Louka 8:13 - O Debleskro Drom 2021 (Sinte)

¹³ Ko kotar phub, hoi hi pherde barra, hi har o dji kol menshendar, kai shunenn o Debleskro lab, un lenn les bachteles pre. O lab well gar sorelo an lengre djia. I tikno tsiro patsenn le. Un te well pharo tsiro ap lende, witsrenn le pengro patsepen ap i rig.

O Debleskro Lab 2024 (Sinte-Manouche)

¹³ Ko kotar phoub, hoy hi pherde barra, hi har o dji kol menshendar, kay shounenn o Debleskro lab, oun lenn les barhteles pre. O lab vell gar zorelo an lengre djia. I tikno tsiro patsenn le. Oun te vell pharo tsiro ap lende, vitsrenn le pengro patsepen ap i rig.

Louka 8:13 ပူးပေါင်းရင်းမြစ်များ

Hiob 19:28

Te putchenn tumendar: “Har nai lah les palla? Hawo koowa nai anah ap leste pre?”

Gosewe laba 12:12

Tchilatche menshenge hi shukar, te krenn le midjak koowa. Kolla, kai an o tchatchepen tardo hi, hi soreles tardo un krenn latcho koowa.

Gosewe laba 12:3

O tchilatchepen dell kekes i soor, te atchell lo soreles tardo. Kowa, kai an o tchatchepen hi, atchell soreles tardo har i ruk bare drabentsa.

Jesaja 58:2

Jon wenn hako diwes, har te rodans le man, un penenn, te kamans le mire dromma te djinell, har te wans le menshe, kai o tchatchepen krenn, un pengro Debles gar mukan. Un jon kamenn, te krap me o tchatchepen lenge win, un te wap pash lende.

Ezekiel 33:32

Un tu, tu hal lenge har sawo, kai giwell pirneskre gilja, un haiwell shukar te giwell un bashrell. Jon shunenn tire laba, un krenn len gar.

Hosea 6:4

Hoi te krap tuha, Efrajim? Hoi te krap tuha, Juda? Tumer mukenn man jaake sik har i wolka, hoi taissarlakro krik djal, un har ko pani, hoi ap o senlepen hi.

Markus 6:20

O Herodes trashas o Johannestar. Job djinas, kai o Johanni i Debleskro mursh hi, kai djas o tchatcho drom. Doleske das lo garda ap leste un rikras les an o stilepen. Job kamas o Johanneskro rakepen. Hako kopo, kai job les shunas, djinas lo buder gar, hoi te krell lo un te penell lo.

Louka 8:12

Ko drom hi har o dji kol menshendar, kai shunenn o Debleskro lab. Un o beng wella, un lell kowa lenge pale dran o dji win, te patsenn le gar ap o Debleste un wenn gar ap leskro drom.

Louka 8:14

Ko kotar phub, kai o djob mashkral i subjengre burra peras, hi har o dji kol menshendar, kai shunenn o Debleskro lab un rikrenn les i tsiro an pengre djia. Te well i daar an lengro djipen, un te well o brawlepen glan lengre jaka, un ko shukar djipen, palle well ko lab lendar tassedo un rakrell buder gar an lengre djia.

Johanni 15:2

Hako senelo kasht ap mande, hoi anell kek drake, tchinell job tele. Un ko kasht, hoi anell drake, krell job djudjo, te anell lo budeder drake.

Johanni 15:6

Koon atchell gar an mande, kowa well win witsedo, har kol kashta, kai tele tchinlo hi. Jon wenn khetne rodedo un an i jag tchiddo, te chatchrenn le.

Johanni 5:35

O Johanni his i momeli, kai chatchas. Un i tikno tsiro hans tumer bachtelo pral kowa, hoi job penas un kras.

1. Korintarja 13:2

Te wals man gar o Debleskro kamlepen an o dji, palle molals ninna kowa tchi, te penoms me i menshenge, hoi o Dewel mande sikras. Te wals man gar o Debleskro kamlepen an o dji, palle molals ninna kowa tchi, te djinoms halauter, hoi i wawar gar djinenna un te haiwoms ko tselo Debleskro drom. Te wals man gar o Debleskro kamlepen an o dji, palle molals ninna kowa tchi, te wals man jek sorelo patsepen, te penoms ap i berge: ‘Hadenn tumen’, un jon hadenna pen.

1. Korintarja 15:2

Te rikrenn tumen ap o latcho lab o Jesusestar, jaake har me les tumenge penom, djan tumer gar nashedo. Te wals kowa wawartchandes, wals tumaro patsepen tchitcheske.

Galatarja 3:1

Hoske kamenn tumer patsle an Galatia kowa gar te haiwell? Koon kras tumenge dinelo? Tumenge was o Jesuseskro merepen ap o trushel jaake penlo, har te dikans kowa tumare jakentsa!

Galatarja 3:4

Tumer djan ap o Jesuseskro drom. Un doleske kran i menshe tumenge o djipen phares. His kowa lauter tchitcheske?

Efesarja 3:17

Me mangau lestar ninna, te djiwell o Jesus Kristo an tumende dran tumaro patsepen, un te kamenn tumer o Debles un ninna jek o wawares o djijestar. Palle han tumer har i ruk, koleskre draba djan dur an i phub. Un tumer han har i kheer, hoi soreles tardo hi.

Kolossarja 1:23

Jek koowa hunte krenn tumer: Atchenn ap o Jesuseskro drom! Patsenn soreles ap leste! Mukenn gar tele, te dikenn ap kowa, hoi tumen hi pash o Debleste! Rikrenn soreles ap leskro latcho lab, hoi tumenge penlo was! Ko lab was penlo ap i tseli phub. Ninna me, o Paulo, hunte penap ko lab i menshenge. Kowa hi miri budi.

Kolossarja 2:7

te well tumaro patsepen jaake sorelo har i ruk, hoi soreles an i phub tardo hi! Ma mukenn ko tchatcho drom, hoi tumende siklo was! Bistrenn witar gar, te parkrenn tumen bud pash o Debleste!

1. Tessalonikarja 3:5

Doleske rikrom kowa buder gar win, un bitchrom o Timotes pash tumende, te nai penell lo mange, har han tardo an tumaro patsepen. Man his traash, te anals tumen o beng o Debleskro dromestar tele. Palle wals mari budi pash tumende tchitcheske.

1. Timoteo 1:19

Rike ap o patsepen ap o Jesus Kristeste! Kre, hoi tiro dji tuke penella! Hi menshe, kai shunan gar ap pengro dji, un kran gar, hoi mishto hi. Un jon peran o Debleskro dromestar tele.

Hebrearja 10:39

Tchatchepah, mer ham gar kolendar, kai mukenn leskro drom un djan nashedo. Na-a. Mer ham kolendar, kai atchah an o patsepen, un lah o djipen, hoi gar pre-herella.

Jakobo 2:26

Jaake har o mensho mulo hi, te hi les kek ducho, jaake hi maro patsepen mulo, te krah kek latcho koowa.

2. Petro 2:20

Jon haiwan, kai maro rai, o Jesus Kristo, lenge meras, un dan pengro phuro djipen pre. Un palle wan le ap ko djungelo drom pale. Kanna hi lengro djipen djungleder har glan ko tsiro.

2. Petro 2:22

Kol menshenge djal jaake, har penlo well: “Ko djuklo chal pale kowa, hoi job win tchadas. Un ko balo witsrell pes pal o thopen pale an i tchik.”

1. Johanni 2:19

Kolla wan mendar. Jon his gar tchatchepah mendar. Te wans jon mendar, atchans le pash mende. Un har jon penge djan, nai dikas hakeno, te his le gar mendar.

Judas 1:12

Kol menshenge hunte ladjenn tumen. Te wenn tumer khetne, te pijenn un te chan, palle chan jon pen thulles pash tumende un ladjenn pen gar. Jon dikenn ap pende kokres, te djal lenge kokres mishto. Jon krenn bare laba, hoi tchi moldo hi. Jon hi har ruka, ap kolende tchi baro wella, witar kek patria, un kai hi tseles mulo un wenn tele dino.