Jesaja 10:20 - O Debleskro Drom 2021 (Sinte)

²⁰ I tsiro wella, kai atchan buder gar bud menshe pral an Israel. Kolla, kai hi gomme djido o Jakobeskre tchawendar, rikrenn pen palle buder gar ap kolende, hoi len dawa dan. Na-a, kolla rikrenn pen palle ap o baro Debleste, kai o Israeleskro Dewel hi, un mukenn lestar gar buder tele.

O Debleskro Lab 2024 (Sinte-Manouche)

²⁰ I tsiro vella, kay ačan bouder gar boud menshe pral an Israel. Kolla, kay hi gomme djido o Yakobeskre čavendar, rikrenn pen palle bouder gar ap kolende, hoy len dava dan. Na-a, kolla rikrenn pen palle ap o baro Debleste, kay o Israeleskro Devel hi, oun moukenn lestar gar bouder tele.

Jesaja 10:20 ပူးပေါင်းရင်းမြစ်များ

2. Rajengro liil 16:7

Un o Ahas bitchras peskre bitchepangre pash o Tiglat-Pileser, ko baro rajeste pral o them Assur, un mukas leske te penell: “Me hom tiro budepaskro un tiro tchawo. Ab pre un le man kate win dran i wasta kol bare rajendar pral i themma Syria un Israel. Kolla djan ap mande pre!”

2. Rajengro liil 19:31

Awa, dran o foro Jerusalem wenna pale menshe, kai kolendar wenna, kai djido atchan. Un ap i berga Zion djiwenn kolla, kai win lino wan dran o merepen. Job, o baro Dewel, ko rai pral o bolepen un i phub, hi, kai kowa krell.

2. Familjakro liil 14:11

Un o baro Dewel das i Kusharja glan o Asa un i menshende dran Juda jaake, kai jon nashan penge an i daar.

2. Familjakro liil 28:16

An ko tsiro peran i Edomarja pale an o them Juda dren, kuran pen i menshentsa koi un lan bud lendar pandles pentsa krik. Jaake bitchras o baro rai Ahas murshen pash o baro rajeste an o them Assur, te well job leske ap i rig.

2. Familjakro liil 28:20

Palle was o baro rai pral o them Assur – leskro lab his Tiglat-Pileser – job was gar o Ahaseske ap i rig – na-a, job kras leske o djipen phares.

Esra 9:14

Har nai was kowa jaake, te kras kowa kanna pale, te shunas gar ap tire laba, un te las menge romjen kol wawar menshendar, kai sawo djungelo koowa krenn? Hunte well tiri choli gar jaake pral mende, bis te atchell kek mendar ap o djipen? Bis te kek menshe mendar buder koi hi, kai pral atchan un nai djiwenn dureder?

Jesaja 1:9

Te mukals o baro Dewel, ko rai pral o bolepen un i phub, gar mendar pral, djals menge har i forjenge Sodom un Gomorra.

Jesaja 11:11

Un ap ko diwes hadell o Dewel peskro wast i duito kopo, te ginell lo kolen win, kai peskre menshendar pral atchan an i themma Assur un Egiptia, Patros, Kush, Elam, Shinar, Hamat, un an kol panjeskre themma.

Jesaja 11:16

Un palle dell i drom dran o them Assur win kolenge, kai leskre menshendar Israel kote djides atchan, jaake har i drom das peskre menshenge ap ko diwes, har djan jon dran o them Egiptia win.

Jesaja 37:4

O baro rai pral o them Assur bitchras peskro pralstunes, te praassell lo o djido Debles. Har kamoms, te shunell o baro Dewel, tiro Dewel, kol tsele laba, hoi ko mursh penas, un dell les i phagi! Mange o Deblestar kol menshenge, kai pral atchan leskre menshendar, te rikrell lo peskro wast pral lende!”

Jesaja 46:3

Tumer dran o kheer Jakob, tumer, kai pral atchan dran o kheer Israel, shunenn ap mande, tumer, kolen rikrom jaake rah har ap i phub han. Awa, jaake rah har boldo wan, hidjrom tumen.

Jesaja 50:10

Kowa tumendar, kai krell, hoi o baro Dewel kamell, un shunell ap leskro budepaskro, kowa nai djinell: Ninna te djiwell lo an i kali rat un dikell kek momeli glan peste, hi lo an o baro Debleskro wast. Un kowa krell leske halauter mishto.

Jesaja 6:13

Ninna te atchell o deshto kotar gomme koi, djal lenge har i tikne kashta, kai wenn dran i tele-dino ruk. I jag chatchrell len pre. Ko telstuno kotar o rukestar atchell. Un dran leste well newo djipen, hoi hi o Debleske koi.

Jeremia 3:23

Tchatchepah, har dam gole pal kol deblende ap kol berge, wan le gar ap mari rig. Kokres tu, maro baro Dewel, nai leh men tchatchepah win dran mari bibacht.

Jeremia 44:14

Kek kolendar, kai pral atchan an o them Juda, un kate an o them Egiptia wan, te djiwenn le kate, nai nashell krik un atchell djido. Jon wenn buder gar pale an o them Juda, ninna te kamans le pale pale te djal, un kote te djiwell. Kokres i wast pherdo lendar nai nashell peske un nai well kote pale.

Hosea 14:3

Lenn kal laba tumentsa, un awenn pale pash o baro Debleste, un penenn leske: Le mari tseli doosh mendar krik, un shun maro mangepen! Palle kamah tut te sharell mare tchipjentsa.

Hosea 5:13

Har dikas o Efrajim peskro nasslepen un o Juda peskro dukepen, djas o Efrajim an o them Assur, un putchas kote o baro rajestar, te well lo leske ap i rig. Kowa nai well tumenge gar ap i rig, witar gar nai krell lo tumaro dukepen sasto.

Micha 5:3

Un job, ko newo rai, dell garda ap lende, har i bakrengro garda dell ap peskre bakren. Leskro Dewel bitchras les, un leskri soor well lestar, o baro Deblestar. An ko tsiro djal leskro railepen un leskri soor jaake dur har i phub hi. Un i menshe an leskro them nai djiwenn kek darjah.

Zefanja 3:13

Un kol pral-mukle menshe an o them Israel krenn kek tchilatchepen, un chochenn gar, un rakrenn gar dui tchipjentsa. Lenge djal mishto, un jon djiwenn kote kek darjah.