Jesaja 1:4 - O Debleskro Drom 2021 (Sinte)

⁴ Tumenge djal djungelo, tumer tchilatche menshe, kai anan jaake bud doosh ap tumende! Tumer han bede, tchawe, kai molenn tchi! Tumer mukan o baro Debles, kamenn tchi buder te djinell o Israeleskro Deblestar, kai kokres o Dewel hi, un sikran leske tumaro dumo.

O Debleskro Lab 2024 (Sinte-Manouche)

⁴ T'menge djal djoungelo, t'mer čilače menshe, kay anan yaake boud doosh ap t'mende! T'mer han bede, čave, kay molenn či! T'mer moukan o baro Debles, kamenn či bouder te djinell o Israeleskro Deblestar, kay kokres o Devel hi, oun sikran leske t'maro doumo.

Jesaja 1:4 ပူးပေါင်းရင်းမြစ်များ

1. Mose 13:13

Kol menshe an Sodom his tchilatcho un djiwan an baro tchilatchepen glan o baro Debleste.

2. Rajengro liil 21:22

Un job mukas o baro Debles, ko Debles, koles leskre phure an-mangan, un djas gar ap o baro Debleskro drom.

2. Familjakro liil 12:1

Har his o Rehabeam soreles ap peskri rajeskri beshepaskri beshdo, un i sorelo baro rai his, mukas lo o baro Debleskro drom. Un i tsele Israelitarja kran kowa leske palla.

2. Familjakro liil 27:2

Un job kras, hoi glan o baro Debleste mishto his, jaake har leskro dad, o Usija, les kras. Koi doosh, hoi peskro dad Usija ap peste anas, har djas lo kote an o baro Debleskro kheer dren, kai kokres i rashaja nai djan dren, kai doosh kras o Jotam gar. I menshe an Juda atchan ap pengro tchilatcho drom.

Nehemia 1:7

Tchilatcho koowa kram ap tute, har shunam gar ap tire laba, hoi tu penal ap o Mose, koles tiro wast his. Un kram gar, hoi tu mendar kamal un djiwam gar pal tiro tchatchepen.

Debleskri gili 58:3

Na-a, kowa krenn tumer gar. Tumer kamenn o tchilatchepen te krell. Tumare wastentsa krenn djungelo koowa.

Debleskri gili 71:22

Jaake kamau me man pash tute te parkrell o bashepah ap i dorjengri bashepaskri, kai rikral tu tiro lab, miro Dewel. O bashepah ap i harfa kamau tuke gilja te giwell. Tu kokres hal o tchatcho Dewel, ko Dewel pral o Israel.

Debleskri gili 78:40

Bud kope hadan le pen ap leste an o mulo tato them, un dukran leskro dji.

Debleskri gili 78:41

Pale te pale kaman le te dikell, hoi job haiwella. Jaake dan le leske an o dji, koleske, kai kokres o tchatcho Dewel hi, o Dewel pral o Israel.

Debleskri gili 78:57

Jon peran lestar tele. Un jaake har lengre phure menshe kran, kran jon ninna, un kaman o Deblestar buder tchi te djinell. Tchi-moldo his le har i bogo, koleskri dori buder gar sorelo hi.

Debleskri gili 78:8

jaake te wenn le gar har pengre phure, kai o Debleskro dromestar tele peran, un kaman gar te shunell. Kolengre djia his gar sorelo, un jon his gar pengro tselo djijeha pash o Debleste.

Debleskri gili 89:18

Tu kokres hal lengro railepen un lengri soor, un dran tiro latchepen nai hadah mare sherja.

2. Mose 32:7

O baro Dewel rakras ap o Mose: “Naash, dja tele, tire menshe, kai tu dran o them Egiptia win anal, kran djungelo koowa.

Jesaja 1:23

Tire pralstune hadan pen pral mande un djan khetne i tchorepangre. Un hakeno lendar mukell pes te ginell. Un kol tchawe, kolen kek dai un kek dad hi, kolenge krenn le kek tchatchepen win. Un ko koowa kol djuwjendar, kolengro rom meras, mukenn le gar glan pende te well.

Jesaja 1:28

Khetne phagedo wenn kolla, kai o Debleskro dromestar tele djan, khetne kolentsa, kai doosh ap pende anan. Un kolla, kai o baro Debles mukan, hunte merenn.

Jesaja 10:6

Me bitchrom len pash kol menshende, kai kamenn mandar tchi te djinell, un ap kolende chojedo hom, te djan le ap lende pre, un randenn len win un tchorenn len win, un stakrenn len khetne har i tchik ap o drom.

Jesaja 12:6

Giwenn un denn gole i bachtjatar, tumer, kai djiwenn an o foro Zion. O Israeleskro Dewel hi bares mashkral tumende.

Jesaja 14:20

Tu kral tiro them paash, un maral i menshen an tiro them. Doleske weh tu gar paskedo har kol wawar raja, kai an barrengre khera paskedo wan. Un tiri tchilatchi familja well bistedo hako tsireske.

Jesaja 29:19

Un o baro Dewel krell kolen pale bachtelo, kai wan tele rikedo. Un i tchorwele giwenn i bachtjatar pral o Israeleskro Debleste.

Jesaja 3:8

O foro Jerusalem peras, un o them Juda hi koi tchiddo. Hoske? Jon dukran o baro Debles pengre labentsa, un ninna koleha, hoi le kran. Kowa, hoi o sorelo Dewel lenge penas, kaman le gar te krell.

Jesaja 30:1

O baro Dewel penell: Djungeles djal mire tchawenge, kai mandar tele peran, un kai penge kowa glan lan, te krenn le hoi gar mandar win djas. Jon tchiwenn pen wawarentsa khetne, har me kowa gar kamau. Un jaake anenn pale te pale le doosh ap pende.

Jesaja 30:15

Doleske penell o baro Dewel, maro rai – job, kai kokres o Israeleskro Dewel hi: Te mukenn tumaro drom, wenn pash mande, un dikenn ap kowa, hoi me tumenge krau, palle wenn win lino dran o kurepen. Te rikrenn tumen pale, un rikrenn tumen ap mande, palle wenn sorelo. Kowa kamenn tumer gar te krell.

Jesaja 30:9

Kal menshe peran mandar tele. Har tchawe hi le, kai rakrenn chochepen, un kamenn gar mire laba te shunell.

Jesaja 31:2

Ninna job hi gosewo un djinell hoi lo krell. Job bitchrell i bibacht, un lell gar peskre laba pale, kolentsa job len trad das. I tchilatchen dell lo i phagi un ninna kolen, kai lenge ap i rig wan.

Jesaja 37:23

Koon hi kowa, pral koleste tchilatche laba rakral? Un kones tire labentsa praassal? I pre-phurdo hal, un ap mande tele dikal, pral o Israeleskro Debleste tut hadal!

Jesaja 41:14

Ma dare, tu kirmo Jakob, tu djuw Israel! Me, rikrau pash tute, me, o baro Dewel. Kowa, kai ginas tut win dran o wawareskro wast, hom me, o Israeleskro tchatcho Dewel.

Jesaja 41:16

Tu witsreh len pre, un i ducho hidjrell len krik, un i phurdepen phurdell len kate te kote. Palle weh bachtelo pral tiro baro Debleste, un shareh tut tiro Debleha, kai o Israeleskro tchatcho Dewel hi.

Jesaja 41:20

Kowa well jaake, te dikenn i menshe un haiwenn, un dikenn dren un djinenn: Dran i soor o baro Deblestar was kowa jaake. Awa, o Israeleskro tchatcho Dewel kras kawa halauter.

Jesaja 5:19

un penenn: Mu well kowa sik, hoi o baro Dewel kamell te krell, te dikas kowa! Mu well tchatcho, hoi o Israeleskro latcho Dewel peske glan las, te prindjras kowa!

Jesaja 5:24

Doleske merenn le tele har o senlepen, koleskre draba nasselo hi, un koleskri bluma tele perell, un har o khass, pral koleste i jag djal un les pre chatchrell. Jon kaman gar te djal o drom o baro Deblestar, kai hi o rai pral o bolepen un i phub. Un i labendar lengro latcho Deblestar kaman le tchi te djinell.

Jesaja 57:17

Lengri doosh his, te lan le gar doha. Pral kowa wom chojedo, un koleske dom me len, khatrom man glan lende un choirom man. Un jon djan dureder ap pengro drom un wan gar pale pash mande.

Jesaja 58:2

Jon wenn hako diwes, har te rodans le man, un penenn, te kamans le mire dromma te djinell, har te wans le menshe, kai o tchatchepen krenn, un pengro Debles gar mukan. Un jon kamenn, te krap me o tchatchepen lenge win, un te wap pash lende.

Jesaja 65:11

Tumenge, kai o baro Debles mukan, well wawartchandes: Tumer bistran miri berga, kai wau an-mangedo, un tchiwan o chocheno debleske, o Gad, chapen glan. Un glan o chocheno debleste, o Meni, tchoran mool win.

Jesaja 65:3

Kol menshe mukenn gar tele, te krenn le kowa, hoi man choirell: Jon anenn viechen i wawar deblenge ap lengre shukar platse, un chatchrenn lenge sungepaskro koowa ap barra.

Jesaja 9:17

O menshengro tchilatchepen hi har i jag, hoi chal trul peste, un chatchrell subjengre burra un subjengro senlepen, un ninna o tselo weesh. Un pesso kalo jagakro ducho djal kote pre.

Jeremia 15:6

Tu djal mandar krik, penell o baro Dewel, un kamal mandar tchi buder djinell. Doleske hadom me miro wast ap tute, te marap tut. Me hom khino, te krap miro dji tuke pre.

Jeremia 2:13

Mire menshe kran tchomone, hoi dui kope tchilatcho hi: Man, ko djido pani mukan jon, un hadan penge panjeskre chebja win, kai paash hi, un nai rikrenn kek pani.

Jeremia 2:17

Kowa lauter hi tiri doosh! Bud kope kamas o baro Dewel, tiro rai, tut ap o tchatcho drom te anell. Un tu mukal les!

Jeremia 2:19

Dran tiro tchilatchepen well kowa ap tute. Tu shunal gar. Doleske leh tu sawi phagi. Tu hunte djiness un haiwess, hawo pharo koowa un duka ap koleste wenna, kai djal peskro baro Deblestar krik, un kamell lestar buder tchi te djinell. Kowa penell o baro Dewel, ko rai pral o bolepen un i phub.

Jeremia 2:31

O baro Dewel penell: Tumer tchilatche menshe! Denn garda ap kowa, hoi me tumenge penau! Hom me i Israelenge i mulo them, i them, kai kek pani hi? Hoske penenn mire menshe: ‘Mer nai djah, kai kamah, un hunte nashas tuke gar buder gar pal.’

Jeremia 2:33

Har sik hatseh tu i drom, te less tuke i wawar pirnes! Un jaake djas tu pale te pale ap tchilatche dromma.

Jeremia 2:5

Kowa penell o baro Dewel: Hawo djungelo koowa hatsan tumare phure ap mande, kai djan jon mandar krik, un mangan figuren an, kai kek dewel hi. Un jaake djan le tele.

Jeremia 32:32

Kowa hunte krap dran ko tselo tchilatchepen, hoi i menshe dran Israel un Juda kran, te choirenn le man. Jon, lengre bare raja, pralstune, rashaja un rakepangre, ninna kolla, kai djiwenn an o foro Jerusalem,

Jeremia 50:29

Kharenn kolen khetne, kai haiwenn pengre bogentsa karje te dell! Jon halauter hunte tchiwenn pen pre trul o foro Babilon, un mukenn kekes te nashell peske krik un djiwell! O foro Babilon phurdas pes pre un hadas pes pral mande, o baro Debleste, kai o Israeleskro tchatcho Dewel hi. Doleske denn o foreske o tchilatchepen pale pale, hoi lo kras! Jaake har job ap i wawarende kras, jaake krenn leske ninna!

Jeremia 51:5

I Babilonarja kran baro tchilatchepen ap o Israeleskro Debleste. O Israel un o Juda wan gar muklo pengro Deblestar, ko baro Deblestar, kai hi o rai pral o bolepen un i phub.

Jeremia 7:19

Mange krenn jon koweha kek duka, penell o baro Dewel. Ap pende kokres anenn le ladj.

Jeremia 7:26

Tumer shunan gar ap mande, un dan kek garda ap mire laba. Tumer djan pal tumaro shero, un kran budeder tchilatchepen har tumare phure.

Ezekiel 14:5

Jaake krau, te krenn i Israelitarja pengre djia pale mange pre, jon, kai mukan miro drom un mangenn wawar deblen an.

Ezekiel 16:33

Haki wawar lubjat well lowe dino. Tu dal gomme kolen, kai tut lan, tchomone. Un ginal len, te wenn le pash tute dran kol themma, kai le hi, un sowenn tuha.

Ezekiel 16:45

Tu hal i tchai tiri datar, koja peskro romeske un peskre tchawenge o dumo sikras. Un tu hal i pheen tiri phenjatar, kai peskro romeske un peskre tchawenge o dumo sikras. Tumari dai his i menshendar Het un tumaro dad his i Amorari.

Daniel 9:11

Un o tselo Israel djas tiro dromestar tele, un kras, hoi job kamas, un shunas gar ap tute. Un jaake was koi tseli bibacht pral mende, hoi tchinlo hi an o liil o Mosestar, koles tiro tchatcho wast his. Mer kram tchilatchepen ap tute. Doleske was kai bibacht jaake pral mende, har tu tut sowel dal.

Zefanja 1:6

Marau ninna kolen, kai perenn mandar tele, un kolen, kai putchenn gar pal mande, un kamenn tchi mandar te djinell.

4. Mose 32:14

Un kanna krenn tumer ko emligo koowa! Tumer han tchatche tchawe tumare dadendar! Mursha, kai o Debleskro drom tele djan un krenn, te well o baro Debleskri choli pral Israel bareder.

Mateo 11:28

Tumer marenna tumen tele, te krenn kowa, hoi tumare phure ap tumende penan. Awenn pash mande! Me lau ko pharo koowa tumendar, te lenn tumer pale newi soor.

Mateo 23:33

Tumer han sapa. Awa, tchilatche sapa han tumer. O Dewel witsrell tumen an o bengeskri jag. Un tumer nashte nashenn gar glan koleste krik.

Mateo 3:7

Ninna bud Farisarja un Sadduzarja wan pash leste, te mukenn le pen lestar te taufrell. Har job kolen dikas, penas lo ap lende: “Tumer tchilatche sapa! Tumer nai nashenn gar krik glan o Debleskri choli, hoi wella pral i menshende.

Remarja 8:7

Koon kamell jaake te djiwell, har job kamella, kowa kamell gar o Debles. Job shunell gar ap kowa, hoi o Dewel penella. Job nai krell les witar gar.

1. Korintarja 10:22

Ma choirenn o Debles! Mer ham gar sorleder har job.

5. Mose 29:25

Un jon mangan wawar deblen an, un witsran pen glan lende tele, sawe deblen, kolen jon gar prindjran un kolendar job lenge gar penas, te mangenn le len an.

5. Mose 31:16

O baro Dewel penas ap o Mose: “Sik well o diwes, kai mereh. Un pal tiro merepen mukenn i Israelitarja miro drom, un nashenn kol deblenge palla ko themestar, an koleste wenna. Un jon djan penge mandar, un krenn buder gar, hoi lentsa win krom.

5. Mose 32:19

O baro Dewel dikas kowa, un was chojedo pral peskre tchawende un tchende, kai kaman tchi buder lestar te djinell.

5. Mose 32:5

Tumer mukan leskro drom, un han buder gar moldo te kharenn ‘leskre tchawe’. Pherdo tchilatchepen un chochepen han tumer.

Kolossarja 1:24

Un kanna hom bachtelo an kol duka, hoi anom tumenge ap mande. Jaake har o Jesus Kristo anas duka ap peste i patslenge, jaake hunte anap me ninna duka ap mande i patslenge.

Debleskro tsiro 18:5

Ko foro hi har i djuwel, hoi wi-ladjedo koowa kras. Lakri doosh hi jaake baro, te djal koi doosh an o bolepen pre. Un o Dewel bistras ko tchilatcho koowa gar, hoi joi kras.

Čačepangre 10:10

Un kote dan i Israelitarja ap o baro Debleste gole un penan: “Mer kram tchilatchepen ap tute, te mukam tut, maro Debles, un mangam o debles Baal an.”