Mateo 6:16 - O Debleskro Drom 2021 (Sinte)

¹⁶ Te chan tumer i tikno tsiro tchi, te mangenn o Debles an, palle krenn kowa gar jaake, te dikenn i menshe kowa! Ma krenn har kolla, kai hi len dui djia! Jon sikrenn ap pengro mui, te bokenn le pengro Debleske. Tchatchepah, me penau tumenge: Kolla lenna tchi o Deblestar. Jon anan pengro latchepen kokres dren.

O Debleskro Lab 2024 (Sinte-Manouche)

¹⁶ Te rhan t'mer i tikno tsiro či, te mangenn o Debles an, palle krenn kova gar yaake, te dikenn i menshe kova! Ma krenn har kolla, kay hi len douy djia! Yon sikrenn ap pengro mouy, te bokenn le pengro Debleske. Čačepah, me penau t'menge: Kolla lenna či o Deblestar. Yon anan pengro lačepen kokres dren.

Mateo 6:16 ပူးပေါင်းရင်းမြစ်များ

2. Samuel 12:16

Un o David rodas o Debles kol ternepaske un chas tchi. Un te was job khere, his job i tseli rati ap i phub tchiddo.

2. Samuel 12:21

Koi penan leskre budepangre ap leste: “Hoi kreh tu koi? Har ko ternepen djiwas, chal un pijal tu tchi, un rowal. Kanna, kai meras lo, steh tu pre un chah.”

1. Rajengro liil 21:27

Har shunas o Ahab kal laba, tserdas lo peskri plaashka an kotja, riwas peske i gono trujel, chas tchi, un rakras buder gar. Ninna o sopaske riwas lo o gono gar win.

Nehemia 1:4

Un har me kol laba shunom, beshom man koi un rowom an bari duk budeder diwessa. Un me chom tchi, un mangom o Debles an o bolepen,

Ester 4:16

“Dja koi un de i tsele bibolden an o foro Susa khetne gole! Chan un pijenn triin diwessa tchi, gar ap o diwes, witar gar an i rati. Krenn kowa mange, te dikell o Dewel latches ap mande! Un me un kol djuwja, kai mange budrenn, mer kamah kowa ninna jaake te krell. Un pal kowa kamau pash o baro rajeste dren te djal, ninna te hi khatar o tchinlo lab. Un te denn le man mulo, palle denn le man mulo.”

Debleskri gili 109:24

Chom tchi jaake bud diwessa, te hi mire herjen buder kek soor, un man hi kek thulepen ap i kokale.

Debleskri gili 35:13

Har jek lendar nasselo his, riwom ropaskre ripja ap mande, chom tchi un bokom leske, un pale te pale mangom o Debles leske,

Debleskri gili 69:10

Kamau tiro kheer jaake bud, te chatchell miro dji an mande har i jag. Un kolla, kai praassenn tut, praassenn man ninna.

Daniel 9:3

Un me dikom pre pash o Debleste, miro rajeste, un rodom les un mangom les ropah, chom tchi un riwom man an i gono, un witsrom jagakri tchik pral mande.

Maleachi 3:14

Tumer penenn: ‘Dineles hi, te das maro djipen an o Debleskro wast. Hoi anell menge kanna, te rikrah leskre laba, un mangah men tele glan o baro Debleste, ko rajeste pral o bolepen un i phub?

Mateo 6:1

Denn jak, har krenn tumer latcho koowa! Ma krenn les jaake, te dikenn i menshe kowa un sharenn tumen! Koon tumendar kowa krella, koles dell tumaro dad an o bolepen kek latchepen pale.

Mateo 6:2

Tu te deh i tchorweles lowe, palle ma pen kowa hakeneske! Ma kre har kolla, kai hi len dui djia, un penenn an i biboldengre kangria un ap o drom, hawo latchepen jon kran, te wenn le i menshendar sharedo. Tchatchepah, me penau tumenge: Kolla lenna buder tchi o Deblestar. Jon anan pengro latchepen kokres dren.

Mateo 6:5

Tu te rakreh o Debleha, palle ma kre kowa har kolla, kai hi len dui djia. Jon kamenn, te dikenn len i menshe, har jon an i biboldengre kangria un ap o drom tardo hi, un o Debleha rakrenna. Tchatchepah, me penau tumenge: Kolla lenna tchi o Deblestar. Jon anan pengro latchepen kokres dren.

Markus 2:18

His i diwes, kai chan o Johanneskre mala un i Farisarja tchi, te mangenn le o Debles an. Koi wan mursha pash o Jesuseste, un penan ap leste: “Kolla, kai shunenn ap o Johanneste, ninna kolla, kai shunenn ap i Farisarja, chan i tsiro tchi, te mangenn le o Debles an. Hoske krenn tire mala kowa gar?”

Louka 18:12

Dui diwessa an o kurko chau me tchi, te mangap tut an. Un me dau tut o deshto kotar halauterestar, hoi dren lau.

Louka 2:37

Palle meras lakro rom. Un kanna his li ochta-deesh-te-star bersha phuro. Un joi his o tselo diwes un i tseli rati an o Debleskro baro kheer, te mangell li o Debles an. Un bud kope chas un pijas li tchi o Debleske.

Bičepangre 10:30

Koi penas o Kornelio: “Glan star diwessa, his trinenge, mangom o Debles an miro kheer an. Koi his ap jek kopo i mursh glan mande tardo. Koleskre koola his bijalo.

Bičepangre 14:23

Un an hake gaba un forja, kai i patsle khetne wan, rodas o Paulo un o Barnabas phralen win, te wenn le phureder mank i patslende. Un o Paulo un o Barnabas lan penge i tsiro, kai chan le tchi o Debleske, un mangan o Debles lauterenge, kai ap leste patslo wan, te dell lo ap lende jak.

1. Korintarja 7:5

Kek tumendar te rikrell pes kol wawarestar pale! Tumer nai rikrenn tumen i tikno tsiro pale, te kamenn tumer dui kowa, te mangenn o Debles an. Un pal kowa awenn pale khetne har rom un romni! Te krenn tumer kowa gar, palle nai well, te han buder gar o rai pral tumende un perenn an o bengeskro wast.

2. Korintarja 11:27

Me marom man tele un man his bud budi. Bud kope sowom gar. Man his trush un bok. Bud kope chom tchi. Mange his shila un man his tchi an-ripaske.

2. Korintarja 6:5

Ninna te denn le men dawa, te witsrenn le men an o stilepen, te lenn le men palla, dah mer gar pre. Mer marah men tele, un della diwessa, kai sowah gar un chah gar.