Micha 5:13 - O Debleskro Drom 2021 (Sinte)

¹³ Kol kashta, hoi i debletsa Ashera sikrenn, tserdau win dran i phub, un tumare forja krau paash.

O Debleskro Lab 2024 (Sinte-Manouche)

¹³ Kol kashta, hoy i debletsa Ashera sikrenn, tserdau vin dran i phoub, oun t'mare forya krau paash.

Micha 5:13 ပူးပေါင်းရင်းမြစ်များ

Jesaja 2:18

Un kol tsele chochene deblentsa hi palle hako tsireske trujel.

Jesaja 2:8

Ninna hi o them pherde chochene deblen, un jon witsrenn pen tele glan kolende, kolen jon pengre wastentsa kran.

Jesaja 27:9

Jaake well o Israelengri doosh krik lino. Un ap kowa sikrell pes, te hi lengri doosh krik lino: Te denn le i pre-tchidde barra jaake khetne, kai mangan le i wawar deblen an, te atchell tchi har tchik. Un te mukenn le kek figure tardo, hoi sikrenn i debletsa Ashera, witar kek boba, kai lake sungepaskro koowa chatchedo was.

Ezekiel 16:41

Un tire khera chatchrenn le an i jag pre, un denn tut tiri phagi glan i jaka bud djuwjendar. Jaake krau, te nai lubreh buder gar trujel, un nai gineh tuke buder kek pirnes.

Ezekiel 36:25

Me witsrau djudjo pani ap tumende, te wenn djudjo halauterestar, hoi kras tumen pale-tchiddo. Ko tselo tchilatchepen, hoi ap tumende anan, har mangan i chochene deblen an, thowau tumendar tele.

Ezekiel 37:23

Un jon mangenn buder gar pengre chochene deblen un djungele figuren an, un krenn pen buder gar pale-tchiddo dran kolende un dran ko wawar djungelo koowa, hoi le kran. Me lau len win dran lengri doosh, hoi le pale te pale ap pende anan, har le miro dromestar tele djan. Un me krau, te hi le buder gar pale-tchiddo. Un jon wenn mire menshe, un me wau lengro Dewel.

Ezekiel 6:9

Kote, kai le pandle hi, wau me lenge an o shero. Un jon dikenn dren, te dom len i phagi koleske, hoi jon kran: Jon phagan mantsa un nashan chochene deblen palla. Palle rissrell lenge halauter an pende pral ko tselo djungelo koowa, hoi jon kran.

Hosea 10:2

Lengre djia hi pherdo chochepen. Kanna well lengri doosh pral lende. Lengre altare wenn khetne phagedo, un kol pre-tchidde bare barra wenn tele dino.

Hosea 14:3

Lenn kal laba tumentsa, un awenn pale pash o baro Debleste, un penenn leske: Le mari tseli doosh mendar krik, un shun maro mangepen! Palle kamah tut te sharell mare tchipjentsa.

Hosea 14:8

Un me hom lenge har i ruk, kai leskre mussja pral lende rikrell, un tel koleste jon beshdo hi. Un lenge well djob pale bares. Un jon wenn har i drakengro ruk, koles bud bud drake hi. Latches well pral lende rakedo, har pral koi mool dran o Libanon.

Nahum 1:14

Ap i menshende an o them Assur penell o baro Dewel: Kek tchawe wenn tumen, kai tumare familjengre laba dureder hidjrenn. Dran i khera tumare deblendar witsrau i tsele figure win. Me krau tumenge i grufta, tumaro djipen his tchitcheske.

Zefanja 1:4

Me hadau miro wast pral o them Juda, un pral halauterende, kai an o foro Jerusalem djiwenn, te dap len lengri phagi. Un krau lauter paash, hoi kote o chocheno deblestar Baal pral atchas. Ninna leskre rashaja wenn bistedo, un kol wawar rashaja, kai mukan o baro Debles.

Zakarie 13:2

O baro Dewel, ko rai pral o bolepen un i phub, penell: An ko tsiro krau, te mangenn i menshe an o them Juda buder kek chochene deblen an. Un kolengre laba wenn bistedo. Ninna kol rakepangre, kai penenn, te hi le Debleskre rakepangre un hi kowa gar, un jon rakrenn, hoi i wawar ducho lenge penell, kolen tradau win dran o them.

Debleskro tsiro 9:20

Un kol wawar menshe, kai gar maredo wan, kolla mukan gar pengro tchilatcho drom, un mukan gar tele, te mangenn le kowa an, hoi jon pen pengre wastentsa kran. Jon mukan gar tele, te mangenn le i bengen an, witar gar kol figuren dran sonakai, rup, saster, barra un kasht, hoi gar nai dikenna, un gar nai shunenna, un gar nai nashenna.