Jesaja 10:5 - O Debleskro Drom 2021 (Sinte)

⁵ Hawi bibacht well ap i menshende an o them Assur! Har homs chojedo ap o Israel, his i Assirja har i kasht an miro wast, koleha i Israelitarjen dom.

O Debleskro Lab 2024 (Sinte-Manouche)

⁵ Havi bibarht vell ap i menshende an o them Assour! Har homs rhoyedo ap o Israel, his i Assirya har i kasht an miro vast, koleha i Israelitaryen dom.

Jesaja 10:5 ပူးပေါင်းရင်းမြစ်များ

1. Mose 10:11

Kotar djas job an o them Assur un kras i forja Ninive, Rechobot-Ir, Kelach

2. Rajengro liil 18:25

Patseh, kai djoms me kokres mandar kai pral, te marap halauteren, kai kate djiwenn? Na-a, o baro Dewel penas les mange: Dja pral an kau them un mare halauteren!”

2. Rajengro liil 19:25

Shun un muk tuke te penell: Kowa was jaake har me kamom. Glan i rah tsiro his jaake an miro shero. Kanna mukom te djal, kai tu wal, un sorele forja paash dal. Un kokres lengre barra pral atchan.

Debleskri gili 125:3

I tchilatche atchenn gar i raja pral o them kolendar, kai an o tchatchepen tardo hi. Te wals jaake, nai krans kolla ninna o tchilatchepen.

Debleskri gili 17:14

Baro Dewel, tiro wasteha le man win dran o wast kol menshendar, kai djiwenn i phubjake. Lengro brawlepen lenn jon an kau djipen! Tu kreh lengro per pherdo ko koowa, hoi tu lenge deh. Ninna lengre tchawe wenn tchalo, un mukenn pral pengre tchawenge.

Jesaja 10:15

O baro Dewel penell: “Nai sharell pes i tower pral koleste kai leha dell? Na-a! Witar gar hadell pes i tchinepaskri, hoi kasht tchinell, pral koleste, kai leha tchinell. Kowa wals jaake, har te dals o kasht koles, kai les pre hadas, un jaake har te hadals ko kotar kasht o murshes.”

Jesaja 10:25

An i tikno tsiro rissrau miri choli tumendar krik, un miri choli perell ap i menshende an o them Assur un anell lenge o merepen.

Jesaja 13:5

Dran dur themma wenn le koi, i palstuni rigjatar i phubjatar. O baro Dewel well kolentsa, kai leskri choli pral o tselo them anenna, te krenn le halauter paash.

Jesaja 14:24

O baro Dewel, o rai pral o bolepen un i phub, penas un das pes sowel: Jaake har me les mange glan lom, jaake krau les ninna. Un jaake har an miro dji hi te krap, jaake well ninna.

Jesaja 14:25

Me dau i Assirjen an miro them, ap mire berge stakrau len khetne, te nai rikrenn le buder gar mire menshen tele, un krenn lenge buder gar i pharo djipen.

Jesaja 23:13

Kolla, kai kowa tumentsa kran, hi gar i menshe dran Assur, na-a, kolla hi i menshe dran Babilonia. Jon kran, te was tiro foro i mulo foro, kai diwje vieche djiwenna. Bare dromma kran le, hoi djan pral ap i foreskre massurja, te nai wenn le an o foro dren, un phagan i shukar khera tele. O forestar atchas kek bar ap i wawar.

Jesaja 26:20

Tumer, mire menshe, djan an tumare khera! Pandenn i wudja pal tumende! Khatrenn tumen i tikno tsiro, bis te i choli trujel hi.

Jesaja 29:2

Me anau jaake bud traash ap o foro Arijel, te denn tumer bari gole, un denn i wasta khetne pral o shero. Un palle well o foro i tchatcho chatchepaskro bob mange.

Jesaja 30:27

Dikenn, o baro Dewel wella fun dural. Leskri choli hi baro, un i pesso jagakro ducho well dran leskro nak. Pherdi choli hi leskro rakepen. un leskri tchip hi har i jag hoi lauter pre chatchrell.

Jesaja 30:30

Palle mukell o baro Dewel peskri bari soreli gole te shunell, un i menshe dikenna, har leskri mussi tele dell an i choli. Kote hi jag, hoi trul peste chal, un baro sorelo brishin, un i sorelo phurdepen un brishineskre barra.

Jesaja 30:9

Kal menshe peran mandar tele. Har tchawe hi le, kai rakrenn chochepen, un kamenn gar mire laba te shunell.

Jesaja 34:2

O baro Debles hi i bari choli ap i tsele themma lengre bud lurdentsa. Un job kras pash peste win, te hunte merenn le, un das len an i wasta kolendar, kai marenn len.

Jesaja 66:14

Tumer dikenn kowa, un tumare djia giwenna. Un tumer lenn newi soor, jaake har o senlepen, te dell brishin. Un i menshe dikenn, te hi o baro Debleskri soor pash peskre budepangre, un leskri choli ap kolende, kai shunenn gar ap leste.

Jesaja 7:17

Un pral tute un tire menshende un i menshende an tiro them anell o baro Dewel sawe diwessa, har jon gar wan, jaake rah har dran o them Israel dui themma wan: o Israel un o Juda. Kol diwessa wenna o baro rajeha pral o them Assur.”

Jesaja 7:20

An ko tsiro bitchrell o Dewel o baro rajes dran o them Assur. I wawar rigjatar o panjestar Eufrat kharell lo les kai, te well lo har i tchuri, hoi tchinell tumare balla tele ap o shero un ap i herja. Un ninna i tchora tchinell lo tele.

Jesaja 8:4

Glan te nai dell o ternepen gole ‘tata’ un ‘mama’, mukell o baro rai pral Assur o tselo brawlepen dran Damaskus un o tselo kutch koowa dran Samaria krik hidjrell.”

Jesaja 8:7

Doleske mukell o Dewel o baro rajes dran Assur pral lende te well. Leskre bud sorele lurde wenna har o baro sorelo pani o panjestar Eufrat, hoi djal diwjes pral peskre rigja un tchakrell i phub koi trujel.

Ezekiel 22:31

Doleske tchorau miri choli win pral lende. Miri tati choli well pral lende har i jag, un jon merenn. Jaake anau lengro tchilatchepen pale ap lengro shero. Kowa penell o baro Dewel, maro rai.

Ezekiel 7:10

Dikenn ko diwes! Dikenn, hoi wella! I bibacht hi glan o wudar. O tchilatchepen was bud un budeder. Un o pre-phurdepen hi baro.

Daniel 11:36

Un ko baro rai krell, hoi job kamell. Job hadell pes un patsell, te hi lo bareder har hako dewel. Ninna pral o pralstuno Debleste rakrell lo sawo koowa, hoi nai rakrell kek win. Un kowa krell lo jek tsireske, un djal leske mishto, bis te well o Debleskri choli pral leste. Palle krell o Dewel, hoi las lo pes glan.

Nahum 1:1

Kawa hi ko liil, kai tchinlo hi, hoi rakras o baro Dewel pral o foro Ninive. Job sikras kowa peskro rakepaskreste, o Nahum. Kowa was dran ko gab Elkosh.

Habakuk 1:12

[Me penom:] Tu, miro baro Dewel, hal kokres o tchatcho Dewel, un hal hako tsireske koi! Muk men gar te merell! Baro Dewel, pash tute khatrah men, tu dal len gole, te denn le menge i phagi, awa, tu bitchral len, te denn le men dawa.

Zefanja 2:13

Un o baro Dewel hadell peskro wast ap koi rig, kai norden hi, te krell lo o them Assur paash. Un o forestar Ninive atchell tchi har paash-dine khera. O foro well har i mulo them, kai buder kek menshe djiwenna.

4. Mose 24:24

Un shiffe wenna dran o them Kittim un anenn lurden, kai perenn an i themma Assur un Eber. Pal halauter djal ninna Kittim paash.”