2 Kings 25:11 - Pijin Bible

¹¹ An Nebusaradan hemi tekem olketa pipol hu i stap yet insaet long taon ya, an olketa hu bin ranawe from taon ya fo go joenem olketa blong Babilonia long aotsaet, nao hemi fosim olketa evriwan fo lusim lan blong olketa an go stap long Babilonia.

Pijin Deuterocanon

¹¹ An Nebusaradan hemi tekem olketa pipol hu i stap yet insaet long taon ya, an olketa hu bin ranawe from taon ya fo go joenem olketa blong Babilonia long aotsaet, nao hemi fosim olketa evriwan fo lusim lan blong olketa an go stap long Babilonia.

2 Kings 25:11 ပူးပေါင်းရင်းမြစ်များ

2 Kronikols 36:20

Olketa fosim olketa pipol hu i laef yet fo go long Babilonia. Olketa go waka olsem slev blong king an olketa long laen blong hem. Hemi olsem go kasem taem wea King blong Pesia hemi rul ovam olketa.

Esra 2:1

Hem ya nao nem blong olketa pipol blong disfala provins wea ami blong King Nebukadnesa bin fosim olketa fo lusim lan blong olketa an go stap long Babilonia. Olketa ya i kambaek long barava ples blong olketa long Jerusalem an olketa narafala ples long Jiuda.

Sams 144:14

Ya, letem olketa buluka blong mifala i kamap plande fogud. Letem olketa enemi no save brekemdaon wolston blong taon fo kam insaet, an letem mifala no go aotsaet long wolston fo faetem olketa. Ya, letem no eniwan long mifala hemi krae long sore falom olketa rod long taon blong mifala.

Jeremaea 32:28

Dastawe nao mi Yawe, mi tok olsem: Bae mi putum disfala taon andanit long paoa blong King Nebukadnesa blong Babilonia, mekem hemi tekova long hem.

Jeremaea 39:9

An Nebusaradan hu hemi sif long spesol ami blong bikfala king blong Babilonia, hemi tekem olketa hu i stap yet insaet long taon, wetem olketa hu bin ranawe from taon fo go joenem olketa blong Babilonia long aotsaet, nao hemi fosim olketa evriwan fo lusim lan blong olketa an go stap long Babilonia.

Jeremaea 52:12

Long meknaentin yia wea king Nebukadnesa hemi king long Babilonia, long mekfaev mans, an long mekten de blong hem, Nebusaradan hu hemi komanda long spesol ami blong king, hemi kasem Jerusalem.

Jeremaea 52:15

An Nebusaradan hemi tekem samfala long olketa pua pipol an olketa narafala pipol hu i stap yet insaet long taon, wetem olketa hu i save hao fo wakem gudfala samting an olketa hu bin ranawe from taon fo go joenem olketa blong Babilonia long aotsaet, nao hemi fosim olketa evriwan fo lusim lan blong olketa an go stap long Babilonia.

Jeremaea 52:30

An long mektuenti-tri yia blong hem, 745 pipol blong Jiuda nao, Nebusaradan hu hemi komanda long spesol ami blong king, hemi tekem olketa go. Namba long olketa evriwan, hemi kasem 4,600.

Esikiel 12:11

Yu mas tok olsem, ‘Mi nao wanfala saen long yufala.’ Olketa samting mi bin duim bae hemi hapen long olketa ya long Jerusalem bihaen. Bae olketa enemi fosim olketa fo lusim ples blong olketa, an go stap long narafala kantri.

Esikiel 17:21

Bae olketa enemi i kilim dae evri soldia blong hem hu i ranawe from faet. An olketa hu i laef yet, bae i ranawe go olobaot fo stap long olketa deferen ples nao. Long datfala taem, bae yufala jes save dat mi Yawe nao mi tok.”

Esikiel 5:2

Taem yu kolsap kasem en long taem wea yu mas leidaon olsem fo somaot wei wea bae olketa enemi i winim finis taon ya, bae yu tekem fas hip long hea ya, an bonem antap long piksa blong taon ya wea yu bin wakem. Mektu hip long hem, bae yu ka-katem long naef ya olobaot raonem aotsaet long piksa blong taon. Bae yu torowem mektri hip long ea, mekem win hemi karim go olobaot, mekem olketa pipol i lukim wei wea bae mi ronem olketa long naef blong mi.

Diutronomi 28:36

“Yawe bae hemi raosim yufala wetem King blong yufala, an yufala bae go long narafala kantri wea hemi farawe tumas wea yufala an olketa olo blong yufala i no save long hem. Taem yufala stap long kantri ya, bae olketa mekem yufala fo wosipim olketa narafala god wea i tambu kaving long timba an ston nomoa.