Esikiel 13:2 - Pijin Bible

² “Man blong graon. Yu go an talemaot profesi blong mi agensim olketa profet long Israel hu i gohed fo talemaot laea profesi falom tingting blong olketa seleva nomoa. Yu talem olketa fo lisin kam gudfala long Mesij blong mi Yawe.

Pijin Deuterocanon

² “Man blong graon. Yu go an talemaot profesi blong mi agensim olketa profet long Israel hu i gohed fo talemaot laea profesi falom tingting blong olketa seleva nomoa. Yu talem olketa fo lisin kam gudfala long Mesij blong mi Yawe.

Esikiel 13:2 ပူးပေါင်းရင်းမြစ်များ

1 Kings 22:19

Bat profet hemi gohed fo tok olsem, “Lisin kam gudfala long Mesij blong Yawe. Long wanfala spesol drim, mi lukim dat Yawe hemi sidaon long tron blong hem long heven. Olketa enjel blong hem i gohed fo stanap long saet blong hem, samfala long raetsaet an samfala long lefsaet.

Aesaea 1:10

!Lisin kam gudfala long Mesij blong Yawe, yufala lida an pipol blong Jerusalem! !Yufala i barava olsem nao olketa lida an pipol blong Sodom an Gomora! !Tingting gudfala long olketa tising blong God blong yumi!

Aesaea 28:14

(Profet) !Lisin kam gudfala long Mesij blong Yawe, yufala evri lida long Jerusalem hu i save tokpraod tumas!

Aesaea 9:15

Hed blong olketa nao olketa olo man, wetem olketa pipol hu i garem biknem. An tel blong olketa nao olketa narafala profet wea i save talem olketa laea toktok nomoa.

Jeremaea 23:2

Dastawe nao Yawe hu hemi God blong Israel, hemi tok long olketa lida ya olsem, “!Olketa lida! Yufala no save lukaftarem olketa pipol blong mi, bat yufala gohed nomoa fo ronem olketa olobaot. Hem nao bae mi seleva mi panisim yufala from olketa ravis samting wea yufala gohed fo mekem.

Jeremaea 27:14

Yufala mas no lisin long olketa profet wea i talemaot dat bae yufala no stap andanit long paoa blong king blong Babilonia. Olketa gohed fo talemaot nomoa laea profesi long yufala.

Jeremaea 27:18

Sapos olketa i profet tru, an olketa gohed fo talemaot barava Mesij blong mi Yawe, hemi stret fo olketa prea long mi Yawe hu mi garem evri paoa, mekem mi stopem olketa enemi fo no kam tekemaot olketa gudfala samting wea i stap yet long Tambuhaos ya, an long haos blong king blong Jiuda, an long olketa narafala ples long Jerusalem, fo karim go long Babilonia.

Jeremaea 37:19

?Bat wea nao olketa profet blong yu wea i bin gohed fo talem dat king blong Babilonia wetem ami blong hem i no save kam faet agensim yu wetem kantri blong yumi?

Jeremaea 5:31

Taem olketa profet i talemaot profesi blong olketa, olketa laea nomoa. Olketa prist gohed fo duim olketa samting wea olketa laekem nomoa. An yufala pipol blong mi i barava laekem tumas disfala wei blong olketa. ?Bat taem mi finisim olketa samting ya, wanem nao bae yufala duim?” Hem nao mesij blong Yawe.

Jeremaea 8:10

Dastawe nao bae mi givim waef blong olketa go long narafala man, an bae mi givim graon blong olketa go long olketa niufala ona. Nomata man hemi garem biknem o nomoa, olketa i semsem nomoa. Evriwan blong olketa i gridi fo winim seleni. Ya, nomata profet o prist, olketa toklaea tumas an trae fo ravem olketa pipol.

Lamentesin 4:13

Bat olketa enemi bin go insaet, bikos olketa profet an prist blong hem bin gohed fo mekem ravis sin insaet long taon ya: Olketa ya bin gohed fo kilim dae olketa stretfala pipol.

Esikiel 13:1

Yawe hemi talemaot Mesij blong hem long mi. Hemi tok olsem,

Esikiel 13:17

Yawe hemi gohed fo tok olsem long mi, “Man blong graon. Luk go long olketa woman blong pipol blong yu hu i gohed fo talemaot olketa laea profesi falom tingting blong olketa seleva. Yu mas talemaot disfala profesi blong mi agensim olketa.

Esikiel 13:3

Yu talem olketa dat mi Lod Yawe nao mi tok olsem: !Sore tumas long olketa krangge profet hu i gohed fo talemaot nomoa olketa tingting blong olketa seleva! !Olketa no lukim enikaen spesol drim!

Esikiel 16:35

“!Yu juri woman! !Lisin kam gudfala long Mesij blong Yawe!

Esikiel 22:25

Olketa profet blong Israel i mekem ravis plan fo spoelem pipol olsem olketa hanggre laeon wea i mekem bikfala noes taem olketa kaikaim mit blong animol wea olketa kilim dae. Olketa kilim pipol dae, an tekem seleni blong olketa wetem evri narafala samting tu. Plande man nao olketa kilim dae, mekem plande woman i kamap wido.

Esikiel 22:28

Olketa profet blong olketa i gohed fo haedem nomoa evri ravis samting wea olketa ya i duim olsem waet penda wea man hemi pendam long wol wea hemi doti. Ya, olketa gohed fo laea abaotem olketa spesol drim an olketa samting wea olketa talem bae hemi hapen. Olketa talem olsem, ‘Lod Yawe nao hemi tok olsem,’ bat mi nating talem enisamting long olketa.

Esikiel 34:7

“From disfala samting nao, yufala lida mas lisin kam gudfala long Mesij blong mi Yawe.

Esikiel 34:9

From disfala samting nao, yufala lida mas lisin kam gudfala long Mesij blong mi.

Maeka 3:11

Yufala jaj letem olketa pipol fo nilam yufala long seleni. An yufala prist tu tisim nomoa olketa lo blong God fo pei. An yufala profet tu gohed fo talemaot mining blong olketa spesol drim, bat fo seleni nomoa. Bat oltaem, yufala tingse bae Yawe hemi lukaftarem yufala olowe. An yufala i gohed fo sei, “Yawe hemi stap wetem yumi. So no eni trabol bae hemi save kasem yumi.”

Maeka 3:6

“!Yufala laea profet! Taem blong yufala hemi kolsap finis nao. Bae yufala no save lukim moa eni spesol drim, an bae yufala nating save talemaot olketa samting wea bae hemi hapen long olketa taem wea hemi no kam yet, bikos yufala lidim olketa pipol blong mi fo gorong. Bae hemi olsem wea san hemi godaon long yufala, mekem tudak hemi kamap wea yufala no save lukim enisamting.

Sefenaea 3:4

Olketa profet i bikhed tumas, an olketa trikim olketa pipol. Olketa prist blong Jerusalem i spoelem tambu long Tambuhaos, an olketa brekem lo blong God.