2 Kɔrɩntɩ Nɩaa 11:13 - WƖA TENIŊ

¹³ Nɩaa deemba nyɩɛ wɩaa nɛ arɩ ba ŋaa Kirisito nanzɔɔba nɛ. Ba bɩra nyɩsɛ nɩaa nɛ ba tɩntɩŋŋaa lɛ. Ba yie fugi a kɛŋ ba tɩtɩa bɩrɩmɛ arɩ ba ŋaa Kirisito nanzɔɔba nɛ.

2 Kɔrɩntɩ Nɩaa 11:13 ပူးပေါင်းရင်းမြစ်များ

JƐRƖMAAYA 23:16

Wɩɩ-la mɩ-na ma TƖƖNA doluŋ kala Tɩɩna sɩ bʋla nɛ ŋ-la: Má sɩ́ nɩalɩŋ sɩ nyɩɛ wɩaa arɩ ba ŋaa mɩ wʋlaabʋllaa a bʋl wɩalɩŋ pɩpɩma teeŋ jegilu. Ba leŋe ma kɛŋ yɩɛlaa sɩ bɩ jaŋ kʋ ŋaa wʋtɩtɩɩ nɛ. Ba yie bʋl wɩalɩŋ ba tɩtɩa sɩ bɩɩna nɛ a pɩpɩma, mɩ-na ma TƖƖNA dee bɩ wɩalɩŋ bʋla.

JƐRƖMAAYA 27:14

Sɩ́ nɩalɩŋ sɩ sɩ ba ŋaa mɩ wʋlaabʋllaa teeŋ jegilu. Ba sɩ, ‘Ŋ bɩ jaŋ tɩma pɩpɩ Babɩlɔŋ kuoro,’ ba nyɩɛ wɩaa nɛ pɩpɩŋ ŋɩɩ.

Matiu 25:24

Ŋɩɩ nɛ tɩntɩnnʋ-la ʋ sɩ joŋ warɩpʋla bʋɩ mahɩŋ balɩa pa, ʋ ma kʋ jʋʋ a bʋl, ‘Mɩ kʋhɩaŋ, mɩ jɩma arɩ ŋ ŋaa nɩtɛrɛ nɛ, ŋ yie kʋkʋŋ kɩalɩŋ ŋ sɩ bɩ duo nɛ aŋ pɩpaa kɩaa lee-la ŋ sɩ bɩ tɩma.

Tɩntɩŋŋaa 15:1

Baalaa dɔnsʋŋ ma lɩɩ Judiya a kɔ Antɩɔk, a suomo dɩdagɛ ba naambiiri-la sɩ laa Yesu wɩaa dii a bʋl, “Wɩa bɩ jaŋ wuo laama ta, see dɩ ma keri ma penee, arɩ Mosis wombie-la ʋ fa sɩ ŋmʋnsa bil dɩ la tuto fa sɩ dagɛ ŋɩɩ.”

Tɩntɩŋŋaa 15:24

La nɩa arɩ la nɩaa dɔnsʋŋ kɔ ma teeŋ a walɩmɛma, a kɛŋ ma tʋɔbɩɩnaa vʋgʋmɛ. Ka la dee bɩ ba hɛ.

Tɩntɩŋŋaa 20:30

Nɩaa jaŋ paala lɩɩ ma tʋɔŋ ma a kɛŋ wɩalɩŋ kaa bɩrɩmɛ, a nyɩsɛ nɩalɩŋ sɩ laa Yesu wɩaa dii dɩ ba mɩɩrɛ harɩŋ a toba.

Rom Tɩŋŋaa 16:18

Nɩaa deemba bɩ La Tɩɩna Kirisito tɩntɩŋŋaa ka tɩŋ, ama ba tɩtɩa wʋchooloo nɛ baa ŋaa. Ba yie kɛŋ nii-sɩma a nyɩsɛ nɩalɩŋ sɩ bɩ wɩaa jɩŋ.

2 Kɔrɩntɩ Nɩaa 11:15

Ʋ saa bɩra bɩ wʋkpuŋkpere wɩɩ ŋaa dɩ Sɩtaanɩ tɩntɩnnaa nɛ kɛŋ ba tɩtɩa ŋaa a nagɛ nɩalɩŋ sɩ kɛŋ tʋɔpʋla. Ba jaŋ timba magɛ ŋɩɩ ba tɩntɩŋŋaa sɩ maga.

2 Kɔrɩntɩ Nɩaa 2:17

Nɩaa yʋga nɛ a gɔllɔ bʋbʋl Wɩa niiŋ wɩaa a lɩlaa moribiee, ama la-na bɩ ŋɩɩ ŋaa. La-na ŋaa nɩtɩtɩɩba nɛ. Wɩa nɛ lɩɩsɛla dɩ la tɩŋ tɩntɩmɩŋ deeŋ. Kirisito doluŋ lɛ nɛ laa bʋl Wɩa wɩaa.

2 Kɔrɩntɩ Nɩaa 4:2

Hɩɩsɩ wɩalɩŋ arɩ wʋkaa-faalɩɩ-la nɩaa sɩ lʋara ŋɩŋaa, la-na vɩaba ta nɛ faafaa kala. La bɩra bɩ nʋʋ nyɩsɛ. La bɩ wɩaa nyɩɛ pɩpɛ Wɩa niiŋ wɩalɩŋ lɛ. Ama Wɩa sɩpaaŋ la chaasa bʋl wɩaa, dɩ nʋʋkala tʋɔbɩɩnaa jɩŋ arɩ wʋtɩtɩɩ nɛ la bʋbʋl.

Galiisia Nɩaa 1:7

Wʋtɩtɩɩ nɛ, Wɩa wombii dɔŋ kala bɩra tuo a pɛ kʋ-la la sɩ dagɛma lɛ. Mɩ bʋl wɩɩŋ deeŋ, bɛɛ wɩaa nɩaa yʋga a hɛ nɩmɛ aa walɩmɛma a chɩchɛ dɩ ba kɛŋ Kirisito wʋzɔmɔ-la kaa bɩrɩmɛ.

Galiisia Nɩaa 2:4

Arɩ ŋɩɩ kala, nɩaa dɔnsʋŋ fa bʋla arɩ Taatɩs maga ʋ keri ʋ peniŋ nɛ. Nɩaa deemba fa fugo arɩ ba ma laa Yesu wɩaa dii nɛ a ŋaa la naambiiriŋ. Ba fa kʋ guoli la tʋɔŋ dɩ ba na arɩ laa to Juu tɩŋŋaa naabalɩmaba wombii-la nɛ koo la bɩbaa to. La sɩ laa Yesu Kirisito wɩaa dii ŋɩɩ, ba faa chɛ dɩ ba na ŋɩɩ la sɩ lɩɩsɛ la tɩtɩa Juu tɩŋŋaa naabalɩmaba wombiiŋ lɛ nɛ. Ba fa cho dɩ la to Juu tɩŋŋaa naabalɩmaba wombii-la nɛ a ŋaa yosi ʋ lɛ.

Galiisia Nɩaa 4:17

Nɩalɩŋ sɩɩ dagɛ Juu tɩŋŋaa wombii-la fogo dɩdagɛ arɩ ba tʋɔŋ wɩɩ ma lɛ nɛ woruŋ, ama ba tʋɔbɩɩnaa bɩ zɔŋ. Ba tʋɔbɩɩnaa kala nɛ dɩ ba kɛŋ mɩ dɩ ma pɔrɛ dɔŋɔ lɛ, dɩ ma tʋɔŋ wɩɩ ba lɛ.

Galiisia Nɩaa 6:12

Nɩalɩŋ sɩɩ chɛ dɩ ba dagɛ ba tɩtɩa lɛ arɩ baa to Juu tɩŋŋaa wombiiŋ, ba nɩɩ fʋgɛma dɩ ma keri ma penee. Ba laa dii arɩ Kirisito sʋʋ daagɛsɛ nyuŋ ba wɩaa nɛ. Ama ba bɩ chɛ dɩ nɩaa to ŋɩɩ lɛ a dɔgɩsɛba.

Ɛfɛsɩs Nɩaa 4:14

Ŋɩɩ-na la bɩra bɩ jaŋ ŋaa hambiisi Wɩa wɩaa lɛ, dɩ wʋwogusu-la nɩaa dɔnsʋŋ sɩɩ dagʋ a mʋ tɩgɛ Wɩa wɩaa lɛ kɛnla begili. La bɩ jaŋ to nɩalɩŋ sɩɩ nyɩɛ wɩaa, a kɛŋ badɛrɩŋ nyɩnyɩsɛ nɩaa, dɩ ba joŋ wɩalɩŋ ba sɩ laa dii ta.

Fɩlɩpa Nɩaa 3:18

Mɩ laa sɩpaaŋ bʋl wɩaa pɩma a tɩgɛ nɩalɩŋ dɔnsʋŋ lɛ, aŋ ka lɛɛlɛ-na sɩlɩɩrɩŋ paala yuyuori mɩ sɩaa lɛ nɛ ka mɩɩ bʋl. Nɩaa yʋga, ba wʋŋaalaa dagɛ arɩ ba dɩ Kirisito ŋaa dʋndɔmɔ nɛ. Ba teeŋ Kirisito sɩ sʋʋ daagɛsɛ nyuŋ ŋɩɩ ŋaa wʋpɛɩ nɛ.

Fɩlɩpa Nɩaa 3:2

Má pɔ ma tɩtɩa lɛ arɩ nɩalɩŋ sɩɩ ŋaa wɩaa a nagɛ vasɩŋ sɩɩ ŋaa ŋɩɩ, nɩalɩŋ sɩɩ ŋaa wʋbɔŋŋɔɔ, nɩalɩŋ sɩ pɛsɛ ma lɛ dɩ ma keri ma penee.

Koloosi Nɩaa 2:4

Mɩ bʋl ŋɩɩ pɩpɩma dɩ nʋʋkala sɩ́ wuo nyɩsɛma arɩ nii-sɩma.

Koloosi Nɩaa 2:8

Má sɩ́ leŋe dɩ nʋʋkala nyɩsa kɛsɛma dɩ ma tou. Baa dagɛma nuhuobiine wʋjɩmɩŋ nɛ, aa nyɩsɛma arɩ wɩalɩŋ sɩ bɩ bʋbʋɔ kɛnɛ. Ba to nuhuobiinee naabalɩma wɛnɩŋ nɛ a dagɛ dɩ-suomuŋ wɩaa dʋnɩa nɩaa sɩɩ to. Wɩaa deemba bɩ Kirisito teeŋ lɩa.

1 Jɔɔŋ 2:18

Mɩ biiriŋ, dʋnɩa dɩdɛrɩŋ kpaga nɛ. Ma nɩa arɩ Kirisito dʋndɔŋ-balɩŋ jaŋ kɔ. Bʋa deeŋ lɛ Kirisito dʋndɔŋŋɔɔ paala yʋgɛ nɛ a kɔ. Ŋɩɩ wɩaa, la jɩma arɩ dʋnɩa dɩdɛrɩŋ kpaga nɛ.

1 Jɔɔŋ 4:1

Mɩ bii-chooloo, dɩ nɩaa nɛ sɩ dɩ ba kɛŋ doluŋ a wuo bʋl wɩaa, Wɩa Dɩŋ-zɔŋ-la doluŋ lɛ, má sɩ́ guu laa dii arɩ baa bʋl wʋtɩtɩɩ nɛ. Má laa sɩpaaŋ magɩsɛba na arɩ ba sɛnɛ ŋaa Wɩa wʋlaabʋllaa nɛɛ. Bɛɛ wɩaa wʋnyɩɛrɩ Wɩa wʋlaabʋllaa yʋga nɛ a hɛ dʋnɩa lɛ.

Juud 1:4

Mɩ bʋl wɩɩŋ deeŋ pɩpɩma, bɛɛ wɩaa nɩaa dɔnsʋŋ sɩ bɩ Wɩa ka fá lʋara jʋʋ ma tʋɔŋ nɛ. Ba bɩ Wɩa wombiiŋ ka to, ŋɩɩ wɩaa Wɩa jaŋ dɔgɩsɛba a leŋ dɩ ba sʋʋ. Wɩa teniŋ tʋɔŋ ba bʋl faafaa kala nɛ dɩ Wɩa jaŋ ŋaa ŋɩɩ nɩbɔŋŋɔɔ lɛ. Wɩa sɩ fá la nenige a laala ta, ba to ŋɩɩ a kɛŋ Wɩa wʋzɔmɔ-la kaa bɩrɩmɛ a ŋɩŋaa wʋlɩɩlɩŋ. Ba yie bʋl arɩ ba bɩ Yesu Kirisito jɩŋ, Nɩɩ-la sɩ ŋaa la kala Tɩɩna.

Jɔɔŋ Wʋnaalaa 19:20

Nɩɩ-la sɩ jɩl jɔɔ-la arɩ ʋ laalɩyuoroo yuo dii baga kʋ-la a kɛŋ ʋ dɩ nɩɩ-la sɩ nyɩɛ wɩaa arɩ ʋ ŋaa Wɩa wʋlaabʋllʋ kala. Nɩɩ-la fa sɩ ŋaa wʋmagɩlaa baga kʋ-la nyuŋ a wuo nyɩsɛ nɩalɩŋ sɩ kɛŋ baga kʋ-la magɩlɩŋ, aa chʋɔlɛ baga kʋ-la nagɩsɩŋ ba sɩ mɛ bil. Nɩaa deemba balɩa kʋweyee nɛ ba joŋo yuo hɛ Wɩa nyiŋ-la sɩɩ dii a nagɛ jiribiiŋ lɛ.

Jɔɔŋ Wʋnaalaa 2:2

Mɩ jɩŋ wɩalɩŋ kala ma sɩ ŋaa nɛ. Mɩ na ŋɩɩ ma sɩ tɩma arɩ sɩɩfɩɛsɩŋ nɛ, a dii kenyiri wɩɩkala lɛ. Mɩ jɩma ma dɩ nɩbɔŋŋɔɔ bɩ dɔŋɔ lɛ wuo. Nɩaa dɔnsʋŋ joŋ ba tɩtɩa arɩ ba ŋaa Wɩa nanzɔɔba nɛ, ama ma magɩsɛ nɩaa deemba nɛ a na dɩ baa nyɩɛ nɛ.

Jɔɔŋ Wʋnaalaa 2:20

Ma ŋaa kukeri, ama wɩaa baŋmɛnɛ nɛ ma ŋaa chei. Haal kʋbala nɛ hɛ ma tʋɔŋ aa dagɛ wʋbɔŋŋɔɔ, ka ma bɩ ʋ kire. Haal-la ba sɩɩ yɩrɛ Jɛzɛbɛl nɛ ŋɩɩ. Ʋ fa joŋ ʋ tɩtɩa arɩ ʋ ŋaa Wɩa wʋlaabʋllʋ nɛ ama ʋʋ nyɩɛ nɛ. Ʋʋ dagɛ mɩ nɩaa nɛ dɩ ba ŋɩŋaa wʋlɩɩlɩŋ aŋ pɛ didii vʋɩyaa kɩaa ma.

Jɔɔŋ Wʋnaalaa 2:9

Mɩ jɩŋ wɩalɩŋ sɩɩ walɩmɛma nɛ, a jɩŋ ŋɩɩ ma sɩ summo, ama Wɩa teeŋ, ma ŋaa kuoroo nɛ. Nɩaa dɔnsʋŋ hɛ nɩmɛ aa chei ma yɩrɩŋ. Nɩaa deemba joŋ ba tɩtɩa arɩ ba ŋaa Juu tɩmma nɛ aŋ bɩ Juu tɩmma ŋaa. Baa to Sɩtaanɩ harɩŋ nɛ.