Johanni 2:19 - O Debleskro Drom 2021 (Sinte)

¹⁹ Penas o Jesus ap lende: “Phagenn kau Debleskro kheer tele! Me krau an triin diwessa i newo kheer.”

O Debleskro Lab 2024 (Sinte-Manouche)

¹⁹ Penas o Yezous ap lende: “Phagenn kava Debleskro kheer tele! Me krau an triin divessa i nevo kheer.”

Johanni 2:19 ပူးပေါင်းရင်းမြစ်များ

Mateo 12:40

O Jona atchas triin diwessa un triin rati an o baro matcheskro per. Un jaake hunte atchell o Mensheskro Tchawo triin diwessa un triin rati an i phub paskedo.

Mateo 16:21

Un ap ko tsiro penas o Jesus peskre malenge, te hunte djal lo an o foro Jerusalem. Un job penas lenge: “Me hunte lap bud duka ap mande. I bare rashaja, un i biboldengre phureder un tchatchepangre, kolla marenn man. Un pal triin diwessa krell man o Dewel djido.”

Mateo 27:40

Un jon penan ap o Jesuseste: “Tu kamal o Debleskro baro kheer tele te phagell, un an triin diwessa pale pre te tchiwell. Tu te hal o Debleskro tchawo, kre tuke, hoi kral i wawarenge un ab kau trushelestar tele!”

Mateo 27:63

un penan ap leste: “Rai, menge djas an maro shero trujel, te penas ko chocheno, har job djiwas: Pal triin diwessa krell o Dewel man djido.

Markus 14:58

“Mer shunam, har job penas: Me phagau kau Debleskro baro kheer tele, hoi i menshe pengre wastentsa kran. Un an triin diwessa krau i wawar Debleskro baro kheer, hoi kek menshe pengre wastentsa kran.”

Markus 15:29

Un kolla, kai kote pashel wan, sikran i gushteha ap leste, un praassan les, un penan: “Tu kamal o Debleskro baro kheer tele te phagell, un an triin diwessa pale pre te tchiwell.

Markus 8:31

Un o Jesus penas peskre malenge: “O Mensheskro Tchawo hunte lell bud duka ap peste. Un i biboldengre phureder un tchatchepangre un i bare rashaja tchiwenn les ap i rig. Un job hunte well maredo. Un pal triin diwessa stell lo pale i mulendar pre.”

Johanni 11:25

Penas o Jesus ap late: “Me hom kowa, kai djangrau len pre dran o merepen un dau len o djipen. Koon ap mande patsella, djiwella, ninna te merell job.

Johanni 5:19

O Jesus penas ap lende: “Tchatchepah, me penau tumenge: O tchawo nai krell tchi pestar. Job dikell, hoi o dad krella. Un kowa, hoi krell o dad, kowa krell ninna o tchawo.

Bičepangre 2:24

Ko Jesuses kras o Dewel djido. Job las les i mulendar win, un kek soor nai rikras les pash i mulende pale.

Bičepangre 2:32

Kau Jesuses mukas o Dewel i mulendar pre te stell. Kowa djinah mer. Mer halauter dikam les djido.

Bičepangre 3:15

Ko rajes, kai o djipen della, maran tumer. Koles mukas o Dewel i mulendar pre te stell. Kowa djinah mer, mer dikam les.

Bičepangre 3:26

Doleske bitchras o Dewel peskro budepaskres, o Jesuses, glanstunes pash tumende, te anell job tumenge o Debleskri bacht, te djal hakeno tumendar peskro tchilatcho dromestar tele.”

Bičepangre 6:14

Mer shunam, har job penas: O Jesus dran Nazaret phagell o Debleskro baro kheer tele un krella, te hunte rikras mer buder gar ap kowa, hoi o Mose menge penas.”

Remarja 4:24

Kowa was ninna menge tchinlo, kai patsah ap o Debleste. Kowa kras o Jesuses, maro rajes, i mulendar djido. Mer te djinas: Maro patsepen tchiwell men ninna an o tchatchepen.

Remarja 6:4

Kote hi maro phuro djipen leha paskedo, te djiwas mer kanna i newo djipen, jaake har o Jesus Kristo i mulendar pre stas, har o Dewel, maro dad, peskri bari sorjah les djido kras.

Remarja 8:11

O Dewel kras o Jesus Kristes i mulendar djido. Te djiwell leskro Ducho an tumende, palle krell lo tumen ninna djido. O Debleskro Ducho, kai an tumende hi, krell kowa.

1. Korintarja 15:12

Mer penam tumenge, kai o Jesus Kristo i mulendar pre stas. Har nai penenn menshe mank tumende: “Ko della gar, kai i mule pre stenna.”

Kolossarja 2:12

Har wan tumer taufedo, was tumaro phuro djipen paskedo. Un jaake wan tumer o Jesus Kristeha paskedo. Har tumer ap leste patsan, kras o Dewel tumen djido, jaake har job o Jesus Kristes i mulendar djido kras.

1. Petro 3:18

Ninna o Jesus Kristo las jek kopo duka ap peste, har job ap o trushel meras, un mari doosh ap peste las. Job his i latcho, un meras i tchilatchenge. Kowa kras lo, te anell lo len pash o Debleste. I menshe maran les. O Debleskro Ducho kras les djido.