1 Kɔrɩntɩ Nɩaa 4:5 - WƖA TENIŊ

⁵ Ŋɩɩ wɩaa, má sɩ́ cheeriŋ joŋo pɩ nʋʋkala, dɩ tapʋlɩɩ-la La Tɩɩna sɩ jaŋ kɔ a dii la sarɩya ha bɩ yie. Dɩ ʋ nɛ mɩɩra kɔ, wʋbɔmɔ-la kala nɩaa sɩ ŋaa birimiŋ tʋɔŋ, ba kala jaŋ kʋ lɩɩ pʋlʋmʋŋ. Nɩaa tʋɔbɩɩnaa kala ba sɩ kɛnɛ jaŋ kʋ lɩɩ pʋlʋmʋŋ. Bʋa-la lɛ Wɩa jaŋ bɛsɛ nʋʋkala lɛ a mʋ tɩgɛ wɩalɩŋ ʋ sɩ ŋaa.

1 Kɔrɩntɩ Nɩaa 4:5 ပူးပေါင်းရင်းမြစ်များ

JOB 12:22

Ʋ nɛ yie kɛŋ kʋŋkala sɩ faa kaa kʋ lɩɩ pʋlʋmʋŋ, aŋ leŋ lere-la sɩ chaasa biri pʋllɛ.

NAMAGABA 12:8

Dɩ nʋʋ nɛ kɛŋ wʋjɩmɩŋ, nɩaa jaŋ bɛsɛ ʋ lɛ. Ama dɩ nʋʋ nɛ yaara, nɩaa sɩaa bɩ ʋ ka su.

TƖƖCHA 11:9

Bapʋɔsɛ bie, leŋ dɩ ŋ tʋɔŋ tɔrɛ ŋ bapʋɔsʋŋ lɛ, nɩɩ sɩma ŋ hambiriŋ lɛ. Ŋaa wɩalɩŋ kala ŋ sɩɩ chɛ arɩ wɩɩ na-kala ŋ sɩ na, ama jɩŋ dɩ wɩaa deemba kala ŋ sɩɩ ŋaa lɛ Wɩa jaŋ diiŋ sarɩya.

TƖƖCHA 12:14

Wɩa jaŋ dii la sarɩya wɩɩ na-kala la sɩ ŋaa lɛ, dɩ ba ŋaa wʋzɔmɔ koo wʋbɔmɔ, a pɛ wɩalɩŋ kala la sɩ lʋara ŋaa lɛ.

JƐRƖMAAYA 16:17

Mɩ sɩaa ka na ba wʋŋaalaa kala nɛ. Wɩalɩŋ kʋŋkala bɩ faa mɩ teeŋ. Ba wʋbɔŋŋɔɔ ma bɩ faa mɩ teeŋ.

JƐRƖMAAYA 23:25

Mɩ nɩa dɩ nɩalɩŋ sɩ nyɩɛ bʋbʋl wɩaa mɩ yɩrɩŋ lɛ sɩ, ‘Mɩ duoso nɛ! Mɩ duoso nɛ.’

HOSIA 8:13

Ba yie kpʋ pʋsʋŋ a ŋaa Wɩɩsʋlʋŋ pɩmɛ, aŋ joŋ nammɩa-la chaŋ, ama mɩ-na ba TƖƖNA tʋɔŋ bɩ ba Wɩɩsʋlʋŋ-la nyuŋ tɔrɔ. Lɛɛlɛ mɩ jaŋ liise yi ba nɩbɔŋ wɩalɩŋ lɛ a dɔgɩsɛba a tɩŋ ba wʋbɔŋŋɔɔ wɩaa. Ba jaŋ mɩɩra mʋ Ijipiti tinteeŋ.

MALAKAƖ 3:18

Ŋɩɩ nɛ nʋʋkala jaŋ na dabaŋ-la sɩ hɛ tʋɔpʋl tɩŋŋaa arɩ nɩbɔŋŋɔɔ pɛgɛ, nɩalɩŋ sɩɩ to mɩ-na Wɩa arɩ nɩalɩŋ sɩ bɩ mɩ ka to.”

Matiu 10:26

Ŋɩɩ wɩaa, ma sɩ́ nuhuobiinee fá. Wɩɩkala sɩ faa jaŋ kʋ lɩɩ pʋlʋmʋŋ, nɩaa ma jaŋ nɩɩ wɩɩ-la sɩ ŋaa wʋfaalɩɩ.

Matiu 24:30

Ŋɩɩ nɛ ma jaŋ na mɩ-na Nuhuobiine Bie magɩlɩŋ wɩa-nyuŋ. Dɩ dʋnɩa nɩaa nɛ naʋ, ba kala jaŋ yel. Ŋɩɩ lɛ nɛ ma jaŋ na mɩ-na Nuhuobiine Bie, dɩ mɩ to duoŋ-bɩlɩmbaanaa tʋɔŋ kʋʋ tuu. Mɩ jaŋ kɛŋ doluŋ yʋgɛ a chaanɛ.

Matiu 24:46

Dɩ tɩntɩnnʋ-la nɛ ŋaa wɩalɩŋ ʋ kʋhɩaŋ sɩ dagʋ dɩ ʋ ŋaa, ʋ tʋɔŋ jaŋ tɔrɛ bʋa-la lɛ ʋ kʋhɩaŋ-la sɩ jaŋ mɩɩra kɔ.

Matiu 25:21

Ŋɩɩ nɛ ʋ kʋhɩaŋ-la bʋla pʋ, ‘Ŋ ŋaa tɩntɩnnɩ-tɩtɩɩ nɛ. Ŋ hɛ doluŋ nɛ a wuo beŋ kɩaa sɩ bɩ yʋgɛ nyuŋ woruŋ, mɩ jaŋ leŋ dɩ ŋ bibeŋ kʋkɛnɛɛ. Kɔ dɩ mɩ dɩŋ kala nɩnɩɩ sɩma.’

Matiu 25:23

Ŋɩɩ nɛ ʋ bʋla pɩ ʋ ma, ‘Ŋ ma ŋaa tɩntɩnnɩ-tɩtɩɩ nɛ, ŋ ma hɛ doluŋ nɛ a wuo beŋ kɩaa sɩ bɩ yʋgɛ nyuŋ woruŋ, mɩ jaŋ leŋ dɩ ŋ bibeŋ kʋkɛnɛɛ. Kɔ dɩ mɩ dɩŋ kala nɩnɩɩ sɩma.’

Luuk 6:37

Má sɩ́ ma dɔnsʋŋ tɩŋŋaa wɩaa laa jɩŋ, a sɩ́ cheeriŋ joŋo pɩba. Dɩ ma nɛ ŋaa ŋɩɩ, Wɩa ma bɩ jaŋ joŋ cheeriŋ pɩma. Má joŋ wɩaa chɩchɛ ma dɔnsʋŋ tɩŋŋaa. Dɩ ma nɩɩ ŋaa ŋɩɩ, Wɩa ma jaŋ joŋ ma wɩaa chɛma.

Jɔɔŋ 21:22

Ŋɩɩ nɛ Yesu bʋla pʋ, “Dɩ mɩ nɩɩ chɛ dɩ ʋ hɛ nɩmɛ ka dɩ mɩ-na mɩɩra kɔ dʋnɩa, ŋ sɩpaa tuo nɩmɛ. To mɩ harɩŋ.”

Jɔɔŋ 21:23

Ŋɩɩ nɛ ba ŋmoo doworo pɩ nɩalɩŋ kala sɩ laa Yesu wɩaa dii arɩ Yesu harɩ-tooro deeŋ-na bɩ jaŋ sʋʋ. Ama Yesu bɩ ŋɩɩ bʋla. Ʋ sɩ dɩ ʋ nɩɩ chɛ dɩ harɩ-tooru-la hɛ nɩmɛ ka dɩ ʋ-na mɩɩra kɔ dʋnɩa, Pɩɩta sɩpaa tuo.

Jɔɔŋ 5:44

Ma cho dɩ nɩaa bɛsɛ ma lɛ nɛ, ama ma bɩ chɛ dɩ Wɩa nɛ bɛsɛ ma lɛ. Ɛɛ nɛ saa ma jaŋ wuo laa mɩ wɩaa dii?

Rom Tɩŋŋaa 14:4

Kʋbɛɛ nɛ kaŋ dɩ ŋ wuo bʋl dɩ nʋʋ tɩntɩnnʋ cheye nɛ? Tɩntɩnnʋ-la kʋhɩaŋ nɛ jaŋ wuo bʋl dɩ ʋ cheye nɛ koo ʋ bɩ cheye. La Kʋhɩaŋ Yesu jaŋ wuo pɛ ʋ lɛ dɩ ʋ chɩŋ. Ʋ saa jaŋ chɩŋ.

Rom Tɩŋŋaa 2:1

Ma bɩ woruŋ ka ŋaa ma sɩ joŋ cheeriŋ pɩpɩ ma dɔnsʋŋ tɩŋŋaa, ma nɩalɩŋ sɩɩ bʋl nɩaa teeŋ a bʋl dɩ ba cheye nɛ, aŋ ŋɩŋaa wʋbɔmɔ-la tɩtɩa. Nɩɩ-la-na kala ma sɩ ŋaa, dɩ ma nɩɩ ŋaa wʋbɔmɔ-la, ma bɩra bɩ wɩɩkala kɛnɛ dɩ ma bʋl. Ma sɩɩ ŋaa ŋɩɩ, ma tɩtɩa laa cheeriŋ nɛ ŋɩɩ lɛ.

Rom Tɩŋŋaa 2:16

Ŋɩɩ wɩaa Wɩa wʋzɔmɔ-la mɩ sɩ bʋla pɩma daga arɩ ŋ-la nɛ ʋ jaŋ nagɛ tapʋlɩɩ-la Wɩa sɩ jaŋ kɛŋ nɩaa wʋfalaa kaa kʋ lɩɩ pʋlʋmʋŋ, a to Yesu Kirisito lɛ a dii ba sarɩya.

Rom Tɩŋŋaa 2:29

Ama nɩɩ-la sɩ ŋaa Juu-tɩtɩɩ, ʋ tʋɔŋ wʋŋaalaa lɛ nɛ tɩɩ ʋ ŋaa Juu tɩɩna. Nɩɩ-la sɩ kɛŋ tʋɔpʋla, ʋ nɛ nɩɩ-la sɩ keri ʋ peniŋ. Wɩa Dɩŋ-zɔmʋŋ nɛ jaŋ wuo ŋaa ŋɩɩ pɩŋ, ŋ sɩ keri ŋ yaraa nammɩa ta dee. Wɩa nɛ jaŋ bɛsɛ ʋ tɩɩna lɛ, nuhuobiiŋ dee bɩ jaŋ bɛsɛ ʋ lɛ.

Rom Tɩŋŋaa 2:7

Nɩalɩŋ sɩ kɛŋ kenyiri a ŋɩŋaa wʋzɔŋŋɔɔ, a ŋaa ŋɩɩ a chɩchɛ dɩ ba laa yɩrɩŋ Wɩa sɩpaaŋ, a chɩchɛ mɩɩsɩ-la sɩ bɩ dɛrɛ, Wɩa jaŋ joŋo pɩba.

1 Kɔrɩntɩ Nɩaa 1:7

Ŋɩɩ wɩaa, ma sɩɩ gbɛrɛ La Tɩɩna Yesu Kirisito dɩ ʋ mɩɩra kɔ ŋɩɩ, ŋɩɩ nɛ tɩɩ ʋ joŋ kɩalɩŋ kala sɩ lɩɩ ʋ Dɩŋ-zɔmʋŋ teeŋ a dii zile ma lɛ.

1 Kɔrɩntɩ Nɩaa 11:16

Dɩ nʋʋ nɛ saa chɛ dɩ ʋ kɛŋ wɩɩŋ deeŋ kaalɛrɛ, mɩ jaŋ bʋl arɩ wɩɩ-la nɛ la tuto. Wɩɩ dɔŋ kala tuo. Nɩalɩŋ sɩ laa Yesu wɩaa dii aa hilimi ma ka to ŋɩɩ nɛ.

1 Kɔrɩntɩ Nɩaa 11:26

Ka dɩ La Tɩɩna-na kɔ, má dii boroboro deeŋ aŋ nyʋnyʋa nyʋnyʋala deeŋ tʋɔŋ. Dɩ ma nɩɩ ŋaa ŋɩɩ, ma dagʋ arɩ La Tɩɩna Kirisito sʋʋ ma wɩaa nɛ.

1 Kɔrɩntɩ Nɩaa 15:23

Ama la kala kɛŋ bʋa-la lɛ Wɩa sɩ jaŋ chɩsɛla sʋʋŋ lɛ nɛ. Kirisito nɛ Wɩa laa sɩpaaŋ chɩsɛ sʋʋŋ lɛ. Dɩ ʋ nɛ mɩɩra kɔ, nɩalɩŋ sɩ ŋaa ʋ nɩaa, Wɩa jaŋ chɩsɛ ba ma sʋʋŋ lɛ.

1 Kɔrɩntɩ Nɩaa 3:13

dɩ Kirisito nɛ mɩɩra kɔ tapʋlɩɩ-la, kɩalɩŋ nʋʋkala sɩ kaa saa dɩa-la, ba jaŋ naʋ. Nyiniŋ nɛ jaŋ dagɛ kʋ-la ba sɩ kaa saa nagɩsɩŋ. Ba jaŋ to ŋɩɩ lɛ a jɩŋ tɩntɩmɩɩ-la nʋʋkala sɩ tɩma.

1 Kɔrɩntɩ Nɩaa 3:14

Dɩ nyiŋ-la nɛ kɔ aŋ bɩ wuo dii kɩalɩŋ nʋʋkala sɩ kaa saa dɩa-la, ʋ tɩɩna jaŋ laa ʋ time.

1 Kɔrɩntɩ Nɩaa 3:8

Nɩɩ-la sɩ duu kʋdoho-la arɩ nɩɩ-la sɩ ŋaa lɩɩŋ mɩsɛ, ba kala tɩma magɛ dɔŋɔ nɛ. Wɩa jaŋ tiŋ nʋʋkala a magɛ ŋɩɩ ʋ sɩ tɩŋ ʋ tɩntɩmɩɩ-la magɛ.

2 Kɔrɩntɩ Nɩaa 10:18

Nɩɩ-la sɩɩ bɩɩnʋ arɩ ʋ maga dɩ Wɩa lɩɩsʋ dɩ ʋ tɩma pʋpʋ, Wɩa bɩ jaŋ lɩɩsɛ tɩɩna, ama Wɩa tɩtɩa yie lɩɩsɛ nɩɩ-la kala ʋ sɩɩ chɛ dɩ ʋ tɩma puu nɛ.

2 Kɔrɩntɩ Nɩaa 10:9

Mɩ bɩ chɛ dɩ ma bɩɩnɛ arɩ mɩ yie ŋmʋnsɛ tenniŋ pɩpɩma dɩ mɩ joŋ fawʋllʋŋ nɛ a hɛ ma lɛ.

2 Kɔrɩntɩ Nɩaa 4:2

Hɩɩsɩ wɩalɩŋ arɩ wʋkaa-faalɩɩ-la nɩaa sɩ lʋara ŋɩŋaa, la-na vɩaba ta nɛ faafaa kala. La bɩra bɩ nʋʋ nyɩsɛ. La bɩ wɩaa nyɩɛ pɩpɛ Wɩa niiŋ wɩalɩŋ lɛ. Ama Wɩa sɩpaaŋ la chaasa bʋl wɩaa, dɩ nʋʋkala tʋɔbɩɩnaa jɩŋ arɩ wʋtɩtɩɩ nɛ la bʋbʋl.

2 Kɔrɩntɩ Nɩaa 5:10

bɛɛ wɩaa la kala jaŋ mʋ chɩŋ Kirisito sɩpaaŋ dɩ ʋ dii la sarɩya. Kirisito jaŋ tiŋ nʋʋkala magɛ ŋɩɩ ʋ sɩ tɩma magɛ dʋnɩa deeŋ lɛ. Dɩ ŋ nɛ faa ŋaa wʋzɔŋŋɔɔ, ʋ jaŋ joŋ wʋzɔŋŋɔɔ timiŋ. Dɩ ŋ nɛ faa ŋaa wʋbɔŋŋɔɔ ma, ʋ jaŋ joŋ wʋbɔŋŋɔɔ timiŋ.

1 Tɛsalonaaka Nɩaa 5:2

bɛɛ wɩaa ma tɩtɩa jɩma woruŋ dɩ La Tɩɩna Yesu nɩɩ kɔ tapʋlɩɩ-la, ʋ jaŋ kʋ dɩ ma lɛ, a nagɛ gaara sɩ yie guu kɔ ŋɩɩ tɩtaŋɩŋ.

Hiburu TƖŊŊAA 4:13

Kʋŋkala tuo sɩ jaŋ wuo kɛŋ ʋ tɩtɩa faa Wɩa teeŋ. Wɩa na kʋŋkala nɛ, ʋ teeŋ ba kala hɛ pʋlʋmʋŋ tʋɔŋ nɛ. Ʋ jaŋ leŋ dɩ la dagɛ la wʋŋaalaa kala a pʋ.

Jeems 4:11

Mɩ naambiiri, má sɩ́ ma dɔnsʋŋ tɩŋŋaa yɩrɩŋ chei. Nɩɩ-la kala sɩ chei ʋ dɔŋɔ tɩɩna yɩrɩŋ koo a bʋl ʋ teeŋ ma arɩ ʋ cheye nɛ, ʋ naga tɩɩna ma bʋl wʋbɔŋ nɛ a tɩgɛ wɩalɩŋ Wɩa sɩ leŋe ba ŋmʋnsa bil dɩ nɩaa tuto lɛ. Dɩ nʋʋ nɛ bʋla arɩ wɩalɩŋ bɩ zɔŋ, ʋ ma bɩra bɩ wɩalɩŋ to. Ʋ mɩɩra joŋ ʋ tɩtɩa arɩ ʋ yʋga nɛ a kɩɩ wɩalɩŋ Wɩa sɩ leŋe ba ŋmʋnsa bil.

Jeems 5:7

Mɩ naambiiriŋ, má kɛŋ kenyiri a gbɛrɛ chɛɛ-la La Tɩɩna Yesu sɩ jaŋ mɩɩra kɔ. Ma bee na ŋɩɩ paara sɩ kɛŋ kenyiri. Ʋ yie gbɛrɛ nɛ duoŋ-puso nɩɩ, ʋ duu kɩaa, a bɩra kɛŋ kenyiri a gbɛrɛ gbanchaaŋ-duonuŋ lɛ ʋ kɩaa ŋaa, ʋ kʋŋ.

Jeems 5:9

Mɩ naambiiriŋ, má sɩ́ wɩaa gʋrʋmʋ dɔŋɔ lɛ, dɩ Wɩa sɩ́ ma sarɩya dii a joŋ cheeriŋ pɩma. Na nɩɩ-la sɩ jaŋ dii la sarɩya nɛ chɩŋ boiŋ niiŋ a ŋaa siri dɩ ʋ jʋʋ ŋɩɩ.

1 Pɩɩta 1:7

Wɩaa deemba jʋʋma dɩ ba magɩsɛ ŋɩɩ ma sɩ laa Wɩa dii nɛ, a leŋ nɩaa wuo na arɩ ʋ sɛnɛ ŋaa wʋtɩtɩɩ nɛ. Ʋ nagɛ sɛlɩmɛ ba sɩ joŋo chɔ a yʋgɩlɛ dɩ ba na ʋ sɛnɛ ŋaa sɛlɩmɛ nɛɛ? Ba sɩ joŋ sɛlɩmɛ chɔ ŋɩɩ ma kala, ʋ bɩ dieni ka dɩ ʋ chei. Ma Wɩa laa diiniŋ nɛ yuŋŋie a kɩɩ sɛlɩmɛ. Ba sɩ magɩsɛma na ŋɩɩ, tapʋlɩɩ-la Yesu Kirisito sɩ jaŋ mɩɩra kɔ, nɩaa jaŋ dɛnnɛ Wɩa a zizilu dɩ ʋ yɩrɩŋ yɩrɛ a tɩŋ wɩalɩŋ ma sɩ laa dii wɩaa.

1 Pɩɩta 5:4

Dɩ ma nɛ ŋaa ŋɩɩ, tapʋlɩɩ-la Yesu Kirisito sɩ jaŋ mɩɩra kɔ, Nɩɩ-la sɩ ŋaa Pie-daaraa kala Kʋhɩaŋ, ʋ jaŋ joŋ kʋ-la sɩ zɔmɔ a kɩɩ kʋŋkala pɩma. Ʋ-na bɩ jaŋ chei.

2 Pɩɩta 3:12

Ma sɩɩ gbɛrɛ tapʋlɩɩ-la La Tɩɩna Yesu sɩ jaŋ kɔ ŋɩɩ, má pɛ pipesi, dɩ ma ŋaa wɩɩ na-kala ma sɩ jaŋ wuo ŋaa dɩ tapʋlɩɩ-la yima lɩma. Tapʋlɩɩ-la nɛ wɩa-nyuŋ jaŋ ŋmɩɛrɛ nyiniŋ tʋɔŋ a nyɩɩgɛ. Ka kʋŋkala sɩ hɛ wɩa-nyuŋ ma jaŋ ŋmɩɛrɛ nyiniŋ lɛ a lɛl.

2 Pɩɩta 3:4

Ba jaŋ pɩɛsɛma, “Yesu fa sɩ hɛ niiŋ arɩ ʋ jaŋ mɩɩra kɔ, nɩɩ nɛ ʋ hɛ? Chɛ bɛɛ nɛ saa ʋ jaŋ bɩra kɔ?” Ba jaŋ bɩra bʋl dɩ bʋa-la lɛ nɩalɩŋ sɩ laa sɩpaaŋ laa Yesu wɩaa dii sɩ sʋba a kaa kʋkɔ bʋa deeŋ lɛ, kʋŋkala bɩ bɩrɩma, ba kala ha nagɛ ŋɩɩ Wɩa sɩ ŋaaba nɛ dʋnɩa dɩ-suomuŋ.

Juud 1:14

Baal kʋbala ba sɩɩ yɩrɛ Ɛnɔk fa bʋl wɩaa Wɩa doluŋ lɛ faafaa kala nɛ a tɩgɛ nɩaa deemba lɛ. Ʋ fa ŋaa Adam nihi-lɩɛrɩ-pɛmɩŋ nɛ. Ʋ sɩ, “Má bee na, La Tɩɩna Wɩa ka kɔ nɛ arɩ ʋ tɩndaaraa bʋɩ fii fiiba sɩ bɩ disiniŋ kɛnɛ,

Jɔɔŋ Wʋnaalaa 1:7

Má bee na, ʋ nɛ to duoŋ-bɩlɩmbaanaa tʋɔŋ a kʋkɔ. Nʋʋkala jaŋ naʋ. Nɩalɩŋ ma sɩ joŋ kɩaa tɔbʋ jaŋ naʋ. Dʋnɩa nɩaa kala jaŋ yel ʋ wɩaa. Ŋɩɩ sɛnɛ jaŋ ŋaa. Amɩɩ.

Jɔɔŋ Wʋnaalaa 20:12

Ŋɩɩ nɛ ka mɩ na nɩalɩŋ sɩ sʋba, nɩhɩasɩŋ arɩ hambiisiŋ kala, dɩ ba chɩŋ kuoru kpasa-la sɩpaaŋ. Ŋɩɩ nɛ ba suri tenniŋ, a bɩra suri teniŋ dɔŋɔ ma, mɩɩsɩŋ teniŋ nɛ ŋɩɩ. Tenni-la lɛ nɛ ba ŋmʋnsɛ nʋʋkala sɩ hɛ dʋnɩa lɛ wʋŋaalaa hɛ, ba lɛ nɛ ba to a dii nʋʋkala sɩ sʋba sarɩya.