1 Kɔrɩntɩ Nɩaa 1:9 - WƖA TENIŊ

⁹ Wɩa kɛŋ wʋtɩtɩɩ. Ʋ nɛ yɩrɛma dɩ ma dɩ ʋ Bie Yesu Kirisito kʋ ŋaa kʋbala. Ʋ nɛ ŋaa La Tɩɩna.

1 Kɔrɩntɩ Nɩaa 1:9 ပူးပေါင်းရင်းမြစ်များ

WƖA YƖƖLAA 100:5

La Tɩɩna wɩaa zɔmɔ, ʋ chonuŋ bɩ dɛrɛ, ʋ wʋtɩtɩɩ bɩ dɩdɛrɩ kɛnɛ.

AZAAYA 11:5

Tʋɔpʋla arɩ wʋtɩtɩɩ jaŋ nagɛ gɛrɩpɛlɩɛɛ-bie ʋ tɩŋa lɛ.

AZAAYA 25:1

Ou La TƖƖNA, ŋ nɛ mɩ Wɩa. Mɩ jaŋ dɛnnɩŋ a yɩrɛ ŋ yɩrɩŋ. Ŋ wʋtɩtɩɩ lɛ nɛ ŋ ŋaa wʋkpuŋkperisiŋ, wɩalɩŋ ŋ sɩ bɩɩna bil faafaa kala.

AZAAYA 49:7

Iziral tɩŋŋaa, Wɩa sɩ bɩ disiniŋ kɛnɛ, a ŋaa ba laataara bʋla pɩ nɩɩ-la Iziral tɩŋŋaa sɩ bɩ ʋ wʋŋaalaa cho a bɛrɛ, a ŋaa kuoroo tɩntɩnnʋ: “Kuoroo jaŋ naŋ a sii chɩŋ, dɩ kuori-biiriŋ ma naŋ a tuu kpirimi. Wɩaa deemba kala jaŋ ŋaa, bɛɛ wɩaa mɩ-na ma TƖƖNA Iziral tɩŋŋaa Wɩa sɩ bɩ disiniŋ kɛnɛ sɩ lɩɩsɛ mɩ tɩntɩnna, kɛŋ wʋtɩtɩɩ nɛ.”

NAMBABA 23:19

Wɩa bɩ nuhuobiinee naga a nyɩnyɩɛ wɩaa koo a kɛŋ ʋ tʋɔbɩɩnaa a bɩbɩrɩmɛ. Dɩ ʋ nɛ bʋl wɩɩ, ʋ yie sɛnɛ ŋaa wɩɩ-la nɛ, dɩ ʋ nɛ hɛ niiŋ arɩ ʋ jaŋ ŋaa wɩɩ ma, ʋ yie sɛnɛ ŋaa nɛ.

Matiu 24:35

Wɩa nyuŋ arɩ tinteeŋ kala jaŋ lɛl, ama wɩalɩŋ mɩ sɩ bʋla bɩ jaŋ lɛl.

Jɔɔŋ 17:21

Mɩ Nyɩmma, mɩɩ sʋlʋŋ dɩ ba kala wuo ŋaa kʋbala, a nagɛ ŋ sɩ hɛ mɩ lɛ mɩ ma hɛ ŋ lɛ ŋɩɩ. Dɩ ŋ nɛ ŋaa ŋɩɩ, dʋnɩa nɩaa jaŋ wuo laa dii arɩ ŋ nɛ tɩmmɛ.

Rom Tɩŋŋaa 11:17

Juu tɩŋŋaa saa nagɛ tɩa-la ba sɩɩ yɩrɛ Olif nɛ. Ba kɛŋ ʋ nɛnɛɛ a kaa tutugi nʋʋŋ nɛ. Wɩa ŋaa ʋ zɔŋ. Ŋɩɩ nɛ Wɩa keri ʋ naakelee dɔnsʋŋ, aŋ kɛmma kaa mɛrɛ ba leree, ma nɩalɩŋ sɩ nagɛ gɩrɩŋ tɩɩ-naakelee. Ʋ ŋaa ŋɩɩ dɩ ma ma pɛ nɩɩ Olif tɩɩ-zɔŋ-la naakelee sɩma nɛ.

Rom Tɩŋŋaa 8:28

La jɩma wɩɩkala lɛ, Wɩa yie leŋ wɩaa zɔŋ nɛ a pɩ nɩalɩŋ sɩ chou, nɩalɩŋ ʋ sɩ lɩɩsa ʋ tʋɔtɔrʋŋ lɛ.

Rom Tɩŋŋaa 8:30

Wɩa yɩrɛ nɩalɩŋ ʋ fa sɩ laa sɩpaaŋ lɩɩsɛ dɩ ba ŋaa ʋ nɩaa nɛ. Ʋ sɩ yɩrɛba ŋɩɩ, ʋ leŋ ba kɛŋ tʋɔpʋla ʋ sɩpaaŋ. Nɩalɩŋ ma sɩ kɛŋ tʋɔpʋla ʋ sɩpaaŋ, ʋ leŋ ba ma pɛ laa ʋ yɩrɩŋ.

Rom Tɩŋŋaa 9:24

La nɛ nɩalɩŋ ʋ sɩ lɩɩsa, la kala dee bɩ Juu tɩŋŋaa ŋaa, la dɔnsʋŋ ma ŋaa nɩalɩŋ sɩ bɩ Juu tɩŋŋaa ŋaa nɛ.

1 Kɔrɩntɩ Nɩaa 1:30

Ama Wɩa leŋe ma to Kirisito Yesu lɛ nɛ a kɛŋ mɩɩsɩŋ. Wɩa saa leŋe Kirisito nɛ ŋaa la wʋjɩmɩŋ. A tɩŋ ʋ wɩaa Wɩa laala ta nɛ, la kʋ ŋaa tʋɔpʋl tɩmma ʋ teeŋ, a ŋaa nɩalɩŋ sɩ bɩ disiniŋ kɛnɛ.

1 Kɔrɩntɩ Nɩaa 10:13

Dɩ Sɩtaanɩ nɛ kʋ magɩsɛ nʋʋ, ʋ maga dɩ ʋ jɩŋ arɩ ŋɩɩ tɩtɩa nɛ Sɩtaanɩ yie mɩmagɩsɛ nʋʋkala. Ama Wɩa kɛŋ wʋtɩtɩɩ nɛ, ʋ bɩ jaŋ sɛɩ dɩ Sɩtaanɩ magɩsɛma a kieli ŋɩɩ ma sɩ jaŋ wuo ŋaa a chɩŋ wɩalɩŋ ma sɩ laa dii lɛ. Bʋa-la Sɩtaanɩ sɩɩ magɩsɛma, Wɩa jaŋ pɩma doluŋ dɩ ma wuo nyalɩmɛ. Ʋ jaŋ dagɛma wombii-la ma sɩ jaŋ to a lɩɩ wɩɩ-la lɛ.

1 Kɔrɩntɩ Nɩaa 10:16

Dɩ la nɩɩ dii kʋdiile-la Kirisito sɩ sɩ dɩ la dii a liliisi ʋ wɩaa, la yie lɔllɛ Wɩa nɛ, aŋ joŋ nyʋnyʋala-la a nyʋa ʋ tʋɔŋ kɩaa. La sɩ ŋaa ŋɩɩ yie dagɛ arɩ a tɩŋ Kirisito chalɩŋ wɩaa la ŋaa kʋbala nɛ. Dɩ la nɛ dii boroboro-la ma, ʋ ŋɩɩ daga arɩ a tɩŋ Kirisito yaraa wɩaa la kala ŋaa kʋbala nɛ.

2 Kɔrɩntɩ Nɩaa 1:18

Ma jɩma woruŋ arɩ Wɩa kɛŋ wʋtɩtɩɩ. Ŋɩɩ wɩaa wɩalɩŋ kala la sɩ bʋla pɩma ŋaa wʋtɩtɩɩ nɛ, la bɩ niiriŋ balɩa ka bʋl.

Galiisia Nɩaa 1:15

Ama ka dɩ ba-na lʋlmɛ, Wɩa lɩɩsɛmɛ nɛ dɩ mɩ tɩma pʋ. Ʋ lahɔrɩmɔ lɛ nɛ ʋ ŋaa ŋɩɩ mɩ lɛ.

Galiisia Nɩaa 2:20

Mɩ dɩ Kirisito kala nɛ ba kpaasa mɛrɛ daagɛsɛ nyuŋ. Mɩɩsɩ-la mɩ sɩ kɛnɛ, ʋ bɩ mɩ teeŋ lɩa, ʋ lɩɩ Kirisito teeŋ nɛ. Mɩ sɩ laa Wɩa Bie wɩaa dii nɛ tɩɩ mɩ wuo kɛŋ mɩɩsɩŋ deeŋ mɩ sɩ kɛnɛ dʋnɩa deeŋ lɛ. Wɩa Bie Yesu nɛ chomi, a joŋ ʋ mɩɩsɩŋ a yɔɔ sʋʋŋ mɩ wɩaa.

Ɛfɛsɩs Nɩaa 3:6

Wɩalɩŋ nɛ ŋ-la: Wɩa to Kirisito Yesu wʋzɔmɔ-la lɛ nɛ a leŋ nɩalɩŋ sɩ bɩ Juu tɩŋŋaa ŋaa ma kɛŋ toruŋ kɩalɩŋ Wɩa sɩ hɛ niiŋ arɩ ʋ jaŋ joŋo pɩ Juu tɩŋŋaa lɛ. Lɛɛlɛ ba kala pɛ Kirisito yaraa lɛ nɛ a tɩŋ Wɩa wʋzɔmɔ-la wɩaa. Ba ma jaŋ pɛ dii kɩalɩŋ Wɩa sɩ to Kirisito Yesu lɛ a bʋl dɩ ʋ jaŋ joŋo pɩla.

MOSIS BƖRA WULLI WƖA WOMBIIŊ 32:4

Ʋ doluŋ nagɛ bʋŋ nɛ, a ŋɩŋaa wɩaa ba bʋa lɛ. Ʋ kɛŋ tɛŋɛ nɛ woruŋ ʋ wombiee kala lɛ. Ʋ ŋaa Wɩa sɩ kɛŋ wʋtɩtɩɩ a bɩ wɩaa ka chei nɛ.

MOSIS BƖRA WULLI WƖA WOMBIIŊ 7:9

Ŋɩɩ wɩaa, ʋ maga dɩ ma jɩŋ arɩ La TƖƖNA Wɩa dʋndʋŋa nɛ Wɩa, ʋ nɛ kɛŋ wʋtɩtɩɩ. Ʋ jaŋ leŋ dɩ nii-la sɩ hɛ ma dɩ ʋ pɛgɛ chɩŋ. Ʋ jaŋ dagɛ ʋ chonuŋ a pɩ nɩalɩŋ kala sɩ chou a tuto wɩalɩŋ kala ʋ sɩ daga doho doho bʋɩba.

Koloosi Nɩaa 1:24

Lɛɛlɛ mɩ tʋɔŋ tɔrɔ hɛɛ-la mɩ sɩ na a pɩma lɛ. Hɛɛ-la mɩ sɩ na ma wɩaa nɛ leŋe Kirisito sɩ na hɛɛ-la nɩalɩŋ sɩ laa ʋ wɩaa dii aa hilimi dɛrɛ. Nɩalɩŋ nɛ ŋaa ʋ yaraa.

1 Tɛsalonaaka Nɩaa 2:12

La bʋl wɩaa ma nyuŋ nyaasɛ nɛ, a leŋ ma tʋɔŋ pɩŋ dɩ-bala. La sʋlma nɛ dɩ ma leŋ dɩ ma mɛlɛ zɔŋ Wɩa sɩpaaŋ. Wɩa nɛ yɩrɛma dɩ ma kʋ jʋʋ ʋ kuorii-la tʋɔŋ a pɛ na ʋ tʋla.

2 Tɛsalonaaka Nɩaa 2:14

Wɩa wʋzɔmɔ-la la sɩ bʋla pɩma, Wɩa to ba lɛ nɛ a yɩrɛma. Wɩa yɩrɛma dɩ ma kʋ to kɛŋ La Tɩɩna Yesu Kirisito tʋla-la nɛ.

2 Tɛsalonaaka Nɩaa 3:3

Ama La Tɩɩna Yesu kɛŋ wʋtɩtɩɩ. Ʋ jaŋ pɩma doluŋ a lɩɩsɛma Sɩtaanɩ nɩsɩŋ lɛ.

2 Timoti 1:9

Wɩa nɛ laala ta a yɩrɛla dɩ la ŋaa ʋ nɩaa. Ʋ bɩ naga Wɩa to la wʋzɔŋŋɔɔ lɛ nɛ a laala ta. Ama ʋ tɩtɩa tʋɔtɔrʋŋ lɛ nɛ ʋ fá la nenige a laala ta. Yesu Kirisito lɛ nɛ ʋ to a ŋaa ŋɩɩ pɩla. Ʋ jɩma arɩ ʋ jaŋ ŋaa ŋɩɩ pɩla faafaa kala nɛ, ka dʋnɩa-na suomi.

2 Timoti 2:13

Dɩ la nɛ bɩ ʋ ka to arɩ wʋtɩtɩɩ, ʋ-na ha kɛŋ wʋtɩtɩɩ nɛ, bɛɛ wɩaa ʋ bɩ jaŋ wuo nyɩsɛ ʋ tɩtɩa.

Taatɩs 1:2

Nɩalɩŋ sɩɩ to Wɩa wombiiŋ deeŋ, baa yɩɛlɛ arɩ ba jaŋ kɛŋ mɩɩsɩ-la sɩ bɩ dɛrɛ. Wɩa fa bʋl wɩaa a tɩgɛ mɩɩsɩŋ deeŋ lɛ faafaa kala nɛ, ka dʋnɩa-na suomi. Wɩa bɩ wɩaa ka nyɩɛ, ʋ jaŋ ŋaa wɩɩ-la.

Hiburu TƖŊŊAA 10:23

Ŋɩɩ wɩaa, wɩalɩŋ la sɩ laa dii, má leŋ dɩ laa yɩɛlɛ wɩalɩŋ, a chɩŋ ba lɛ kpaŋ kpaŋ, a sɩ́ begilu mʋa ma, bɛɛ wɩaa Wɩa kɛŋ wʋtɩtɩɩ nɛ. Kɩalɩŋ ʋ sɩ sɩ ʋ jaŋ joŋo pɩla, la laa dii arɩ la jaŋ naba.

Hiburu TƖŊŊAA 11:11

Ŋɩɩ tɩtɩa nɛ Abɩraham haala Saara ma laa Wɩa wɩaa dii. Saara fa ŋaa hapɩrɩ nɛ. Abɩraham arɩ ʋ haala kala fa hɩɛsa nɛ woruŋ, ka Wɩa wuo pɛ ba lɛ ba lʋl bie. Sara jɩma arɩ Wɩa kɛŋ wʋtɩtɩɩ nɛ. Ŋɩɩ wɩaa ʋ laa dii arɩ ʋ jaŋ na kʋ-la Wɩa sɩ sɩ ʋ jaŋ joŋo pʋ.

Hiburu TƖŊŊAA 2:17

Ŋɩɩ nɛ tɩɩ ʋ bɩrɩmɛ nuhuobiine a ma nagɛ ʋ naambiiri-la, ba wɩɩ-wɩɩkala lɛ. Ʋ ŋaa ŋɩɩ dɩ ʋ wuo kʋ ŋaa nɩalɩŋ sɩ tɩma pɩpɩ Wɩa nɩaa nyuŋ kʋhɩaŋ ʋ naambiiriŋ tʋɔŋ a ŋaa nʋʋ sɩɩ fa nɩaa nenige, a kɛŋ wʋtɩtɩɩ Wɩa tɩntɩŋŋaa lɛ, dɩ ŋɩɩ leŋ dɩ Wɩa joŋ nɩaa wʋbɔŋŋɔɔ chɛba.

Hiburu TƖŊŊAA 3:1

Ŋɩɩ wɩaa mɩ naambiiriŋ sɩ bɩ disiniŋ kɛnɛ Wɩa sɩpaaŋ, Wɩa nɛ yɩrɛla dɩ la kɔ ʋ teeŋ. Ʋ saa maga dɩ ma joŋ Yesu wɩaa hɛ ma nyuŋ lɛ. Ʋ nɛ ŋaa Wɩa nanzɔɔ a ŋaa Wɩɩsʋllɩ sɩpaalaaraa kʋhɩaŋ ma, wombii-la la sɩɩ to lɛ.

Hiburu TƖŊŊAA 3:14

Wɩalɩŋ la sɩ laa dii bumbuŋ, dɩ la nɛ kɛmba ŋɩɩ a kaa mʋ dɩdɛrɩŋ, la dɩ Kirisito kala jaŋ ŋaa kʋbala.

Hiburu TƖŊŊAA 6:18

Wɩa saa ŋaa wɩaa balɩa nɛ. Ʋ sɩ wuo bʋl wɩɩ-la aŋ pɛ ŋmɩɛsɛ ŋɩɩ, wɩaa deemba balɩamɩŋ bɩra bɩ jaŋ kɔ dɩ ba bɩrɩma, bɛɛ wɩaa Wɩa bɩ wɩaa nyɩɛ. Ŋɩɩ wɩaa, la nɩalɩŋ sɩ fá mʋ Wɩa teeŋ dɩ ʋ laala ta nyuŋ nyaasɛ nɛ dɩ la kɛŋ yɩɛlaa woruŋ a mʋ tɩgɛ wɩalɩŋ Wɩa sɩ sɩ ʋ jaŋ ŋaa pɩla lɛ.

1 Pɩɩta 5:10

Hɛɛŋ deeŋ ma sɩɩ na bɩ jaŋ dieni. Ʋ ŋɩɩ harɩŋ lɛ, Wɩa sɩ kɛŋ zile kɩŋkɛŋ kɩŋkɛŋ a yɩrɛma dɩ ma ma na tʋla-la Kirisito sɩ kɛnɛ a kaa mʋ wuu. Ʋ nɛ jaŋ kɛmma wasa kɩɩ, a leŋ dɩ ma chaasa chɩŋ arɩ doluŋ.

1 Jɔɔŋ 1:3

Wɩalɩŋ la sɩ na aŋ nɩɩ ma, ba nɛ la bʋlaa pɩma, dɩ ma wuo jʋʋ la tʋɔŋ dɩ la kala kɛŋ nii-bala. La dɩ la Nyɩmma Wɩa arɩ ʋ Bie Yesu Kirisito kɛŋ nii-bala nɛ.

1 Jɔɔŋ 1:7

Ama dɩ la nɛ hɛ pʋlʋmʋŋ tʋɔŋ, arɩ Wɩa sɩ hɛ pʋlʋmʋŋ tʋɔŋ ŋɩɩ, ŋɩɩ-na la dɩ la dɔnsʋŋ tɩŋŋaa kala kɛŋ nii-bala nɛ. Dɩ la nɛ ŋaa ŋɩɩ, Wɩa Bie Yesu chalɩŋ ma jaŋ chɛsɛ la wʋbɔŋŋɔɔ kala ta.

1 Jɔɔŋ 4:13

Ʋ joŋ ʋ Dɩŋ-zɔŋ-la hɛ la lɛ dɩ ʋ dɩdagɛla. Ŋɩɩ lɛ nɛ la to jɩŋ arɩ la hɛ Wɩa teeŋ nɛ, Wɩa ma hɛ la teeŋ nɛ a kaa mʋ.

Jɔɔŋ Wʋnaalaa 19:11

Ŋɩɩ nɛ mɩ na Wɩa-jaŋ dɩ ʋ suro. Mɩ beŋ a na ja-pʋla dɩ nʋʋ jɩla. Nɩɩ-la sɩ jɩla yɩrɩŋ nɛ Nɩtɛŋɛ arɩ Wʋtɩtɩɩ Tɩɩna. Ʋ dii nɩaa sarɩya arɩ wʋtɩtɩɩ nɛ, aa yuo laalɩŋ ma arɩ wʋtɩtɩɩ.