɩŋ arɩ ma kɛŋ ma tɩtɩa nɛ dɩ ma pɛ ba lɛ. Ŋɩɩ wɩaa nɛ tɩɩ mɩ bigisi ma lɛ a pɩ Wɩa nɩalɩŋ sɩ hɛ Masidoonia tinteeŋ lɛ. Mɩ bʋla pɩba arɩ nɩalɩŋ sɩ hɛ Akaaya tinteeŋ lɛ kɛŋ ba tɩtɩa hɛ dɔŋɔ harɩŋ jɩna-la lɛ nɛ dɩ ba pɛ Wɩa nɩaa lɛ. Ma sɩ fɩɛsɛ sɩɩŋ ŋɩɩ, ma leŋe ba nɩaa jesiŋ kala nɛ cho dɩ ba pɛ a kɩɛsɛ kɩaa pɩpɩ nɩalɩŋ.

2 Kɔrɩntɩ Nɩaa 9:7

Nʋʋkala magɛ dɩ ʋ tɩa magɛ ŋɩɩ ʋ tʋɔbɩɩnaa sɩ daga nɛ. Ʋ bɩ maga dɩ ʋ ŋaa saka saka. Ʋ bɩ maga dɩ ʋ bɩɩnɛ arɩ baa fʋgʋ nɛ dɩ ʋ pɩ kɩalɩŋ. Nʋʋkala maga dɩ ʋ tɩa kɩaa ʋ tʋɔtɔrʋŋ lɛ nɛ, bɛɛ wɩaa Wɩa cho nɩɩ-la sɩɩ pa arɩ tʋɔtɔrʋŋ nɛ.

Ɛfɛsɩs Nɩaa 4:15

Ama ʋ maga dɩ la cho dɔŋɔ a bʋl wʋtɩtɩɩ pɩpɩ dɔŋɔ bʋa na-kala. Dɩ la nɩɩ ŋaa ŋɩɩ, la jaŋ wuo waa Wɩa wɩaa lɛ a kʋ nagɛ Kirisito sɩ nagɛ ŋɩɩ. Nɩalɩŋ sɩ laa Yesu wɩaa dii aa hilimi nagɛ nuhuobiine nandaasɩŋ nɛ. Kirisito nɛ ŋaa ba nyuŋ.

Ɛfɛsɩs Nɩaa 6:24

Nɩalɩŋ sɩ cho La Tɩɩna Yesu Kirisito a kaa mʋ deeŋ deeŋ, Wɩa jaŋ fá nɩaa deemba kala nenige.

Hiburu TƖŊŊAA 10:24

Má leŋ dɩ la cho dɔŋɔ, a kɛŋ dɔŋɔ arɩ sɩɩfɩɛsɩŋ, aa pɛ dɔŋɔ lɛ, a ŋɩŋaa wʋzɔŋŋɔɔ dɔŋɔ lɛ.

JOSUA 24:14

Maa fá La TƖƖNA a tutou arɩ ma wʋtɩtɩɩ. Má paa vesi-la ma naabalɩmaba fa sɩɩ kpaarʋ Yufireti fuo-la cholo arɩ Ijipiti lɛ a yuo ta, aŋ tɩma pɩpɩ La TƖƖNA.

1 Pɩɩta 1:22

A tɩŋ ma sɩɩ to wʋtɩtɩɩ wombiiŋ lɛ ŋɩɩ, ma pɩɩsɛ ma disiniŋ kala ta nɛ. Ma sɛnɛ cho ma naambiiri-la sɩ laa Wɩa wɩaa dii nɛ. Ŋɩɩ wɩaa, má kɛŋ ma tʋɔŋ arɩ ma doluŋ kala a wasa cho dɔŋɔ.