Remarja 1:25 - O Debleskro Drom 2021 (Sinte)

²⁵ Jon tchiwan o Debleskro tchatchepen ap i rig, un patsan ap kowa, hoi chochepen hi, un sharan i menshen un i viechen, un mangan len an, har te wans le o Dewel. Un o baro Dewel, kai lauter kras un djipen das, koles sharan le gar, un mangan les gar an. Un job hi kowa, kai moldo hi, te well lo sharedo hako tsiro. Amen.

O Debleskro Lab 2024 (Sinte-Manouche)

²⁵ Yon čivan o Debleskro čačepen ap i rig, oun patsan ap kova, hoy rhorhepen hi, oun sharan i menshen oun i firhen, oun mangan len an, har te vans le o Devel. Oun o baro Devel, kay lauter kras oun djipen das, koles sharan le gar, oun mangan les gar an. Oun yob hi kova, kay moldo hi, te vell lo sharedo hako tsiro. Amen.

Remarja 1:25 ပူးပေါင်းရင်းမြစ်များ

Debleskri gili 72:19

Sharas leskro baro railo lab hako tsiro! Leskro railepen mu well diklo an i tsele themma! Amen, jaake te well kowa!

Jesaja 44:20

Kowa hi jaake, har te mangals lo i jagakri tchik an. Leskro dinelo dji anas les an o chochepen. Kote hatsell lo kek drom win, te penals lo peske: “Rikrau me man gar ap o chochepen?”

Jeremia 13:25

Tumer bistran man un djan chochene deblen palla. Doleske well kai phagi pral tute, Jerusalem, hoi me, o baro Dewel tut dau.

Jeremia 16:19

Baro Dewel, tu deh man soor un deh garda ap mande. Pash tute nai wau me un khatrau man an i bibacht. Dran i tsele themma ap i phub wenn i menshe pash tute, un penenn: Kol debla mare phurendar hi lauter chochepen, tchi-moldo hi le, un nai wenn gar ap mari rig.

Amos 2:4

O baro Dewel penell: I menshe an o them Juda kran pale te pale djungelo koowa. Miro drom un mire laba his lenge tchi moldo. Un jon kran gar, hoi lendar kamom. Jon mukan pen o tchatcho dromestar tele te anell un mangan kol chochene deblen an, kolen ninna lengre phure an-mangan. Doleske lenn le pengri phagi, un khaitenn man gar.

Habakuk 2:18

Hoi well tuke palle ap i rig? I figura dran kasht un saster, hoi i mursh peskre wastentsa kras? Kowa hi chochepen! Har nai patsell jek ap i dewel, hoi nai rakrell gar, un koles job peskre wastentsa kras?

Mateo 10:37

Koon kamell peskro dades un peskri dai budeder har man, hi gar moldo, te well lo miro maal. Un koon kamell peskro tchawes un peskri tchat budeder har man, hi gar moldo, te well lo miro maal.

Mateo 6:24

Kek budrell nai dui rajenge. Te wals kowa jaake, budrals lo ko jekeske mishto, un ko wawareske gar mishto. Ko jekes kamals job gar, kol wawares kamals job o djijestar. Tu nai budreh gar o Debleske un rodeh tiro brawlepen.

Johanni 2:8

Un job penas pale ap lende: “Lenn dran kol khore un anenn kowa o rajeske pral o pipen!” Un jon anan les pash leste.

Remarja 1:18

O Debleskri choli well dran o bolepen tele ap kol tsele menshende, kai kamenn lestar tchi te djinell un krenn o tchilatchepen. Un lengro tchilatchepen rikrell o tchatchepen tele.

Remarja 1:23

O baro Debles, kai hako tsiro atchella, sharan le gar. Na-a, jon mangan kol murshen un djuwjen an, kai merenna. Ninna wawar koowa, har i tchirkle, i star-herjengre vieche un i sapa mangan le an.

Remarja 9:5

Lengre phure hi o Abraham, o Isaak un o Jakob. Ninna o Jesus Kristo was i Israelitari, har was lo boldo. Sharas o Debles pral kowa lauter hako tsireske. Amen!

2. Korintarja 11:31

O Dewel, ko dad o Jesusestar, maro rajestar, djinella, kai penau o tchatchepen. Les sharas mer hako tsiro.

1. Tessalonikarja 1:9

Jon hi kolla, kai penenn i wawarenge, har lan tumer men pash tumende pre, har mukan tumaro phuro drom, te djan ap o Debleskro drom, un mangenn buder gar wawar koowa an har o djido un tchatcho Debles kokres.

1. Timoteo 1:11

Jaake penell menge o latcho lab, hoi das o Dewel an mire wasta, te penap kowa i menshenge. Ko lab sikrell men o Debleskro railepen. Lestar well o tselo latchepen.

1. Timoteo 1:17

Me sharau o Debles, koles, kai hako tsiro o baro rai hi; kowa, kai merella gar, un kai nai dikell les kek. Kowa kokres hi o Dewel. Leskro railepen atchell hako tsireske. Amen.

2. Timoteo 3:4

Jon hi phukepangre. Jon wenn sik chojedo. Jon phurdenn pen pre. Jon kamenn budeder pengro khelepen har o Debles.

1. Johanni 5:20

Mer djinah, kai o Debleskro tchawo ap kai phub was, te krell lo mare jaka pre, te prindjras o tchatcho Debles. Un jaake har mer ham khetne o Debleskro Tchaweha, o Jesus Kristeha, jaake ham khetne o tchatcho Debleha. O Jesus Kristo hi o tchatcho Dewel. Un job dell ko djipen, hoi gar pre-herella.