2 Kɔrɩntɩ Nɩaa 3:18 - WƖA TENIŊ

¹⁸ La nɩalɩŋ kala sɩ laa Yesu wɩaa dii, kʋ-la fa sɩ tɔ la sɩaa, Wɩa kaa suri nɛ. Kirisito tʋla jʋʋ la sɩaa nɛ la tʋtʋl arɩ ʋ sɩɩ tʋl ŋɩɩ. Ʋ kɛnla kaa bɩbɩrɩmɛ nɛ dɩ la wasa tʋtʋl, a kʋ nagʋ. La Tɩɩna Dɩŋ-zɔmʋŋ nɛ ŋaa ŋɩɩ la lɛ.

2 Kɔrɩntɩ Nɩaa 3:18 ပူးပေါင်းရင်းမြစ်များ

WƖA YƖƖLAA 84:7

Ba doluŋ fa pʋŋa pɛ nɛ a mʋmʋ bʋa-la lɛ ba sɩ mʋ chɩŋ ŋ-na Wɩa sɩpaaŋ Zaayɔŋ lɛ.

Jɔɔŋ 1:14

Ŋɩɩ nɛ wɩɩ-la bɩrɩmɛ nuhuobiine a kʋ hɛ la tʋɔŋ. Ʋ fa hɛ la teeŋ a fɩfá la nenige woruŋ, a kɛŋ wʋtɩtɩɩ. La na ʋ tʋla. Tʋla deeŋ ʋ Nyɩmma Wɩa nɛ joŋo pʋ, arɩ ʋ nɛ ŋaa ʋ Bie kala.

Jɔɔŋ 12:41

Azaaya fa na ŋɩɩ Yesu fa sɩ jaŋ kɛŋ doluŋ nɛ, ŋɩɩ nɛ tɩɩ ʋ bʋl ŋɩɩ.

Jɔɔŋ 17:22

Ŋ sɩ leŋe mɩ laa yɩrɩŋ ŋɩɩ, ŋɩɩ nɛ mɩ ma leŋ ba laa yɩrɩŋ. Mɩ ŋaa ŋɩɩ dɩ ba kala wuo ŋaa kʋbala nɛ, arɩ mɩ dɩŋ kala sɩ ŋaa kʋbala ŋɩɩ.

Jɔɔŋ 17:24

Mɩ Nyɩmma, ŋ paala chomi nɛ a leŋ mɩ laa yɩrɩŋ, ka dʋnɩa-na suomi. Mɩ saa chɛ dɩ ŋ leŋ dɩ nɩalɩŋ ŋ sɩ lɩɩsa pɩmɛ, dɩ ba hɛ mɩ teeŋ lee na-kala mɩ sɩ jaŋ hɛ nɛ, dɩ ba wuo na ŋɩɩ ŋ sɩ leŋe mɩ laa yɩrɩŋ.

Rom Tɩŋŋaa 12:2

Má sɩ́ ma nyuŋ joŋo hɛ dʋnɩa wʋŋaalaa lɛ. Ama má leŋ dɩ Wɩa kɛŋ ma tʋɔbɩɩnaa bɩrɩmɛ dɩ ba zɔŋ. Ŋɩɩ lɛ nɛ ma jaŋ wuo jɩŋ wɩɩ-la Wɩa sɩɩ chɛ. Ma jaŋ wuo jɩŋ wɩɩ-la sɩ zɔmɔ aa tɔrɛ Wɩa tʋɔŋ aŋ pɛ zɔŋ ma woruŋ.

Rom Tɩŋŋaa 13:14

Má leŋ dɩ Yesu Kirisito nɛ ŋaa ma laalɩyuori kɩaa, aŋ sɩ́ ma yaraa tʋɔtɔrɛ wʋŋaalaa lɛ to.

Rom Tɩŋŋaa 8:29

Nɩalɩŋ Wɩa sɩ laa sɩpaaŋ lɩɩsɛ, ʋ lɩɩsɛba dɩ ʋ kɛmba bɩrɩmɛ dɩ ba nagɛ ʋ tɩtɩa Bie nɛ, a leŋ ʋ Bie ŋaa ba kala kʋhɩaŋ.

Rom Tɩŋŋaa 8:4

Ʋ ŋaa ŋɩɩ dɩ la wuo kɛŋ doluŋ nɛ a ŋɩŋaa tʋɔpʋl wɩalɩŋ Mosis fa sɩ bile dɩ nɩaa tuto, la nɩalɩŋ sɩ bɩ la yaraa doluŋ lɛ ka to aŋ tuto Wɩa Dɩŋ-zɔmʋŋ doluŋ lɛ.

Rom Tɩŋŋaa 8:7

bɛɛ wɩaa dɩ nʋʋ nɛ joŋ ʋ nyuŋ kala a hɛ ʋ yaraa doluŋ lɛ, ʋ ŋaa Wɩa dʋndɔŋ nɛ. Ʋ bɩ chɛ dɩ ʋ to wɩalɩŋ Wɩa sɩ daga, ʋ paala bɩ wuo to.

1 Kɔrɩntɩ Nɩaa 13:12

Lɛɛlɛ la sɩ hɛ dʋnɩa deeŋ lɛ, ʋ naga laa beŋ Kirisito liigu liigu nɛ, a nagɛ nɩaa sɩ beŋ beenantɩrɛ lɛ a na kʋa liigu. La bɩ Kirisito chaasa nɩna woruŋ, ama maachie la sɩaa jaŋ na dɔŋɔ. Lɛɛlɛ mɩ jɩmʋ mʋa nɛ, ama maachie mɩ jaŋ chaasa jɩmʋ woruŋ, arɩ Wɩa sɩ jɩmmɛ ŋɩɩ.

1 Kɔrɩntɩ Nɩaa 15:49

La sɩ kɛŋ nɩɩ-la ba sɩ kɛŋ tɩarɩŋ mɛ nagɩsɩŋ ŋɩɩ, ŋɩɩ tɩtɩa nɛ la jaŋ kɛŋ nɩɩ-la sɩ lɩɩ Wɩa-jaŋ ma nagɩsɩŋ.

2 Kɔrɩntɩ Nɩaa 3:17

La Tɩɩna Kirisito arɩ Wɩa Dɩŋ-zɔmʋŋ kala ŋaa kʋbala nɛ. Lee-la kala saa La Tɩɩna Kirisito Dɩŋ-zɔmʋŋ sɩ hɛ, ʋ yie laa nɩalɩŋ ta nɛ.

2 Kɔrɩntɩ Nɩaa 4:4

Nɩaa deemba Sɩtaanɩ nɛ tɔ ba wʋjɩmɩŋ dɩ ba sɩ́ wuo na Wɩa wʋzɔmɔ-la pʋlʋmʋŋ. Wɩa wʋzɔmɔ-la nɩɩ dagɛ Kirisito tʋla, Nɩɩ-la sɩ nagɛ Wɩa.

2 Kɔrɩntɩ Nɩaa 4:6

Bumbuŋ Wɩa sɩ ŋaa dʋnɩa, ʋ leŋe pʋlʋmʋŋ chaanɛ birimiŋ tʋɔŋ nɛ. Ŋɩɩ tɩtɩa nɛ lɛɛlɛ ʋ leŋ pʋlʋmʋŋ kʋ jʋʋ la tʋɔŋ. Pʋlʋŋ-la nɛ leŋe la kɛŋ wʋjɩmɩŋ a wuo jɩŋ ŋɩɩ Wɩa sɩɩ tʋl. Wɩa to Kirisito lɛ nɛ a dagɛ ʋ tʋla.

2 Kɔrɩntɩ Nɩaa 5:17

Ŋɩɩ wɩaa dɩ nʋʋkala nɛ laa Kirisito wɩaa dii, Wɩa kɛnʋ bɩrɩmɛ nɩ-falɩɩ nɛ. Wʋbɩnɩa-la kala bálá nɛ. Wʋfalaa nɛ suomi ʋ mɩɩsɩŋ lɛ.

Galiisia Nɩaa 6:15

Ʋ bɩ wɩɩ kɛnɛ dɩ la keri la penee koo dɩ la bɩ kere. Wɩɩ-la sɩ ŋaa sɩɩfɩaŋ wɩɩ nɛ, dɩ la bɩrɩmɛ a kɛŋ mɩɩ-falɩɩ-la.

Koloosi Nɩaa 3:10

aŋ lɛɛlɛ tuto mɛl-falɩɩ-la sɩ zɔmɔ. Wɩa leŋe ma waa mɛl-falɩŋ deeŋ lɛ nɛ dɩ ma wuo jɩŋ ʋ wɩaa woruŋ a kʋ nagɛ ʋ tɩtɩa nagɩsɩŋ.

1 Timoti 1:11

Wɩalɩŋ mɩ sɩ dagɛma lɩɩ Wɩa sɩ kɛŋ tʋla wʋzɔmɔ-la tʋɔŋ nɛ, ʋ sɩ joŋo pɩmɛ dɩ mɩ bʋla pɩma. Wɩa nɛ kɛŋ yɩrɩŋ.

Taatɩs 3:5

a laala ta. Ʋ bɩ naga arɩ la sɩ ŋaa tʋɔpʋl tɩmma nɛ tɩɩ ʋ laala ta. Ama ʋ sɩɩ fá nɩaa nenige nɛ tɩɩ ʋ laala ta. Ʋ laala ta nɛ, bɛɛ wɩaa ba fola Wɩɩchʋɔlɛ lɩɩŋ nɛ Wɩa Dɩŋ-zɔmʋŋ doluŋ lɛ. Ŋɩɩ dagɛ arɩ Wɩa bɩra wasa lʋlla nɛ, la kɛŋ mɩɩ-falɩŋ ʋ teeŋ.

Jeems 1:23

Dɩ nʋʋkala nɛ nɩɩ wɩalɩŋ aŋ bɩbaa ŋaa, ʋ nagɛ nɩa sɩ joŋ beenantɩrɛ a bee na ʋ nagɩsɩŋ nɛ,

1 Jɔɔŋ 3:2

Mɩ nandɔŋ-kpɩanaba, lɛɛlɛ la ŋaa Wɩa biiriŋ nɛ. Ama Wɩa ha bɩ chaasa daga pʋllɛ ŋɩɩ la sɩ jaŋ nagɛ. Ama wɩɩ-la la sɩ jɩma nɛ ŋ-la: Bʋa-la lɛ Kirisito sɩ jaŋ kɔ, la ma jaŋ nagɛ ŋɩɩ ʋ sɩ naga, bɛɛ wɩaa la jaŋ na ʋ sɩ nagɛ ŋɩɩ kala.