Jesaja 61:8 - O Debleskro Drom 2021 (Sinte)

⁸ Me, o baro Dewel kamau o tchatchepen, un hom chojedo pral o tchorepen un o tchilatchepen. Un tchatchepah, me dau latcho koowa i menshende an Juda ko tselo tchilatchepaske, hoi ap lende was. Un me krau lentsa win, te atchas mer mala hako tsiro. Koi pre dau miro tchatcho wast.

O Debleskro Lab 2024 (Sinte-Manouche)

⁸ Me, o baro Devel kamau o čačepen, oun hom rhoyedo pral o čorepen oun o čilačepen. Oun čačepah, me dau lačo koova i menshende an Youda ko tselo čilačepaske, hoy ap lende vas. Oun me krau lentsa vin, te ačas mer mala hako tsiro. Koy pre dau miro čačo vast.

Jesaja 61:8 ပူးပေါင်းရင်းမြစ်များ

1. Mose 17:7

Kowa, hoi me tuha win krau, atchell hako tsiro mange un tuke, tire tchawenge, kolengre tchawenge un lauterenge, kai pal tute wenna. Me hom tiro Dewel un ko Dewel tire tchawendar, kai pal tute wenna.

2. Samuel 23:5

O Dewel das man peskro lab hako tsireske, un hoi lo penas hi mishto un atchell tardo. Jaake hi miro kheer soreles glan leste tardo. Lauter, hoi mange mishto hi un hoi kamau o djijestar, mukell lo mishto te djal.

Debleskri gili 105:10

un pal leste o Jakobeste, un das peskro wast pre, te atchell kau lab i Israelenge hako tsireske.

Debleskri gili 11:7

O baro Dewel hi an o tchatchepen tardo, un kamell hakenes, kai o tchatchepen krella. Koon ap leste shunella peskro tselo djijeha, kowa dikell les peskre jakentsa.

Debleskri gili 32:8

“Me kamau tute te sikrell hawo drom tu hunte djas, un penau tuke, har tu les djas, un dau jak ap tute,” penell o baro Dewel.

Debleskri gili 33:5

Job kamell i tchatche dromma un i tchatche laba. Un i tseli phub hi pherdo latchepen o baro Deblestar.

Debleskri gili 37:28

O baro Dewel kamell o tchatchepen un mukell peskre menshen gar kokres. Hako tsiro dell job jak ap lende. Kolla, kai kamenn o Deblestar tchi te djinell, merenna, ninna lengre tchawe un kolengre tchawe.

Debleskri gili 45:7

Miro Dewel, tiri rajeskri beshepaskri atchell hako tsireske. Tu hal i tchatcho un latcho rai pral tire menshende.

Debleskri gili 50:5

“Anenn mange mire menshen khetne, kai mantsa win kran, te wap me lengro Dewel, un mange viechen anan.”

Debleskri gili 62:10

I menshe hi tchi har i ducho. Tikne har bare hi tchi moldo. Te wans le ap i waga tchiddo, wans le lauter khetne lino gar phareder har i ducho.

Debleskri gili 99:4

Tuke hi bari soor. Tu hal o baro rai, kai kamell o tchatchepen o djijestar. Tu penal, hoi tchatcho hi, un tchiwal o tchatchepen pre an o them Israel, te djan i tchatchepangre mursha pal o tchatchepen.

Gosewe laba 3:6

Rike tut ap o baro Debleste, hoi tu ninna kreh! Un job krell tiro drom tchatcho glan tute.

Gosewe laba 8:20

Kote, kai i menshe ap o tchatcho drom djan, un an o tchatchepen tardo hi, kote hom me ninna,

Jesaja 28:17

An miro kheer djiwell o tchatchepen, un mire menshende dau tchatchepaskre laba. Sorelo brishin, kai brishineskre barra dren hi, dell palle o chochepen paash, ap koleste tumen rikrenn. Un panja hidjrenn tumaro khatepen krik.

Jesaja 30:18

Doleske dikell o baro Dewel ap ko diwes, kai nai well lo tumenge pale latches, un te nai krell lo peskro dji tumenge pre. O baro Dewel hi i Dewel, kai hako tsiro o tchatchepen krell. Bachtelo hi hakeno, kai ap leste dikell.

Jesaja 5:16

O baro Dewel, ko rai pral o bolepen un i phub sikrell peskri soor, un krell, hoi tchatcho hi. O tchatcho Dewel sikrell, te hi lo kokres o Dewel, kai rakrell o tchatchepen win.

Jesaja 54:10

I berge nai djan ap i rig, un i tikne berge nai perenn khetne, miro latchepen, kowa djal gar tutar, un kowa, hoi win kram, te ham mer mala, atchell tardo. Kowa penau me, o baro Dewel, kai peskro dji tuke pre kras.

Jesaja 55:3

Shunenn mishto, hoi penau, un awenn pash mande! Shunenn ap mande, te atchenn djido! Un me kamau tumentsa win te krell, te atchas mer mala hako tsireske. Ko latcho koowa, hoi o Davideske penom, well ap tumende.

Jesaja 56:1

Kawa penell o baro Dewel: Djiwenn pal mire tchatchepaskre laba, un krenn, hoi tchatcho hi! Sik well ko diwes, kai lau tumen dran o tchilatchepen win, un tchiwau tumen an o tchatchepen.

Jesaja 66:22

Tumare tchawe un tumaro lab atchenn glan mande, jaake rah har o newo bolepen un i newi phub, hoi me krau, glan mande atchenna, penell o baro Dewel.

Jeremia 32:40

Un me krau lentsa win, te mukap gar tele, te krap lenge latchepen, un te dap len i dji, hoi ap mande shunell, un mukell man gar. Kau lab, hoi lentsa win krau, atchell hako tsireske.

Jeremia 9:24

Shunenn, penell o baro Dewel, ko tsiro well, kai dau hakenes i phagi, kai tchinlo hi ap peskro mass, un djiwell, har te wals lo gar tchinlo:

Ezekiel 16:60

Ninna te rikral tiro lab gar, bistrau me kowa gar, hoi tuha win krom, har hals terno. Un me krau tuha pale newes win, te wap tiro Dewel. Un kowa, hoi tuha newes win krau, atchell hako tsireske.

Ezekiel 34:25

Un me pandau miro dji ap lende, un krau lentsa win, te nai djiwenn le an o latchepen. Hake diwje viechen tradau krik dran o them. Un an o mulo them nai djiwenn le kek darjah. Un an i wesha sowenn le.

Maleachi 1:13

Un tumer penenn: ‘Dikenn, hawi budi hi men koleha! Ko well menge dran o nak win.’ Tumer anenn mange viechen, kai hi tchoredo, bango un nasselo. Penap me koi pre: ‘Kowa hi shukar, hoi tumer mange krenn’, penell o baro Dewel.

Mateo 23:13

Tumer tchatchepangre un Farisarja! Kowa, hoi tumer krenna, ko hi gar mishto. Tumaro patsepen ap o Debleste hi chochepen! Tumer krenn o wudar pandlo, te well kek ap o Debleskro drom. Tumer djan gar koi dren. Witar gar mukenn i wawaren dren te djal.

2. Tessalonikarja 3:5

Maro rajestar, o Jesusestar, mangah, te krell lo tumare djia pre, te dikenn tumer, har baro o Debleskro kamlepen tumenge hi. Un lestar mangah ninna, te denn tumaro patsepen gar pre, ninna te well tumaro djipen pharo, jaake har o Jesus Kristo gar pre das.