Jeremia 7:14 - O Debleskro Drom 2021 (Sinte)

¹⁴ Doleske krau me kau khereha, har me ko foreha Shilo krom, ninna te was kau kheer mange kerdo, un tumer patsenn, kote nai djal tumenge tchi. Me krau koi platsa paash, hoi dom tumen un tumare phuren.

O Debleskro Lab 2024 (Sinte-Manouche)

¹⁴ Doleske krau me kava khereha, har me ko foreha Shilo krom, ninna te vas kava kheer mange kerdo, oun t'mer patsenn, kote nay djal t'menge či. Me krau koy platsa paash, hoy dom t'men oun t'mare phouren.

Jeremia 7:14 ပူးပေါင်းရင်းမြစ်များ

2. Rajengro liil 25:9

Un job chatchras o baro Debleskro kheer tele, ninna ko kheer o baro rajestar un kol wawar khera an o foro Jerusalem; awa, hako baro kheer chatchras lo tele.

2. Familjakro liil 7:21

Un hakeno kai djal kate, un dikell, hoi pral atchas kau kherestar, hoi kanna jaake baro un railo hi, koleske atchell o rakepen krik i trashatar, un job penell: “Hoske kras o baro Dewel sawo koowa kau themeha un kau khereha?”

Debleskri gili 78:60

Un job mukas peskro kheer an o foro Shilo, kote, kai job mank peskre menshende djiwas.

Jesaja 64:11

Baro Dewel, kameh tut pash kawa lauter kanna gomme pale rikrell? Kameh tu tchi penell, un mari ladj gomme dureder un bareder te krell?

Jeremia 12:7

Me mukom mire menshen, ko kheer Israel. Kolen, kai mange win rodom, tradom mandar krik. Kol menshen, kai o djijestar kamau, dom an i wasta kolendar, kai kamenn len te marell.

Jeremia 23:39

palle djinenn, me hadau tumen pre har i pharo koowa, un witsrau tumen krik mandar, tumen un tumaro foro, hoi dom tumende un tumare phurende.

Jeremia 26:18

“Har o Hiskija o baro rai pral Juda his, penas o Debleskro rakepaskro, o Micha dran o foro Moreshet, ap i tsele menshende an Juda: Kowa penell o baro Dewel, ko rai pral o bolepen un i phub: I diwes well, kai well o foro Zion jaake trujel witsedo har i hachetikri phub, te well o pralstuni phub tele un i telstuni phub pral. O forestar Jerusalem atchell tchi pral har barra. Un ap koi berga, kai kanna o Debleskro kheer tardo hi, well i diwje burra bares.

Jeremia 26:4

Pen lenge: Kowa hi, hoi o baro Dewel penell: Me bitchrom tumenge mire rakepangre, kai mange budrenn, te penenn le tumenge, hoi te krenn. Bud kope bitchrom len pash tumende. Tumer dan gar jak ap kowa, hoi le penan. Te shunenn tumer gar ap mande un djan gar ap miro drom, hoi tumende sikrom, un denn gar jak ap i laba, hoi mire rakepangre tumenge penenn,

Jeremia 7:10

Un palle wenn tumer glan mande an kau kheer, hoi mange kerdo was, un penenn: ‘Menge nai djal tchi’. Un krenn sawo koowa dureder, hoi choiran man.

Jeremia 7:12

Djan pash ko foro Shilo, kai glan rah tsiro miro kheer tardo his. Un dikenn, hoi me kote krom doleske, kai mire menshe Israel tchilatchepen kran.

Jeremia 7:4

Ma patsenn kol chochene laba, te penenn jon: ‘Kate hi o baro Debleskro kheer, kai djiwell lo. Awa, kate hi o baro Debleskro kheer!’

Ropaskre gilja 2:7

Fun peskro altaro kamell lo buder tchi te djinell. Peskro khereske sikrell lo o dumo. Leskre massurja das lo kolenge an o wast kai maro foro paash kran, un koi pashel i bari gole dan an o baro Debleskro kheer, har an kol bare diwessa, kai kote bud menshe khetne wan.

Ropaskre gilja 4:1

Har was o sonakai jaake kalo, un o latcho sonakai jaake djungelo! Har nai wan i kutch barra trujel tchiddo ap i dromma!

Ezekiel 23:31

Ap o drom tiri phenjatar djal tu, doleske dau tut ko emligo khoro an tiro wast, har late dom, te pijess les win har joi hunte pijas les win.

Ezekiel 24:21

Kawa penell o baro Dewel, maro rai: Djinau, tumenge hi miro kheer o kamleder koowa. Un tumaro dji nashell pal leste. Tumer han pre-phurdo un patsenn, kolenge, kai kote hi, nai djal kek tchilatchepen. Tchatchepah, me dau miro kheer kolenge an o wast, kai krenn les pale-tchiddo. Un tumare mursh tchawe un tcha, kolen tumer kote an Jerusalem pale mukan, kolla wenn o chareha mulo dino.

5. Mose 12:5

Mangenn o baro Debles ap i platsa an, hoi job peske win rodell mashkral an o them Israel, te djiwell lo kote. Kote djan, te mangenn les an.

5. Mose 28:52

Un jon tchiwenn pen trul tumare forja, un mukenn kekes dren un kekes win, bis te kol bare un sorele forjengre massurja tele phagedo hi, kolendar tumer patsan, te well kek wergel. Kowa krenn le tumare tsele forjentsa an tumaro tselo them, hoi tumaro baro Dewel tumen das.