Jesaja 5:20 - O Debleskro Drom 2021 (Sinte)

²⁰ Djungelo djal kolenge, kai penenn ap o tchilatchepen ‘kowa hi latcho’, un ap o latchepen ‘kowa hi tchilatcho’. I rati kharenn le ‘diwes’, un o diwes kharenn le ‘rati’. Shutlo koowa hi lenge gudlo, un gudlo koowa hi lenge shutlo.

O Debleskro Lab 2024 (Sinte-Manouche)

²⁰ Djungelo djal kolenge, kay penenn ap o čilačepen kova hi lačo, oun ap o lačepen kova hi čilačo. I rati kharenn le dives, oun o dives kharenn le rati. Shoutlo koova hi lenge goudlo, oun goudlo koova hi lenge shoutlo.

Jesaja 5:20 ပူးပေါင်းရင်းမြစ်များ

Hiob 17:12

Te hi rati, penenn le, te wals diwes. Te well tamlo, penenn le, te wals o diwes sik.

2. Mose 23:7

Ma shun ap kolende, hoi anenn chochepen pre ap i wawareste! Ma pen, te well kowa temerl dino, kai kek tchilatcho koowa kras un kai an o tchatchepen tardo hi. Miri phagi well ap koleste, kai sawo tchilatcho koowa krella.

Gosewe laba 17:15

Kowa hi dui kope i djungelo koowa glan o baro Debleskre jaka: te rakrell jek koles tchatches, kai doosh ap peste las, un ninna, te tchiwell jek doosh ap koleste, kai o tchatchepen kras.

Gosewe laba 4:17

Lengro tchilatcho koowa hi lengro chapen, hoi krell len tchalo. Jon djan i sorjah ap i wawarende pre. Un kowa hi lenge shukar har te pijenn le mool.

Jesaja 24:9

Kek giwell buder pash o pipen, un shutlo hi i mool kolenge, kai pijenn.

Jesaja 29:21

kolla, kai chochepah doosh ap i wawarende anan, un chochenn i tchatchepangre murshen, un anenn len pengre chochene labentsa jaake dur, te denn le kek tchatchepen koleste, kai kek doosh ap leste hi.

Jesaja 30:10

Ap i dikepangre penenn le: “Ma dikenn i dikepen.” Un ap o Debleskre rakepangre penenn le: “Ma penenn menge, hoi o Dewel tumende sikras un hoi tchatcho hi! Penenn menge kowa, hoi pes menge shukar an-shunell! Un sikrenn men sau koowa, har mari djia les kamenn.

Jesaja 32:5

I dinelo well gar buder kharedo ‘baro mursh’, witar gar well ap i chocheno penlo ‘tchatchepaskro mursh’.

Ezekiel 13:19

Tumaro durkepah anenn tumer ladj ap mande glan mire menshende, te lenn i wast pherdo djob un i kotar maro. Mire menshenge penenn tumer chochene laba. Un jon kamenn te shunell ap chochepen. Tumaro chochepah anenn tumer sawe menshen an o merepen, kai hunte merans gar, un krenn, te atchenn sawe djido, kai hunte merans.

Amos 5:7

Bibacht ap tumende, tumer rissrenn o tchatchepaskre laba, un stakrenn ap o tchatchepen trujel!

Micha 3:2

O latchepen kamenn tumer gar! O tchilatchepen, kowa kamenn te krell. Mire menshentsa djan tumer trujel, har te wans le marede vieche, kolenge i hauta tele tserdedo well, un o mass tele tchinlo fun lengre kokale, un i kokale phagedo, un palle o mass an i piri tchinlo un keredo. Jaake chan tumer mire menshen.

Habakuk 1:4

O tchatchepen nashrell peskri soor, un well buder gar win rakedo. Kowa hoi i tchatchepangre mursha penenn, dell i tchilatchenge tchatcho un gar i latchenge. Jaake well dran o tchatchepen chochepen.

Maleachi 2:17

Tumer choirenn o baro Debles tumaro rakepah! Tumer penenna: ‘Har choiram mer les?’ Tumaro rakepen hi: ‘An o baro Debleskre jaka hi i tchilatche latcho. Job kamell len.’ Tumer penenn ninna: ‘Kai hi o Dewel, kai men i phagi della?’

Maleachi 3:15

Doleske sharas mer kolen, kai phurdenn pen pre pral o baro Debleste. Kol tchilatchenge djal mishto. Ninna te krenn le, hoi o Dewel gar kamell, krell lo lenge tchi. Kek bibacht well pral lende.’

Louka 16:15

Koi penas o Jesus ap lende: “Glan i menshengre jaka kamenn tumer latcho te well. O Dewel prindjrell tumaro dji. Hoi pash i menshende bud molella, hi tchi moldo an o Debleskre jaka.

5. Mose 25:1

Te well i tchingepen mashkral mursha pre, un jon glan tchatchepangre murshende stakrenn, un o tchatchepen well win kerdo, palle well pral koleste, kai an o tchatchepen his, glan halauterende win rakedo, te hi job an o tchatchepen. Un pral koleste, koles doosh his, well glan halauterende win rakedo, te hi les doosh.

2. Petro 2:1

Glan i rah tsiro his chochene rakepangre an o them Israel, kai kran, har te bitchras len o Dewel. Jaake wenna ninna mashkral tumende chochene sikepangre, kai sikrenn tumen i chocheno drom, kai anell tumen krik o Deblestar. Kol sikepangre denn o Jesuses, maro rajes, buchoste, kai plaissras peskro rateha lenge, te lell lo len dran o tchilatchepen win. Jon nashenn an pengri bibacht.