1 Kɔrɩntɩ Nɩaa 14:3 - WƖA TENIŊ

³ Ama nɩɩ-la sɩɩ bʋl Wɩa wɩaa ʋ Dɩŋ-zɔŋ-la doluŋ lɛ, ʋ bʋl wɩalɩŋ a pɩpɩ nɩaa nɛ. Ʋ yie pɛ ba lɛ a leŋ ŋɩɩ ba sɩ laa Wɩa dii pʋŋa pa, a leŋ ba nyuŋ nyaasɛ Wɩa wɩaa lɛ, a leŋ ba tʋɔŋ ma tɔrɛ.

1 Kɔrɩntɩ Nɩaa 14:3 ပူးပေါင်းရင်းမြစ်များ

Luuk 3:18

Jɔɔŋ to wombiee yʋgɛ nɛ a bʋl Wɩa wʋzɔmɔ-la a pɩ nɩaa a chagɩlɛba.

Tɩntɩŋŋaa 13:15

Ba sɩ hɔŋ ŋɩɩ, nʋʋ karɩmɛ wɩalɩŋ Mosis fa sɩ ŋmʋnsa bil dɩ nɩaa tuto, arɩ Wɩa tenni-la Wɩa wʋlaabʋllaa fa sɩ ŋmʋnsa. Ba sɩ karɩma dɛrɛ, Wɩɩchʋɔlɛ dɩa-la kʋhɩasɩŋ tɩŋ dɩ ba bʋla pɩba, “La naambiiriŋ, dɩ ma nɛ kɛŋ wɩɩ ma sɩ jaŋ bʋla pɩ nɩaa deemba dɩ ba nyuŋ nyaasɛ, má bʋl.”

Tɩntɩŋŋaa 14:22

Leree deemba kala lɛ ba yie bʋl wɩaa pɩ nɩalɩŋ sɩ laa Yesu wɩaa dii, dɩ ba wasa kɛŋ wʋtɩtɩɩ a bʋl wɩaa nyaasɛ ba nyuŋ dɩ ba chɩŋ ŋɩɩ ba sɩ laa Wɩa dii lɛ. Ba bʋla pɩba, “La nɩalɩŋ sɩ laa Yesu wɩalɩŋ dii, jaŋ na hɛɛŋ kɩŋkɛŋ, aŋ-na jʋʋ Wɩa kuorii-la tʋɔŋ.”

Tɩntɩŋŋaa 15:32

Judas arɩ Saalas fa ŋaa Wɩa wʋlaabʋlla nɛ. Ba bʋl wɩaa yʋgɛ a pɩ nɩalɩŋ, ba nyuŋ nyaasɛ, ba wasa kɛŋ doluŋ.

Tɩntɩŋŋaa 4:36

Baal kʋbala ma nɛ fa hɛ nɩmɛ, baa yɩrɛ Josɛf. Ʋ fa ŋaa Levi doho nʋʋ nɛ a lɩɩ Saapʋrɔs tinteeŋ. Yesu nanzɔɔba-la ma kɛnʋ kaa yɩyɩrɛ Banabas. (Ʋ bʋbʋɔŋ nɛ, ʋ fa yie bʋl wɩaa pɩ nɩaa ba nyusuŋ nyɩnyaasɛ.)

Tɩntɩŋŋaa 9:31

Ŋɩɩ harɩŋ lɛ nɩalɩŋ sɩ laa Yesu wɩaa dii aa hilimi Judiya arɩ Galilii arɩ Samarɩa tinteeŋ lɛ kala na wiese, a wasa laa Wɩa dii, a to La Tɩɩna Yesu a fɩfáʋ. Wɩa Dɩŋ-zɔmʋŋ ma pɛ ba lɛ. Ba pʋŋa pɛ.

Rom Tɩŋŋaa 12:8

Dɩ ŋ nɛ kɛŋ doluŋ dɩ ŋ wuo dɩdagɛ nɩaa a leŋ dɩ ba nyuŋ nyɩnyaasɛ, ŋ ma ŋɩŋaa ŋɩɩ. Dɩ nʋʋ nɛ kɛŋ zile a pɩpɛ nɩaa lɛ, ʋ ma ŋɩŋaa ŋɩɩ arɩ tʋɔ-bala. Dɩ ŋ nɛ ŋaa sɩpaalaarʋ, tɩtɩŋ arɩ sɩɩfɩɛsɩŋ. Dɩ ŋ nɛ kɛŋ doluŋ a fɩfá nɩaa nenige, ŋɩŋaa ŋɩɩ arɩ tʋɔtɔrʋŋ.

Rom Tɩŋŋaa 14:19

Má saa leŋ dɩ la bɩbɩɩnɛ wɩalɩŋ sɩ jaŋ leŋ dɩ la kɛŋ nii-bala, a wuo pɩpɛ dɔŋɔ lɛ a kɛŋ doluŋ.

Rom Tɩŋŋaa 15:2

Má leŋ dɩ la kʋŋkala ŋaa dɩ ʋ dɔŋɔ tɩɩna tʋɔŋ tɔrɛ, dɩ la pɛ ʋ lɛ ŋɩɩ dɩ ʋ kɛŋ doluŋ a chɩŋ ʋ wɩalɩŋ ʋ sɩ laa dii lɛ.

1 Kɔrɩntɩ Nɩaa 10:23

Mɩ jaŋ wuo ŋaa wɩɩkala, ama ba kala bɩ jaŋ wuo pɛ mɩ lɛ. Ba kala bɩ jaŋ wuo ŋaa dɩ mɩ waa Wɩa wɩaa lɛ.

1 Kɔrɩntɩ Nɩaa 14:12

Ŋɩɩ wɩaa, ma sɩ cho dɩ ma kɛŋ kɩalɩŋ kala Wɩa Dɩŋ-zɔmʋŋ sɩ joŋo dii zile ma lɛ ŋɩɩ, má hɛ doluŋ aŋ chɛ kɩalɩŋ sɩ jaŋ leŋ dɩ ma kɛŋ doluŋ a pɛ nɩalɩŋ sɩ laa Yesu wɩaa dii aa hilimi lɛ, dɩ ba chɩŋ wɩalɩŋ ba sɩ laa dii lɛ kpaŋ kpaŋ.

1 Kɔrɩntɩ Nɩaa 14:17

Ʋ ŋaa wʋtɩtɩɩ nɛ, nʋʋ jaŋ wuo dɛnnɛ Wɩa woruŋ arɩ yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl, ama dɩ nʋʋ nɛ ŋaa ŋɩɩ, ʋ bɩ nɩalɩŋ sɩ hilime lɛ wuo pɩpɛ.

1 Kɔrɩntɩ Nɩaa 14:26

Wɩalɩŋ kala mɩ sɩ bʋla, ba bʋbʋɔŋ nɛ ŋ-la: Dɩ ma nɛ kʋ hilimi-na kala, dɩ dɔŋɔ nɛ kɛŋ yɩɩlɩŋ dɩ ʋ yɩɩ, dɩ dɔŋɔ ma kɛŋ wɩɩ dɩ ʋ dagɛ nɩaa, koo nʋʋ nɩɩ chɛ dɩ ʋ bʋl wɩɩ-la Wɩa sɩ joŋo dagʋ ʋ doluŋ lɛ, dɔŋɔ maa chɛ dɩ ʋ bʋl wɩaa yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl, dɔŋɔ maa chɛ dɩ ʋ dagɛ wɩɩ-la ba sɩ bʋla bʋbʋɔŋ, má maga ma ŋaa wɩaa deemba kala a pɩpɛ dɔŋɔ lɛ.

1 Kɔrɩntɩ Nɩaa 14:31

Ma kala jaŋ wuo bʋl Wɩa wɩaa, Wɩa Dɩŋ-zɔŋ-la doluŋ lɛ, kʋŋ kʋŋ a dagɛ dɔŋɔ dɩ ma nyuŋ nyaasɛ.

1 Kɔrɩntɩ Nɩaa 8:1

Ma sɩ pɩɛsɛmɛ wɩaa dɔnsʋŋ a mʋ tɩgɛ vʋɩŋ kʋdiilee lɛ, mɩɩ chɛ dɩ mɩ bʋl wɩaa a mʋ tɩgɛ ba lɛ nɛ. Ʋ ŋaa wʋtɩtɩɩ nɛ arɩ la kala jɩŋ wɩaa nɛ. Wʋjɩmɩŋ saa yie kɛŋ ʋ tɩɩna bibigisi ʋ tɩtɩa lɛ nɛ. Ama nɩalɩŋ sɩ cho nɩaa yie pɛ ba lɛ nɛ dɩ ba chɩŋ wɩalɩŋ ba sɩ laa dii lɛ woruŋ.

2 Kɔrɩntɩ Nɩaa 1:4

Dɩ wɩaa nɩɩ walɩmɛla, ʋ yie pɛ la lɛ nɛ a leŋ la tʋɔŋ tɔrɛ. Ʋ sɩ yie ŋaa la tʋɔŋ tɔrɛ ŋɩɩ, la ma yie ŋaa la naambiiriŋ ma wɩaa sɩɩ walɩmʋ tʋɔŋ tɔrɛ ŋɩɩ nɛ. Wɩa joŋ tʋɔtɔrʋŋ nɛ pɩla, ŋɩɩ nɛ tɩɩ la ma pɛ la naambiiriŋ lɛ dɩ ba ma na tʋɔtɔrʋ-la doho.

2 Kɔrɩntɩ Nɩaa 2:7

Lɛɛlɛ-na ʋ maga dɩ ma joŋ wɩɩ-la kala chɛʋ, a pɛ ʋ lɛ dɩ ʋ tʋɔŋ tɔrɛ. Dɩ ŋɩɩ dee, ʋ tʋɔŋ jaŋ faasa chei a kieli dɩ ʋ pʋgʋmɛ.

Ɛfɛsɩs Nɩaa 4:29

Má sɩ́ leŋe dɩ wʋbɔŋ kala lɩɩ ma niiŋ lɛ. Má bʋl wʋzɔmɔ-la sɩɩ jʋʋ nɩaa dɩgɩlaa bʋa-la lɛ sɩ maga, a leŋ dɩ wɩalɩŋ ma sɩɩ bʋl pɛ nɩalɩŋ sɩɩ jegili ba lɛ.

Ɛfɛsɩs Nɩaa 6:22

Wɩɩ-la wɩaa mɩ sɩɩ tɩmʋ nɛ ŋɩɩ, dɩ ʋ leŋ dɩ ma jɩŋ ŋɩɩ la hɔnʋŋ sɩ naga, dɩ ma nyuŋ nyaasɛ.

Koloosi Nɩaa 4:8

Mɩɩ tɩmʋ ma teeŋ, dɩ ʋ leŋ dɩ ma jɩŋ ŋɩɩ wɩaa sɩ naga a pɩla, dɩ ʋ wuo ŋaa dɩ ma nyuŋ nyaasɛ.

1 Tɛsalonaaka Nɩaa 2:11

La sɩ hɛ ma teeŋ, la kɛmma a nagɛ hambiisiŋ nyɩmma sɩ yie kɛŋ ʋ hambiisiŋ ŋɩɩ nɛ.

1 Tɛsalonaaka Nɩaa 2:3

La bɩ ma teeŋ kɔ dɩ la kʋ bʋl wɩalɩŋ sɩ bɩ wʋtɩtɩɩ ŋaa a pɩma. La bɩra bɩ tʋɔbɩɩŋ bɔŋŋɔɔ ma kaa kɔ. La bɩ maa nyɩsɛ ma.

1 Tɛsalonaaka Nɩaa 3:2

La tɩŋ la naambie Timoti dɩ ʋ kʋ nama. Ʋ ŋaa la naambii nɛ, a ŋaa la tɩntɩnnɩ dɔŋ ma, a bʋl Wɩa wʋzɔmɔ-la sɩ tɩgɛ Kirisito lɛ a pɩpɩ nɩaa. La tɩmʋ dɩ ʋ kʋ bʋl wɩaa a nyaasɛ ma nyuŋ dɩ ma chɩŋ wɩalɩŋ ma sɩ laa dii lɛ woruŋ,

1 Tɛsalonaaka Nɩaa 4:1

La naambiiri, wɩalɩŋ mɩ sɩɩ chɛ dɩ mɩ bʋl wʋkaanɩŋ nɛ ŋ-la: La dagɛma wɩalɩŋ ma sɩ jaŋ ŋaa dɩ Wɩa tʋɔŋ tɔrɛ ma nyuŋ nɛ, ŋɩɩ tɩtɩa nɛ ma sɛnɛ ŋɩŋaa. Ama la haa sʋlma La Tɩɩna Yesu yɩrɩŋ lɛ dɩ ma wasa ŋɩŋaa wɩalɩŋ.

1 Tɛsalonaaka Nɩaa 4:18

Má bʋl wɩaa deemba a pɩ dɔŋɔ dɩ ma tʋɔŋ pɩŋ dɩ-bala.

2 Tɛsalonaaka Nɩaa 3:12

La Tɩɩna Yesu Kirisito yɩrɩŋ lɛ la bʋla pɩ nɩaa deemba aa kpʋrɩsɛ ba dɩgɩlaa nɛ dɩ ba kɛŋ ba tɩtɩa hɛ dɔŋɔ a tɩŋ tɩntɩŋŋaa a wuo na ba tɩtɩa kʋdiilee didii.

1 Timoti 1:4

Bʋla pɩba dɩ ba sɩ nɩalɩŋ sʋnsɔgʋlɔ-la joŋo hɛ ba nyuŋ lɛ, a sɩ́ ba naabalɩmaba doho nɩaa wɩaa sɩ duomo ŋɩɩ dɩɩsʋ. Wɩaa deemba yie ŋaa nɩaa kɛŋ nii-doluŋ nɛ. Nii-doluŋ ma bɩ jaŋ pɛ ba lɛ dɩ ba laa Wɩa dii a laa wɩɩ-la ʋ sɩɩ chɛ dɩ ʋ ŋaa pɩ ʋ nɩaa dii.

1 Timoti 4:13

Ŋaa sɩɩfɩɛsɩŋ karɩmɛ Wɩa niiŋ wɩalɩŋ pɩ nɩaa dɩ ma nɛ hilime, a dɩdagɛ nɩaa, aŋ pɛ bʋl wɩalɩŋ pɩpɩ nɩaa, aŋ ka dɩ mɩ-na kɔ.

1 Timoti 6:2

Yosu-la nɩhɩasɩŋ sɩ laa Yesu wɩaa dii, ʋ bɩ maga dɩ ba mɩmaasɛ ba tɩŋŋaa a tɩŋ ba kala sɩ laa Yesu wɩaa dii. Ʋ paala magɛ dɩ ba tɩŋ tɩntɩŋŋaa woruŋ nɛ a pɩba, bɛɛ wɩaa nɩalɩŋ ba sɩ tɩmaa pa ŋaa nɩa sɩ laa Yesu wɩaa dii nɛ, a ŋaa nɩa ba cho. Timoti, wɩaa deemba nɛ ŋ jaŋ joŋo dagɛba a chaasa leŋ dɩ ba tutoba.

2 Timoti 4:2

bʋl Wɩa wɩaa pɩpɩ nɩaa bʋa na-kala lɛ, dɩ wɩaa zɔmɔ koo dɩ ba lɔrɔ. Kɛmba tʋra kɩɩ, bʋl ba teeŋ, aŋ ŋaa dɩ ba nyuŋ nyaasɛ. Kɛŋ kenyiri a jɩma dɩdagɛba woruŋ.

Taatɩs 1:9

Ba sɩ dagʋ Wɩa niiŋ wɩalɩŋ sɩ ŋaa wʋtɩtɩɩ ŋɩɩ, ʋ maga dɩ ʋ kɛmba woruŋ, dɩ ʋ wuo dagɛ ʋ dɔnsʋŋ tɩŋŋaa wʋtɩtɩɩ-la ʋ sɩ gʋnna. Dɩ ʋ nɛ ŋaa ŋɩɩ, ʋ jaŋ wuo dagɛ nɩalɩŋ sɩ bʋl wɩaa chichei Wɩa wʋtɩtɩɩ-la la sɩɩ to.

Taatɩs 2:15

Ŋɩɩ wɩaa, joŋ wɩaa deemba a dagɛba, a kɛŋ dol-la Wɩa sɩ joŋo pɩŋ, a bʋl wɩaa nyaasɛ ba nyuŋ, dɩ ba nɛ ŋaa wɩɩ ma chei dɩ ŋ bʋl ba teeŋ. Sɩ́ leŋe dɩ nʋʋkala bee gʋʋnʋŋ.

Taatɩs 2:6

Bʋl ŋɩɩ tɩtɩa a nyaasɛ bapʋɔsaa ma nyuŋ dɩ ba jɩma kɛŋ ba tɩtɩa woruŋ.

Taatɩs 2:9

Bʋla pɩ yosuŋ ma dɩ ba tuto nɩalɩŋ sɩ tɩɩba niiŋ wɩɩkala lɛ, a ŋaa wɩalɩŋ kala sɩ maga dɩ ba tɩŋŋaa tʋɔŋ tɔrɛ ba nyuŋ. Ʋ bɩ maga dɩ ba laa wɩaa bʋbʋl ba teeŋ.

Hiburu TƖŊŊAA 10:25

La sɩ yie hihilimi ŋɩɩ, nɩaa dɔnsʋŋ yie vɩa nɛ. Má sɩ́ ŋɩɩ ŋaa. Ama má leŋ dɩ la haa hilimi a pɩpɛ dɔŋɔ lɛ dɩ la to Wɩa arɩ sɩɩfɩɛsɩŋ, bɛɛ wɩaa tapʋlɩɩ-la La Tɩɩna Yesu sɩ jaŋ mɩɩra kɔ kpaga nɛ.

Hiburu TƖŊŊAA 13:22

Mɩ naambiiriŋ, mɩɩ sʋlma dɩ ma jegile nɩɩ wɩalɩŋ mɩ sɩ bʋla pɩma. Wʋkuu-bie nɛ mɩ ŋmʋnsa pɩma ŋɩɩ.

Hiburu TƖŊŊAA 3:13

Ama má pɛ dɔŋɔ lɛ tapʋlɩɩ-na kala a lɩɩ jɩnɩŋ a kaa mʋmʋ, dɩ wʋbɔŋŋɔɔ sɩ́ wuo nyɩsɛ ma kʋŋkala a leŋ dɩ ma ŋaa sɩɩ-duo wɩaa Wɩa sɩpaaŋ.

1 Pɩɩta 5:12

Mɩ nɛ leŋe Sɩlɩvaanʋs ŋmʋnsɛ teniŋ deeŋ pɩpɩma. Mɩ jɩma arɩ ʋ ma ŋaa la naambii-tɩtɩɩ nɛ. Wʋkuu-bie nɛ mɩ ŋmʋnsa pɩma dɩ mɩ ŋaa dɩ ma nyuŋ nyaasɛ. Wʋtɩtɩɩ nɛ, mɩ bʋla pɩma ŋɩɩ Wɩa sɩ pɛ la lɛ. Ŋɩɩ wɩaa má chɩŋ wɩaa deemba lɛ kpaŋ kpaŋ.

Juud 1:20

Ama ma-na, mɩ nandɔŋ-chooloo, wɩalɩŋ ma sɩ laa dii lɩɩ Wɩa teeŋ nɛ. Ŋɩɩ wɩaa, má kɛmba woruŋ a waa ba lɛ, a to Wɩa Dɩŋ-zɔŋ-la lɛ a chʋchʋɔlɛ Wɩa.