Johanni 4:14 - O Debleskro Drom 2021 (Sinte)

¹⁴ Koon ko pani pijella, hoi me les dau, kowa lell an peskro tselo djipen buder kek trush. Ko pani, hoi me les dau, well an leste i djido pani, hoi dell les o djipen, hoi gar pre-herella.”

O Debleskro Lab 2024 (Sinte-Manouche)

¹⁴ Koon ko pani piyella, hoy me les dau, kova lell an peskro tselo djipen bouder kek troush. Ko pani, hoy me les dau, vell an leste i djido pani, hoy dell les o djipen, hoy gar pre-herella.”

Johanni 4:14 ပူးပေါင်းရင်းမြစ်များ

Jesaja 49:10

Jon bokenna gar un trushenna witar gar. Un o tato ducho dran o mulo them dukrell len gar, witar gar dell len o kham tchurje. Me, kai man i baro dji lenge hi, sikrau lenge o drom, un anau len pash shila pani, te nai pijenn le.

Jesaja 55:1

Awenn pash o pani, tumer kolen trush hi! Un tumer, kai tumen kek lowe hi, awenn un ginenn un chan! Awenn un ginenn kek lowentsa un lenn tchitcheske mool un thud!

Jesaja 58:11

Un hako tsireske sikrell tut o baro Dewel tiro drom. Ninna te djiweh an o mulo tato them, dell lo tut doha djipaske, un dell tut newi soor. Palle hal tu har i baar, kolat hako tsiro doha pani hi, awa, har i pani, hoi dran i phub pre djal, un koleskro pani hako tsiro nashell.

Jeremia 2:13

Mire menshe kran tchomone, hoi dui kope tchilatcho hi: Man, ko djido pani mukan jon, un hadan penge panjeskre chebja win, kai paash hi, un nai rikrenn kek pani.

Jeremia 31:25

Kolen, kai khino hi, dau me pale soor, un kolen kai bokenna, dau doha te chal.”

Ezekiel 47:9

Kote kai ko lengsto pani nashell un well, kote hi djipen. Un kau pani krell, te well o Londo Baro Pani sasto, un bud bud matche djiwenn koi dren. Kai kau pani nashell, well halauter sasto un djiwell.

3. Mose 11:36

Kokres te perell i mulo viecho an i brunna, kai pani dren hi, palle well ko pani gar pale-tchiddo. Kokres kowa, kai taprell ko mulo vieches an, hoi koi dren hi, kowa hi pale-tchiddo.

Mateo 25:46

Un kol tchilatche len i phagi hako tsireske. I latche lenn o djipen, hoi gar pre-herella.

Mateo 5:6

Bachtele hi kolla, kai kanna pal o tchatchepen bokenna un trushenna. O Dewel krell len tchalo.

Johanni 10:10

Ko tchorepaskro wella, te tchorell lo kol bakren, te marell lo len, un te chal lo len. Me wom, te dap len o djipen, budeder har doha.

Johanni 11:26

Koon djiwella un patsell ap mande, kowa merell buder gar. Patseh tu kowa?”

Johanni 4:10

Penas o Jesus ap late: “Te djinals tu, hoi o Dewel kamell tut te dell, un koon tutar ko pani mangella, mangals tu mandar, te dap tut o pani. Un me doms tut o pani, hoi dell o djipen.”

Johanni 4:11

“Romeha,” penas koi djuwel, “tut hi tchi, kai leh ko pani nai win. Un ko pani hi tel an i phub. Kai kameh tu ko pani, hoi dell o djipen, te lell?

Johanni 4:13

Penas o Jesus: “Hakeno, kai pijell kau pani, lell pale trush.

Johanni 4:36

Kanna anenn i budepangre kolen khetne, kai lenn o djipen, hoi gar pre-herella. Un lengri budi well plaissedo. Jaake hi hake dui bachtelo: Kowa, kai o tikno djob an i phub witsras, un kowa, kai anell o djob dren.

Johanni 6:27

Ma djiwenn o chapaske, hoi paash djala! Djiwenn jaake, te lenn ko djipen, hoi gar pre-herella! O Mensheskro Tchawo kokres nai dell tumen kowa. Jaake sikras o Dewel, kai kowa leskro tchawo hi.”

Johanni 6:35

O Jesus penas lenge: “Me hom ko maro, kai della ko djipen. Koon pash mande wella, koles well buder kek bok. Un koon ap mande patsella, koles well buder kek trush.

Johanni 6:58

Kawa hi ko maro, hoi was dran o bolepen. Koon kau maro chala, lell o djipen, hoi gar pre-herella. Kawa hi i wawar maro har kowa, hoi tumare phure chan.”

Johanni 7:37

Ap ko pralstuno un shukeder diwes, was o Jesus pale glan kol tsele menshende, un das gole: “Kones trush hi, kowa te well pash mande un pijella!

Remarja 5:21

O menshengro tchilatchepen his sorelo, un anas o merepen. O Debleskro latchepen hi sorleder. Kanna, kai ham tchatcho glan leste, dell lo men o djipen, hoi gar pre-herella. Kowa kras maro rai, o Jesus Kristo, menge.

Remarja 6:23

Kowa, kai krell o tchilatchepen, lell peskri phagi. Koi phagi hi o merepen. Kowa, kai patsell ap o Jesus Kristeste, maro rajeste, koles dell o Dewel tchitcheske o djipen, hoi gar pre-herella.

2. Korintarja 1:22

un das men peskro Ducho. Ko Ducho, hoi an mende hi, sikrell men, kai ham leskro. Doleske djinah, job dell men gomme bud bareder latcho koowa an ko tsiro, hoi wella.

Efesarja 4:30

Te krenn tumer i tchilatcho koowa, palle dukrenn o Debleskro Ducho an tumare djia. O Dewel das les tumende, te sikrell lo, kai leskro han ap ko diwes, kai lell lo tumen dran o tselo tchilatchepen win.

1. Petro 1:22

Tumer shunan ap o tchatcho lab, un tchiwan o tchilatchepen dran tumaro djipen krik. Kanna nai kamenn tumen tchatchepah har phrala un phenja. Mukenn gar tele, te kamenn tumen o tselo djijestar!

1. Johanni 5:20

Mer djinah, kai o Debleskro tchawo ap kai phub was, te krell lo mare jaka pre, te prindjras o tchatcho Debles. Un jaake har mer ham khetne o Debleskro Tchaweha, o Jesus Kristeha, jaake ham khetne o tchatcho Debleha. O Jesus Kristo hi o tchatcho Dewel. Un job dell ko djipen, hoi gar pre-herella.

Debleskro tsiro 7:16

Un jon hunte bokenn buder gar, witar gar trushenn le buder. Un o kham chatchrell len buder gar, witar kek wawar tatepen.

Debleskro tsiro 7:17

O terno bakro, hoi mashkral o Debleskro beshepaskro hi, kowa dell jak ap lende, har i bakrengro rai ap peskre bakre jak della, un anell len pash o pani, hoi o djipen della. Un o Dewel khossell hake swa ap lengre jaka tele.