2 Kɔrɩntɩ Nɩaa 6:4 - WƖA TENIŊ

⁴ Ŋɩɩ wɩaa wɩɩ-na kala la sɩɩ ŋaa lɛ, la yie dagɛ arɩ la ŋaa Wɩa tɩntɩnnaa nɛ. Wʋwalɩmaa yie jʋʋla, la nɩna hɛɛŋ, la tʋɔŋ faasa chei, ama la yie faasa nyalɩmɛ nɛ.

2 Kɔrɩntɩ Nɩaa 6:4 ပူးပေါင်းရင်းမြစ်များ

AZAAYA 61:6

Ma-na jaŋ ŋaa La TƖƖNA Wɩɩsʋllɩ sɩpaalaaraa, a ŋaa la Wɩa tɩntɩnnaa. Ma nɛ jaŋ tɩɩ tinteyee kala dʋa, a kɛŋ ba kɩalɩŋ ŋmuŋmoo bɔyɛ.

JOWƐL 1:9

Ba giri mɩaa Wɩɩsʋlʋŋ arɩ kʋnyʋalaa Wɩɩsʋlʋŋ ta nɛ La TƖƖNA dɩɩ-balɩŋ lɛ. Ŋɩɩ leŋ Wɩɩsʋllɩ sɩpaalaaraa yiyel, nɩalɩŋ sɩɩ tɩŋ La TƖƖNA sɩpaaŋ.

JOWƐL 2:17

Má leŋ dɩ Wɩɩsʋllɩ sɩpaalaaraa, nɩalɩŋ sɩɩ tɩŋ La TƖƖNA sɩpaaŋ chɩŋ Wɩa dɩɩ-bal-la zawʋra arɩ Wɩɩsʋlʋŋ koru-la pɛgɛ a yiyel. Má leŋ dɩ ba bʋl, “La TƖƖNA, laa sʋlʋŋ, joŋo chɛ ŋ nɩaa. Sɩ́ leŋe dɩ nɩalɩŋ ŋ sɩ lɩɩsa ŋaa mɔmɩa, dɩ tinteyee nɩaa sisieri ba lɛ. Sɩ́ leŋe dɩ tinteyee nɩaa pɩɛsɛ arɩ nɩɩ nɛ ba Wɩa hɛ.”

Luuk 21:19

Dɩ ma nɛ nyalɩma, ma jaŋ laa ma mɩɩsɩŋ.”

Jɔɔŋ 16:33

Mɩ bʋl wɩaa deemba pɩma dɩ ma wuo hɔŋ arɩ fɩɛlɩŋ nɛ. Dʋnɩa deeŋ tʋɔŋ ma jaŋ na hɛɛŋ. Ama má leŋ dɩ ma nyuŋ nyaasɛ. Mɩ yuo dii dʋnɩa nɛ.”

Tɩntɩŋŋaa 2:22

Ŋɩɩ nɛ Pɩɩta bɩra bʋl, “Iziral tɩmma, má jegile nɩɩ wɩaa deemba mɩ sɩɩ chɛ mɩ bʋla pɩma. Yesu sɩ lɩɩ Nazarɛt nɛ Wɩa lɩɩsa pɩma. Wʋmagɩlaa arɩ wʋkpuŋkperisiŋ Wɩa sɩ to ʋ lɛ ŋaa ma sɩɩŋ lɛ nɛ dagɛ ŋɩɩ. Ma ma jɩma nɛ.

Tɩntɩŋŋaa 20:34

Ma tɩtɩa jɩma mɩ tɩma nɛ woruŋ, a na kɩalɩŋ kala mɩ dɩ mɩ toori dɔnsʋŋ sɩɩ chɛ.

Tɩntɩŋŋaa 9:16

Mɩ nɛ jaŋ dagʋ hɛɛŋ magɛ ŋɩɩ ʋ sɩ jaŋ na a tɩŋ mɩ wɩaa.”

Rom Tɩŋŋaa 14:18

Nʋʋkala sɩ to wombiiŋ deeŋ lɛ a tɩma pɩ Kirisito, Wɩa tʋɔŋ jaŋ tɔrɛ ʋ nyuŋ, dɩ nɩaa ma zizilu.

Rom Tɩŋŋaa 16:10

Má chʋɔlɛ Apɛlɛs ma, ʋ faasa chɩŋ Kirisito wɩaa lɛ nɛ woruŋ. Má chʋɔlɛ Arisitobulus dɩa nɩaa ma.

Rom Tɩŋŋaa 3:5

Ka la wʋbɔmɔ-la la sɩɩ ŋaa nɛ chaasa dagɛ arɩ Wɩa kɛŋ wʋtɩtɩɩ, bɛɛ nɛ laa chɛ dɩ la bʋl? Mɩɩ chɛ dɩ mɩ bʋl nuhuobiine tʋɔbɩɩnaa wɩaa nɛ a pɩɛsɛ: Dɩ Wɩa nɛ dɔgɩsɛla a tɩŋ la wʋbɔŋŋɔɔ wɩaa, ʋ kɩaa bɩ sɩŋ ʋ sɩ ŋaa ŋɩɩ, koo?

Rom Tɩŋŋaa 5:8

Ama ŋɩɩ Wɩa sɩ daga arɩ ʋ chola nɛ ŋ-la: Bʋa-la lɛ la ha sɩ ŋaa wʋbɔŋ ŋaaraa nɛ Kirisito sʋʋ la wɩaa.

1 Kɔrɩntɩ Nɩaa 3:5

Kʋbɛɛ nɛ Apɔlɔs? Kʋbɛɛ nɛ Pɔɔl? La ŋaa Wɩa tɩntɩnnaa nɛ. La nɛ bʋl Wɩa wɩaa pɩma ma laa dii. La kʋŋkala tɩŋ tɩntɩmɩɩ-la La Tɩɩna Wɩa sɩ joŋo pɩla dɩ la tɩŋ nɛ.

1 Kɔrɩntɩ Nɩaa 4:1

Ma sɩɩ benla ŋɩɩ, ʋ maga dɩ nʋʋkala jɩŋ arɩ la ŋaa Kirisito tɩntɩnnaa nɛ. Wɩa joŋ ʋ wɩalɩŋ fa sɩ faa a hɛ la nɩsɩŋ lɛ nɛ.

1 Kɔrɩntɩ Nɩaa 9:11

Ŋɩɩ tɩtɩa nɛ Wɩa wɩalɩŋ la sɩ bʋla pɩma, ba nagɛ kʋdoho nɛ la duu ma teeŋ. Ŋɩɩ wɩaa dɩ ma nɩɩ pɛ la lɛ arɩ dʋnɩa kɩaa, ma sɩ́ bɩɩna arɩ ma ŋaa kikieli nɛ.

2 Kɔrɩntɩ Nɩaa 11:23

Ba ŋaa Kirisito tɩntɩnna nɛɛ? Mɩɩ bʋl wɩaa arɩ mɩ nyuŋ tuo nɛ. Mɩ ma ŋaa dɔŋɔ nɛ, a paala kɩɩba. Mɩ nɛ paala fɩɛsɛ sɩɩŋ a tɩŋ kɩŋkɛŋ. Ba kɛmmɛ tɔ dɩa a yʋgɛ nɛ. Ba sɩ ŋmoomi kɩŋkɛŋ mɩ ka mʋa dɩ mɩ sʋba, mɩ bɩ ʋ ma niiŋ jɩŋ.

2 Kɔrɩntɩ Nɩaa 11:27

Mɩ faasa tɩŋ nɛ woruŋ a kala lɔl. Tapʋlaa yʋga mɩ sɩ bɩ doŋ pɩna, losuŋ arɩ lɩɩnyʋasʋŋ ma kɛmmɛ, mɩ paala bɩ kʋdiilee kɛnɛ dɩ mɩ dii, a bɩ gɛrɩ-yuŋii kɛnɛ dɩ mɩ kaa tɔ waarɩŋ, ka waarɩŋ kpʋmɛ.

2 Kɔrɩntɩ Nɩaa 11:9

Bʋa-la lɛ mɩ fa sɩ hɛ ma teeŋ, dɩ mɩ nɩɩ chɛ kʋŋkala, mɩ ha bɩ ma kʋŋkala baŋŋaa lɛ kɛnɛ. La naambiiri-la sɩ hɛ Masidoonia tinteeŋ lɛ nɛ faa pɩmɛ kɩalɩŋ kala mɩ sɩɩ chɛ. Mɩ fa bɩ chɛ dɩ mɩ ŋaa chʋga kʋŋkala ma lɛ. Mɩ saa bɩ chɛ dɩ mɩ ŋaa chʋga ma kʋŋkala lɛ.

2 Kɔrɩntɩ Nɩaa 12:10

Ŋɩɩ wɩaa a tɩŋ Kirisito wɩaa dɩ mɩ nɛ bɩ doluŋ kɛnɛ, dɩ ba nɩɩ tʋʋsɛmɛ, dɩ mɩ nɩɩ na hɛɛŋ, dɩ ba nɛ to naasɩŋ dʋdɔgɩsɛmɛ, koo dɩ wɩaa nɛ jʋʋmɛ ma, mɩ tʋɔŋ ha yie tɔrɛ nɛ. Dɩ mɩ nɛ bɩ doluŋ kɛnɛ, Wɩa yie pɩmɛ ʋ doluŋ nɛ.

2 Kɔrɩntɩ Nɩaa 12:12

Mɩ nyalɩma nɛ woruŋ a wuo tɩŋ ma teeŋ. Wɩalɩŋ kala mɩ sɩ ŋaa, wʋmagɩlaa arɩ wʋkpuŋkperisi-la arɩ wɩalɩŋ kala mɩ sɩ ŋaa Wɩa Dɩŋ-zɔmʋŋ doluŋ lɛ daga arɩ mɩ sɛnɛ ŋaa Kirisito nanzɔɔ-tɩtɩɩ nɛ.

2 Kɔrɩntɩ Nɩaa 2:17

Nɩaa yʋga nɛ a gɔllɔ bʋbʋl Wɩa niiŋ wɩaa a lɩlaa moribiee, ama la-na bɩ ŋɩɩ ŋaa. La-na ŋaa nɩtɩtɩɩba nɛ. Wɩa nɛ lɩɩsɛla dɩ la tɩŋ tɩntɩmɩŋ deeŋ. Kirisito doluŋ lɛ nɛ laa bʋl Wɩa wɩaa.

2 Kɔrɩntɩ Nɩaa 3:6

Wɩa tɩtɩa nɛ pɩla doluŋ la ŋaa nii-faalɩɩ-la ʋ sɩ hɛ pɩ nuhuobiinee tɩntɩnnaa. Nii-la bɩ naga ʋ ŋaa wɩɩ ba sɩ ŋmʋnsa bil a tuto, ama nii-falɩɩ-la doluŋ lɩɩ Wɩa Dɩŋ-zɔmʋŋ wɩalɩŋ nɛ. Wɩalɩŋ Mosis sɩ ŋmʋnsa bil dɩ nɩaa tuto bɩ nɩaa mɩɩsɩŋ wuo pa, ama Wɩa wʋzɔmɔ-la sɩ lɩɩ ʋ Dɩŋ-zɔŋ-la teeŋ nɩɩ pa mɩɩsɩŋ.

2 Kɔrɩntɩ Nɩaa 4:17

La teeŋ hɛɛ-la la sɩɩ na bɩ yʋgɛ aŋ bɩra bɩ jaŋ dieni maa. Hɛɛ-la dagɛla wombii-la la sɩ jaŋ to a laa yɩrɩŋ nɛ Wɩa teeŋ. Yɩrɩ-la jaŋ ŋaa yɩrɩ-bal. Yɩrɩ-bal-la la sɩ jaŋ laa jaŋ kɩɩ hɛɛ-la la sɩɩ na. La jaŋ kɛŋ yɩrɩ-balɩŋ deeŋ deeŋ.

2 Kɔrɩntɩ Nɩaa 4:2

Hɩɩsɩ wɩalɩŋ arɩ wʋkaa-faalɩɩ-la nɩaa sɩ lʋara ŋɩŋaa, la-na vɩaba ta nɛ faafaa kala. La bɩra bɩ nʋʋ nyɩsɛ. La bɩ wɩaa nyɩɛ pɩpɛ Wɩa niiŋ wɩalɩŋ lɛ. Ama Wɩa sɩpaaŋ la chaasa bʋl wɩaa, dɩ nʋʋkala tʋɔbɩɩnaa jɩŋ arɩ wʋtɩtɩɩ nɛ la bʋbʋl.

2 Kɔrɩntɩ Nɩaa 4:8

La na hɛɛŋ nɛ woruŋ lee-na kala, ama hɛɛ-la bɩ la wuo. Bʋa dɔŋɔ lɛ la yie bɩ jɩŋ wɩɩ-la kala lɛ la sɩ hɛ, ama la ha kɛŋ yɩɛlaa.

2 Kɔrɩntɩ Nɩaa 7:11

Má bee na wɩalɩŋ sɩ ŋaa ma lɛ a tɩŋ Wɩa sɩ leŋe ma tʋɔŋ chei. Lɛɛlɛ ma fɩɛsɛ sɩɩŋ nɛ a kɛŋ ma tɩtɩa hɛ dɔŋɔ dɩdagɛ arɩ ma bɩ wɩɩ cheye. Ma na baanɩŋ nɛ a tɩŋ wʋbɔmɔ-la ma sɩ ŋaa wɩaa. Fawʋllʋŋ kɛmma. Ma chomi nɛ a fɩɛsɛ sɩɩŋ dɩ ma namɛ. Ma kɛŋ ma tɩtɩa hɛ dɔŋɔ dɩ ma dɔgɩsɛ nɩɩ-la sɩ ŋaa wʋbɔmʋŋ nɛ ma tʋɔŋ. Ma daga arɩ ma bɩ wɩɩkala cheye wɩɩ-la lɛ.

Koloosi Nɩaa 1:11

Wɩa jaŋ pɩma ʋ dol-bal-la, dɩ ma wuo kɛŋ pɩɩna arɩ kenyiri, a kɛŋ tʋɔtɔrʋŋ

Koloosi Nɩaa 1:24

Lɛɛlɛ mɩ tʋɔŋ tɔrɔ hɛɛ-la mɩ sɩ na a pɩma lɛ. Hɛɛ-la mɩ sɩ na ma wɩaa nɛ leŋe Kirisito sɩ na hɛɛ-la nɩalɩŋ sɩ laa ʋ wɩaa dii aa hilimi dɛrɛ. Nɩalɩŋ nɛ ŋaa ʋ yaraa.

1 Tɛsalonaaka Nɩaa 3:7

Ŋɩɩ wɩaa la naambiiri, laa na hɛɛŋ nɛ ka wɩaa ma wʋwalɩmɛla, ama la sɩ nɩa arɩ ma chɩŋ wɩalɩŋ ma sɩ laa dii lɛ ŋɩɩ, la tʋɔŋ pɩŋ dɩ-bala nɛ ma wɩaa.

1 Tɛsalonaaka Nɩaa 5:14

La naambiiri, laa sʋlma dɩ ma kpʋrɩsɛ yarɩwɩɩ tɩŋŋaa dɩgɩlaa, a pɛ fawʋlʋbaa lɛ dɩ ba kɛŋ bɔɩ-duoŋ, a pɛ nɩalɩŋ sɩ bɩ faasa chɩŋ Wɩa wɩaa lɛ. Má kɛŋ kenyiri arɩ nʋʋkala.

1 Timoti 2:15

Ama dɩ haala nɛ laa Wɩa dii, a cho nɩaa, a leŋ dɩ ʋ sɩaa fɩɛlɛ a bɩ disiniŋ kɛnɛ, Wɩa jaŋ laaʋ ta biiriŋ lʋlʋŋ lɛ.

1 Timoti 4:6

Dɩ ŋ nɛ joŋ wɩaa deemba a dagɛ ŋ dɔnsʋŋ tɩŋŋaa sɩ laa Yesu wɩaa dii, ŋ jaŋ ŋaa Kirisito Yesu tɩntɩnnɩ-zɔŋ. Ŋɩɩ jaŋ dagɛ arɩ ŋ waa nɛ wʋtɩtɩɩ-la la sɩ laa dii lɛ, arɩ wʋzɔmɔ-la la sɩ dagɩŋ ŋ to lɛ.

1 Timoti 6:11

Ama ŋ-na sɩ ŋaa Wɩa tɩntɩnnʋ, sɩ́ wɩaa deemba kala ŋaa. Leŋ dɩ ŋ sɩɩŋ fɩɛsɛ dɩ ŋ ŋɩŋaa tʋɔpʋl wɩaa, a tuto Wɩa wombiiŋ, a chɩŋ wɩalɩŋ ŋ sɩ laa dii lɛ, a cho nɩaa, a kɛŋ kenyiri, a kɛŋ ŋ tɩtɩa muuri nɩaa sɩpaaŋ.

2 Timoti 1:8

Ŋɩɩ wɩaa dɩ ŋ nɛ bʋl La Tɩɩna Yesu wɩaa pɩpɩ nɩaa, sɩ́ leŋe dɩ hɩɩsɩŋ kɛnɩŋ a tɩŋ Yesu wɩaa. Bɩra sɩ́ leŋe dɩ hɩɩsɩŋ kɛnɩŋ mɩ ma wɩaa, a tɩŋ ba sɩ kɛmmɛ tɔ dɩa Kirisito wɩaa. Ama Wɩa doluŋ lɛ, sɛɩ dɩ la kala na hɛɛŋ a tɩŋ Yesu wʋzɔmɔ-la wɩaa.

2 Timoti 2:24

Nɩɩ-la sɩ tɩma pɩpɩ La Tɩɩna Wɩa, ʋ bɩ maga dɩ ʋ yuyuo yuosuŋ. Ʋ maga dɩ ʋ kɛŋ zile nɛ nʋʋkala lɛ, a wuo dɩdagɛ nɩaa woruŋ, aŋ pɛ kɛŋ kenyiri.

2 Timoti 4:5

Ama ŋ-na hɛ doluŋ a kɛŋ ŋ tɩtɩa woruŋ wɩɩ na-kala lɛ. Dɩ hɛɛŋ nɛ jʋʋŋ ma, nyalɩmɛ. Ŋ sɩ ŋaa Wɩa tɩntɩnnʋ ŋɩɩ, bʋl Yesu wʋzɔmɔ-la a pɩ nɩaa a tɩŋ ŋ tɩntɩmɩɩ-la kala woruŋ.

Hiburu TƖŊŊAA 12:1

La sɩ na dɩ nɩ-daŋ deeŋ gollila a ŋaa pɛ-naaraa a mʋ tɩgɛ ba sɩ laa Wɩa wɩaa laa dii lɛ, má leŋ dɩ la joŋ wɩalɩŋ kala sɩ nyagɛla bil ta, arɩ wʋbɔmɔ-la kala sɩ mɛrɛ la lɛ. Má leŋ dɩ la nyalɩmɛ a mʋmʋ sɩpaaŋ, a ŋaa wɩɩ-la Wɩa sɩ joŋo bil la sɩpaaŋ.

Jɔɔŋ Wʋnaalaa 1:9

Mɩ-na ma naambie Jɔɔŋ nɛ ŋmʋnsɛ teniŋ deeŋ a pɩpɩma. A tɩŋ Yesu Kirisito wɩaa nɛ laa na hɛɛŋ. Ama la nɩalɩŋ sɩ na hɛɛ-la ŋɩɩ a tɩŋ ʋ wɩaa, la ma jaŋ jʋʋ Wɩa kuorii-la tʋɔŋ. Hɛɛ-la kala lɛ la dii kenyiri nɛ a nyalɩmɛ. Mɩ fa bʋl Wɩa wɩaa nɛ aŋ pɛ ŋaa Yesu Kirisito sɩada tɩɩna. Ŋɩɩ wɩaa nɛ tɩɩ ba kɛmmɛ kaa mʋ tintee kʋbala baa yɩrɛ Patɩmɔs. Lɩɩŋ golli tintee-la kala chu nɛ.

Jɔɔŋ Wʋnaalaa 3:10

A tɩŋ ma sɩ to mɩ niiŋ wɩaa a nyalɩmɛ, mɩ ma jaŋ pɔma a lɩɩsɛma hɛɛ-la sɩ jaŋ jʋʋ dʋnɩa nɩaa kala, a magɩsɛba.