2 Kings 3:25 - Pijin Bible

²⁵ An olketa gohed fo spoelem evri taon blong olketa. An taem olketa gopas long eni gudfala graon blong olketa, olketa tekem olketa ston an torowem go long hem, go-go evri gaden long Moab i fulap long ston. An olketa gohed fo berem olketa springwata an katemdaon evri tri blong kaikai blong olketa. Olketa gohed fo duim olsem go-go bikfala taon long Kia-Hareset nomoa hemi stap. An olketa soldia fo su-sut long sling nao i kam hipap raonem taon ya an faet long hem tu.

Pijin Deuterocanon

²⁵ An olketa gohed fo spoelem evri taon blong olketa. An taem olketa gopas long eni gudfala graon blong olketa, olketa tekem olketa ston an torowem go long hem, go-go evri gaden long Moab i fulap long ston. An olketa gohed fo berem olketa springwata an katemdaon evri tri blong kaikai blong olketa. Olketa gohed fo duim olsem go-go bikfala taon long Kia-Hareset nomoa hemi stap. An olketa soldia fo su-sut long sling nao i kam hipap raonem taon ya an faet long hem tu.

2 Kings 3:25 ပူးပေါင်းရင်းမြစ်များ

Jenesis 26:15

Bifoa, long taem wea dadi blong hem hemi laef yet, olketa wakaman blong dadi blong hem olketa bin digim olketa wel olobaot long ples ya, bat, olketa man long Filistia i joles tumas, so olketa go an berem olketa wel ya moa.

Jenesis 26:18

Olketa wel wea i stap long ples ya, dadi blong hem, Ebraham nao, hemi bin digim, bat bihaen, taem hemi dae finis, olketa man long Filistia olketa berem olketa moa. So Aesak hemi gobaek an hemi digim olketa moa, an hemi gohed fo kolem olketa sem nem nomoa wea dadi blong hem hemi bin kolem long olketa fastaem.

2 Samuel 8:2

Nao Deved hemi go faetem pipol blong Moab, an hemi winim olketa. Den hemi tekem olketa soldia blong Moab, an hemi mekem olketa fo leidaon long graon. Hemi yusim wanfala rop fo makem hu nao long olketa hemi mas dae. Long evri trifala man, hemi kilim tufala man dae, an hemi letem wanfala laef. Bihaen long taem ya, olketa blong Moab i stap andanit long paoa blong hem, an olketa gohed fo peim taks long hem.

2 Kings 3:19

Olketa taon blong olketa i gudfala tumas, an olketa garem bikfala wolston i goraonem, bat bae yufala save spoelem olketa finis. An bae yufala katemdaon olketa tri blong kaikai, an berem olketa springwata blong olketa, an torowem olketa ston go long olketa gaden blong olketa.”

2 Kings 3:24

Bat taem olketa soldia blong Moab i kam kasem ples ya, olketa soldia blong Israel i go faetem olketa, an ronem olketa gobaek. Olketa blong Israel i go long lan blong Moab an aftarem olketa soldia blong hem, go-go olketa kilim olketa dae.

2 Kings 3:26

Nao taem king blong Moab hemi lukim dat olketa lus nomoa, hemi tekem 700 soldia wea i save yusim naef fo faet, an olketa trae fo goaot long faet kolsap long king blong Idom, bat hemi had tumas fo olketa goaot.

Aesaea 15:1

Hem ya profesi abaotem Moab. Yawe nao hemi tok olsem, “Long wanfala naet nomoa, tufala bikfala taon ya blong Moab, Ara an Kia, bae olketa spoelem finis.

Aesaea 16:11

Mi barava sore tumas long olketa pipol blong Kia-Hareset wetem olketa narafala pipol blong Moab.

Aesaea 16:7

Dastawe nao olketa pipol blong Moab i krae bikfala from olketa trabol wea hemi kasem olketa. Taem olketa tingim evri gudfala kaikai wea olketa bin kaikaim bifoa long taon long Kia-Hareset, olketa evriwan i sore an krae fogud.

Jeremaea 48:31

From samting ya, mi sore long Moab. Bae mi krae fo olketa blong taon long Kia-Heres.

Jeremaea 48:36

“Long haat blong mi nao, mi barava sore tumas long Moab, olsem man hu hemi bloum bambu fo mekem nomoa saon blong sore an krae. Ya, mi sore long olketa long taon long Kia-Heres, bikos olketa risis blong olketa i lus finis.

Diutronomi 2:9

Yawe hemi tok olsem long mi, ‘Mosis, yufala mas no raoa o faet wetem olketa pipol blong Moab bikos mi no save givim yufala eni lan blong olketa. Olketa ya long laen blong Lot, an mi givim finis ples long Ara long olketa.’”

Jajis 9:45

Abimelek an olketa wetem hem i faet agensim pipol insaet long taon ya fo wanfala fulde, go-go-go olketa kilim dae evriwan an holem taon ya. Olketa brekemdaon taon ya an torowem solt antap long hem fo som dat trabol bae kasem eniwan hu hemi stap moa long hem.