Mateo 7:15 - O Debleskro Drom 2021 (Sinte)

¹⁵ Denn jak, te patsenn gar kol chochene rakepangren, kai penenn, te wans le o Deblestar bitchedo! Jon krenn, har te wans le tumare phrala. An lengro dji hi le diwje djukle, kai marenna.

O Debleskro Lab 2024 (Sinte-Manouche)

¹⁵ Denn yak, te patsenn gar kol rhorhene rakepangren, kay penenn, te vans le o Deblestar bičedo! Yon krenn, har te vans le t'mare phrala. An lengro dji hi le divye djoukle, kay marenna.

Mateo 7:15 ပူးပေါင်းရင်းမြစ်များ

1. Rajengro liil 13:18

Kote penas o phuro ap leste: “Me hom ninna i Debleskro rakepaskro har tu, un i bolepaskro o baro Deblestar penas mange: ‘An les khere pash tute, te nai chal lo maro un te nai pijell lo pani!’” Chochepen his kowa, hoi ko phuro penas.

Jeremia 29:21

Kowa penell o baro Dewel, ko rai pral o bolepen un i phub, kai o Israeleskro Dewel hi: O Ahab, koleskro dad o Kolaja his, un o Zidkija, koleskro dad o Maaseja his, kolla dui rakran chochepen ap tumende an miro lab. Doleske dau len an i wasta o baro rajestar Nebukadnezar dran Babilonia. Kowa mukell len mulo te dell glan tumare jaka.

Jeremia 29:32

Doleske dau me, o baro Dewel, leste un leskri familjate i phagi. Kek lendar atchell djido mank kal menshende. Un job dikell gar ko latchepen, hoi krau ap mire menshende. Peskro rakepah anas job mire menshen mandar krik. Kowa penell o baro Dewel.

Ezekiel 13:16

Kolla hi i rakepangre an o them Israel, kai dan glan, te wals len i lab o Deblestar un penan i menshenge an Jerusalem glan-wi “lauter hi mishto”, ninna te hi tchi mishto. Kowa penau me, o baro Dewel, tumaro rai.

Ezekiel 13:22

Tumare chochene labentsa dukran i djia kolendar, kai an o tchatchepen djiwenn, un kolenge kamom kek daar te krell. Un tumer kran i wasta kolendar sorelo, kai tchilatcho koowa krenn. Jaake kran tumer, te djan le gar tele lengro tchilatcho dromestar, te atchenn le djido.

Ezekiel 22:25

Tire raja hi mank tute har lewe, kai denn gole, har dandrenn le viechen khetne. Jon marenn menshen, tchorenn penge brawlepen khetne, un krenn, te nashrenn bud romja an o them pengre romen.

Ezekiel 22:27

Tire pralstune hi har diwje djukle, kai marenn, un hi boklo pal rat. Jon marenn menshen, te lenn le lengro koowa penge.

Daniel 11:34

An ko tsiro, kai wenn le jaake palla lino, wenn lenge menshe ap i rig. Kolla hi gar bud. Bud wawar rikrenn gar tchatchepah pash lende.

Micha 3:11

Tumare tchatchepangre mursha mukenn pen te makell. Tumare rashaja lenn lowe koleske, hoi le i menshenge penenn. Un i lowenge penenn o Debleskre rakepangre, glan-wi, hoi wella. Un tumer penenn: “O baro Dewel hi ap mari rig. Kek bibacht nai well pral mende.”

Zakarie 13:4

An ko tsiro ladjenn pen kol chochene rakepangre koleske, hoi dikan le an i suni. Un jon riwenn buder gar i plaashka dran busjengre balla ap pende, te denn le i menshen pal i kanda.

Mateo 10:17

Denn jak, hoi i menshe tumentsa krenna! Jon anenn tumen glan i tchatchepangre, un mukenn tumen an lengre kangria i tchupnijah dawa te dell.

Mateo 16:11

Haiwenn tumer kanna, kai me rakrom gar pral o maro, har penom: Denn jak! O shutlo jarro hi gar mishto, hoi well i Farisarendar un i Sadduzarendar!”

Mateo 16:6

Un o Jesus penas ap lende: “Denn jak! O shutlo jarro hi gar mishto, hoi well i Farisarendar un i Sadduzarendar!”

Mateo 24:11

Ninna wenna bud chochene rakepangre un penenna, te hi le bitchedo o Deblestar. Kolla anenn bud menshen o tchatcho dromestar tele.

Mateo 7:14

Tikno hi ko wudar un gar buchlo hi ko drom, kai i menshe hatsenn o djipen. Un gar bud hi kolla, kai ap ko drom djana.

Louka 12:15

Palle penas o Jesus ap kolende, kai trul leste tardo hi: “Denn garda! Ma nashenn bud brawlepen palla! O tselo brawlepen, hoi i mensho khetne anas, krell o mensheskro djipen gar braweles.”

Louka 6:26

Bibacht well ap tumende, te rakrenn i tsele menshe tumendar latches. Kolengre phure rakran ninna latches pral i chochene rakepangre, kai penan, te wan le o Deblestar, un wan gar lestar.

Johanni 10:12

Jek, kai lell lowe, te dell lo garda ap i bakrende, hi kek bakrengro. Kol bakre hi gar leskre. Te dikell kowa, kai i diwjo djuklo wella, nashell lo peske, un mukell kol bakren kokres. Un o diwjo djuklo perell pral kol bakrende, un tradell len jaake, kai jon buder gar khetne hi.

Bičepangre 13:40

Krenn lauter, te well gar kowa pral tumende, hoi o Debleskre rakepangre an pengre lila penan:

Bičepangre 13:6

Jon djan an o tselo them Ciprus trujel, un wan ap i wawar rig ko themestar un djan an o foro Pafos. Kote tapran le i biboldes. Kowa kharas Bar-Jesus un his i durkepaskro. Job penas pestar, te hi lo i Debleskro rakepaskro. Kowa his i chochepen.

Galatarja 2:4

His wawar mursha koi. Jon kran, har te wans le patsle. Jon kaman te dikell, har kol patsle djiwenna, kai buder gar ap o Moseskre laba pandlo hi. Mer, kai ham buder gar pandlo ap kol laba, djiwah kanna pal o Jesuseskre laba. Un kol mursha, kai djiwenn gar pal o Jesuseskre laba, kaman, te was mer pale pandlo ap o Moseskre laba.

Efesarja 4:14

Palle ham buder gar har tikne tchawe, kai lauter patsenna, kau diwes jaake un ko wawar diwes wawartchandes. Un mer shunah buder gar ap kolende, kai chochenna, un kamenn men o tchatcho dromestar tele te anell.

Efesarja 5:6

Ma patsenn kekes, kai penell tumenge, te nai krenn kowa lauter! Koon kowa penella, hi i chocheno. O Debleskri choli well ap kolende, kai gar ap o Debleste shunenna, un krenna sawo tchilatcho koowa.

Filiparja 3:2

Denn garda, te shunenn gar ap kolende, kai hi tchilatche budepangre un djukle. Jon kamenna, te mukenn tumen ap tumaro mass te tchinell, un penenn: “Kowa hunte krenn, te nai wenn tumer o Debleskre menshe!”

Kolossarja 2:8

Denn jak, te shunenn ap kekeste, kai kamell te taprell tumen shukar labentsa, hoi wenna dran i menshengro goswepen. Kowa hi chochepen un tchi moldo! Kol laba hi menshengro rakepen, hoi i phure ap i tchawende dureder penan un wella i phubjatar, un gar o Jesus Kristestar.

2. Timoteo 3:13

Kol tchilatche menshe un kol chochene, kai krenn jaake, har te wans le patslo, kolentsa well djungleder un djungleder. Jon peran o Debleskro dromestar tele, un tserdenn ninna wawaren o Debleskro dromestar tele.

2. Timoteo 4:3

Well i tsiro, kai kamenn le o Debleskro tchatchepen buder gar te shunell. Jon djiwenna, har jon kamenna, un rodenn penge sawe sikepangre, kai kowa len sikrenna, hoi jon kamenn te shunell.

2. Petro 3:17

Latche phrala un phenja, kanna djinenn tumer, kai tchilatche menshe wenna, kai shunenn gar ap o Debleste. Doleske denn garda, te patsenn gar o chochepen, hoi jon rakrenna! Ma djan lentsa, te perenn tumer gar o tchatcho dromestar tele! Atchenn soreles an o patsepen tardo!

1. Johanni 4:1

Latche phrala un phenja, ma patsenn hakenes, koon penella, te hi les o Debleskro Ducho! Dikenn ap leskro rakepen, te djinenn tumer, te well kowa tchatchepah o Deblestar! Bud chochene rakepangre nashenn ap i phub trujel. Kolla penenna i menshenge, te well lengro rakepen o Deblestar. Kowa hi gar tchatcho.

Judas 1:4

Me shunom, hi menshe koi, hoi tchorchanes mank tumende wan. Kolla kamenn o Deblestar tchi djinell. Jon penenn, te hi o Dewel latcho, un te nai krenn le lauter, hoi jon kamenna. Jaake djiwenn le i wi-ladjedo djipen, un denn maro rajes, o Jesus Kristes, buchoste. Kowa kokres hi maro rai. Glan i rah tsiro hi tchinlo, te lenn jon pengri phagi.

Debleskro tsiro 16:13

Un me dikom triin benga, hoi dikan win har djambe. Kolla wan win, jek dran o baro sapeskro mui, jek dran o viecheskro mui, un jek dran ko rakepaskro mui, kai job i chocheno hi, un krell pes, har te wals lo i Debleskro rakepaskro.

Debleskro tsiro 17:6

Un me dikom, kai koi djuwel mato his o ratestar, hoi nashas, har o Debleskre menshe maredo wan, kolla, kai patsan ap o Jesuseste un dan pengro patsepen gar pre. Un me nashte patsom gar, hoi dikom.

Debleskro tsiro 19:20

Un ko viecho was tapedo, ninna leskro chocheno rakepaskro. Ko rakepaskro kras bud baro koowa, un anas kolen ap o bengeskro drom, kai o viecheskro lab ap pende lan, un ko vieches an-mangan, hoi i menshendar kerdo was. Un djides wan kol dui an i bari jag witsedo, hoi soreles chatchella un khandella.

Debleskro tsiro 20:10

Un o beng, kai anas len ap peskro drom, well an i bari jag witsedo, hoi soreles chatchella un khandella. Kote hi ninna o viecho, un ko chocheno rakepaskro. Kote well len hako tsiro bare duka.