Jesaja 13:11 - O Debleskro Drom 2021 (Sinte)

¹¹ O baro Dewel penell: Me anau bibacht ap i phub, un mukau o tselo tchilatchepen, hoi i tchilatche kran, ap lende pale te well. I pre-phurden hi buder tchi, koleha nai sharenn le pen. Un me krau kol pre-phurden tikno, kai rikran pengri sorjah kolen tele, kai len kek soor hi.

O Debleskro Lab 2024 (Sinte-Manouche)

¹¹ O baro Devel penell: Me anau bibarht ap i phoub, oun moukau o tselo čilačepen, hoy i čilače kran, ap lende pale te vell. I pre-phourden hi bouder či, koleha nay sharenn le pen. Oun me krau kol pre-phourden tikno, kay rikran pengri zoryah kolen tele, kay len kek zoor hi.

Jesaja 13:11 ပူးပေါင်းရင်းမြစ်များ

Hiob 40:12

Awa, dik ap kol pre-phurde, un kre len tiknes! Un stake i tchilatchen ap jek kopo khetne!

Gosewe laba 11:31

Djiness, i latcho mensheske ap kai phub well o latchepen pale dino, hoi lo kras. Har bud budeder well palle o tchilatchepen pale dino kolenge, kai o tchilatchepen kran un o Debleskro drom mukan.

Gosewe laba 8:13

Kowa, kai kamell o baro Debleha te djiwell, kowa kamell o tchilatchepen gar glan peskre jaka te dikell, kowa dikell gar tele ap o wawareste un phurdell pes gar pre, kowa djal gar i tchilatcho drom, un rakrell kek chochepen.

Jesaja 11:4

Na-a, job dell i tchorwelende pengro tchatchepen, un well kolenge ap i rig, kai gar an-dikle hi, te lenn jon pengro tchatchepen. Penell lo i sorelo lab, palle lenn i marepangre pengri phagi. Les hi i soor, te penell ap o tchilatcheste: “Tu hunte meress!”

Jesaja 14:21

Tire mursh tchawe hunte merenn! Awenn un denn len mulo! Jon hunte merenn ko tchilatchepaske, hoi lengre phure kran, te nai hadenn le pen gar buder, un lenn i phub penge dren un krenn penge forja koi pre.

Jesaja 14:5

O baro Dewel phagas tiro kasht, tu tchilatcho, awa, o rajeskro kasht phagas lo an kotja.

Jesaja 2:11

Hakeno, kai dikell tele ap o wawareste, hunte dikell tele glan peste i ladjatar. Un i pre-phurde menshe wenn phagedo. Ap ko diwes hi kokres o baro Dewel baro.

Jesaja 2:12

Leskro diwes wella, ko diwes o baro Deblestar, ko rajestar pral o bolepen un i phub. Ap ko diwes well hako pre-phurdo tiknes kerdo, ninna hakeno, kai hadas pes, hakeno kai kras pes bares.

Jesaja 2:17

Palle well lenge kowa krik lino, koleha i menshe phurdan pen pre. Un lengro sharepen atchell gar. Ap ko diwes hi kokres o baro Dewel o Dewel pral halauter.

Jesaja 22:14

Ap mande penas o baro Dewel, ko rai pral o bolepen un i phub: “Kaja doosh well lendar gar krik lino jaake rah har djiwenn le.”

Jesaja 23:9

O baro Dewel, ko rai pral o bolepen un i phub penas, te well kowa jaake. Job kamas lenge ko tselo railepen krik te lell, koleha jon pen jaake bares kran, un kamas i an-dikle murshen ap i phub tiknes te krell.

Jesaja 24:21

Un ap ko diwes dell o baro Dewel i bolepangre lurden lengri phagi, un ninna i bare rajen ap i phub.

Jesaja 25:3

Doleske sharenn tut i menshe an sorele themma. Un i menshe an forja, kai lengre pralstune i sorjah ap lende djan, mangenn tut an.

Jesaja 25:5

un har o kham an o tato tsiro, hoi lauter chatchrell. Tu kral, te hunte mukan le mendar tele, kolla, kai wan dran wawar themma, un djan diwjes ap mende pre. Jaake har djal o tatepen krik, te wenn wolke glan o kham, jaake lal lendar lengro gipen krik, hoi giwan le pral ko baro koowa, hoi le kran.

Jesaja 26:21

O baro Dewel well dran peskro kheer win, te anell lo o tchilatchepen pale ap i sherja kolendar, kai o tchilatchepen kran. Palle well o rat kolendar diklo, kai maredo wan. Un i phub khatrell len buder gar.

Jesaja 29:20

Sorele raja, kai i wawaren tele rikran, nashrenn pengri soor. Un i pre-phurde hi buder gar koi. Un maredo wenn halauter, kai kaman i bibacht pral i wawarende te anell,

Jesaja 29:5

Ap jek kopo wenn kol bud bud lurde, kai ap tumende djan, krik phurdedo har i stauba. Un kol sorele kurepangre hi har o phuss, hoi krik phurdedo well un buder gar koi hi. Jaake sik, har jek i jakentsa dell,

Jesaja 3:11

Ap i tchilatchende well bibacht. Lenge djal gar mishto. Ap lengro shero well ko tchilatchepen pale, hoi le kran.

Jesaja 5:15

Un jaake well o mensho tikno, un hunte dikell dren, te hi lo tchi. Un kolla, kai dikan tele ap i wawarende, hunte tchiwenn pengre jaka tele pherdi ladj.

Jesaja 65:7

Ko tchilatcho koowa, hoi jon kran, un ko tchilatcho koowa, hoi lengre phure kran, penell o baro Dewel. Jon chatchran ap i berge wawar deblenge sungepaskro koowa, un koleha anan le ladj ap mande. Jaake dau me kowa ap lengre sherja pale, kowa lauter, hoi kran le ninna an i phure tsirja.

Jeremia 48:29

An hako tsiro was penlo pral o them Moab, har pre-phurdo job hi, un hawo sharedo job hi, har rikrell lo bud pestar, hawo baro mujeskro job hi, un har dikell lo tele ap i wawarende!

Daniel 4:34

Me, o Nebukadnezar parkrau man pash o bolepaskro rajeste un hadau les un sharau les. Lauter, hoi job krell un kras, hi mishto. Un leskre dromma hi tchatcho. Un kolen, kai pen bares krenn, nai krell lo tiknes.”

Habakuk 2:4

Kawa hi, hoi hunte tchiness pre: Kones i pre-phurdo un i chocheno dji hi, kowa nashrell peskro djipen. Koon an o tchatchepen tardo hi, kowa djiwell dran peskro patsepen ap mande.