Aposol 27:2 - Pijin Bible

² Mifala go long wanfala sip wea hemi kam long Adramitiam, an hemi redi fo sel go long olketa ples long provins long Esia. So mifala sel go nao. An Aristakas blong Tesalonaeka long Masedonia hemi go wetem mifala.

Pijin Deuterocanon

² Mifala go long wanfala sip wea hemi kam long Adramitiam, an hemi redi fo sel go long olketa ples long provins long Esia. So mifala sel go nao. An Aristakas blong Tesalonaeka long Masedonia hemi go wetem mifala.

Aposol 27:2 ပူးပေါင်းရင်းမြစ်များ

Gudnius abaotem Jisas Kraes wea Luk hemi raetem 8:22

Nao long wanfala taem, Jisas hemi go insaet long wanfala bot wetem olketa disaepol blong hem an hemi sei, “Yumi katkros go long narasaet long leik ya.” So olketa sel go nao,

Aposol 16:17

Nao gele ya hemi go bihaen long mifala Pol, an hemi gohed fo singaot olsem, “Olketa man ya, olketa nao wakaman blong God Antap. An olketa save talem yufala abaotem disfala wei blong God fo sevem yufala.”

Aposol 17:1

Pol an Saelas tufala wakabaot gopas nomoa long tufala taon long Amfipolis an Apolonia, an tufala go kasem taon long Tesalonaeka. Olketa Jiu i garem wanfala preahaos long taon ya,

Aposol 19:19

An plande man wea bifoa olketa bin gohed fo mekem kastom fo spoelem pipol, olketa hipimap olketa nogud buk wea olketa bin yusim ya, an olketa bonem evriwan long ae blong olketa pipol nao. An taem olketa kaontem praes blong olketa buk ya, hemi kasem 50,000 silva seleni ya.

Aposol 19:29

Nao trabol ya hemi barava go kasem evriwea long biktaon ya nao. An olketa evriwan i ran go semtaem fo kasem disfala bikfala ples blong miting. Samfala long olketa i kasholem Gaeas an Aristakas, an olketa pulum tufala go wetem olketa. Tufala ya i stap kam long Masedonia an tufala save go-go wetem Pol.

Aposol 2:9

Yumi ya, yumi stap kam long olketa kantri olsem Patia an Midia an Elam an Mesopotemia an Jiudia an Kapadosia an Pontas an Esia

Aposol 21:5

Bat taem olketa de i go finis nomoa, mifala lusim ples ya fo go moa. An evriwan long olketa, nomata olketa waef an olketa pikinini, olketa joenem mifala fo goaot from taon go kasem saet si. An long sanbis nao mifala evriwan i nildaon an prea.

Aposol 28:10

So olketa givim plande samting long mifala, an taem mifala redi fo lusim ples ya, olketa givim mifala evrisamting wea mifala nidim fo gogo blong mifala.

Aposol 28:12

Mifala sel go kasem Sirakius, an mifala stap long taon ya fo trifala de.

Aposol 28:16

Taem mifala barava kasem biktaon long Rom, olketa bikman long ples ya olketa letem Pol fo go stap long wanfala haos seleva, bat wanfala soldia nao hemi stap fo gadem hem olowe.

Aposol 28:2

An olketa man blong aelan ya olketa barava kaen gudfala tumas long mifala, an olketa lukaftarem mifala gudfala. Nao taem ya, hemi ren an kol tumas tu, so olketa mekem wanfala bikfala faea fo mifala.

Kolosi 4:10

Nao Aristakas hu hemi stap wetem mi long prisin, hemi talem halo go long yufala ya, wetem Mak hu hemi kasin brata blong Banabas. Sapos Mak bae hemi go kasem ples blong yufala, yufala mas lukaotem hem gudfala olsem mi talem yufala finis.

Filimon 1:24

Mak, an Aristakas, an Dimas, an Luk, hu olketa waka tugeta wetem mi, olketa talem halo go long yu.