1 Jɔɔŋ 5:14 - WƖA TENIŊ

¹⁴ La kɛŋ bɔɩ-duoŋ nɛ Wɩa sɩpaaŋ, bɛɛ wɩaa la laa dii arɩ la nɛ sʋlʋ a chɩchɛ kʋŋkala sɩɩ tɔrɛ ʋ tʋɔŋ, ʋ jaŋ jegile nɩɩ la teeŋ.

1 Jɔɔŋ 5:14 ပူးပေါင်းရင်းမြစ်များ

1 KUOROO 3:12

mɩ jaŋ ŋaa wɩɩ-la ŋ sɩɩ chɛ a pɩŋ. Mɩ jaŋ pɩŋ wʋjɩmɩŋ nʋʋ ha sɩ bɩ kɛnɛ aŋ ka arɩ maachie kala.

JOB 34:28

Ba wʋŋaalaa leŋe summoo ŋmoo niiŋ Wɩa sɩpaaŋ nɛ, ʋ nɩɩ nɩalɩŋ sɩ bɩ ba tɩtɩa lɛ wuo pɛ nii-ŋmobo.

WƖA YƖƖLAA 145:19

Ʋ yie leŋ nɩalɩŋ kala sɩɩ fáʋ na ba kʋchɛɛlɛɛ nɛ, ʋ yie nɩɩ ba nii-ŋmobo a laaba ta.

WƖA YƖƖLAA 31:22

Fawʋllʋŋ fa kɛmmɛ nɛ mɩ bɩɩnɛ arɩ ŋ kirimi ta nɛ ŋ sɩpaaŋ. Ama ŋ nɩɩ mɩ nii-ŋmobo nɛ mɩ sɩ yɩrɩŋ dɩ ŋ pɛ mɩ lɛ.

WƖA YƖƖLAA 34:17

Dɩ tʋɔpʋl tɩŋŋaa nɛ ŋmoo niiŋ pɩ La Tɩɩna dɩ ʋ pɛ ba lɛ, ʋ yie nɩɩ nɛ, a lɩɩsɛba ba wʋjʋʋlaa kala lɛ.

WƖA YƖƖLAA 69:33

La Tɩɩna ka jegili nɩalɩŋ sɩ bɩ ba tɩtɩa lɛ wuo pɛ nii-ŋmobo nɛ, ʋ bɩ ʋ nɩalɩŋ ba sɩ yuo kɛsɛ wɩaa ka yʋ.

NAMAGABA 10:24

Wɩɩ-la nɩbɔmʋŋ sɩ chaasa fɩfá nɛ jaŋ ŋaa ʋ lɛ, ama tʋɔpʋl tɩɩna-na jaŋ na wɩɩ-la ʋ sɩɩ chɛ.

NAMAGABA 15:29

La Tɩɩna bɩ nɩbɔmʋŋ Wɩɩsʋlʋŋ ka nɩɩ, ama ʋʋ nɩɩ tʋɔpʋl tɩɩna-na Wɩɩsʋlʋŋ nɛ.

JƐRƖMAAYA 33:3

“Yɩrɛmɛ, mɩ jaŋ sɛɩ, a dagɩŋ wʋduoruŋ arɩ wɩalɩŋ sɩ faa ŋ bɩ ba jɩŋ.

Matiu 21:22

Dɩ ma nɛ laa Wɩa dii, kʋŋ na-kala ma sɩ chʋɔlɛ Wɩa a sʋsʋl, ma jaŋ naʋ.”

Jɔɔŋ 11:42

Mɩ jɩma arɩ ŋŋ jegili mɩ teeŋ nɛ bʋa na-kala lɛ. Ama mɩ bʋl wɩɩŋ deeŋ a tɩŋ nɩalɩŋ sɩ hɛ daha wɩaa nɛ, dɩ ba wuo laa dii arɩ ŋ nɛ tɩmmɛ.”

Jɔɔŋ 14:13

Kʋŋ na-kala ma sɩ pɩɛsa chɩchɛ mɩ yɩrɩŋ lɛ, mɩ jaŋ joŋo pɩma. Mɩ jaŋ ŋaa ŋɩɩ dɩ nɩaa wuo to mɩ lɛ a leŋ dɩ mɩ Nyɩmma yɩrɩŋ yɩrɛ.

Jɔɔŋ 15:7

Dɩ ma nɛ mɛrɛ mɩ lɛ, dɩ mɩ niiŋ wɩaa hɛ ma tʋɔŋ, kʋŋkala ma sɩ pɩɛsɛmɛ a chɩchɛ, mɩ jaŋ ŋaa pɩma.

Jɔɔŋ 16:24

Lɛɛlɛ ŋ-la, ma ha bɩ kʋŋkala pɩɛsa chɩchɛ mɩ yɩrɩŋ lɛ. Ŋɩɩ wɩaa má saa pɩɛsʋ, ʋ jaŋ joŋo pɩma, dɩ ma tʋɔŋ faasa tɔrɛ a mʋ dɛrɛ.

Jɔɔŋ 9:31

La jɩma arɩ Wɩa bɩ wʋbɔŋ ŋaaraa wʋbʋlʋŋ ka jegili. Ʋʋ jegili nɩalɩŋ sɩɩ zilu nɛ aŋ pɛ ŋɩŋaa wɩalɩŋ ʋ sɩ cho.

Ɛfɛsɩs Nɩaa 3:12

La sɩ laa ʋ wɩaa dii ŋɩɩ, la bɩ jaŋ fɩfá fawʋllʋŋ. La jaŋ kɛŋ nyuduoŋ a mʋ ʋ sɩpaaŋ.

Hiburu TƖŊŊAA 10:35

Ŋɩɩ wɩaa má sɩ́ leŋe dɩ ma nandaasɩŋ yʋɔrɛ. Dɩ ma nɛ chɩŋ wɩalɩŋ ma sɩ laa dii lɛ, ma time jaŋ yʋgɛ Wɩa teeŋ.

Hiburu TƖŊŊAA 3:14

Wɩalɩŋ la sɩ laa dii bumbuŋ, dɩ la nɛ kɛmba ŋɩɩ a kaa mʋ dɩdɛrɩŋ, la dɩ Kirisito kala jaŋ ŋaa kʋbala.

Hiburu TƖŊŊAA 3:6

Ama Kirisito-na fa ŋaa Wɩa Bii nɛ, a kɛŋ wʋtɩtɩɩ a bibeŋ Wɩa nɩaa. Dɩ la ma nɛ kɛŋ bɔɩ-duoŋ a tɩŋ kɩalɩŋ la sɩɩ yɩɛlʋ wɩaa, la jaŋ wuo ŋaa ʋ nɩaa.

Jeems 4:3

Bʋa dɔŋɔ ma lɛ ma yie sɛnɛ sʋlʋ a chɩchɛ kɩaa. Ama ma yie kɛŋ tʋɔbɩɩŋ bɔŋŋɔɔ nɛ a sʋl dɩ ma kaa ŋaa ma tɩtɩa tʋɔtɔrɛ wɩaa. Ŋɩɩ nɛ tɩɩ ma bɩ na.

Jeems 5:16

Ŋɩɩ wɩaa, má dagɛ ma wʋbɔŋŋɔɔ a pɩ dɔŋɔ a sʋl Wɩa a pɩpɩ dɔŋɔ, dɩ Wɩa wuo ŋaa dɩ ma duori. Dɩ tʋɔpʋl tɩɩna nɛ sʋl Wɩa, ʋ Wɩɩsʋlʋŋ yie faasa kɛŋ doluŋ nɛ a ŋaa wɩɩ-la ʋ sɩɩ chɛ pʋ.

1 Jɔɔŋ 2:28

Mɩ biiri, dɩ ma nɩɩ to Kirisito ŋɩɩ a kaa mʋ, la jaŋ kɛŋ bɔɩ-duoŋ chɛɛ-la ʋ sɩ jaŋ mɩɩra kɔ. Hɩɩsɩŋ bɩ jaŋ kɛnla dɩ la faa.