1 Pɩɩta 4:3 - WƖA TENIŊ

³ Bumbuŋ-la kala lɛ ma faa ŋaa wɩalɩŋ nɩalɩŋ fa sɩ bɩ Wɩa jɩŋ sɩɩ ŋaa nɛ. Ma faa to ma tʋɔtɔrɛ wʋŋaalaa harɩŋ nɛ aa ŋaa wʋlɩɩlɩŋ, a chɩl ma yaraa wʋchɛɛlɛɛ wɩaa, a fa nyʋa sɩnɩŋ bubugi, a ŋɩŋaa wʋtɔɔnʋŋ, a yie gɔllɔ nyʋnyʋa sɩnɩŋ, a faa kpaarɛ vʋɩyaa ma, wɩalɩŋ Wɩa sɩɩ kɩsʋ.

1 Pɩɩta 4:3 ပူးပေါင်းရင်းမြစ်များ

2 SAMƲƐL 13:28

Abɩsalɔm fa bʋla pɩ ʋ tɩntɩnnaa, “Má jegile nɩɩ mɩ teeŋ: Dɩ Amɩnɔŋ nɛ faasa nyʋa sɩnɩŋ a bugi, dɩ mɩ nɛ bʋla pɩma, arɩ ma ŋmobu lo, má kpʋʋ. Má sɩ́ fawʋllʋŋ fá. Mɩ-na nɛ pɩma wombiiŋ. Má kɛŋ bɔɩ-duoŋ.”

1 KUOROO 21:26

Ʋ faa ŋaa wɩalɩŋ sɩɩ kɩsʋ nɛ, a tuto vʋɩyaa a nagɛ Amɔrɩ tɩŋŋaa fa sɩɩ ŋaa ŋɩɩ La TƖƖNA kiriba ta Iziral tɩŋŋaa sɩpaaŋ.)

2 IZIRAL TƖŊŊAA NAABARƖŊ 15:8

Asa sɩ nɩɩ wɩaa deemba Ɔdɛd nanʋala Azarɩa Wɩa wʋlaabʋllʋ-la sɩ bʋla, ʋ nyuŋ nyaasɛ. Ʋ chei tɔmɔ-la kala sɩ hɛ Juda arɩ Bɛnjamɩŋ tinteeŋ arɩ tasɩ-la kala ʋ sɩ yuo laa Efirem tintee-la peelee sɩ yʋga lɛ. Ʋ wasa bɩrɩmɛ La TƖƖNA koru-la sɩ hɛ La TƖƖNA dɩɩ-bal-la zawʋra sɩpaaŋ.

AZAAYA 28:7

Wɩɩsʋllɩ sɩpaalaaraa arɩ Wɩa wʋlaabʋlla-la ma yie nyʋa tɩɩnɛnɛɛ sɩnɩŋ a bugi nɛ a gɩgɛrɛ a bɩ ba tɩtɩa jɩŋ. Dɩ Wɩa wʋlaabʋlla-la nɛ na wɩaa arɩ duosoo tʋɔŋ ma, ba bɩ ba bʋbʋɔŋ ka jɩŋ. Wɩɩsʋllɩ sɩpaalaaraa ma bɩ wɩaa ka bʋl ba bʋɔsʋŋ lɛ.

AZAAYA 5:11

Wɩɩŋ puu nɩalɩŋ sɩ yie sii chʋchʋɔ-fɩɛla a kire to sɩnɩŋ harɩŋ, a nyʋa ŋɩɩ deeŋ deeŋ taŋ mʋ siesi a kala bugi.

AZAAYA 65:4

Tɩtaŋɩŋ ba yie mʋ hɔŋ vaamaa tʋɔŋ a bɛrɛ doŋ a yɩyɩrɛ lɛlɛɛ. Ba yie chɩchaŋ tooŋ nammɩa aŋ nyʋnyʋa vʋɩyaa nammɩa yomuŋ.

JƐRƖMAAYA 16:11

Ŋɩɩ-na bʋla pɩba, ‘A tɩŋ ma naabalɩmaba sɩ vɩamɛ, aŋ to vesiŋ, a kpaarɛba wɩaa nɛ tɩɩ.’ Mɩ-na ma TƖƖNA nɛ bʋla. Ba vɩamɛ nɛ a bɩ mɩ wombii-la mɩ sɩ bile dɩ ba tuto ka to.

JƐRƖMAAYA 16:18

Mɩ jaŋ timba naansɩɩŋ bʋlɩa a tɩŋ ba wʋbɔŋŋɔɔ arɩ ba wʋcheelee wɩaa, bɛɛ wɩaa ba ŋaa disiniŋ hɛ mɩ tinteeŋ lɛ nɛ arɩ ba tɔmɔ-la sɩ bɩ wei, a leŋ mɩ tinteeŋ su arɩ ba tɔmɔ-la mɩ sɩɩ kɩsʋ.”

ƐZƖKƖƐL 44:6

Bʋla pɩ Iziral tɩŋŋaa sɩ bɩ dagɩŋ ka sɛɩ, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ bɩra bɩ jaŋ kɔ dɩ mɩ sɛɩ wʋkɩsɩa-la ma sɩɩ ŋaa.

ƐZƖKƖƐL 45:9

Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: “Iziral sɩpaalaaraa, ma ŋaa wʋbɔŋŋɔɔ kieli nɛ. Má leŋ doluŋ diiniŋ arɩ nɩaa dɔgʋsʋŋ, aŋ to wʋtɩtɩɩ a ŋɩŋaa wɩaa ba bʋa lɛ. Má leŋ mɩ nɩaa tinteeŋ kaa laanɩŋ. Mɩ-na ma TƖƖNA Wɩɩjarɩbakɔ nɛ bʋla.

Maak 7:22

a kɛŋ tʋɔ-luŋuŋ, a bɩbɩɩnɛ wʋbɔŋŋɔɔ nɩaa lɛ, a ŋmuŋmoo nɩaa puo, a ŋɩŋaa wʋlɩɩlɩŋ. Ŋ yaraa bibieri nɩaa lɛ, a chichei nɩaa yɩrɩŋ, a bibigisi ŋ tɩtɩa lɛ, a ŋaa nɩyaarɩ.

Tɩntɩŋŋaa 17:30

Bʋa-la lɛ nuhuobiinee sɩ bɩ ʋ jɩŋ, ʋ fa tɔrɩkɔ nɛ ba nyuŋ. Ama lɛɛlɛ ʋ bʋla pɩpɩ nʋʋkala lee-na kala dɩ ba bɩrɩma lɩɩ ba wʋbɔŋŋɔɔ lɛ,

Rom Tɩŋŋaa 13:13

Má leŋ dɩ la kɛŋ la tɩtɩa woruŋ a nagɛ nɩaa sɩ hɛ pʋlʋmʋŋ tʋɔŋ. Má sɩ́ leŋe dɩ la faasa gbieli gbieli-tɔɔnʋŋ a bubugi, a ŋɩŋaa wʋlɩɩlɩŋ aŋ pɛ ŋaa wʋbɔŋŋɔɔ. Má sɩ́ dɔŋɔ yuo, má sɩ́ leŋe dɩ ma yaraa bibieri dɔŋɔ nyuŋ.

1 Kɔrɩntɩ Nɩaa 12:2

Ma jɩma bʋa-la lɛ ma fa sɩ bɩ Wɩa ka chʋɔlɛ, ma faa to Sɩtaanɩ harɩŋ nɛ, a faa kpaarɛ vʋɩyaa ma. Vʋɩyaa deemba fa bɩ wɩaa wuo bʋbʋl. Ba leŋe ma yeŋŋi nɛ.

1 Kɔrɩntɩ Nɩaa 6:11

Ma dɔnsʋŋ faa ŋaa wɩaa deemba nɛ. Ama Wɩa fo ma wʋbɔŋŋɔɔ ta nɛ. Wɩa nɛ tɩɩma. A tɩŋ La Tɩɩna Kirisito Yesu wɩaa arɩ Wɩa Dɩŋ-zɔŋ-la doluŋ lɛ, ma ŋaa tʋɔpʋl tɩmma nɛ Wɩa teeŋ.

2 Kɔrɩntɩ Nɩaa 12:21

Mɩ bɔyɛ ka joŋ nɛ dɩ mɩ nɛ bɩra kɔ ma teeŋ, Wɩa jaŋ leŋ dɩ hɩɩsɩŋ kɛmmɛ ma wɩaa, dɩ mɩ yel a tɩŋ ma wʋbɔŋŋɔɔ wɩaa. Nɩaa yʋga a hɛ ma tʋɔŋ a ŋaa wʋbɔŋŋɔɔ, a ŋaa disiniŋ, a ŋaa wʋlɩɩlɩŋ, a gɔllɔ chɛ nɩaa haalaa, aŋ bɩrɩma lɩɩ ba lɛ.

Galiisia Nɩaa 5:19

La tʋɔtɔrɛ wʋŋaalaa bɩ wʋfaalɩa ŋaa. Dɩ nʋʋ nɛ toba, ʋ yie ŋɩŋaa wʋlɩɩlɩŋ, a ŋɩŋaa disiniŋ, a ŋɩŋaa hɩɩsɩ wɩaa,

Galiisia Nɩaa 5:21

a kɛŋ tʋɔbɔmʋŋ, a nyʋa sɩnɩŋ a bubugi. Dɩ ba nɛ kʋ hilimi na-kala, ba nyʋa sɩnɩŋ bugi a ŋɩŋaa wʋtɔɔnʋŋ. Mɩ laa sɩpaaŋ kpʋrɩsɛ ma dɩgɩlaa nɛ. Mɩ saa bɩraa kpʋrɩsɛ ma dɩgɩlaa nɛ arɩ nɩalɩŋ sɩɩ ŋaa wɩaa deemba bɩ jaŋ wuo jʋʋ Wɩa kuorii-la tʋɔŋ.

Ɛfɛsɩs Nɩaa 5:18

Má sɩ́ sɩnɩŋ nyʋa bubugi, dɩ ma nɛ nyʋa sɩnɩŋ bubugi, ŋɩɩ jaŋ cheima. Ama má leŋ dɩ Wɩa Dɩŋ-zɔmʋŋ hɛ ma lɛ a tɩtɩŋ.

1 Tɛsalonaaka Nɩaa 4:5

Má sɩ́ ma tʋɔtɔrɛ wʋŋaalaa lɛ to a gɔllɔ ŋaa wʋlɩɩlɩŋ arɩ nɩalɩŋ sɩ bɩ Wɩa jɩŋ sɩɩ ŋaa ŋɩɩ.

Taatɩs 3:3

La ma tɩtɩa fa ŋaa nɩyaara nɛ, a fa bɩ Wɩa niiŋ to, wʋbɔŋŋɔɔ fa leŋ la yeŋŋi. La fa to la tʋɔtɔrɛ wʋŋaalaa harɩŋ nɛ a bɩrɩmɛ ba yosi. La fa cho dɩ nɩaa jʋʋ wʋbɔŋŋɔɔ a fa kɛŋ yarɩ-bieriŋ dɔŋɔ lɛ. Nɩaa fa bɛrɛla, la ma fa bɛrɛba.

1 Pɩɩta 1:14

Má tuto Wɩa niiŋ. Bʋa-la lɛ ma fa sɩ bɩ Wɩa jɩŋ, ma faa to ma tʋɔtɔrɛ wʋŋaalaa sɩ bɩ zɔŋ lɛ nɛ. Má bɩra sɩ́ ba to.

Juud 1:4

Mɩ bʋl wɩɩŋ deeŋ pɩpɩma, bɛɛ wɩaa nɩaa dɔnsʋŋ sɩ bɩ Wɩa ka fá lʋara jʋʋ ma tʋɔŋ nɛ. Ba bɩ Wɩa wombiiŋ ka to, ŋɩɩ wɩaa Wɩa jaŋ dɔgɩsɛba a leŋ dɩ ba sʋʋ. Wɩa teniŋ tʋɔŋ ba bʋl faafaa kala nɛ dɩ Wɩa jaŋ ŋaa ŋɩɩ nɩbɔŋŋɔɔ lɛ. Wɩa sɩ fá la nenige a laala ta, ba to ŋɩɩ a kɛŋ Wɩa wʋzɔmɔ-la kaa bɩrɩmɛ a ŋɩŋaa wʋlɩɩlɩŋ. Ba yie bʋl arɩ ba bɩ Yesu Kirisito jɩŋ, Nɩɩ-la sɩ ŋaa la kala Tɩɩna.