Jesaja 1:11 - O Debleskro Drom 2021 (Sinte)

¹¹ “Hoi krap me kol tsele viechentsa, hoi tumer mange anenn”, putchell o baro Dewel. “Man hi doha tumare bakrendar, hoi mange chatchran, hom tchalo ko thulepastar i pesse grumjendar. Ko rat i murshkane grumjendar un tikne bakrendar un busjendar kamau me gar.

O Debleskro Lab 2024 (Sinte-Manouche)

¹¹ “Hoy krap me kol tsele firhentsa, hoy t'mer mange anenn”, poučell o baro Devel. “Man hi doha t'mare bakrendar, hoy mange rhačran, hom čalo ko thulepastar i pesse groumyendar. Ko rat i morshkane groumyendar oun tikne bakrendar oun bouzyendar kamau me gar.

Jesaja 1:11 ပူးပေါင်းရင်းမြစ်များ

Debleskri gili 40:6

Miro baro Dewel, har bud hi ko baro koowa, hoi tu ap mende kral, hoi kek wawar nai krals, har tu kokres. Te kamoms pral kowa lauter te rakrell, nai kroms kowa gar, jaake bud hi kowa.

Debleskri gili 50:8

Tchingrau gar, te anals tu mange kek viechen. Kol viechen, hoi tu mange chatchral, hi hako diwes glan mire jaka.

Debleskri gili 51:16

Me anom rat ap mande, ma de man mulo, miro Dewel! Tu hal o Dewel, kai lell man win dran o merepen. Un me kamau tiro tchatchepen te sharell.

Gosewe laba 15:8

O baro Dewel dikell chojedes ap kowa, hoi o tchilatcho leske anell. Te mangenn les kolla an, kai an o tchatchepen tardo hi, dikell lo latches ap lengro mangepen.

Gosewe laba 21:27

Kowa, hoi anenn i tchilatche o baro Debleske, hi djungeles glan leskre jaka. Har bud budeder, te krenn le kowa dran i tchilatcho dji.

Gosewe laba 21:3

Te djah o tchatcho drom un djiweh pal o Debleskro tchatchepen, hi kowa o baro Debleske budeder moldo har te anals leske viechen.

Jesaja 58:2

Jon wenn hako diwes, har te rodans le man, un penenn, te kamans le mire dromma te djinell, har te wans le menshe, kai o tchatchepen krenn, un pengro Debles gar mukan. Un jon kamenn, te krap me o tchatchepen lenge win, un te wap pash lende.

Jesaja 66:3

Kowa, kai mange i gurum marell, marell ninna i menshes i chocheno debleske. Kowa, kai mange i terno bakro temerl dell, marell ninna i djukles i chocheno debleske. Kowa, kai mange chapen glan anell, anell ninna balengro rat i chocheno debleske. Kowa, kai mange sungepaskro koowa chatchrell, parkrell pes ninna pash i chocheno debleste. Jon djan pengre dromma jaake har jon les kamenna. Un shukar hi an lengre jaka, hoi an mire jaka djungeles hi.

Jeremia 6:20

Me putchau tchi pal o sungepaskro koowa dran o them Saba, un pal ko gudlo sungepaskro djet, hoi well dran i dur them. Kol vieche, hoi tumer mange chatchrenna, kamau me gar. Un ap kol vieche, hoi tumer mange marenna, dikau gar latches.

Jeremia 7:21

Kowa penell o baro Dewel, ko rai pral o bolepen un i phub, kai hi o Israeleskro Dewel: Hoske chatchrenn tumer viechen mange? Tchiwenn len pash kol wawarende, hoi chan tumer khetne glan mande! Chan ko tselo mass!

Hosea 6:6

Dikenn, hoi kamau: Kamau, te rikrenn tumer i latcho djijeha ap mande, un kamau gar, te anenn mange viechen. Kamau te prindjrenn man tchatchepah, un kamau gar, te chatchrenn mange viechen.

Hosea 8:13

Jon anenn mange viechen, un chan pen tchalo ap ko mass. Me, o baro Dewel, dikau gar latches koi pre. Lengri doosh bistrau me gar, un lengro tchilatchepen well pral lende: Jon hunte djan pale an o them Egiptia pale.

Amos 4:5

Anenn shutlo maro o Debleske, te parkrenn pen pash leste! Denn win gole, te anenn i menshe pendar tchomone o Debleske! Un palle denn win gole, hoi hakeno anas. Sawo koowa kamenn tumer jaake, tumer Israelitarja! Kowa penell o baro Dewel, maro rai.

Amos 5:21

O baro Dewel penell: Chojedo hom me pral kol bare diwessa, kai wenn tumer khetne. Mange hi le i tchadepen.

Amos 5:22

Ninna te chatchrenn tumer mange viechen un chapen, hom gar bachtelo pral kowa. Kol thulle viechen, hoi mange marenn un glan mande chan, nai dikau buder gar glan i jaka.

Micha 6:7

Hi o baro Dewel bachtelo pral bud serja bakre, un deesh serja khore djet? Hunte dap leske miro phureder tchawes, te well miri doosh krik lino un ko tchilatcho koowa, hoi krom?

Haggai 2:14

Koi penas o Haggai: Jaake hi ninna kal menshentsa an kau them. An mire jaka hi le pale-tchidde. Un lauter, hoi krenn le pengre wastentsa, hi pale-tchiddo, ninna ko koowa, hoi le mange anenn.

Zakarie 7:5

“Pen i tsele menshenge an o them un kol rashajenge: Har chan tumer tchi un dan gole ropah an o pantchto tchon un an o eftato tchon an kal efta-deesh bersha, kran tumer kowa mange? Na-a!

Maleachi 1:10

‘Kamaus, te wals jek tumendar koi, kai krals o wudja an miro kheer pandles, te krenn tumer gar tchitcheske i jag ap miri chatchepaskri! Man hi doha tumendar’, penell o baro Dewel, ko rai pral o bolepen un i phub. ‘Un kol marede vieche, hoi mange anenn, hi mange gar mishto.’

Mateo 22:4

Un pale bitchras lo wawar budepangren pash kolende, te penenn le ap lende: Shunenn, me krom i chapen tumenge, un marom thulle grumja. Un wawar latcho chapen un pipen hi lauter koi. Awenn ap i bijab!

Mateo 9:13

Kowa hunte djinenn tumer: O Dewel penas: Me kamau gar, te marenn mange viechen. Na-a! Me kamau, te hi tumen i baro dji i wawarenge. Me wom gar, te dap kolen pash mande gole, kai djan ap o tchatcho drom. Na-a! Me wom, te dap kolen pash mande gole, kai hi ap o tchilatcho drom.”

1. Samuel 15:22

O Samuel penas: “Hoi patseh, hi shukar o baro Debleske: Vieche, hoi leske maredo wenn, sawe hoi leske tseles chatchedo wenn un sawe, kolengre feteder kotja mass leske chatchedo wenn? Kamell lo gar budeder, te shunell jek ap kowa, hoi lo penell? Djin, te shuneh tu ap o baro Debleste, hi kowa leske feteder, har te deh les viechen. Te shuneh tu mishto ap leste, hi kowa feteder, har te deh les thulle kotja i bakrestar.