Josua 22:18 - O Debleskro Drom 2021 (Sinte)

¹⁸ Un tumer rissrenn tumen kau diwes o baro Deblestar tele. Dikenn tumer gar, hoi wella? Kau diwes hadenn tumen pral o baro Debleste. Un taissar well leskri choli pral i tsele menshende Israel.

O Debleskro Lab 2024 (Sinte-Manouche)

¹⁸ Oun t'mer rissrenn t'men kava dives o baro Deblestar tele. Dikenn t'mer gar, hoy vella? Kava dives hadenn t'men pral o baro Debleste. Oun taysar vell leskri rholi pral i tsele menshende Israel.

Josua 22:18 ပူးပေါင်းရင်းမြစ်များ

2. Samuel 24:1

Un o baro Dewel was pale chojedo ap o Israel. Un job kras, te anell o David bibacht ap kol menshende an Israel, un penas leske: “Dja koi un hatse win, har bud mursha hi an Israel un an Juda!”

1. Rajengro liil 9:6

Te mukenn tumer miro drom, tumer un tumare tchawe, te rikrenn tumen gar pal mire laba un miro tchatchepen, hoi me tumenge dom, un djan pash wawar debla, un mangenn len an, un witsrenn tumen glan lende tele ap i phub,

2. Rajengro liil 17:21

O baro Dewel tchinas i Israelitarja tele kol menshendar Juda, jaake te his le buder gar jek them. Un i Israelitarja lan o Jerobeames, koleskro dad o Nebat his, te well lo lengro baro rai. Un kowa anas i Israelitarjen o baro Debleskro dromestar tele un kras, te anan le bari doosh ap pende.

1. Familjakro liil 21:1

Un o beng kamas tchilatchepen te krell ap i menshende Israel. Jaake das lo o Davideske an o dji, te hatsell lo win, har bud mursha an Israel hi, kai nai djan an o kurepen.

1. Familjakro liil 21:14

Koi mukas o baro Dewel i baro nasslepen pral o Israel te well, un 70.000 (efta-deesh-serja) menshe meran.

2. Familjakro liil 25:27

Un ko tsirestar, kai o Amazja mukas o baro Debles, kran pen murshen khetne an o foro Jerusalem, te marenn le les. Job nashas peske an o foro Lakish. Un jon bitchran murshen leske palla an o foro Lakish un maran les kote.

2. Familjakro liil 34:33

Un o Josia witsras i tsele djungele chochene deblen dran o tselo them win, kai i Israelitarja djiwan, un kras, te mangan le halauter o baro Debles an, kai lengro Dewel hi. Jaake rah, har o Josia djiwas, mukan le gar o baro Debles, ko Debles, koles ninna lengre phure an-mangan.

3. Mose 10:6

O Mose penas ap o Aron un koleskre wawar dui tchawende, o Eleasar un o Itamar: “Mukenn tumare phralen, kol wawar Israelitarjen, te rowenn le kolenge, kai o baro Dewel koi jagah maras. Tumer hunte mukenn gar tumare balla ap tumaro shero diwjes trujel tchiddo, un hunte tserdenn gar tumare koola an kotja, te sikrenn, har phares tumare djia hi. Te krenn kowa, hunte merenn. Un o baro Debleskri choli well pral o tselo kheer Israel.

4. Mose 16:22

Kol dui mukan pen ap pengro mui te perell, un penan: “Ach Dewel, tu hal o Dewel, kai das hakenes o djipen! Te kras jek mursh i tchilatcho koowa, kameh tu doleske tiri choli pral i tsele menshende te tchiwell?”

4. Mose 32:15

Te djan tumer lestar krik, mukell job kal menshen i rah tsiro an o mulo tato them, un tumen hi doosh, te djan le halauter tele.”

5. Mose 7:4

Kol tcha anens tumare mursh tchawen o baro Debleskro dromestar tele, jaake te mangens le wawar deblen an. Palle wals o baro Debleskri choli pral tumende, un sik marals job tumen.

Josua 22:15

Un har wan le an o them Gilead, penan le ap lende:

Josua 22:16

O baro Debleskre tsele menshe mukenn tumenge te penell: “Hawo tchilatcho koowa kran tumer ap o Israeleskro Debleste! Hoske mukan o baro Debles, un kran tumenge i altaro? Koleha perenn o baro Deblestar tele!

Josua 22:20

His gar jaake, har o Achan, koleskro dad o Serach his, peske kolestar las, hoi o baro Debleske kokres his, te was o baro Debleskri choli pral i tsele Israelitarjen, ninna te kras jek mursh kokres ko tchilatchepen. Un job hunte meras koleske, hoi lo kras.”

Josua 7:1

I Israelitarja rikran pen gar ap o Debleskro lab, hoi job penas, te well halauter an o foro Jericho leskro. Jek lendar, o Achan, las tchomone peske. O Achaneskro dad his o Karmi, koleskro dad his o Sabdi, un koleskro dad his o Serach. Un kolla his mursha dran o kheer Juda. Har o Achan kowa kras, las o baro Dewel i bari choli pral i Israelitarja.

Josua 7:11

O Israel anas bari doosh ap peste! Jon rikran pen gar ap mire laba, hoi lenge penom, te hunte rikrenn le. Un jon lan kolestar, hoi mange his un tchoran les un tchiwan les tchorchanes pash pengro koowa pashel.

Josua 7:21

Mank ko tselo koowa, hoi lam lendar, dikom i shukar plaashka dran o them Shinar, un 200 (dui-sheel) rupeni kotja un i baro lengsto sonakaskro kotar, hoi jek paash kilo phares hi. Un me nai rikrom man gar pale un lom kowa. Un halauter hi an miro plachteno kheer, an i phub khatemen. Un o rup hi tel o wawar.”

1. Samuel 12:14

Har kamoms, te sharenn tumer o baro Deblestar, kai tumaro Dewel hi, un mangenn les kokres an, un shunenn ap leste un krenn, hoi job tumenge penella! Har kamoms, te djan tumer un tumaro baro rai, kai pral tumende hi, o Debleskro drom!

1. Samuel 12:20

O Samuel penas ap lende: “Ma darenn! Hi tchatcho, te kran tumer kau tselo tchilatchepen; kanna shunenn ap o baro Debleste un djan leskro drom tumaro tselo djijeha!