2 Kɔrɩntɩ Nɩaa 3:14 - WƖA TENIŊ

¹⁴ Ama Iziral tɩŋŋaa tʋɔbɩɩnaa fa tuo Wɩa wombiiŋ lɛ. Ŋɩɩ wɩaa arɩ jɩnɩŋ kala, dɩ ba nɛ karɩmɛ wɩalɩŋ Wɩa fa sɩ joŋo pɩ Mosis bumbuŋ-la dɩ nɩaa tuto, ba bɩ ba bʋbʋɔŋ jɩŋ. Ʋ naga arɩ kʋ-la Mosis fa sɩ joŋo tɔ ʋ sɩaa dɩ Iziral tɩŋŋaa sɩ́ ʋ sɩaa na, kʋ-la ha tɔ ba sɩaa nɛ dɩ ba sɩ́ Wɩa tʋla na. Ama Yesu Kirisito nɛ jaŋ wuo kɛŋ kʋ-la suri, dɩ ba wuo na Wɩa tʋla.

2 Kɔrɩntɩ Nɩaa 3:14 ပူးပေါင်းရင်းမြစ်များ

WƖA YƖƖLAA 69:23

Leŋ dɩ ba nyʋlɩmɛ a sɩ́ kʋŋkala wuo na, leŋ dɩ wɩaa nyagɛba dɩ ba duduuri wuu.

AZAAYA 25:7

Peel-la nyuŋ, La TƖƖNA jaŋ giri tʋɔ-chee-la sɩ nagɛ duoŋ-bɩlɩmbaanɩŋ a keese tɔ tinteyee ta.

AZAAYA 44:18

Ba ŋaa nɩyaaraa nɛ, ba bɩ wɩɩkala jɩŋ ba sɩaa tɔ nɛ, ba bɩ na. Ba ŋaa tʋɔ-togi tɩmma nɛ, ba bɩ wʋtɩtɩɩ ka nɩɩ.

AZAAYA 56:10

Nɩalɩŋ kala sɩ maga dɩ ba bibeŋ Iziral tɩŋŋaa, ba nyʋlɩma nɛ. Ba bɩ wɩɩkala jɩŋ, ba nagɛ vasɩŋ sɩɩ pɔ leriŋ aŋ bɩ huosi nɛ. Ba yie pɩŋ nɛ a duduosi. Ba cho doŋ-pɩnɩŋ kɩŋkɛŋ.

AZAAYA 59:10

La nagɛ nyʋlɩma sɩ laarɛ jeeŋ a chɩchɛ wombiiŋ nɛ. La nagɛ nyʋlɩma nɛ, wɩɩhɛyɛ ma la yie gɛrɛ nɛ a titel. Nɩduoruŋ tʋɔŋ, la nagɛ nɩsʋʋnʋŋ nɛ.

AZAAYA 6:10

La TƖƖNA bɩra bʋl, “Leŋ dɩ nɩaa deemba tʋɔŋ dol, ŋaa dɩ ba dɩgɩlaa kparɩmɛ, aŋ ŋaa dɩ ba sɩaa ma tɔ. Dɩ ŋɩɩ dee ba jaŋ na wɩaa koo a nɩɩ wɩaa a bɩrɩmɛ ba tʋɔbɩɩnaa a kɔ mɩ teeŋ dɩ mɩ laaba ta.”

JƐRƖMAAYA 5:21

Ma ŋaa nɩyaara nɛ a chʋʋlɛ, má nɩɩ wɩɩŋ deeŋ, ma kɛŋ sɩaa nɛ aŋ bɩ na, a kɛŋ dɩgɩlaa ma aŋ bɩ nɩɩ.”

ƐZƖKƖƐL 12:2

“Nuhuobiiŋ, ŋ hɛ nɩalɩŋ sɩ vɩa mɩ niiŋ tʋɔŋ nɛ. Ba kɛŋ sɩaa nɛ a magɛ dɩ ba nɩna, ama ba bɩ na, a kɛŋ dɩgɩlaa a magɛ dɩ ba nɩnɩɩ ka ba bɩ nɩɩ, bɛɛ wɩaa ba ŋaa nɩa sɩ vɩa mɩ niiŋ nɛ.

Matiu 13:11

Ŋɩɩ nɛ Yesu bʋla pɩba, “Ma nɩaa deemba nɛ Wɩa dagɛ ʋ kuorii-la wɩaa sɩ faa bʋbʋɔŋ pɩpa, ama nɩ-daŋ kala dee.

Matiu 16:17

Ŋɩɩ nɛ Yesu bʋl, “Saamɔŋ, Jɔɔŋ bie, Wɩa jaŋ pɛ ŋ lɛ, wʋjɩmɩŋ deeŋ bɩ naga nuhuobiine nɛ pɩŋ. Ama mɩ Nyɩmma sɩ hɛ Wɩa-jaŋ nɛ pɩŋ.

Matiu 6:23

ama dɩ ŋ sɩaa nɛ bɩ zɔŋ, ŋ yaraa kala hɛ birimiŋ tʋɔŋ nɛ. Dɩ pʋlʋŋ-la nɛ kɔ dɩ ʋ bɩrɩmɛ birimiŋ, birimiŋ lim lɛ nɛ ŋ hɛ ŋɩɩ.

Jɔɔŋ 12:40

Ʋ sɩ, “Wɩa tɔ ba sɩaa nɛ aŋ nyɩrɛ ba tʋɔŋ, dɩ ba sɩaa sɩ́ kʋŋkala wuo na, dɩ ba sɩ́ wɩaa bʋbʋɔŋ ma wuo jɩŋ. Dɩ ŋɩɩ dee, ba fa jaŋ kɔ Wɩa teeŋ dɩ ʋ pʋllɛ ba tʋɔŋ, dɩ mɩ laaba ta.”

Jɔɔŋ 12:46

Mɩ kʋ tuu dʋnɩa dɩ mɩ ŋaa dʋnɩa pʋlʋmʋŋ nɛ a chaanɛ. Nɩɩ-la kala sɩ laa mɩ wɩaa dii bɩra bɩ jaŋ hɛ birimiŋ tʋɔŋ.

Jɔɔŋ 8:12

Ŋɩɩ nɛ Yesu bɩra suomi a dɩdagɛ nɩaa, a bʋla pɩba, “Mɩ nɛ ŋaa dʋnɩa nɩaa pʋlʋmʋŋ, nɩɩ-la kala sɩ tomi, ʋ bɩ jaŋ vɛŋ birimiŋ tʋɔŋ. Ama ʋ jaŋ kɛŋ pʋlʋŋ sɩɩ pɩ nɩaa mɩɩsɩŋ.”

Tɩntɩŋŋaa 13:15

Ba sɩ hɔŋ ŋɩɩ, nʋʋ karɩmɛ wɩalɩŋ Mosis fa sɩ ŋmʋnsa bil dɩ nɩaa tuto, arɩ Wɩa tenni-la Wɩa wʋlaabʋllaa fa sɩ ŋmʋnsa. Ba sɩ karɩma dɛrɛ, Wɩɩchʋɔlɛ dɩa-la kʋhɩasɩŋ tɩŋ dɩ ba bʋla pɩba, “La naambiiriŋ, dɩ ma nɛ kɛŋ wɩɩ ma sɩ jaŋ bʋla pɩ nɩaa deemba dɩ ba nyuŋ nyaasɛ, má bʋl.”

Tɩntɩŋŋaa 15:21

Ba dagɛ wɩalɩŋ Mosis fa sɩ bile dɩ la tuto tabiisi-la kala lɛ nɛ. Ba ŋaa ŋɩɩ faafaa kala nɛ a kaa kɔ jɩnɩŋ. Ba ma yie karɩmɛ wɩalɩŋ Wɩɩchʋɔlɛ dɩɩsɩŋ lɛ chɛ-wiesii-la chɛɛ na kala nɛ.”

Tɩntɩŋŋaa 16:14

Haala-la sɩ jegile nɩɩ wɩalɩŋ tʋɔŋ dɔŋɔ yɩrɩŋ nɛ fa Lidia. Ʋ lɩɩ Taataya tinteeŋ nɛ, a biri gɛnnɩŋ yɩyallɛ. Ʋ faa chʋɔlɛ Wɩa nɛ woruŋ. Ʋ sɩ nɩɩ wɩalɩŋ Pɔɔl fa sɩɩ bʋl, Wɩa suri ʋ tʋɔŋ, ʋ laa wɩalɩŋ dii.

Tɩntɩŋŋaa 26:18

Mɩ jaŋ tɩmɩŋ dɩ ŋ mʋ bʋl wɩaa a suri ba sɩaa, dɩ ba bɩrɩma lɩɩ birimiŋ lɛ a kʋ jʋʋ pʋlʋmʋŋ tʋɔŋ, a ŋaa dɩ ba lɩɩ Sɩtaanɩ nɩsɩŋ lɛ a kɔ Wɩa teeŋ. Dɩ ba nɛ ŋaa ŋɩɩ a laa mɩ wɩaa dii, Wɩa jaŋ joŋ ba wʋbɔŋŋɔɔ chɛba. Ba jaŋ na leriŋ nɩalɩŋ Wɩa sɩ lɩɩsa tʋɔŋ.’

Rom Tɩŋŋaa 11:25

Mɩ naambiiriŋ, wɩaa nɛ hɛ nɩmɛ Wɩa fa joŋo faama, mɩɩ chɛ dɩ ma jɩŋ. Wɩɩ-la jaŋ ŋaa dɩ ma sɩ́ bɩɩna bʋl arɩ ma kɛŋ wʋjɩmɩŋ a bibigisi ma tɩtɩa lɛ. Wɩɩ-la nɛ ŋ-la: Iziral tɩŋŋaa sɩ kɛŋ nyu-duo-la, ba bɩ jaŋ kɛnʋ wuu. Bʋa-la lɛ dɩ nɩalɩŋ sɩ bɩ Juu tɩŋŋaa ŋaa nɛ kʋ yʋgɛ a laa Wɩa wɩaa dii, Iziral tɩŋŋaa nyu-duo-la jaŋ dɛrɛ.

2 Kɔrɩntɩ Nɩaa 3:15

Arɩ jɩnɩŋ kala, dɩ ba nɛ karɩmɛ wɩalɩŋ Wɩa fa sɩ joŋo pɩ Mosis dɩ nɩaa tuto-na kala, ʋ yie nagɛ arɩ kʋŋ nɛ tɔ ba wʋjɩmɩŋ, dɩ ba sɩ́ wɩalɩŋ bʋbʋɔŋ jɩŋ.

2 Kɔrɩntɩ Nɩaa 3:6

Wɩa tɩtɩa nɛ pɩla doluŋ la ŋaa nii-faalɩɩ-la ʋ sɩ hɛ pɩ nuhuobiinee tɩntɩnnaa. Nii-la bɩ naga ʋ ŋaa wɩɩ ba sɩ ŋmʋnsa bil a tuto, ama nii-falɩɩ-la doluŋ lɩɩ Wɩa Dɩŋ-zɔmʋŋ wɩalɩŋ nɛ. Wɩalɩŋ Mosis sɩ ŋmʋnsa bil dɩ nɩaa tuto bɩ nɩaa mɩɩsɩŋ wuo pa, ama Wɩa wʋzɔmɔ-la sɩ lɩɩ ʋ Dɩŋ-zɔŋ-la teeŋ nɩɩ pa mɩɩsɩŋ.

2 Kɔrɩntɩ Nɩaa 4:6

Bumbuŋ Wɩa sɩ ŋaa dʋnɩa, ʋ leŋe pʋlʋmʋŋ chaanɛ birimiŋ tʋɔŋ nɛ. Ŋɩɩ tɩtɩa nɛ lɛɛlɛ ʋ leŋ pʋlʋmʋŋ kʋ jʋʋ la tʋɔŋ. Pʋlʋŋ-la nɛ leŋe la kɛŋ wʋjɩmɩŋ a wuo jɩŋ ŋɩɩ Wɩa sɩɩ tʋl. Wɩa to Kirisito lɛ nɛ a dagɛ ʋ tʋla.

Ɛfɛsɩs Nɩaa 4:18

Birimiŋ tɔ ba wʋjɩmɩŋ nɛ. Ba bɩ jaŋ wuo na mɩɩsɩ-la Wɩa sɩ joŋo pɩ nɩaa, bɛɛ wɩaa ba bɩ wɩɩkala jɩŋ, ba dɩgɩlaa ma bɩ wɩaa ka nɩɩ.