Jeremia 7:13 - O Debleskro Drom 2021 (Sinte)

¹³ Tumer kran ninna lauter sawo koowa, penell o baro Dewel. Un me rakrom pale te pale tumentsa, un tumer kaman gar te shunell. Un me dom tumen gole, un tumer penan koi pre tchi.

O Debleskro Lab 2024 (Sinte-Manouche)

¹³ T'mer kran ninna lauter savo koova, penell o baro Devel. Oun me rakrom pale te pale t'mentsa, oun t'mer kaman gar te shounell. Oun me dom t'men gole, oun t'mer penan koy pre či.

Jeremia 7:13 ပူးပေါင်းရင်းမြစ်များ

Gosewe laba 1:24

Har kharom tumen, kaman gar te shunell. Har hadom miro wast, dan tumer gar jak.

Jesaja 50:2

Hoske wom me, un kek mensho his koi, dom gole, un kek das pes glan? Hi miri mussi gar lengsto doha, te nai lap tumen gar dran o pandepen win? Hi an mande kek soor, te nai lap gar jekes win dran o wawareskro wast? Dikenn, te tchingrau me ap o baro pani, palle well lo truk i darjatar, un lengste panja wenn har o mulo them. I matchen an lende hi buder gar doha pani, un merenn i trushatar un khandenn palle.

Jesaja 65:12

Doleske penau me, tumer wenn mulo dino o chareha, un hunte djan ap i tchanga, te wenn maredo har vieche. Har dom me tumen gole, dan tumen gar glan. Har rakrom tumentsa, shunan gar, un kran, hoi djungeles hi an mire jaka, un rodan tumenge kowa win, hoi gar kamau.

Jesaja 66:4

Doleske hi mange shukar, te anap len an i bibacht. Un anau kowa pral lende, glan leste jon jaake darenna. Me dom ap lende gole, un kek shunas un kek rakras pale. Me dom len trad, un kek das pre jak. Awa, jon kran kowa, hoi an mire jaka tchilatcho hi, un lenge his shukar, te krenn le kowa, hoi an mire jaka djungelo hi.

Jeremia 11:7

Me dom tumare phuren trad ap ko diwes, har anom len dran Egiptia win, bis ap kau diwes, un penom lenge pale te pale: Shunenn ap miro rakepen!

Jeremia 11:8

Jon shunan gar ap mande, un dan gar jak ap mire laba. Hakeno djas pal peskro shero, un kras kowa, hoi leskro midjak dji leske penas. Me penom lenge, te hunte rikrenn le dren, hoi lentsa win krom. Kowa kran le gar. Doleske mukom pral lende koi tseli bibacht te well.

Jeremia 13:10

Kalla tchilatche menshe, kai kamenn mire laba gar shunell, djan pal pengro shero, un djan wawar deblenge pal, anenn lenge viechen, un mangenn len an. Jon hunte wenn har ko pereskro pandepen, hoi buder tchi molella.

Jeremia 13:11

Jaake har i mursh ko pandepen trul peste pandella, jaake pandom me kol tsele menshen dran Israel un kol tsele menshen dran Juda trul mande, te wenn jon mire menshe. Kamom, te wap dran lende sharedo un miro lab bares un prindjedo well; jon kaman gar ap mande shunell, penell o baro Dewel.

Jeremia 25:3

O baro Dewel rakras mantsa biish-te-triin bersha, fun ko deesh-te-triinto bersh, kai o Josia, koleskro dad o Amon his, o baro rai his pral o them Juda, bis kau diwes. Un me penom tumenge leskre laba pale te pale. Un tumer kaman len gar te shunell.

Jeremia 29:19

Kowa well pral lende doleske, kai shunan le gar ap kol laba, hoi mire rakepangre lenge pale te pale penan. Jon kaman gar te shunell, penell o baro Dewel.

Jeremia 32:33

kolla lauter sikran mange pengro dumo un gar lengro mui. Ninna te dom me lenge an hako tsiro sikepangre, kai sikran len miro drom, kaman jon gar te shunell, un mukan gar pengro phuro djipen.

Jeremia 35:14

Kol laba, hoi penas o Jonadab, koleskro dad o Rechab his, peskre menshenge, kai pal leste wenna, rikrenn jon dren bis ap kau diwes, un pijenn kek mool, jaake har lengro dad lenge penas. Me mukom tumenge pale te pale mire laba te penell, un tumer shunenn gar, hoi me penau.

Jeremia 35:15

Me bitchrom tumenge pale te pale mire rakepangre, kai mange budrenn, un mukom tumenge te penell: Djan tele, hakeno peskro tchilatcho dromestar! Mukenn tumaro tchilatcho koowa, un nashenn buder gar mule deblenge palla, te mangenn len an! Palle nai atchenn an kau them, hoi me tumenge un tumare phurenge dom. Tumer dan gar jak ap mire laba un shunan gar ap mande.

Jeremia 35:17

Doleske penell o baro Dewel, ko rai pral o bolepen un i phub, kai o Israeleskro Dewel hi: Me rakrom tumentsa, un tumer kaman gar ap mande te shunell. Me dom tumen gole, un tumer rakran gar mantsa. Doleske anau pral o them Juda un pral i tsele menshende an o foro Jerusalem koi tseli bibacht, doleske me len trad dom.

Jeremia 44:23

Tumer chatchran sungepaskro koowa i bolepaskri rajetsake, un kran, hoi djungeles hi glan o baro Debleskre jaka, un shunan gar ap leste, un djiwan gar pal leskre laba un pal leskro tchatchepen, un kran gar, hoi job tumendar kamas. Doleske was sawi bibacht pral tumende, jaake har kau diwes hi.

Jeremia 44:4

Un me bitchrom lenge pale te pale mire rakepangre, kai mange budran, un mukom lenge te penell: “Ma krenn sau djungelo koowa, kai man sorjah choirenna!”

Jeremia 5:21

Shunenn kai, tumer menshe, kai tumen tchi an o shero hi, kai len jaka hi, un dikenn tchi, kai len kanda hi un shunenn tchi!

Jeremia 6:10

Koneha rakrap me? Koneske penap tutar? Koon shunella koi pre? Lengre kanda hi pandlo. Jon nai shunenn gar, hoi tu lenge kameh te penell, un san pral tire laba, un choirenn pen pral lende.

Jeremia 7:25

Fun ko diwes, har me tumare phuren dran Egiptia anom bis kai diwes, bitchrom pale te pale mire budepangren pash tumende, kol rakepangren, kai mire laba dureder penan.

Hosea 11:2

Un te kharau len kanna, nashenn le mandar krik, un chatchrenn viechen i mule deblenge, un sungepaskro koowa glan i figure.

Hosea 11:7

Mire menshe atchenna krik mandar, un kamenn gar pash mande te well. Ninna te wenn le pash mande, o pralstuneste, hadenn le man gar.

Hosea 9:17

I menshe Efrajim shunan gar ap miro Debleste. Doleske witsrell lo len pestar krik. Jon wenn naashepangre an i wawar themma.

Zakarie 7:13

Un djas jaake: Jon shunan gar, hoi lenge penlo was. Doleske kamom witar gar te shunell, har jon gole dan, penas o baro Dewel, ko rai pral o bolepen un i phub.

Mateo 23:37

Tumer menshe an o foro Jerusalem! Tumer maran o Debleskre rakepangren, un dan kolen i barrentsa mulo, kai o Dewel pash tumende bitchras. Bud kope kamom tumen pash mande te lell, te dap garda ap tumende, har i kachni ap peskre terne garda della, un lell len tel peskre phora. Un tumer kaman gar.