Johanni 4:10 - O Debleskro Drom 2021 (Sinte)

¹⁰ Penas o Jesus ap late: “Te djinals tu, hoi o Dewel kamell tut te dell, un koon tutar ko pani mangella, mangals tu mandar, te dap tut o pani. Un me doms tut o pani, hoi dell o djipen.”

O Debleskro Lab 2024 (Sinte-Manouche)

¹⁰ Penas o Yezous ap late: “Te djinals tou, hoy o Devel kamell tout te dell, oun koon toutar ko pani mangella, mangals tou mandar, te dap tout o pani. Oun me doms tout o pani, hoy dell o djipen.”

Johanni 4:10 ပူးပေါင်းရင်းမြစ်များ

Debleskri gili 10:17

Kowa, hoi i tchorwele tutar mangenna, shuneh tu, mo baro Dewel. Tu kreh lengro dji sorelo, un tiro kand hi lenge pre.

Debleskri gili 46:4

ninna te wals o baro pani diwjo un chojedo, un djals sawi sorjah pre, te perenn i berge khetne.

2. Mose 17:6

Un me tchiwau man glan tute tardo ap o baro bar pash i berga Horeb. Un palle dess tu ap o baro bar, un dran leste nashella pani, jaake te well len te pijell.” Un o Mose kras kowa jaake glan i jaka kol phurendar.

Kamlepaskri gili 4:15

I pani, hoi an i baar nashella hal tu, i djido pani, hoi dran o Libanon tele nashella.

Jesaja 12:3

Ap ko tsiro, kai lell tumen o Dewel win, wenn tumer jaake bachtelo har trushele menshe bachtelo hi, te hatsenn le pani.

Jesaja 35:6

Un har i wesheskri busni stell kowa, kai nai nashas gar. Un kowa, kai nai rakras gar, rakrell nai un dell gole i bachtjatar. An o mulo tato them well pani win dran i phub. Un an o diwjo truk them nashenn lengste panja.

Jesaja 42:6

Me, o baro Dewel, dom tut gole, te aness o tchatchepen pash i menshende. Me taprom tut pash tiro wast. Un me dau jak ap tute. Tu wess o rakepaskro, kai krell i menshentsa win, te wap lengro Dewel; un wess i menshenge an i tsele themma i momeli, hoi sikrell len o drom pash mande.

Jesaja 43:20

Mire wi-rodede menshenge dau pani an o mulo them, awa, lengste sorele panja an o tato them. Doleske sharenn man i diwje vieche, ninna i diwje djukle un bare diwje tchirkle.

Jesaja 44:3

Me tchorau pani ap o them, koles trush hi, un lengste panja nashenn an o truk them. Miro ducho tchorau ap kolende, kai tutar wenna, un miro latchepen ap tire tchawende.

Jesaja 49:10

Jon bokenna gar un trushenna witar gar. Un o tato ducho dran o mulo them dukrell len gar, witar gar dell len o kham tchurje. Me, kai man i baro dji lenge hi, sikrau lenge o drom, un anau len pash shila pani, te nai pijenn le.

Jesaja 9:6

I rajeskri soor, hoi les hi, well baro un bareder. Un an kek tsiro dell tchingepen. Job well beshdo ap o Davideskri beshepaskri, un hi i rai, kai krell o tchatchepen jaake win, har o Dewel kamell un mishto hi kanna un hako tsireske. O baro Dewel, ko rai pral o bolepen un i phub, krell kowa lauter. Jaake las lo pes kowa soreles glan.

Jeremia 2:13

Mire menshe kran tchomone, hoi dui kope tchilatcho hi: Man, ko djido pani mukan jon, un hadan penge panjeskre chebja win, kai paash hi, un nai rikrenn kek pani.

Ezekiel 16:35

Doleske shun, Jerusalem, tu lubni, hoi o baro Dewel penell!

Zakarie 13:1

“An ko tsiro nashell i pani an o foro Jerusalem, hoi nashell i menshenge dran o kheer David un i wawar menshenge an Jerusalem, te thowell lo lengri doosh un kowa krik, hoi kras len pale-tchiddo glan mire jaka”, penell o baro Dewel.

Zakarie 14:8

An ko tsiro nashenn djide panja dran o foro Jerusalem win. Ko jek paash nashell an o baro pani, hoi kote hi, kai o kham pre djal. Ko wawar paash nashell an o baro pani, hoi kote hi, kai o kham tele djal. Ko pani nashell an i nijal har an o wend.

Louka 11:13

Ninna te han tumer tchilatche menshe, denn tumer tumare tchawen latcho koowa. Har bud budeder dell tumaro dad an o bolepen peskro Ducho kolende, kai les mangenna.”

Johanni 16:3

Jon prindjrenn o dades gar un man witar gar. Doleske krenn jon kowa.

Johanni 17:3

Kowa hi ko djipen, hoi gar pre-herella: Te prindjrenn jon tut, kai tu hal o tchatcho Dewel, un te prindjrenn jon o Jesus Kristes, koles tu bitchral ap kai phub.

Johanni 3:16

O Dewel kamas i menshen jaake bud, te das lo lenge peskro jek tchawes. Les his kek wawar. Hakeno, koon patsell ap leste, djal gar nashedo. Job lell ko djipen, hoi gar pre-herella.

Johanni 4:14

Koon ko pani pijella, hoi me les dau, kowa lell an peskro tselo djipen buder kek trush. Ko pani, hoi me les dau, well an leste i djido pani, hoi dell les o djipen, hoi gar pre-herella.”

Johanni 6:35

O Jesus penas lenge: “Me hom ko maro, kai della ko djipen. Koon pash mande wella, koles well buder kek bok. Un koon ap mande patsella, koles well buder kek trush.

Johanni 6:51

Me hom ko maro, hoi dell o djipen, un hoi was dran o bolepen. Hakeno, koon chala kau maro, lell o djipen, hoi gar pre-herella. Un ko maro hi miro mass. Me dau les i menshenge, te lenn le ko djipen.”

Bičepangre 9:11

Un o rai Jesus penas ap leste: “Ste pre un dja ap ko drom, kai kharell o tchatcho drom. Putch an ko kheer o Judasestar pal i mursheste, kai kharell Saulo dran Tarsus. Job mangell o Debles an,

Remarja 8:32

O Dewel rikras peskro tchawes gar pash peste. Job das les menge lauterenge an o merepen. Patsenn tumer gar, te dell lo men khetne leha kowa lauter, hoi job menge penas?

1. Korintarja 1:30

O Dewel kras, te wan tumer ap o Jesus Kristeskro drom. Kanna djinah, hoi tchatchepah goswepen hi. O Jesus Kristo kras men tchatcho glan o Debleste. Job rodas men win, te was leske koi, un las mari doosh mendar krik.

1. Korintarja 10:4

Un jon pijan lauter ko jek pipen, kai was o Deblestar. Jon pijan ko pani, kai was dran i baro bar win, kai lentsa djas. Ko bar his o Jesus Kristo.

2. Korintarja 9:15

Parkras men pash o Debleste! Job das men peskro baro kamlepen, kai hi jaake baro, te nai rakrah les gar win.

Efesarja 2:8

Dran peskro latchepen las lo tumen dran o tchilatchepen win, har patsan ap o Jesus Kristeste. Tumer wan nai gar dran tumari soor dran o tchilatchepen un o merepen win. Na-a! O Dewel las tumen win.

Hebrearja 6:4

Hi menshe koi, kolenge kras o Dewel lengre djia pre, te haiwan le leskro bolepaskro latchepen. Un o Debleskro Ducho budras an lengre djia. Un jon haiwan o Debleskro latcho lab un leskri soor an lengro djipen. Kolla te perenn o Debleskro dromestar tele, nai anell len kek pale ap o Debleskro drom. Kowa, hoi jon krenna hi jaake, har te denn le penge o Jesus Kristes pale ap o trushel. Un kol wawar san pral leste.

1. Johanni 5:20

Mer djinah, kai o Debleskro tchawo ap kai phub was, te krell lo mare jaka pre, te prindjras o tchatcho Debles. Un jaake har mer ham khetne o Debleskro Tchaweha, o Jesus Kristeha, jaake ham khetne o tchatcho Debleha. O Jesus Kristo hi o tchatcho Dewel. Un job dell ko djipen, hoi gar pre-herella.

Debleskro tsiro 21:6

Un job penas pale: Halauter was jaake, har penom. Mandar was halauter. Un lauter wella pale glan mande. Me hom o glanstuno un o palstuno. Kones trush hi, kowa lell mandar o djido pani tchitcheske.

Debleskro tsiro 22:17

O Debleskro Ducho un o terno bakreskri pirni penenna: “Ab!” Un koon kowa shunell, penella: “Ab!” Un kones trush hi, kowa wella! Koon kamell, kowa lell tchitcheske o pani, hoi o djipen dell.

Debleskro tsiro 7:17

O terno bakro, hoi mashkral o Debleskro beshepaskro hi, kowa dell jak ap lende, har i bakrengro rai ap peskre bakre jak della, un anell len pash o pani, hoi o djipen della. Un o Dewel khossell hake swa ap lengre jaka tele.