Jesaja 26:10 - O Debleskro Drom 2021 (Sinte)

¹⁰ Te kreh latchepen i tchilatchenge, dikenn jon gar, hoi tchatchepen hi. Ninna an o them, kai djan halauter pengre dromma pal o tchatchepen, djan i tchilatche dureder ap pengre bange dromma, un dikenn gar tiro barepen, baro Dewel.

O Debleskro Lab 2024 (Sinte-Manouche)

¹⁰ Te kreh lačepen i čilačenge, dikenn yon gar, hoy čačepen hi. Ninna an o them, kay djan halauter pengre dromma pal o čačepen, djan i čilače doureder ap pengre bange dromma, oun dikenn gar tiro barepen, baro Devel.

Jesaja 26:10 ပူးပေါင်းရင်းမြစ်များ

2. Rajengro liil 13:6

Ninna te dikan le, hoi o baro Dewel lauter lenge kras, mukan le gar tele ko tchilatcho dromestar, kai o kheer Jerobeam len pre anas, un mangan dureder i wawar deblen an. Ninna mukan le koi kashteni debletsa, i Ashera, an o foro Samaria tardo.

Debleskri gili 106:43

Bud kope las lo len dran lengre wasta win. Un pale te pale kran le kowa, hoi choiras les, un mukan gar tele pengro tchilatcho koowa, un wan bud un budeder koi dren.

Debleskri gili 143:10

Sike mange, hoi tuke shukar hi, te krap me, tu hal miro Dewel. Tiro latcho ducho mu sikrell man o tchatcho drom.

Debleskri gili 69:27

Jon lenn koles palla, koles tu dal, un lenge hi shukar, te rakrenn le pral i duka un dawa, hoi tu les dal.

2. Mose 8:15

Kote penan i durkepangre ap o Farao: “Kawa hi o Debleskro wast!” Ninna kanna rikras o Farao peskro dji pandlo un shunas gar ap lende. Jaake was, hoi o baro Dewel penas.

2. Mose 9:30

Tu un tire pralstune, kowa haiwom, tumer darenna gomme gar o baro Deblestar.”

2. Mose 9:34

Har o Farao dikas, te heras kowa lauter pre, kras lo gar, hoi o baro Dewel lestar kamella, un pandas pale peskro dji. Un jaake kran ninna i pralstune an leskro them.

Gosewe laba 1:32

Kolen tchi an o shero hi, kolla rissrenn o Debleske o dumo; un kowa anell lenge o merepen. Un lengro pre-phurdepen marell len.

Sikepaskro 3:16

Ninna dikom ap i phub, kote kai hunte rakrans i tchatchepangre o tchatchepen, his o tchilatchepen o rai. Un kote, kai hunte djans le pal o tchatchepen, rakran le chochepah.

Sikepaskro 8:11

Ko mensho, kai kras tchilatcho koowa, lell gar sik pal kowa peskri phagi. Doleske rikrenn pen i menshe gar pale, te krenn le pengro djungelo koowa dureder.

Jesaja 1:21

Har nai was kowa? Kau foro, hoi rikras pes ap mande peskro tselo djijeha, was har i lubni! O foro his pherdo tchatchepen, un i menshe djiwan pal o Debleskre tchatchepaskre laba. Un kanna djiwenn kate lauter marepangre, kai wawaren mulo denn!

Jesaja 2:10

Dja mank i bare barra, un khate tut an i tchik, i darjatar o baro Deblestar un glan leskro railo barepen.

Jesaja 24:5

I menshe ap i phub mukan o Debleskro drom, un rikran pen gar ap leskre laba, un djiwan gar jaake, har lo lentsa win kras, un hoi hako tsireske tchatcho hi. Jaake kran le i phub pale-tchiddo.

Jesaja 27:13

Un ap ko diwes well an i bari phurdepaskri phurdedo. Un i Israelitarja, kai his nashedo an o them Assur, un kai his win tradedo an o them Egiptia, kolla lauter wenna un mangenn o baro Debles an ap o Debleskri berga an o foro Jerusalem.

Jesaja 32:6

Ko dinelo mensho rakrell dinlepen. Un an leskro dji hi djunglepen. Job rakrell dui tchipjentsa, un kowa, hoi lo pral o baro Debleste penell, hi gar tchatcho. Kolen, kai bokenna, dell lo tchi te chal, un kolen, kai trush hi, mukell lo gar te pijell.

Jesaja 32:7

O chocheno djal chochene dromma. Tchilatcho koowa lell lo peske glan, un leskro chochepah anell lo doosh ap i tchorwelende, ninna te hi kolla an o tchatchepen.

Jesaja 5:12

Jon mukenn penge mishto te djal un krenn bashepen ap dorjengre bashepangre un phurdepangre un wawar bashepangre. Un mool hi ninna pashel. Ap kowa, hoi o baro Dewel krell, dikenn le gar. Kolestar kamenn le tchi te djinell.

Jeremia 2:7

Un me anom tumen an i latcho them, kai bud chapen hi, te chan ko tselo latcho koowa, hoi kote baro wella. Un har tumer an ko them djan, kran les tumer pale-tchiddo. Un miro them was djungeles glan mire jaka.

Jeremia 31:23

Kowa penell o baro Dewel, ko rai pral o bolepen un i phub, kai o Israeleskro Dewel hi: “An ko tsiro, kai anau len pale dran kol themma, kai jon pandle his, penenn i menshe dran i forja an o them Juda: O baro Dewel mu tchiwell peskri bacht ap tute, tu them, kai o tchatchepen khere hi, un o Dewel ap peskri berga djiwell.

Hosea 11:7

Mire menshe atchenna krik mandar, un kamenn gar pash mande te well. Ninna te wenn le pash mande, o pralstuneste, hadenn le man gar.

Hosea 13:6

Un har dom len te chal, un jon tchalo wan un len doha his, phurdan le pen pre, un bistran man.

Hosea 9:3

Tumer atchenn gar an o them, hoi o baro Dewel tumen das. I menshe dran o them Efrajim hunte djan pale an o them Egiptia, ninna an o them Assur. Kote hunte chan le sawo koowa, hoi pale-tchiddo hi.

Micha 2:10

Stenn pre, djan tumenge! An kau them nai atchenn tumer gar! Tumer kran les pale-tchiddo. Kate atchell kek bar ap o wawar.

Mateo 4:5

Pal kowa anas les o beng an o Debleskro foro. Kowa hi o foro Jerusalem. Un o beng tchiwas les ap o Debleskro baro kheer pral pre,

5. Mose 32:15

O Jeshurun djiwas i shukar djipen, his tchalo un brawelo. Har was lo pesso, phurdas lo pes pre. Un mukas o Debles, kai les kras, un witsras les ap i rig. Leskro sorelo rikepaskro his leske tchi moldo.

Debleskro tsiro 2:21

Me dom lat tsiro, te nai mukell li peskro tchilatcho drom. Un joi kamell gar peskro djungelo koowa te mukell.

1. Samuel 15:17

Un o Samuel penas: “Hi gar jaake? Har hals tikno an tire jaka, wal tu o pralstuno pral o Israel. O baro Dewel kras, te wal o baro rai pral i deesh-te-dui bare familje, kai wenna o Israeleskre deesh-te-dui mursh tchawendar.