Nahum 1:2 - O Debleskro Drom 2021 (Sinte)

² O baro Dewel hi i Dewel, kai kamell, te mangenn i menshe kek wawar debles an har les kokres. Leskri choli well pral kolende, kai hadenn pen pral leste. Kolen, kai kamenn lestar tchi te djinell, dell job i phagi. Un bistrell gar, hoi jon ap leste kran.

O Debleskro Lab 2024 (Sinte-Manouche)

² O baro Devel hi i Devel, kay kamell, te mangenn i menshe kek vavar debles an har les kokres. Leskri rholi vell pral kolende, kay hadenn pen pral leste. Kolen, kay kamenn lestar či te djinell, dell yob i phagi. Oun bistrell gar, hoy yon ap leste kran.

Nahum 1:2 ပူးပေါင်းရင်းမြစ်များ

Hiob 20:23

Ap ko tsiro, kai krell lo peskro per pherdo, bitchrell o Dewel peskri soreli choli ap leste, un mukell lat har brishin tele ap leste te perell.

Debleskri gili 94:1

Baro Dewel, tu hal o Dewel, kai o tchilatchepen pale deh kolenge, kai wawaren tchilatchepen kran. Ab, un sike tut!

2. Mose 20:5

Tu witsress tut gar glan i wawar debleste tele, un mangess les gar an. Me, o baro Dewel, hom tiro Dewel, un kamau, te kamess man kokres. Kolen, kai kamenn mandar tchi te djinell un anenn doosh ap pende, dau me i phagi. Me dau ninna i phagi lengre tchawende un kolengre tchawende jaake rah har triin-te-star familje jek pal i wawar djiwenn.

2. Mose 34:14

Mangenn kek wawar Debles an! Me, o baro Dewel, kamau, te kamenn man kokres. Me kamau kokres te wap tumaro Dewel.

2. Mose 34:7

Me sikrau miro latchepen ap lengre tchawende un kolengre tchawende un kolengre tchawende un serja kope jaake dureder. Un bistrau lengri doosh un lau lengro tchilatchepen krik. Koles, kai kamell mandar tchi te djinell, dau i phagi, un gar koles kokres, na-a ninna leskre tchawen un kolengre tchawen jaake rah har triin, star familje, jek pal i wawar, djiwan.”

Jesaja 42:13

O baro Dewel djal win an o kurepen har i sorelo mursh; un kurell pes har i kurepaskro, koleskro dji pherdo hi, te djal lo an o marepen. Soreles dell lo o kurepaskri gole, un kek darjah djal lo win ap kolende, kai kurenn pen leha.

Jesaja 51:17

Ste pre! Ste pre! Hade tut, Jerusalem! Tu pijal dran o baro Debleskro khoro, hoi his pherdi leskri choli. Tu hunte pijal ko khoro win, bis te tchi buder an leste his. Kolestar wal har jek, kai hi mato, un nai well buder gar tardo ap peskre herja.

Jesaja 51:20

Tire tchawe peran khetne, un his tchiddo ap hake dromma. Jon hi har i tserfo, hoi an i netsa djas. Jaake tapras len koi choli o baro Deblestar, un leskro tchingepen.

Jesaja 66:15

Dik, o baro Dewel well an i jag, un leskre wurdja hi har i sorelo phurdepen. Job dell len lengro tchilatchepen pale i bari choljah, un leskro tchingepen hi har jag, kai chatchrell.

Jeremia 25:15

O baro Dewel, ko Dewel pral o Israel, penas ap mande: Le ko khoro mool dran miro wast. Kau khoro hi pherdi miri choli. De les i tsele natsjonenge te pijell, pash kolende me tut bitchrau.

Jeremia 28:8

O Debleskre rakepangre, kai his glan mande un glan tute, kolla rakran glan i rah tsiro pral kurepen, bok un nasslepen, hoi well pral sorele themma un bud menshende.

Jeremia 3:5

Kameh tu hako tsiro chojedo atchell un tchilatches ap mande te dikell?’ Jaake rakreh un kreh tchilatchepen, un mukeh tuke tchi te penell.

Jeremia 36:7

Nai well, te mukenn le pengro tchilatcho drom un mangenn pen tele glan o baro Debleste un wenn pale ap leskro drom. Palle nai rikrell o baro Dewel peskri bari choli pale, hoi les ap kal menshende hi, un hunte dell len gar koi phari phagi, kolah lo len trad das.

Jeremia 4:4

Rikrenn tumen ap i laba, hoi tumentsa win krom! Un krenn tumare djia mange pre, tumer menshe an Juda un Jerusalem. Te krenn kowa gar, well miri choli pral tumende har jag, un chatchella jaake, te nai krell kek koi jag win.

Jeremia 50:15

Denn i kurepaskri gole haki rigjatar! Dikenn, o foro dell pre! Leskre turme phagenn khetne. Leskre massurja hi tele phagedo. O baro Dewel dell o foro Babilon peskri phagi. Denn o foreske halauter pale pale, hoi kau foro ninna kras!

Ropaskre gilja 4:11

O baro Dewel mukas peskri tseli choli win te well. Leskri tseli choli was pral lende. Un an o foro Zion mukas lo i bari jag te well, te chatchras o foro tele bis ap i telstune barra.

Ezekiel 36:6

Doleske pen glan-wi, hoi pral o them Israel wella. Pen ap i bare un tikne berge, ap i panja un tale: Kawa penell o baro Dewel, maro rai: Tumer hunte hidjran sawo baro praassepen kol wawar menshendar. Doleske hom chojedo pral lende, un an miri tati choli rakrau i phagi win pral lende.

Ezekiel 38:18

Un an ko tsiro, kai well o Gog un perell an o them Israel dren, well miro choli pre an mande, penell o baro Dewel, maro rai.

Ezekiel 38:19

Un an miri bari un tati choli dau man sowel: Tchatchepah, an ko tsiro trissell i phub an o them Israel soreles.

Ezekiel 39:25

Kanna krau, penell o baro Dewel, maro rai, te well lauter pale mishto o Jakobeske, un krau miro dji pre o tselo khereske Israel. Miro tselo djijeha krau, te well buder gar djungeles rakedo pral mande.

Ezekiel 5:13

Te mukom miri tseli choli ap tumende win, un dom tumen pale, hoi kran, palle djal miri choli krik, un hom buder gar chojedo pral tumende. Un tumer djinenn, te homs me, o baro Dewel, kai das tumen trad o tselo djijeha.

Ezekiel 6:12

Kolla, kai an i dur them hi, merenn ap o nasslepen. Un kolla, kai djiwenn an o them Israel un trul o them trujel, kolla merenn an o kurepen. Un kolla, kai pral atchenn, merenn i bokatar. Jaake krau lentsa, bis te miri choli trujel hi.

Ezekiel 8:18

Doleske djau lentsa i choljah trujel. Jon khaitenn man buder gar. Un man well kek latchepen lenge. Ninna te denn le palle glan mire kanda pre gole, shunau me gar ap lende.

Joel 2:18

Palle well o baro Debleskro kamlepen bares an leste peskro themeske, un job krell peskro dji pre peskre menshenge.

3. Mose 26:28

palle djau me an choli ap tumende, un dau tumen i phagi hoi hi efta kope phareder har kaja, hoi bis kanna ap tumende was.

Micha 7:18

Kek Dewel hi har tu, kai lell o tchilatchepen krik, hoi mer kram, un kai bistrell koi doosh, hoi anam ap mende – mer, kai tire menshendar pral atcham. Tu atcheh gar chojedo pral mende hako tsiro, un kreh tiro dji pre menge.

Zakarie 1:14

Un kowa penas mange, te penap dureder, hoi o baro Dewel, ko rai pral o bolepen un i phub, penas: “Man hi i baro kamlepen o foreske Jerusalem un i berga Zion,

Zakarie 8:2

Kowa penell o baro Dewel, ko rai pral o bolepen un i phub: “Me hom pherdo baro kamlepen o foreske Zion. Miro dji nashell, te well lo kau foreske ap i rig. Un miri choli well ap kolende, kai kamenn leskre menshen gar.

4. Mose 25:11

“O Pinhas, koleskro dad o Eleasar hi, un koleskro papo o rashai Aron his, kowa las miri choli kol Israelendar krik. Job his jaake chojedo har me homs, un kras, te marom me gar i tsele Israelitarjen an miri choli.

Remarja 12:19

Mire kamle phrala un phenja, ninna te kras jek tumenge tchilatcho koowa, ma denn leske pale! Mukenn les! O Dewel dell les i phagi. An o Debleskro lab hi tchinlo: O Dewel penas: Me dau len pale. Me dau len i phagi.

Remarja 13:4

O Dewel das len pengri budi, te djal tuke latches. Tu te kre tchilatcho koowa, palle hunte daress tu lendar. Hi gar tchitcheske, te well len i soor, te denn le i phagi. O Dewel das len koi budi, te denn le kolen i phagi, kai kran i tchilatcho koowa.

5. Mose 4:24

Job hi i soreli jag, hoi halauter pre chatchrell, un kamell, te kamenn tumer les kokres.

5. Mose 7:10

Un kolen, kai kamenn lestar tchi te djinell, dell lo i phagi, un marell len sik. Kek tsiro mukell lo pes, te anell lo lenge lengro tchilatchepen pale ap lengre sherja.

Hebrearja 10:30

Mer djinah, kai o Dewel penas: Me dau len ko tchilatchepen pale, hoi jon kran. Miri choli well ap lende. Un pale hi tchinlo: O Dewel rakrell o tchatchepen pral peskre menshende win.

Josua 24:19

Kote penas o Josua ap i tsele menshende: “Kowa nai wals tumenge phares, o baro Debleske koi te well. Kek wawar dewel hi har job hi. Un job kamell tumendar, te mangenn les kokres an. Te djan tumer leskro dromestar tele un hadenn tumen pral leste, bistrell lo kowa gar.

2. Petro 2:9

O Dewel, maro rai, haiwell garda te dell ap kolende, kai les kamenna, te perenn le gar o tchatcho dromestar tele. Job haiwell ninna kol tchilatchen pandlo te rikrell, te lenn le pengri phagi ap ko diwes, kai well o tchatchepen wi-rakedo pral i tsele menshende.