Jesaja 9:6 - O Debleskro Drom 2021 (Sinte)

⁶ I rajeskri soor, hoi les hi, well baro un bareder. Un an kek tsiro dell tchingepen. Job well beshdo ap o Davideskri beshepaskri, un hi i rai, kai krell o tchatchepen jaake win, har o Dewel kamell un mishto hi kanna un hako tsireske. O baro Dewel, ko rai pral o bolepen un i phub, krell kowa lauter. Jaake las lo pes kowa soreles glan.

O Debleskro Lab 2024 (Sinte-Manouche)

⁶ I rayeskri zoor, hoy les hi, vell baro oun bareder. Oun an kek tsiro dell čingepen. Yob vell beshdo ap o Davideskri beshepaskri, oun hi i ray, kay krell o čačepen yaake vin, har o Devel kamell oun mishto hi kanna oun hako tsireske. O baro Devel, ko ray pral o bolepen oun i phoub, krell kova lauter. Yaake las lo pes kova zoreles glan.

Jesaja 9:6 ပူးပေါင်းရင်းမြစ်များ

2. Samuel 7:13

Kowa krell mange i kheer. Un me krau te atchell lo hako tsiro baro rai.

2. Samuel 7:16

Hako tsiro hi tut tchawe, kai pal tute wenna, un jek lendar hi baro rai glan mande. Un tiro rajengri beshepaskri atchell hako tsiro.”

1. Rajengro liil 10:9

Sharedo well o baro Dewel, kai tiro Dewel hi, job, kai dikell latches ap tute, un kras te wal o rai pral o Israel! O baro Dewel kamell peskre menshen Israel an hako tsiro. Doleske tchiwas lo tut pral lende, te wess lengro rai, te aness o tchatchepen pash lende, un hakeno peskro tchatchepen lell.”

1. Rajengro liil 2:33

Lengro rat atchell ap o shero o Joabestar un leskre tchawendar pal leste hako tsireske. O David un halauter, kai wenn pal leste, un kai wenn bare raja pal leste, kolendar mu rikrell o baro Dewel i bibacht dur krik an hako tsiro!”

1. Rajengro liil 2:45

Ap mande, o baro rajeste Salomo, mu tchiwell lo peskri bacht, un mukell dran o Davideskro kheer an hake tsirja i bare raja te well pral Israel.”

Nehemia 9:32

Maro Dewel, har baro hal tu, jaake sorelo, te daras mer tutar. Tu pandal tiro dji ap mende, un rikreh tiro lab, hoi dal tut sowel. Kanna mangah tut, ma biste koi tseli bibacht, hoi pral mende was, pral mare bare rajende un mare pralstunende, pral i rashajende un o Debleskre rakepangre, pral mare phurende un men lauterende, an ko tselo tsiro, har wan i bare raja dran o them Assur pral mende bis ap kau diwes.

Debleskri gili 45:3

Tu hal shukeder har i wawar menshe. Dran tiro mui wenn latche laba. Tchatchepah o Dewel tchiwas peskri bacht ap tute, te atchell li hako tsireske ap tute.

Debleskri gili 45:6

De tire faile karje, te djan le an o dji kolendar, kai kurenn pen tuha. Jaake perenna i wawar themma glan tute.

Debleskri gili 45:7

Miro Dewel, tiri rajeskri beshepaskri atchell hako tsireske. Tu hal i tchatcho un latcho rai pral tire menshende.

Debleskri gili 50:1

I gili o Asafestar. O Dewel rakrell, o baro un sorelo Dewel dell i menshen ap i tseli phub gole, kotar, kai o kham pre djas bis kote, kai lo tele djal.

Debleskri gili 72:17

Leskro lab mu atchell hako tsireske. Jaake rah har o kham ap o bolepen hi, mu well leskro lab sharedo! Lestar mu well latchepen ap i menshende an i tsele themma. Un jon te rakrenn i bacht pral leste win.

Debleskri gili 72:3

Kote, kai job o baro rai hi, djiwenn i menshe i latcho djipen o Debleha, un tchatchepen well an o tselo them, ninna ap peskre tikne un bare berge.

Debleskri gili 72:7

Palle djal mishto kolenge, kai an o tchatchepen tardo hi. Un i menshe djiwenn latches khetne, bis te o tchon buder gar koi hi.

Debleskri gili 85:10

Tchatchepah, job hi ap kolengri rig, kai leha djiwenna un ap leste shunenna. Un leskro railepen atchell an maro them.

Debleskri gili 89:5

I menshe, kai tutar wenna, hako tsireske jon atchenna. Dran tiro kheer i bare raja wenna, un hako tsiro i raja atchenna.”

Gosewe laba 8:23

Me homs koi glan hako tsiro, har i phub gomme gar kerdo was.

Jesaja 10:21

Kol Israelitarja, hoi pral atchan, mukenn pengro drom un djan pale pale ap o drom o sorelo Deblestar.

Jesaja 11:5

Hako tsiro krell lo o tchatchepen. Hako tsiro penell lo, hoi tchatcho hi. Doleske hi o tchatchepen trul leste har i pereskri dori trul i ripen.

Jesaja 16:5

Palle well i rajeskri beshepaskri pre tardo. Un jek o Davideskre menshendar hi koi pre beshdo, un hi i latcho rai. Les hi i dji peskre menshenge. Un hi i tchatchepaskro rai, kai krell, hoi tchatcho hi, un dell hakenes peskro tchatchepen.

Jesaja 26:12

Baro Dewel, le o kurepen krik, te djal menge mishto! Lauter hoi kram, kral tu menge.

Jesaja 26:3

Baro Dewel, tu rikreh tire wasta pral kolende, kai mukenn pen gar tutar krik te tserdell, un deh len shukapen an o dji. Ap tute rikrenn le pen.

Jesaja 28:29

Ninna kawa djal win o baro Deblestar, ko rajestar pral o bolepen un i phub. Kowa, hoi job peske glan las, hi jaake shukar, te atchell menge o rakepen krik. Un leskro goswepen hi baro.

Jesaja 32:1

Sik well i baro rai, kai krell halauter an o tchatchepen, un i pralstune pral o them denn hakenes peskro tchatchepen.

Jesaja 37:32

Awa, dran o foro Jerusalem wenna pale menshe, kai kolendar wenna, kai djido atchan. Un ap i berga Zion djiwenn kolla, kai win lino wan dran o merepen. Job, o baro Dewel, ko rai pral o bolepen un i phub, hi, kai kowa krell.

Jesaja 53:10

O baro Dewel kamas kowa jaake, te was lo phagedo. Job mukas ap leste duka te well. Pal kowa, kai das lo peskro djipen i doshake i menshendar, dikell lo tchawen, kai lestar wenna, un djiwell i lengsto djipen. Un kowa, hoi o baro Dewel peske glan las, well lestar kerdo.

Jesaja 53:2

Job was baro glan o baro Debleste har i sano terno ruk, har i drab hoi dran i truk phub well. Les his kek shukapen un kek barepen. Un har mer les dikam, hatsam tchi, hoi an mare jaka shukar wals.

Jesaja 53:5

Mari doosh his kowa, kolake job dukedo was. Un koleske, hoi mer tchilatches kram, was job khetne dino. I phagi his ap leste tchiddo, te djas menge mishto. Job was dukedo, te was mer sasto.

Jesaja 63:16

Tu hal maro dad. O Abraham djinell tchi mendar, un o Jakob prindjrell men gar. Tu, baro Dewel, hal maro dad, kowa kai men win las dran o them Egiptia. Glan rah tsiro kral tu tuke koleha i baro lab.

Jesaja 66:12

Kawa penell o baro Dewel ap o foro Jerusalem: Dik, me mukau bud latchepen pral tute te well har i lengsto pani. Un o brawlepen dran wawar themma nashell an tute har i diwjo pani. Me dau garda ap tute har i dai ap peskro ternepen, hoi hidjrell li ap i wasta, un tchiwell les ap peskre herja un khelell leha.

Jesaja 7:14

Doleske dell o baro Dewel kanna kokres i sikepen, te sikrell lo, kai hi lo ap tumari rig: I terni tchai well wawartchandes un lell i mursh tchawes. Un koles dell li o lab Immanuel.

Jesaja 8:18

Me un kol tchawen, kai o baro Dewel man das, ham har i sikepen, hoi sikrell, hoi kamell o baro Dewel te krell an Israel, job, ko rai pral o bolepen un i phub, kai hi khere ap i berga Zion.

Jeremia 31:22

Har rah kameh te nashess trujel, tu, miri tchai, kai mukal miro drom? O baro Dewel krell tchomone newes ap i phub: I romni hi pash peskro romeste.

Daniel 2:44

Un an ko tsiro, kai kol bare raja djiwenna, krell o bolepaskro Dewel jek them, hoi an kek tsiro paash kerdo nai well. Kau them well an kek tsiro wawar menshendar dren lino. Leskro baro rai krell kol wawar rajengre themma paash, un leskri soor atchell hako tsireske.

Daniel 7:14

Un kowa das les i rajeskri soor un barepen un railepen, te well lo rai pral i menshende dran hako them un rakepen. Leskri rajeskri soor atchell hako tsiro un herell gar pre. Un job atchell baro rai an i tsele tsirja.

Haggai 2:9

Kau kheer te well shukeder har miro ersto kheer his. Un me kamau tumen bacht te dell an kau foro, penell o baro Dewel, ko rai pral o bolepen un i phub.

Mateo 1:1

Kawa hi o liil, hoi sikrella, koon o Jesus Kristeskre phure his. Mank lende his o David un o Abraham.

Mateo 1:23

I terni tchai, kai gomme kek murshestar an tapedo was, lella i ternepen. Un jon denn les o lab Emmanuel. Kowa kharella: O Dewel hi mentsa.”

Mateo 11:27

Lauter das miro dad an mire wasta. Kek djinella, koon o tchawo hi, har kokres o dad. Un kokres o tchawo djinella, koon o dad hi. Un o tchawo sikrell kolen, kai patsenn ap leste, koon o dad hi.

Mateo 28:18

Un o Jesus djas pash lende un penas ap lende: “O baro Dewel das man i soor pral o bolepen un pral i phub.

Louka 1:35

O bolepaskro penas ap late: “O Debleskro Ducho un leskri soor well pral tute. Doleske well o ternepen o Deblestar un well Debleskro tchawo kharedo.

Louka 2:11

Kau diwes was tumenge an o foro Betlehem kowa boldo, kai lell tumen dran o tchilatchepen win. Job hi ko baro rai, kolestar o Dewel penas, te well job.

Louka 2:14

“Baro hi o Debleskro railepen an o bolepen! O Debleskri bacht well ap i phub. Job dikell latches ap i menshende.”

Louka 21:15

Me dau tumen ko goswepen, un penau tumenge, hoi tumer hunte penenn. Un palle djinenn le buder gar, hoi te penenn le.

Johanni 1:14

Ko lab was i mensho, un djiwas pash mende. Un mer dikam leskro railepen un leskri soor, kai o Dewel peskro tchawes das. Kowa his pherdo latchepen un tchatchepen.

Johanni 1:16

Mer halauter lam pale un pale bud latchepen lestar, kai les jaake bud hi.

Johanni 14:27

Ninna te hom me gar pash tumende, atchell koi bacht, hoi me dom tumen, an tumare djia. Me dau tumen miri bacht. Koi bacht nai denn tumen gar i menshe ap kai phub. Ma trashenn! Ma awenn dareno!

Bičepangre 10:36

Job mukas i biboldenge o latcho lab te penell, te hi o Jesus Kristo kowa, kai anell len pash o Debleste. Job hi gar lengro rai kokres, na-a, job hi o rai pral halauter.

Bičepangre 20:28

Denn garda ap tumende un ap kol tsele patslende! Kolen ginas o Dewel peskro tchaweskro rateha. O Debleskro Ducho das len an tumare wasta, te denn garda ap lende. Tumer han lengre bakrengre.

Remarja 8:32

O Dewel rikras peskro tchawes gar pash peste. Job das les menge lauterenge an o merepen. Patsenn tumer gar, te dell lo men khetne leha kowa lauter, hoi job menge penas?

Remarja 9:5

Lengre phure hi o Abraham, o Isaak un o Jakob. Ninna o Jesus Kristo was i Israelitari, har was lo boldo. Sharas o Debles pral kowa lauter hako tsireske. Amen!

1. Korintarja 1:30

O Dewel kras, te wan tumer ap o Jesus Kristeskro drom. Kanna djinah, hoi tchatchepah goswepen hi. O Jesus Kristo kras men tchatcho glan o Debleste. Job rodas men win, te was leske koi, un las mari doosh mendar krik.

1. Korintarja 15:25

O Jesus Kristo hunte well o rai jaake rah, bis te tchiwell o Dewel lauteren, kai les gar kamenna, tel leskre pire.

2. Korintarja 5:19

O Dewel his an peskro tchaweste, o Jesus Kristeste, un kras, te nai wenn i menshe leha khetne. Lengri doosh las lo lendar krik. Jaake was kowa krik lino, hoi his mank lende un o Debleste tardo. Mende das lo kai budi, te penas kal latche laba i menshenge.

5. Mose 10:17

Tumaro baro Dewel hi o Dewel pral hako dewel un o rai pral hako rai. Job hi o baro un o sorelo, kolestar halauter darenn. Job dikell gar koi pre, koon jek hi. Un job lell tchi an, hoi kamell jek les te dell, te rissrell lo o tchatchepen trujel.

Kolossarja 2:3

Job kokres nai dell tumen o tselo goswepen, te haiwenn o Debleskro lab mishto.

1. Timoteo 3:16

Tchatchepah, an maro patsepen hi i baro tchatchepen: O Debleskro tchawo was i mensho. Hoi job kras, hi tchatcho. Ko sikras men o Debleskro Ducho. I bolepangre dikan ap leste. An i tsele themma rakran le lestar. Ap i tseli phub patsan le ap leste. An o bolepen las les o Dewel pash peste.

Tito 2:13

Un mer dikah ap ko bachtelo diwes, kai well o Jesus Kristo pale an o shukar railepen. Job hi maro baro Dewel, kai las men dran o tchilatchepen win.

Hebrearja 1:8

Ap peskro tchaweste penas lo: Tu, o Dewel, atcheh o baro rai kanna un hako tsiro. Tu hal tchatcho un latcho ap tire menshende.

Hebrearja 13:20

O Dewel kras i drom, te nai wah pash leste. Job kras o Jesuses, maro rajes, i mulendar djido. Kowa ratas peskro rat menge, te nai wah pash o Debleste, un djiwah hako tsiro leha khetne. O Jesus was maro baro bakrengro. Kowa dell jak ap mende, har i bakrengro dell jak ap peskre bakre.

1. Johanni 5:20

Mer djinah, kai o Debleskro tchawo ap kai phub was, te krell lo mare jaka pre, te prindjras o tchatcho Debles. Un jaake har mer ham khetne o Debleskro Tchaweha, o Jesus Kristeha, jaake ham khetne o tchatcho Debleha. O Jesus Kristo hi o tchatcho Dewel. Un job dell ko djipen, hoi gar pre-herella.

Debleskro tsiro 19:16

Ap leskro ripen un ap leskri pralstuni heri hi i lab tchinlo, hoi kharella: o rai pral i rajende un o pralstuno pral i pralstunende.

Čačepangre 13:18

O bolepaskro o baro Deblestar penas ap leste: “Hoske putcheh tu pal miro lab? Kowa hi i lab, hoi well gar kharedo.”