Jesaja 4:4 - O Debleskro Drom 2021 (Sinte)

⁴ Kowa wella, te thowell o Dewel i tchik tele i menshendar, kai djiwenn an Zion, un lell koi phari doosh krik dran Jerusalem. Te krell lo kowa, hi kowa har i jag, hoi chatchell ko tselo djungelo koowa krik.

O Debleskro Lab 2024 (Sinte-Manouche)

⁴ Kova vella, te thovell o Devel i čik tele i menshendar, kay djivenn an Sion, oun lell koy phari doosh krik dran Yerusalem. Te krell lo kova, hi kova har i yag, hoy rhačell ko tselo djoungelo koova krik.

Jesaja 4:4 ပူးပေါင်းရင်းမြစ်များ

Debleskri gili 51:2

har o Debleskro rakepaskro Natan pash leste was, pal kowa o David i wawareskri romjat, i Batsheba, las.

Kamlepaskri gili 3:11

Tumer tcha dran o foro Jerusalem, awenn win! Tumer tcha dran Zion dikenn o baro rajes, o Salomes! Dikenn leskri rajeskri stadi, hoi leskri dai leske ap o shero tchiwas, ap ko diwes, kai lo romedineras, un leskro dji i bachtjatar bashras.

Jesaja 1:15

Un te hadenn tumer tumare wasta pre, te mangenn man an, palle tchakrau me mire jaka tele, te dikap tumen gar. Un ninna te mangenn mandar pale te pale, me shunau tumen gar: Tumare wasta hi pherdo rat.

Jesaja 1:25

Jerusalem, miro wast hadau ap tute, te dap tut, te chatchap i tchik tutar win, har kowa o rupeha kerdo well, jaake te atchell o latcho rup pale.

Jesaja 1:31

Un ko mursh, hoi sorelo his har i ruk, well har mulo kasht. Un ko sorelo koowa, hoi lo kras, well har i jag, hoi ko mulo kasht pre chatchell. Jaake djal lauter an i jag pre, un kek nai krell koi jag win.

Jesaja 27:9

Jaake well o Israelengri doosh krik lino. Un ap kowa sikrell pes, te hi lengri doosh krik lino: Te denn le i pre-tchidde barra jaake khetne, kai mangan le i wawar deblen an, te atchell tchi har tchik. Un te mukenn le kek figure tardo, hoi sikrenn i debletsa Ashera, witar kek boba, kai lake sungepaskro koowa chatchedo was.

Jesaja 28:6

Un i tchatchepangre rajende dell lo o tchatchepen an o dji, te nai rakrenn le tchatchepah o tchatchepen win. Un kol kurepangren dell lo i soor, te nai tradenn le i lurden dran wawar themma pale dran o foro win.

Jesaja 9:19

Un lengri bok hi jaake baro, te taprenn le pal chapen ap hake rigja, un chan hako tikno kotar, un wenn gar tchalo. Hakeno krell o djipen o wawarestar paash.

Jesaja 9:5

I ternepen was menge boldo, i mursh tchawo was men dino. Kowa well i baro rai, un kharell: latcho rakepaskro, sorelo Dewel, dad-hako-tsireske, rai-kai-lell-o-kurepen-krik.

Jeremia 9:6

Doleske penell o baro Dewel, ko rai pral o bolepen un i phub: Har o rup an i jag djudjes kerdo well, jaake kamau mire menshen dukentsa djudjes te krell. Dell tchi wawares, hoi krap me nai mire menshenge.

Ropaskre gilja 1:9

Lakro ripen hi pherdo tchik. Un joi patsas gar kai lake jaake djala. Dur tele peras li, un kek hi lake koi, kai penell lake i kamlo lab. “Dik, baro Dewel, har djungeles mange djala, un kolla, kai man khetne dan, krenn pen bares.”

Ezekiel 22:15

Me tradau tumen an wawar themma, mank wawar menshende. Un lau o tselo pale-tchiddo koowa dran tumaro foro win.

Ezekiel 36:25

Me witsrau djudjo pani ap tumende, te wenn djudjo halauterestar, hoi kras tumen pale-tchiddo. Ko tselo tchilatchepen, hoi ap tumende anan, har mangan i chochene deblen an, thowau tumendar tele.

Ezekiel 36:29

Un me lau tumen win dran ko tselo koowa, hoi kras tumen pale-tchiddo. Un o djob mukau pale bares un bud te well, un mukau buder kek bok pral tumende te well.

Zefanja 3:1

Djungeles djal ko foreske, kai hadas pes pral o baro Debleste, ko foreske, an koleste tchilatchepen un marepen hi!

Zakarie 13:1

“An ko tsiro nashell i pani an o foro Jerusalem, hoi nashell i menshenge dran o kheer David un i wawar menshenge an Jerusalem, te thowell lo lengri doosh un kowa krik, hoi kras len pale-tchiddo glan mire jaka”, penell o baro Dewel.

Zakarie 13:9

Un kolenge, kai pral atchenn, wenn phare tsirja, kai hunte djan le dren, te wenn le djudjo kerdo, jaake har rup un sonakai djudjo kerdo well an i jag. Palle denn le ap mande gole, un me shunau len. Me penau: ‘Jon hi mire menshe.’ Un jon penenn: ‘Tu baro Dewel, hal maro Dewel.’”

Mateo 23:37

Tumer menshe an o foro Jerusalem! Tumer maran o Debleskre rakepangren, un dan kolen i barrentsa mulo, kai o Dewel pash tumende bitchras. Bud kope kamom tumen pash mande te lell, te dap garda ap tumende, har i kachni ap peskre terne garda della, un lell len tel peskre phora. Un tumer kaman gar.