Jiud 1:18 - Pijin Bible

¹⁸ Olketa bin talem yufala olsem, “Long taem wea wol ya bae hemi kolsap finis, bae samfala pipol olketa save mekfan long wei blong Kraes. Bae olketa falom nomoa ravis tingting blong olketa seleva, wea olketa no save obeim God.”

Pijin Deuterocanon

¹⁸ Olketa bin talem yufala olsem, “Long taem wea wol ya bae hemi kolsap finis, bae samfala pipol olketa save mekfan long wei blong Kraes. Bae olketa falom nomoa ravis tingting blong olketa seleva, wea olketa no save obeim God.”

Jiud 1:18 ပူးပေါင်းရင်းမြစ်များ

Aposol 20:29

Bikos mi save dat taem mi lusim yufala finis, bae samfala ravis pipol olketa kam an traehad fo spoelem olketa pipol long sios ya.

2 Timoti 3:13

An olketa ravis pipol olsem olketa laea profet, bae olketa gohed fo laea long olketa pipol. Seitan tu bae hemi laea moa long olketa, mekem wei blong olketa hemi barava wos moa.

2 Timoti 4:3

Bikos bae yumi kasem taem olketa pipol no wande lisin long tru tising, bae olketa falom tingting blong olketa seleva nomoa. Bae olketa lukaotem olketa tisa olobaot, mekem olketa save herem nomoa tising wea olketa seleva laekem tumas fo herem.

2 Pita 2:1

Bifoa, plande laea profet nao olketa kamap long olketa pipol blong Israel. An long sem wei tu, bae olketa laea tisa kamap long yufala. Bae olketa talemaot olketa laea tising wea i save spoelem biliv blong yufala. An nomata Masta hemi sevem olketa from sin, bae olketa tanem baeksaet blong olketa moa long hem. An from olketa samting ya nao, bae olketa spoelem olketa seleva kuiktaem nomoa.

2 Pita 2:10

Olketa pipol hu i barava kasem panis ya, hemi olketa ya hu i laekem tumas fo duim ravis samting wetem eniwan, an hu i lukdaon long paoa blong God. Olketa laea tisa tu i bikhed tumas, an olketa laekem nomoa fo falom tingting blong olketa seleva. Olketa no save tinghae long olketa enjel long heven, bat olketa gohed nomoa fo tok nogud abaotem olketa.

2 Pita 3:3

Yufala mas savegud abaotem wanfala samting. Long olketa las de blong disfala wol, samfala pipol bae falom nomoa nogud tingting blong olketa. Olketa man fo tok nogud ya, bae olketa laf nogud long yufala.

Jiud 1:16

Olketa pipol ya, olketa i pipol fo toktok enikaen agensim nara pipol oltaem. Olketa save falom olketa ravis tingting blong olketa seleva an olketa save tokpraod tumas tu, an olketa save suitim olketa nara pipol fo helpem olketa seleva nomoa.

Jiud 1:4

Mi raet go long yufala olsem, bikos samfala pipol olketa bin kamhaed fo joen wetem yumi long sios. Olketa ya no barava biliv long God. Olketa sensim tru tising abaotem kaenfala lav blong God wea hemi mekem yumi fri, fo laea tising wea olketa sei yumi fri fo duim enikaen ravis samting. An olketa les long Jisas Kraes, wea hem nomoa hemi King an Masta blong yumi. Longtaem bifoa, Buktambu hemi talemaot finis disfala panis wea bae hemi kasem olketa pipol olsem.