Jesaja 23:3 - O Debleskro Drom 2021 (Sinte)

³ te ginenn le o djob un o gib, hoi an i tala Shihor pash o pani Nil bares was. Pral o baro pani anan le kowa pash tumende. O foro Sidon was i parepangro foro i menshenge dran bud themma.

O Debleskro Lab 2024 (Sinte-Manouche)

³ te ginenn le o djob oun o gib, hoy an i tala Shihor pash o pani Nil bares vas. Pral o baro pani anan le kova pash t'mende. O foro Sidon vas i parepangro foro i menshenge dran boud themma.

Jesaja 23:3 ပူးပေါင်းရင်းမြစ်များ

1. Familjakro liil 13:5

Jaake mukas o David i tsele Israelitarjen khetne gole te dell, kotar, kai o pani Sihor hi an o them Egiptia, bis kotar, kai djal pash o foro Lebo-Hamat, te lenn le ko mochton o deesh labentsa o Deblestar dran o foro Kirjat-Jearim.

Jesaja 19:7

Ninna o senlepen pash o pani merell tele, un o djobeskro them, hoi pash leste tchiddo hi, well truk. Un i ducho hidjrell o djob krik un hi gar buder.

Jesaja 23:8

Koon penas, te well kowa pral o foro Tirus? Ko foro, hoi jaake sorelo his, te tchiwas lo raja dren pral wawar themma. Leskre parepangre his har rajengre tchawe, un leskre bikepangre his mank i pralstunende ap i tseli phub.

Jesaja 32:20

har bachtele nai wenn tumer, kai nai witsrenn tumaro djob win pash hake panja, un nai mukenn tumare grumja un burike kote djan un chan, kai le kamenn.

Jeremia 2:18

Hoi hi tut kolestar, te djah an o them Egiptia, un kameh koi dran o pani Nil te pijell? Un hoi hi tut kolestar, te djah tu an o them Assur un kameh dran o pani Eufrat te pijell?

Ezekiel 27:33

Har tire parepangre pral o baro pani djan, un an bud themma o brawlepen anan, kral tu koweha, hoi tut o parepaske his i raja ap i phub braweles.

Ezekiel 28:4

Tiro goswepah un ko koweha, hoi tu halauter djineh, anal tuke ko tselo brawlepen khetne. Tiro brawleskro kheer hi pherdo sonakai un rup.

Joel 3:5

An ko tsiro well jaake: Koon o baro Debleskro lab an-gole dell, kowa well win lino dran o merepen. Ap i berga Zion un an o foro Jerusalem nai well lenge kek tchilatchepen, jaake har o baro Dewel penas. Un mank kolende, kai djido atchan, hi kolla, kolen o baro Dewel peske win rodas.

5. Mose 11:10

Kau them an kowa tumer wenna, te lenn les tumenge dren, hi gar har ko them Egiptia, dran koleste tumer win djan. Kote hunte budran phares te anenn o pani ap tumari hachetikri phub.

Josua 13:3

un ko them, kai i Kanaanitarja djiwenn, mank o pani Shihor, hoi glan o them Egiptia nashell, un o foro Ekron, kai kote tchiddo hi, kai norden hi; un kol pantch forja, pral kolende pantch Filistarja i raja hi: Gaza, Ashdod, Ashkelon, Gat un Ekron; koi pashel ko them, kote kai o kham pralstunes hi, un kai i Awarja djiwenn;