2 Kɔrɩntɩ Nɩaa 3:3 - WƖA TENIŊ

³ Ma nɛ saa chaasa dagɛ arɩ ma ŋaa teŋ-la Kirisito sɩ leŋe la ŋmʋnsɛ. Teniŋ deeŋ, ʋ bɩ naga kʋ-la nɩaa sɩ kaa ŋmʋnsɛ tenniŋ nɛ. Wɩa sɩ weye joŋ ʋ Dɩŋ-zɔmʋŋ nɛ a kaa ŋmʋnsɛ wɩalɩŋ hɛ ma tʋɔŋ. Ba saa bɩra bɩ ŋmʋnsa hɛ tabɩɩ-taala lɛ, ama ba ŋmʋnsa hɛ nuhuobiinee tʋɔŋ lɛ nɛ.

2 Kɔrɩntɩ Nɩaa 3:3 ပူးပေါင်းရင်းမြစ်များ

WƖA YƖƖLAA 40:8

Mɩ Wɩa, mɩ cho dɩ mɩ ŋaa wɩalɩŋ sɩɩ tɔrɛ ŋ tʋɔŋ nɛ. Wombii-la ŋ sɩ bile dɩ la tuto hɛ mɩ tʋɔŋ lɛ nɛ.”

WƖA YƖƖLAA 42:2

Mɩ chaasa chɛ ŋ-na Wɩa sɩ weye nɛ woruŋ. Bʋa bɛɛ lɛ nɛ mɩ jaŋ naŋ?

WƖA YƖƖLAA 84:2

mɩ fa cho dɩ mɩ hɛ nɩmɛ nɛ. Mɩɩ hɩɛnɛ dɩ mɩ hɛ La Tɩɩna dɩa tʋɔŋ nɛ, a yɩɩ yɩɩlaa arɩ tʋɔtɔrʋŋ a pɩ ŋ-na Wɩa sɩ weye.

MOSIS KƐŊ IZIRAL TƖŊŊAA LƖƖ 24:12

Ŋɩɩ nɛ La TƖƖNA bʋla pɩ Mosis, “Kʋ jɩl mɩ teeŋ peel-la nyuŋ a gbɛrɛmɛ, mɩ jaŋ joŋ tabɩɩ-taalɩa-la lɛ mɩ sɩ ŋmʋnsɛ mɩ niiŋ wɩalɩŋ hɛ dɩ ma tuto arɩ wɩalɩŋ mɩ sɩ daga dɩ ma ŋɩŋaa a pɩŋ.”

MOSIS KƐŊ IZIRAL TƖŊŊAA LƖƖ 31:18

La TƖƖNA sɩ bʋl wɩaa pɩ Mosis Sɩnaɩ peel-la nyuŋ a dɛrɛ, ʋ joŋ tabɩɩ-taalɩa-la balɩa lɛ ʋ sɩ ŋmʋnsɛ ʋ niiŋ wɩaa hɛ a pɩ Mosis.

MOSIS KƐŊ IZIRAL TƖŊŊAA LƖƖ 32:15

Ŋɩɩ nɛ Mosis lɩɩ peel-la nyuŋ kʋ tuu a kori tabɩɩ-taalɩa-la balɩa lɛ Wɩa niiriŋ sɩ hɛ. Wɩa tuuri wɩalɩŋ hɛ ba sɛsɩŋ balɩa lɛ nɛ, sɩpaaŋ arɩ harɩŋ kala.

MOSIS KƐŊ IZIRAL TƖŊŊAA LƖƖ 34:1

Ŋɩɩ nɛ La TƖƖNA bʋla pɩ Mosis, “Yɛrɛ lɩɩsɛ tabɩɩ-taalaa balɩa dɩ ba nagɛ bumbuŋ kɩalɩŋ ŋ sɩ joŋo lo yɛrɛ, mɩ jaŋ tuuri wɩalɩŋ tɩtɩa fa sɩ hɛ bumbuŋ kɩalɩŋ lɛ a hɛ ba lɛ.

NAMAGABA 3:3

Kɛŋ chonuŋ arɩ wʋtɩtɩɩ bʋa na-kala lɛ, leŋ dɩ ba nɛ ŋaa ŋ banzɔlɔ, leŋ dɩ ba hɛ ŋ tʋɔŋ lɛ.

NAMAGABA 7:3

Leŋ dɩ ba nagɛ nenii-pɩrɩŋ dɩ ŋ joŋo hɛ ŋ neniiŋ. Ŋmʋnsɛba hɛ ŋ tʋɔŋ lɛ.

JƐRƖMAAYA 10:10

Ama La TƖƖNA nɛ ŋaa Wɩɩ-tɩtɩɩ. Ʋ nɛ Wɩa sɩ weye. Ʋ nɛ kuoru-bal-la sɩ hɛ nɩmɛ a kaa mʋ deeŋ deeŋ. Dɩ ʋ nɛ na baanɩŋ, tinteeŋ yie zigili nɛ. Dɩ ʋ baanɩŋ nɛ sie, tinteyee bɩ jaŋ wuo chɩŋ.

JƐRƖMAAYA 17:1

La Tɩɩna sɩ, “Hɔɔŋ nɛ ba kaa ŋmʋnsɛ Juda wʋbɔmʋŋ. Hɔɔ-chʋlachʋla-bie nɛ ba kaa tuuri. Ba ŋmʋnsɛ wɩalɩŋ hɛ ba tʋɔŋ lɛ nɛ arɩ ba vʋɩ-kpaarɛ korunuŋ nyilliŋ lɛ.

JƐRƖMAAYA 31:33

La TƖƖNA bɩra sɩ, “Bʋa-la lɛ nii-la mɩ sɩ jaŋ bil mɩ dɩ Iziral tɩŋŋaa pɛgɛ nɛ ŋ-la: Mɩ jaŋ joŋ wombii-la mɩ sɩ bile dɩ ba tuto wɩaa hɛ ba nyuŋ lɛ, aŋ ŋmʋnsʋ a hɛ ba tʋɔŋ ma lɛ. Mɩ jaŋ ŋaa ba Wɩa, dɩ ba ma ŋaa mɩ nɩaa.

ƐZƖKƖƐL 11:19

Mɩ jaŋ leŋ dɩ ba kɛŋ tʋɔ-bala a tutomi, a pɩba dɩŋ-falɩŋ. Mɩ jaŋ lɩɩsɛ tʋɔ-dol-la sɩ nagɛ tabɩɩŋ a hɛ ba lɛ ta, aŋ pɩba tʋɔ-la sɩ pʋnyɛ.

DANƖƐL 6:26

Mɩ hɛ niiŋ nɛ aa pɩ nʋʋ na-kala sɩ hɛ mɩ tinteeŋ sɛmɛ kala lɛ, arɩ ʋ maga dɩ ma fá Danɩɛl Wɩa nɛ a zizilu. Ʋ nɛ Wɩa sɩ weye. Ʋ nɛ hɛ nɩmɛ a kaa mʋ deeŋ deeŋ. Ʋ kuoruŋ bɩ jaŋ kɔ dɩ ʋ tele, ʋ doluŋ bɩ jaŋ dɛrɛ.

Matiu 16:16

Ŋɩɩ nɛ Saamɔŋ Pɩɩta bʋl, “Ŋ nɛ ŋaa Kirisito, Wɩa-la sɩ weye Bie.”

1 Kɔrɩntɩ Nɩaa 3:5

Kʋbɛɛ nɛ Apɔlɔs? Kʋbɛɛ nɛ Pɔɔl? La ŋaa Wɩa tɩntɩnnaa nɛ. La nɛ bʋl Wɩa wɩaa pɩma ma laa dii. La kʋŋkala tɩŋ tɩntɩmɩɩ-la La Tɩɩna Wɩa sɩ joŋo pɩla dɩ la tɩŋ nɛ.

2 Kɔrɩntɩ Nɩaa 3:6

Wɩa tɩtɩa nɛ pɩla doluŋ la ŋaa nii-faalɩɩ-la ʋ sɩ hɛ pɩ nuhuobiinee tɩntɩnnaa. Nii-la bɩ naga ʋ ŋaa wɩɩ ba sɩ ŋmʋnsa bil a tuto, ama nii-falɩɩ-la doluŋ lɩɩ Wɩa Dɩŋ-zɔmʋŋ wɩalɩŋ nɛ. Wɩalɩŋ Mosis sɩ ŋmʋnsa bil dɩ nɩaa tuto bɩ nɩaa mɩɩsɩŋ wuo pa, ama Wɩa wʋzɔmɔ-la sɩ lɩɩ ʋ Dɩŋ-zɔŋ-la teeŋ nɩɩ pa mɩɩsɩŋ.

2 Kɔrɩntɩ Nɩaa 3:7

Wɩalɩŋ Mosis sɩ ŋmʋnsa bil dɩ nɩaa tuto, ba ŋmʋnsa hɛ tabɩɩ-taala lɛ nɛ. Wɩalɩŋ fa bɩ nɩaa mɩɩsɩŋ wuo pa. Bʋa-la lɛ Wɩa sɩ jomba pɩpɩ Mosis, ʋ tʋla fa chaana hɛ ʋ lɛ nɛ. Ŋɩɩ nɛ Mosis sɩaa kala tʋtʋl, Iziral tɩŋŋaa bɩ ʋ sɩaa lɛ wuo beŋ. Ama tʋla-la fa jaŋ lɛl,

2 Kɔrɩntɩ Nɩaa 6:16

La ŋaa Wɩa-la sɩ weye dɩa nɛ, ʋ hɛ la lɛ. Ŋ bɩ jaŋ wuo jʋʋ Wɩa dɩa a kpaarɛ vʋɩyaa nɩmɛ. Ŋ-la nɛ Wɩa tɩtɩa bʋl ʋ teniŋ tʋɔŋ. Ʋ sɩ, “Mɩ jaŋ hɛ mɩ nɩaa tʋɔŋ a gʋgɔllɛ. Mɩ nɛ jaŋ ŋaa ba Wɩa, dɩ ba ma ŋaa mɩ nɩaa.

1 Tɛsalonaaka Nɩaa 1:9

Nɩaa yie bʋbʋl ŋɩɩ ma sɩ kɛnla woruŋ bʋa-la lɛ la sɩ kɔ ma teeŋ. Ba yie bʋl ŋɩɩ ma sɩ vɩa ma vʋɩyaa ta aŋ bɩrɩma to Wɩa. Ʋ nɛ weye, ʋ nɛ ŋaa Wɩɩ-tɩtɩɩ-la.

Hiburu TƖŊŊAA 10:16

“Dɩ bʋa-la nɛ yie, nii-la mɩ sɩ jaŋ bil mɩ dɩ Iziral tɩŋŋaa pɛgɛ nɛ ŋ-la: Mɩ jaŋ joŋ wombie-la mɩ sɩ bile dɩ ba tuto wɩaa hɛ ba nyuŋ lɛ, aŋ ŋmʋnsɛba hɛ ba tʋɔŋ ma lɛ.”

Hiburu TƖŊŊAA 8:10

La Tɩɩna bɩra sɩ, “Bʋa-la lɛ nii-la mɩ sɩ jaŋ bil mɩ dɩ Iziral tɩŋŋaa pɛgɛ nɛ ŋ-la: Mɩ jaŋ joŋ wombie-la mɩ sɩ bile dɩ ba tuto hɛ ba nyuŋ lɛ, aŋ ŋmʋnsɛba hɛ ba tʋɔŋ ma lɛ. Mɩ jaŋ ŋaa ba Wɩa, dɩ ba ma ŋaa mɩ nɩaa.

Hiburu TƖŊŊAA 9:14

Dɩ wɩaa deemba nɛ wuo pɩɩsɛ nɩaa disiniŋ ta, ŋɩɩ-na Kirisito chalɩŋ ma jaŋ wuo paala pɩɩsɛ nɩaa disiniŋ ta a kɩɩ bʋʋnaa koo nɛsɩŋ chalɩŋ. Kirisito fa bɩ disiŋ kala kɛnɛ. Wɩa Dɩŋ-zɔmʋŋ doluŋ lɛ, ʋ joŋ ʋ tɩtɩa pɩ Wɩa, a sʋʋ a tɩŋ la wɩaa. Ʋ jaŋ wuo leŋ dɩ ma tʋɔbɩɩnaa chesi dɩ má sɩ́ wʋbɔŋ bɩɩnʋ, ka dɩ ma wuo tɩma pɩpɩ Wɩa sɩ weye.

JOSUA 3:10

Dɩ ma nɩɩ mʋ, ma TƖƖNA jaŋ sɛnɛ kiri Kɛnaŋ tɩŋŋaa, Hiti tɩŋŋaa, Hivi tɩŋŋaa, Pɛrɛs tɩŋŋaa, Gɩgasɩ tɩŋŋaa, Amɔrɩ tɩŋŋaa arɩ Jebus tɩmma-la kala sɩ hɛ tintee-la lɛ dɩ ba lɩɩ. Ma jaŋ jɩŋ arɩ ma TƖƖNA Wɩa sɩ weye hɛ ma tʋɔŋ nɛ,

Jɔɔŋ Wʋnaalaa 2:1

Ŋmʋŋsɛ wɩaa deemba a pɩpɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi Ɛfɛsʋs lɛ. Mɩ-na nɩɩ-la sɩ kori chɛnwʋla-la balɩpɛ mɩ nadiiŋ nɩsɩŋ lɛ a vɩvɛŋ chaaŋ daasɩ-la balɩpɛ tʋɔŋ, mɩ nɛ tɩŋ tɩndaarɩŋ deeŋ.

Jɔɔŋ Wʋnaalaa 2:12

Bɩra ŋmʋnsɛ wɩaa deemba a pɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi taŋ-la ba sɩɩ yɩrɛ Pɛgamɔm lɛ. Mɩ-na nɩɩ-la sɩ kori tokobiiŋ niiriŋ balɩa kala sɩɩ dii nyagaga nɩɩ bʋl wɩaa deemba.

Jɔɔŋ Wʋnaalaa 2:18

Bɩra ŋmʋnsɛ wɩaa deemba nɛ a pɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi taŋ-la ba sɩɩ yɩrɛ Taataya lɛ. Mɩ-na Wɩa Bie nɛ bʋl wɩaa deemba. Mɩ sɩaa nagɛ nyiŋgeliŋ nɛ, ka mɩ naasɩŋ ma nagɛ kɔlɩɩŋ ba sɩ chɛsɛ ʋ faasa tʋtʋl.

Jɔɔŋ Wʋnaalaa 2:8

Bɩra ŋmʋnsɛ wɩaa deemba a pɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi Sɩmɩɩna lɛ. Wɩaa deemba lɩɩ mɩ-na Nɩɩ-la fa sɩ hɛ nɩmɛ bumbuŋ kala teeŋ nɛ, aŋ ha jaŋ hɛ nɩmɛ dʋnɩa dɩdɛrɩŋ. Mɩ sʋba nɛ, aŋ bɩra sii sʋʋŋ lɛ.

Jɔɔŋ Wʋnaalaa 3:1

Bɩra ŋmʋnsɛ wɩaa deemba a pɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi Saadɩs lɛ. Bʋla pɩba: Mɩ-na Nɩɩ-la sɩ kori Wɩa Dɩnsɩŋ balɩpɛ-la aŋ pɛ kɛŋ chɛnwʋlaa balɩpɛ-la nɛ bʋl wɩaa deemba pɩba. Mɩ jɩŋ ma Saadɩs nɩaa tɩntɩŋŋaa kala nɛ. Ma laa yɩrɩŋ arɩ ma weye nɛ, ama ma sʋba nɛ.

Jɔɔŋ Wʋnaalaa 3:14

Bɩra ŋmʋnsɛ wɩaa deemba pɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi Laadisiya taŋ-la lɛ. Mɩ-na nɛ Nɩɩ-la ba sɩɩ yɩrɛ “Amɩɩ,” a kɛŋ wʋtɩtɩɩ a didii dansɩa arɩ wʋtɩtɩɩ, Nɩɩ-la lɛ Wɩa sɩ to a ŋaa dʋnɩa, mɩ nɩɩ bʋl wɩaa deemba.

Jɔɔŋ Wʋnaalaa 3:22

Dɩgɩlaa tɩŋŋaa, má wuoli ma dɩgɩlaa a nɩɩ wɩalɩŋ Wɩa Dɩŋ-zɔmʋŋ sɩ bʋla pɩ nɩalɩŋ sɩ laa Yesu wɩaa dii aa hilimi lee-kala Esia tinteeŋ lɛ.

Jɔɔŋ Wʋnaalaa 3:7

Ŋmʋnsɛ wɩaa deemba pɩ Wɩa tɩndaarɩ-la sɩɩ beŋ nɩalɩŋ sɩ laa Yesu wɩaa dii aa hilimi Fɩladɛlɩfɩa lɛ. Mɩ-na Nɩɩ-la sɩ ŋaa tʋɔpʋl Tɩɩna arɩ Nɩtɩtɩɩ nɩɩ bʋl wɩaa deemba. Mɩ nɛ kori Devit taŋ-la boribiiŋ, dɩ mɩ nɛ suro, nʋʋkala bɩ wuo kaa tɔ, dɩ mɩ nɛ bɩra kaa tɔ ma, nʋʋkala bɩ wuo suri.

1 SAMƲƐL 17:26

Devit pɩɛsɛ laalɩyuoro-la dɔnsʋŋ sɩ chɩna kpagʋ, “Ma sɩ bɛɛ nɛ ba jaŋ ŋaa pɩ nɩɩ-la sɩ jaŋ kpʋ Fɩlɩsɩtɩa tɩŋŋaa baala deeŋ a lɩɩsɛ Iziral tɩŋŋaa hɩɩsɩŋ lɛ? Kʋbɛɛ nɛ ka Fɩlɩsɩtɩa tɩɩna deeŋ sɩ bɩ Wɩa ka to, aa tʋʋsɛ Wɩa-la sɩ weye laalɩyuoroo joŋŋoo?”