Jesaja 51:11 - O Debleskro Drom 2021 (Sinte)

¹¹ Kolen o baro Dewel dran o pandepen win las, wenn pale khere, un wenn o gipah pash i berga Zion. Lengri bacht lell kek lendar. Lengre djia giwenn un bashrenn i bachtjatar. Un duk un ropen dell gar buder.

O Debleskro Lab 2024 (Sinte-Manouche)

¹¹ Kolen o baro Devel dran o pandepen vin las, venn pale khere, oun venn o gipah pash i berga Sion. Lengri barht lell kek lendar. Lengre djia givenn oun bashrenn i barhtyatar. Oun douk oun ropen dell gar bouder.

Jesaja 51:11 ပူးပေါင်းရင်းမြစ်များ

Debleskri gili 126:2

Kote sanas maro mui, un mari tchip das gole i bachtjatar, un pash i tsele wawar menshende penan le: “O baro Dewel kras baro koowa ap lende.”

Debleskri gili 126:5

Koon ropah o djob an i phub witsrella, kowa dell gole i bachtjatar ap ko diwes, kai lell lo o djob dren.

Jesaja 11:15

Un o baro Dewel mukell i kotar o baro panjestar pash o them Egiptia truk te well. Un leskro wast mukell i sorelo tato ducho pral o pani Eufrat te djal, te atchenn lestar kokres efta tikne panja pral, hoi nashenn, jaake te nai djan le pengre kirchentsa koi wergel.

Jesaja 25:8

O merepen lell lo krik hako tsireske. O baro Dewel, maro rai, khossell palle hakeneske i swa tele. Un koi ladj, hoi ap peskre menshende tchiddo hi an hake themma, lell lo lendar krik. Kowa penas o baro Dewel.

Jesaja 35:10

Kolen, kai job dran o pandepen win las, wenn pale khere, un wenn o gipah pash i berga Zion. Lengri bacht lell kek lendar. Lengre djia giwenn un bashrenn i bachtjatar. Un duk un ropen dell gar buder.

Jesaja 44:23

Tu bolepen, gib kolestar, hoi o baro Dewel kras! Tu telstunepen i phubjatar, de gole i bachtjatar! Tumer berge, giwenn! Tu weesh tire tsele rukentsa, gib! O baro Dewel las o Jakobes dran o merepen win, un o Israel sharell les.

Jesaja 48:20

Djan win dran Babilon! Sik, nashenn dran o them Kaldea! Denn win gole i bachtjatar, un penenn kawa dureder, jaake te shunenn le kowa ap i tseli phub. Penenn: O baro Dewel las peskro budepaskres, o Jakobes, win dran o pandepen!

Jesaja 49:13

De gole i bachtjatar, tu bolepen! Ab bachtelo, tu phub! Giwenn, tumer berge! O baro Dewel khossas i swa peskre menshendar tele, un kras peskro dji kolenge pre, kai tele rikedo wan.

Jesaja 55:12

Tumer djan bachteles win an o latchepen, un kek rikrell tumen pre. I bare un i tikne berge denn gole i bachtjatar, te dikenn le tumen. Un i ruka an o weesh denn an pengre wasta.

Jesaja 61:7

Tumer hidjran bari ladj un praassepen, doleske lenn tumer kanna i baro them un i bacht, hoi atchella hako tsireske.

Jesaja 65:14

An ko tsiro, kai denn tumer gole darjatar, un rowenn dran i phagedo dji, hi mire budepangre jaake bachtelo, te giwenn le i bachtjatar.

Jesaja 65:19

Me ninna, wau bachtelo pral Jerusalem, un miro dji giwell pral mire menshende. Ropen well kote buder gar shunlo, witar gar dell jek gole i darjatar.

Jeremia 31:13

I terne tcha giwenn un khelenn, awa, i terne un i phure hi khetne bachtelo; lengro ropastar well sapen. Lengre djia, kai rowan, krau pale sorelo un bachtelo.

Jeremia 33:11

kote well pale sapen shunlo un bachteli gole. O pirno un leskri pirni, kai i bijab krenn, giwenn pale. Un wawar anenn viechen an miro kheer, te parkrenn le pen pash mande, un giwenn koi pashel: Parkrenn tumen pash o baro Debleste, ko rajeste pral o bolepen un i phub; job hi kamles ap mende. Hako tsiro hi leskro latchepen menge koi. Me krau te djal kau themeske pale jaake mishto, har leske glan kowa djas.

2. Tessalonikarja 2:16

O Dewel hi maro dad un kamell men o djijestar. Job hi menge latcho, un penell menge an o dji, te kras lo lauter menge mishto, un te lell lo men pash peste hako tsireske. Lestar mangah un maro rajestar, o Jesus Kristestar,

Judas 1:24

Maro Debles hi i soor, te rikrell lo tumen ap leskro drom, te hatsell lo kek doosh ap tumende ap ko diwes, kai han glan leste tardo, un dikenn leskro railepen, un han bachteles.

Debleskro tsiro 21:1

Un me dikom i newo bolepen un i newi phub. O phuro bolepen un i phuri phub his buder gar koi. Un o baro pani his buder gar koi.

Debleskro tsiro 21:4

Un job khossella hake swa ap lengre jaka tele. Un o merepen dell gar buder, witar kek bibacht, kek ropen un kek duka. Kowa hoi his, dell gar buder.

Debleskro tsiro 22:3

Kanna dell tchi buder, hoi hi glan o Debleste praassedo. Un o beshepaskro o Deblestar un o terno bakrestar hi an o foro tardo. Un leskre budepangre hi leske koi,

Debleskro tsiro 7:17

O terno bakro, hoi mashkral o Debleskro beshepaskro hi, kowa dell jak ap lende, har i bakrengro rai ap peskre bakre jak della, un anell len pash o pani, hoi o djipen della. Un o Dewel khossell hake swa ap lengre jaka tele.