Josua 11:20 - O Debleskro Drom 2021 (Sinte)

²⁰ O baro Deblestar was, te kran kol menshe pengre djia har bar, jaake te djan le an o kurepen khatar o Israel, un wan halauter lendar maredo. I Israelitarja hunte wan lenge gar latches. Na-a, jon hunte dan len halauteren mulo, jaake har o baro Dewel kowa ap o Mose penas.

O Debleskro Lab 2024 (Sinte-Manouche)

²⁰ O baro Deblestar vas, te kran kol menshe pengre djia har bar, yaake te djan le an o kourepen khatar o Israel, oun van halauter lendar maredo. I Israelitarya hounte van lenge gar lačes. Na-a, yon hounte dan len halauteren moulo, yaake har o baro Devel kova ap o Mose penas.

Josua 11:20 ပူးပေါင်းရင်းမြစ်များ

2. Samuel 17:14

Koi penas o Absalom un hakeno an Israel: “Kowa hoi o Hushai penas, hi feteder har kowa, hoi o Ahitofel penas.” Jaake kras o baro Dewel, kai kek kowa kras, hoi o Ahitofel an leskro goswepen penas. O baro Dewel kamas i bibacht pral o Absalom te anell.

1. Rajengro liil 12:15

Un jaake shunas o baro rai gar ap i menshende. Kowa kamas o baro Dewel jaake, te nai well leskro lab tchatcho, hoi lo o Achija dran Shilo an o mui tchiwas, te penell kowa les ap o Jerobeam, koleskro dad o Nebat hi.

2. Familjakro liil 22:7

O Dewel kamas kowa jaake, te djal o Ahasja pash o Joram, te well lo kote maredo. Un har job koi was, djan kol dui, o Ahasja un o Joram pash o Jehu, koleskro dad o Nimshi hi. Koles rodas o baro Dewel win, te well lo baro rai un marell o Ahabeskri tseli familja.

2. Familjakro liil 25:16

Un har o Debleskro rakepaskro leha jaake rakras, penas o baro rai ap leste: “Tchiwom me tut dren, te peness mange, hoi te krap? Rike tiro mui, te kameh gar dawa te lell!” Un o Debleskro rakepaskro mukas tele un penas: “Kanna, kai dikau, hoi kral, un kameh gar te shunell, hoi tuke penom, haiwau me, kai hi an o Debleskro dji, te marell lo tut.”

2. Mose 10:1

Pal kowa penas o baro Dewel ap o Mose: “Dja pash o Farao dren! Me pandom leskro dji, ninna i djia leskre pralstunendar, te nai krom kau baro koowa an miri soor mashkral lende.

2. Mose 11:10

Un o Mose un o Aron kran ko tselo baro koowa an o Debleskri soor glan o Farao. Un o baro Dewel pandas leskro dji, te mukas lo i Israelitarjen gar dran peskro them te djal.

2. Mose 14:17

Me krau, te pandenn i Egiptarja pengre djia jaake, te lenn le tumenge palla. Un me sikrau miro barepen un miri soor ap o Farao, ap leskre wurdja un ap leskre kurepangre.

2. Mose 14:4

Palle pandau me leskro dji, te lell lo len palla. Un me sikrau miro barepen un miri soor ap leste un ap leskre tsele lurdende. Un i Egiptarja haiwenn: Me hom o baro Dewel.” Un i Israelitarja kran jaake har o Mose lenge penas.

2. Mose 14:8

Un o baro Dewel pandas o Faraeskro dji, jaake te las job i Israelitarja palla, har jon i hadede wastentsa bachteles win djan.

2. Mose 4:21

Un o baro Dewel rakras ap o Moseste: “Te hal an o them Egiptia, palle kre ko tselo baro koowa, hoi me tut an tiro wast dom, glan o Farao! Un me kamau leskro dji har i bar te krell, te mukell job gar tire menshen dran i Egiptia win.

2. Mose 9:12

Un o baro Dewel pandas o Faraeskro dji, un job shunas gar ap lende. Jaake was, hoi o baro Dewel ap o Mose penas.

2. Mose 9:16

Me mukom tut doleske djido, te dikess miri bari soor, un te rakrenn le mandar ap i tseli phub.

Jesaja 14:24

O baro Dewel, o rai pral o bolepen un i phub, penas un das pes sowel: Jaake har me les mange glan lom, jaake krau les ninna. Un jaake har an miro dji hi te krap, jaake well ninna.

Jesaja 34:2

O baro Debles hi i bari choli ap i tsele themma lengre bud lurdentsa. Un job kras pash peste win, te hunte merenn le, un das len an i wasta kolendar, kai marenn len.

Remarja 9:18

Lauter krell lo jaake, har job kamella. Ap koneste job latches kamell te well, ap koleste hi lo latcho. Koneske job i dji dran bar kamell te dell, koleske dell lo i dji dran bar.

5. Mose 2:30

O Sihon, ko baro rai an Heshbon, kamas men gar wergel leskro themestar te djal. Tumaro baro Dewel mukas leskro dji har bar te well, jaake te dikas lo tchi dren. Jaake das o baro Dewel les un leskro them an tumare wasta. Un kowa his gomme kau diwes jaake.

5. Mose 7:16

Tumer hunte marenn i tsele natsjone, hoi tumaro baro Dewel an tumare wasta dell. Jon hunte khaitenn tumen gar, un lengre deblen hunte mangenn gar an. Jon anans tumen an i bibacht.

Čačepangre 14:4

Leskro dad un leskri dai haiwan gar, te was kowa o baro Deblestar, kai i drom rodas, te nai perell lo ap i Filistarja. Kolla his i raja pral o Israel an ko tsiro.

1. Samuel 2:25

Te krell jek tchilatchepen ap i wawar mensheste, hi lo an o Debleskro wast. Te krell lo tchilatchepen ap o baro Debleste, koon nai rakrell leske mishto?” Jon shunan gar ap pengro dadeste. O baro Dewel kras lengre djia pandlo. Job kamas len te marell.